Kaudiahl me Sohn Alehdi

Ahnsou me wahnpoaron Sohn sensel nan dekehn Padmos, Sises ketin kasalehiong ih irekidien kasansal de kilel 16 ong ahnsou kohkohdo. Kasansal pwukat kasalehda ia duwen mwaren Siohwa eh pahn sarawihla, sapwellime Wehi pahn ketido, oh kupwure pahn pweida nin sampah duwen eh kin wiawi nanleng.

Nan ehu kasansal, Sohn kilangada Siohwa eh ketiket nan mwoale lingan nanleng, oh lapalap 24 kapilpene likawih likou pwetepwet oh mie nihn kohl kei pohn moangarail kan. Lioal kin pirsang ni mwoahlo oh nansapwe kin posopossang ie. Lapalap 24 ko ahpw poaridi mwohn Siohwa oh kaudokiong ih. Nan pil ehu kasansal, Sohn kilangada pokon kalaimwun ehu me kohsang wehi koaros, kadaudok koaros, oh lokaia koaros me kin kaudokiong Siohwa. Sihmpwulo, me iei Sises, kin ketin apwalih irail oh kahluwairaillahng pilen komour. Mwuhr, pil nan ehu kasansal, Sises ketin tepida kakaun nin duwen Nanmwarki en nanleng, iangahki lapalap 24 ko. Nan kasansal en mwurin mwo, Sohn kilangada Sises eh ketin mahweniong drakono, me iei Sehdan, oh nah ngehn suwed kan. Sises ketin siken irail sang nanleng, kohdiong sampah.

Sohn eri kilangada kilel kaselel ehu en Sihmpwulo oh meh 144,000 kesikesihnen pohn Nahna Saion. E pil kilangada tohnleng men me pipihrseli nin sampah pwon, padapadahkihong aramas akan ren lemmwiki Koht oh kapinga Ih.

Nan kasansal en mwurin mwo, mahwen en Armakedon wiawi. Erein mahweno, Sises oh sapwellime sounpei kan kalowehdi en Sehdan kaunda suwed wet. Kaimwiseklahn kasansalo, Sohn kilangada miniminpene unsek me mi nanleng oh sampah. Sehdan oh nah kan kasohrala douluhl. Koaros nanleng oh sampah kin wiahki mwaren Siohwa mehkot sarawi oh kaudokiong ih kelehpw.