IREN MEHN KASUKUHL 11

Dahme Ke Kak Wia Pwe Wadawad Paipel en Uhdahn Seweseiuk?

Me kin print

Mie pak ke men tapiada doadoahk laud ehu ahpw ke medewe me e nohn apwal? Mweinele ke pahn mengeikihla doadoahko ni omw ekisekis wia. Met pil duwehte wadawad Paipel. Mwein ke kin medewe, ‘Ia wasa I pahn tepida?’ Nan iren mehn kasukuhl wet kitail pahn koasoiapene soahng mengei kei me ke kak wia pwe ken kak wiahiong omw wadek oh onopki Paipel en kaperen.

1. Dahme kahrehda kitail anahne wadek Paipel rahn koaros?

Aramas emen me kin wadek Paipel de “Kosonned en” Siohwa rahn koaros, pahn nsenamwahu oh pweida. (Wadek Melkahka 1:1-3.) Pwehn tepida, song wadek Paipel ni minit keite ehuehu rahn. Uwen laud en omw esehla Mahsen en Koht, ih uwen laud en omw pahn perenkihla wadek Paipel.

2. Dahme ke kak wia pwe omw wadek Paipel en kak seweseiuk?

Pwe atail wadek Paipel en kak uhdahn sewese kitail, kitail anahne wadek oh “medemedewe.” (Melkahka 119:97) Ni omw wadek, idek rehmw peidek pwukat: ‘Dahme met padahkihong ie duwen Siohwa Koht? Ia duwen ei kak doadoahngki met nan ei mour? Ia duwen ei kak doadoahngki iretikitik pwukat pwehn sewese meteikan?’

3. Ahnsou dah me ke kak koasoanehdi ken kin wadek Paipel?

Ke kin apwalki koasoanehdi ahnsou en wadek Paipel? Me tohto kitail kin apwalki. Song en ‘doadoahngki mwahu omw ahnsou.’ (Episos 5:16) Ke kak wia met sang ni omw koasoanehdi ahnsou ehu pwe ken kin wadek Paipel ehuehu rahn. Ekei aramas kin koasoanehdi ren wadek Paipel nimensehngie. Ekei kin wadek Paipel mweinele ni ahnsoun kommoal en souwas. A meteikan kin wadek Paipel ni soutik mwohn ar meir. Ahnsou dah me pahn keieu mwahu ong uhk?

KALAUDEHLA OMW ESE MET

Sukuhlki ia duwen omw pahn wiahiong omw wadawad Paipel en kaperen. Kilang ia duwen omw kak kaunopada mwahu pwe omw onop Paipel en wia kamwahupomw.

Kilel kan: Kisin pwutak men ekisekis ioukihla soangen mwenge ehu. 1. Kisin pwutako mwadomwadongki mwengeo. 2. Ahnsou kei mwuhr, pwutako kang mwengeo. 3. Ni eh ekis laudla, pwutako perenkihla kang mwengeo. — Duwehte atail kin ekisekis ioukihla soangsoangen mwenge kan, kitail kak ekisekis perenkihla wadek Paipel

4. Wiahiong omw wadawad Paipel en kaperen

Mweinele e pahn kakete apwal en tepida wadek Paipel. Ahpw, kitail kak “kakairada ineng” en wia met, duwehte emen eh kin ekisekis ioukihla mwenge kapw ehu. Wadek 1 Piter 2:2, oh mwuri koasoiapene peidek wet:

Ke medewe ma ke kin wadek Paipel rahn koaros, ke pahn perenkihla wadek oh kin men pwurupwurehng wadek?

Kilang KISIN KASDO pwe ken kilang ia duwen ekei aramas ar tepida perenkihla wadek Paipel. Mwuri koasoiapene peidek pwukat.

KISIN KASDO: Youths Learning to Love God’s Word (5:33)

Nan kisin kasdou, soangen kahpwal dah kan me, me pwulopwul kan powehdi?
Dahme sewese irail en kin pousehlahte wadewadek Paipel?
Dahme re wia pwe ar wadawad Paipel en kin kaperen?

Iren sawas kan ong omw pahn tepida:

Pilada kawehwe me pwung oh mengei en wadek. Song wadek Kawehwe en Sampah Kapw.
Tepida wadek wasa me ke keieu perenki. Karasepe, ke kak kilang wasa me nda “Wadek Paipel Ehuehu Rahn.”
Kilelehdi dahme ke wadek. Doadoahngki wasa me nda “Kilelehdi Omw Wadawad en Paipel.”
Doadoahngki JW Library^® app. Ke kak doadoahngki met pwe ken wadek oh rong wadawad en Paipel wasa koaros, ni omw doadoahngki smartphone de tablet ape.
Doadoahngki Sawas ong Onopki Mahsen en Koht. Mie map kan oh koakon kan me kak wiahiong omw wadawad en Paipel en kaperen.

5. Kaunopada ong omw onop Paipel

Wadek Melkahka 119:34, oh mwuri koasoiapene peidek wet:

Dahme kahrehda e mwahu en kapakap mwohn omw wadek Paipel de kaunopada ong onop Paipel?

Dahme ke kak wia pwe ehuehu omw ahnsoun onop en uhdahn seweseiuk? Ni omw kaunopada ong ehuehu iren mehn kasukuhl, song wia mepwukat:

Wadek tepin parakrap kan nan ehuehu iren mehn kasukuhl.
Tehk oh wadek iren Paipel kan, oh song wehwehki ia duwen ireo eh pidada mehn kasukuhlo.
Lainihala lepin lokaia kan me sapengala ehuehu peidek; met pahn seweseiuk ni ahnsou me kowe oh omw sounpadahko koasoiapene ireo.

Kilel kan: Lih emen kaukaunop ong eh onop Paipel. A. E wadek tepin pali en iren mehn kasukuhlo. B. E wadek iren Paipel kan me kileldi. C. E lainihala oh kilelehdi lepin lokaia kan nan iren mehn kasukuhlo.

Ke ese met?

Sounkadehdehn Siohwa kan kin doadoahngki soangsoangen kawehwehn Paipel kan. Ahpw, se uhdahn perenki doadoahngki Kawehwe en Sampah Kapw pwehki e kawehwehdi ni pwung, sansal oh e doadoahngki mwaren Koht.—Kilang Web article “Do Jehovah’s Witnesses Have Their Own Bible?”

EKEI ARAMAS KIN NDA: “Onop Paipel nohn apwal. I me nohn kedirepw de pwang.”