Koakon En Peidek
◼ Dahme kahrehda e kin mwahu ma tohnmwomwohdiso pahn pakalahng iren Paipel kan oh idawehn ahnsou me sounkapahrek wia padahk?
Iren Paipel depe me tohnmwomwohdiso pahn pakalahng oh idawehn wadawad en sounkapahrek pahn poahsoankihda soahng kan duwehte oaralap me sounkapahrek kin koasoia oh pil soangen padahk me kin koasoia ehu ehu iretikitik en irelaud ehu pwon nan Pwuhk Sarawi.
E pil kesempwal en tamataman me kahrepe ehu me e mwahu en pakalahng iren Paipel kan iei en tehk me dahme sounkapahreko koasoia uhdahn kohsang Pwuhk Sarawi. (Wiewia 17:11) Pil ehu kahrepe iei en kasawihada kadehde me kohsang nan Pwuhk Sarawi pwehn kakehlail atail pwoson. Ma kitail kilang dahme Pwuhk Sarawi kin mahsanih ahnsou me kitail rong sounkapahreko wadek iren Paipel pahn sewese kitail en wehwehki iren Paipelo. E kin mwahu en kaidehn ihte kilang iren Paipel kan ahpw pil ntingihdi ire kesempwal kan oh rong kanahieng dahme sounkapahreko koasoia.
Nan outline kan me Society kin kihda: iren Paipel tohto mie pwe iren Paipel pwukat kin sewese sounkapahreko en kaunopada. Iren Paipel pwukat kin koasoia dahme wiawi mahs oh dahme kahrehda oh kin sewese sounkapahreko en wehwehkihla oaralapo oh iaduwen iren Paipel kan kin utungada oaralapo. Sounkapahreko kin pilada mehnia iren Paipel kan kin mwahu en doadoahngki en kawehwehda oaralapo oh e kin luhke sounrongorong kan en idawehn eh wasawad oh kawehwe. Brother me wia kapahreko sohte pahn pakalahng iren Paipel koaros me mihmi nan outline, pwe ekei iren Paipel kan e kak koasoiahte mouren iren Paipelo.
Ni ahnsou me sounkapahreko pahn wadek iren Paipel kan, e pahn wadek iren Paipel kan sang nan Pwuhk Sarawi, kaidehn sang doaropwe kan me kohsang computer (computer print-out). Ni ahnsou me sounkapahreko pahn luhke sounrongorong kan en iang ih wadek iren Paipelo, e pahn kasalehda, ni sansal, mehnia pwuhk, irelaud oh iretikitik (de iretikitik kan) e pahn wadek. Mwurin mwo, e pahn mwahu en uhdi ekis oh wia peidek ehu de koasoia ekis duwen dahme iren Paipelo pahn kasalehda oh met pahn mweidong sounrongorong kan ahnsou en diarada iren Paipelo. Ma sounkapahreko pahn pwurehng nda iren Paipelo, met pahn sewese sounrongorong en tamataman mehnia iren Paipel me re raparapahki. Oh pil, e sohte pahn mwahu ma sounkapahreko pahn nda mehnia pali (page number) iren Paipel ntingihdi loale pwe sounrongorong kan mwein doadoahngki soangsoangen Pwuhk Sarawi kan. Eri, ma sounrongorong kan pahn pakalahng iren Paipel kan ahnsou me luhk kohwong irail, e kin kak sewese irail en pehm manaman en Mahsen en Koht ahnsou me sounkapahreko kin wia eh padahk oh kawehwe iren Paipel kan.—Ipru 4:12.