MEHN ONOP 14

Wiahiong Ire Kesempwal kan en Sansal

Ipru 8:1

DAHME KE PAHN WIA: Sewese sounrongorong kan ren ideidawehn omw padahko, oh kasalehda mwahu ia duwen ehuehu ire kesempwalo eh dokedoke mehn akadei en omw padahko oh oaralape.

IA DUWEN OMW PAHN WIA MET:

Mie omw mehn akadei ehu. Medemedewe ma mehn akadei en omw padahko pahn kehsehki, kamehlelehiong, de kamwakid sounrongorong kan, oh eri wiahda omw padahko nin duwen me konehng. Kanahieng pwe ire kesempwal koaros en seweseiuk ken lel omw mehn akadeio.

Pein idek rehmw: ‘Peidek dah kan de uhwong dah kan me sounrongorong kakete ahneki duwen oaralap wet? Ni soangen irekidi dah me re pahn wia peidek pwukat de uhwong pwukat?’ Kowe eri koasoanehdi ire kan ni soangen irekidiohte pwe sounrongorong kan ren kak idawehn, wehwehki, oh pwungki ire ko.
Kasansalehda oaralap en omw padahko. Kin koasoia oaralapo erein omw padahko pwon sang ni omw kin kapwukapwurehiong lepin lokaia kesempwal kan en oaralapo de doadoahngki lepin lokaia kan me me wekpeseng ahpw wehwe ko duwepenehte.
Wiahiong ire kesempwal kan en sansal oh mengei. Pilada ire kesempwal kante me pid omw oaralapo oh me ke kak padahngki erein ahnsou me koasoandi. Pilada ekeite ire kesempwal kan, kasalehda ni sansal ehuehu ire kesempwal ko, ekis uhdi nanpwungen ire kesempwal ko, oh doula koasoia sang ehu ire kesempwal ong ni ehu ni maledek.

Ke kak ndahla ire kesempwal ko ni tepin omw padahko pwehn sewese sounrongorong kan ren idawehn, de pwurehng ndahla ni kaimwiseklahn padahko pwehn sewese sounrongorong kan ren tamatamante.