Sises Kamwenge Aramas Tohto

MEHKOT suwed wiawiehr. Sohn Sounpepdais kamakamalahr. Erodias, ahn nanmwahrki pwoudo, kailongki Sohn. Oh e kahreong ah pwoudo en lepuksang mwoange.

Ni ansou me Sises rong met, e pahtoukihla kowahlap. Ih eri kohla wasakis pwen kelehpwla. Ahpw aramas kan idawehnla ih. Ni en Sises kilang pokono, e poakeirailla. Ih eri padahkiong irail duen wehin Koht, oh kakehlailda me soumwahu tohto.

Ni soutik lelehr oh sapwellime tohnpadahk kan kohieila patohan ong: ‘E pwandehr, oh wasaht me sahpwtehn ehu. Kadarwei aramas akan pwe ren kak pwainda kenarail kisin mwenge nan kahnihmw me keren.’

‘Re sohte anahne en kohieila,’ Sises sapeng. ‘Kumwail kihong irail mehkot ren kang.’ Sohpeilahng Pilip, Sises mahsanih: ‘Iawasa kitail kak pwainda mwenge pwen kamwenge aramas pwukat koaros?’

‘E pahn inenen pweilaud en pwainda mwenge me pahn itar ong emen en kang kisin me tikitik,’ Pilip sapeng. Andru eri koasoaia: ‘Pwutaket, me weuwa kenatail mwenge, mie lopwon en pilawa limau oh mwahmw riemen. Ahpw met sohte pahn itar ong aramas pwukat koaros.’

‘Padahkiong aramas kan en mwohndi pohn reh,’ Sises mahsanih. Ih eri wia ah kaping ong Koht ki mwenge ko, oh tapiada pwaltikipesang. Mwuhri, tohnpadahk kan ahpw nehkpesang pilawa oh mwahmw ong aramas kan. Mie ohl 5,000 iangahki lih oh seri kid kid kei. Irail koaros mwengmwenge lao medala. Ni en tohnpadahk kan kihpene me luluhwe, re kadirehla kopwou 12!

Sises eri kahrehla sapwellime tohnpadahk kan ong nan apwoat pwoht pwe ren kotehla Sehd en Kalilih. Ni pwongo mie ehu melimel kohda, oh ilok kan eri kaseseli pwohto. Tohnpadahk ko ahpw masapwehkada. Ah ni luhkepen pwong, irail kilang mie emen kohkohdohng irail pohn pihlo. Irail eri weriwer ni masak, pwehki re sohte wehwehki dahme re kilikilang.

‘Kumwail dehr masak,’ Sises mahsanih. ‘Ngehi met!’ Irail pil saikinte kak kamehlele. Piter eri patohan ong: ‘Ma uhdahn komwi, Maing Kaun, padahkiong ie en aluwei rehmw pohn pihlo.’ Sises sapeng: ‘Kohdo!’ Eri Piter doudi sang nan pwohto oh alu pohn pihl! Mwuhri ekis, e masapwehkada oh tapiada kihrla, ahpw Sises doarehla ih.

Mwuhri, Sises pil kamwenge aramas kid kei. Ansouwet e doadoahngki lopwon en pilawa isuh oh mwahmw tikitik kei. Oh mwehrin arail mwenge pil mie luhwe tohto. Kaidehn met mehkot kasehlel ong duen Sises ah kin apwali aramas kan? Ni ansou me e pahn kaunda duen nanmwahrki en Koht men kitail sohte pahn apwalkihla mehkot!