Wadawad En Paipel Kin Wahdo Kapai Laud Kan Oh Kin Kaperen

“Ke anahne . . . wadwadek nin rahn oh nipwong.”​—SOSHUA 1:8.

1. Ia ekei kapai kan me kin kohsang wadawad pwuhk sohte lipilipil oh wadawad Paipel?

WADAWAD en pwuhk katepe kan iei wiewia katepe ehu. Ohlen Prans men, Montesquieu (Charles-Louis de Secondat) me kin onopki palien politik kan ntingihdi: “Ong ngehi, onop iei pasapengpen ong kapwang en mour. Sohte pwunod ehu me powehdi ie ma I wadek pwuhk kan ni erein awa ehu. Wadawad en Paipel kin kak kihda sawas inenen laud mehlel ehu. Sounmelkahkao mahsanih: “Kosonned en Kauno me unsek mehlel; e kin pwurehng kakehlahda aramas. Mahsen en Kauno me likilik, e kin kaloalokongihala me soaloalokong kan. Kosonned en Kauno me pwung; oh irail kan me kin peikiong kin pereperen. Sapwellimen mahsen kan me uhdahn pwung oh kin kamarainihada lamalam en aramas.”​—Melkahka 19:7, 8.

2. Dahme kahrehda Siohwa nekidala Pwuhk Sarawi sangete mahs lel ni ahnsou wet, oh dahme e kupwurki sapwellime aramas akan en wia?

² Audepen Paipel kin kohsang rehn Siohwa Koht, ihme e kin nekidala audepe kan erein sounpar epwiki kei sang irail imwintihti kan en pelien lamalam kan oh sampah. Pwehki Siohwa kin ketin kupwurki “aramas koaros en ale komourparail oh marainkihla me mehlel,” e kupwurki aramas koaros en ese me mie sapwellime Mahsen pwe ren kak wadek. (1 Timoty 2:4) Aramas akan lemeleme me mpen persent 80 en tohnsampah pwon kin wehwehki ehu lokaia sang lokaia 100. Audepen Pwuhk Sarawi pwon me kawehwehda ni lokaia 370, oh ekei pwuhk kan nan Pwuhk Sarawi kawehwehda ni lokaia 1,860. Siohwa kupwurki sapwellime aramas akan en wadek sapwellime Mahsen. E kin kapaiada sapwellime ladu kan me kin nsenohki sapwellime Mahsen, ei, irail akan me kin wadek Pwuhk Sarawi rahn koaros.​—Melkahka 1:1, 2.

Sounapwalih kan Anahne Wadek Neirail Pwuhk Sarawi

3, 4. Dahme Siohwa kupwurki nanmwarki kan en wehin Israel en wia, oh ia kahrepe kan kosonned pwukat pil kin dokedoke irail Kristian elder kan nan rahn pwukat?

³ Ni ahnsou me wehin Israel kin ahneki nanmwarki kan me kin kaunda irail, Siohwa mahsanih: “Ni eh pahn nanmwarkihla e pahn sapwellimanki ehu pwuhken pelien kosonned akan en Koht oh padahk kan me e pahn pein ntingihasang nan keieun pwuhk me wie nekinek rehn samworo mehn Lipai kan. E pahn kin nekinekid pwuhk wet reh oh kin wadewadek erein eh mour, pwe en kin padahngki duwen lemmwin Siohwa oh kapwaiada ni loalopwoat mehkoaros me audedahr pwuhk wet. Met pahn sewese pwe en dehr kin kupwukupwure me e deisang rie mehn Israel kan oh en dehr kin sapeikiong mahsen kan oh en dehr kin sapeikiong mahsen kan en Siohwa. Ih duwen eh pahn kakaun erein sounpar tohto oh kadaudoke pahn pil kaunda Israel erein dih tohtohie.”​—Deuderonomi 17:18-20, New World Translation.

⁴ Tehk duwen kahrepe kan Siohwa kin kupwurki nanmwarki kan en Israel en wadek pwuhken kosonnedo me kohsang rehn Koht ni rahn koaros: (1) “pwe en kin padahngki duwen lemmwin Siohwa oh kapwaiada ni loalopwoat mehkoaros me audedahr pwuhk wet;” (2) “met pahn sewese pwe en dehr kin kupwukupwure me e deisang rie mehn Israel kan”; (3) “oh en dehr kin sapeikiong mahsen kan en Siohwa.” Irail Kristian sounapwalih kan nan rahnpwukat pil anahne lemmwin Siohwa, peikiong sapwellime kosonned akan, dehr kin lemeleme me re mwahusang riarail brother kan, oh dehr kin sapeikiong sapwellimen Siohwa kosonned akan? Wadewadek Paipel rahn koaros kin wia mehkot me kesempwal ong irail nanmwarki kan en wehin Israel oh e pil kin wia mehkot me kesempwal ong irail sounapwalih kan nan rahnpwukat.

5. Dahme pwihn en Governing Body ntingwohng pwihn en Committee en Rahn Ohpis kan me pid duwen wadawad en Paipel, oh dahme kahrehda irail Kristian elder kan koaros pil anahne kapwaiada kaweid wet?

⁵ Kristian elder kan nan rahnpwukat kin kedirepw mehlel nan arail mour, ihme, wia arail wadawad en Pwuhk Sarawi pahn kak apwal ong irail. Karasepe ieu, irail kan me iang pwihn en Governing Body en Sounkadehdehn Siohwa kan oh iang Committee kan en Branch nin sampah pwon me inenen kedirepw. Ahpw, ni ahnsou kerendo ieu, mie kisinlikou ehu me pwihn en Governing Body kadaralahng pwihn en Rahn Ohpis kan pwe en padahkiong irail duwen kesempwalpen irail en wadewadek neirail Pwuhk Sarawi rahn koaros oh kesempwaliki arail onop kan. Kisin likou wet kasansalehda me met pahn sewese en kakehlailda atail limpoak ong Siohwa oh padahk mehlel, oh e pil pahn “sewese kitail en kolokolte atail pwoson, peren, oh dadaurete lao lel ni imwi.” Elder kan koaros nan mwomwohdiso en Sounkadehdehn Siohwa kan kin ahnekihte soangen anahnohte. Wadewadek Nting Sarawi kan ni rahn koaros pahn sewese irail en “pweida mwahu.” (Sosua 1:7, 8) Ong irail, wadawad en Paipel kin sewese irail “en padahkihong aramas akan me mehlelo, ong peneu ong tiahk sapwung, ong kapwungala wiewia sapwung kan, oh pil ong padahk duwen mour lelepek.”​—2 Timoty 3:16, Revised Standard Version.

Anahn Kesempwal ong Me Pwulopwul oh Me Laud kan

6. Dahme kahrehda Sosua kin wadek mahsen en sapwellimen Siohwa kosonned akan koaros ong pokon en keinek en Israel oh mehn liki kan me kin kousoanla rehrail?

⁶ Mahs, aramas akan sohte kak pein naineki Pwuhk Sarawi, ihme kahrehda wadawad en Pwuhk Sarawi kin wiawi mwohn pokon laud kan. Mwurin Siohwa sewese Sosua en kalowehdi kahnimw en Ai, Sosua ahpw kapokonepene irail keinek kan en wehin Israel mwohn Nahna Epal oh Nahna Kerisim. Oh met wiawi: “Sosua eri wadekohng irail Kosonnedo pwon iangahki kupwuramwahu. Sosua eri wadekohng irail Kosonnedo pwon iangahki kupwuramwahu kan oh keria kan, nin duwen ar ntingdier nan Pwuhken Kosonnedo. Sosua wadekada ehuehu kosonned koaros en Moses ong pokono, iangahki lih akan oh seri kan, pil mehn liki kan me kin kousoan rehrail.” (Sosua 8:34, 35) Me pwulopwul oh me mah kan, pwilidak en mehn Israel oh mehn liki kan, anahne en ni karasaras ntingihdi nan mongiongarail oh madamadau kan tiahk dah kei me pahn kahrehong Siohwa en kapaiada irail oh wiewia kan me pahn kansensuwedihala ih. Kaukaule wia atail wadawad en Pwuhk Sarawi pahn sewese kitail en kapwaiada met.

7, 8. (a) Nan rahnpwukat, ihs irail me kin rasehng “mehn liki kan,” oh dahme kahrehda re anahne wadek neirail Paipel rahn koaros? (b) Ni ahl dah kan irail “seri kan” nanpwungen sapwellimen Siohwa aramas akan kak idawehn mehn kahlemeng mwahu en Sises?

⁷ Rahnwet, sapwellimen Siohwa ladu rar rar kei kin ni pali ngehn rasehng irail “mehn liki kan.” Ahnsou ehu, re kin momourki koasoandi en sampah wet, ahpw ni ahnsou wet, re onehda sapahl pein arail mour. (Episos 4:22-24; Kolose 3:7, 8) Re anahne ahnsou koaros katamankin pein irail duwen sapwellimen Siohwa koasoandi kan ong dahme mwahu oh dahme suwed. (Eimwos 5:14, 15) Wadewadek Mahsen en Koht ni rahn koaros kin sewese irail en kapwaiada met.​—Ipru 4:12; Seims 1:25.

⁸ Nanpwungen sapwellimen Siohwa aramas akan mie “seri” tohto me kin ale kaiahn sang arail pahpa oh nohno kan me pid duwen sapwellimen Siohwa koasoandi kan ahpw pein irail anahne en kamehlele duwen pwung en sapwellimen Koht kupwur kan. (Rom 12:1, 2) Iaduwen re kak wia met? Nan Israel, kaweid kohwong irail samworo kan oh me mah kan: “Wadekohng irail ni ahnsou me re pahn pokonpenehn kaudokiong Kauno, amwail Koht, ni wasahn kaudokteieuo. Kapokonepene aramas akan koaros, ohl, lih, seri, oh pil mehn liki kan koaros me kin kousoan nan amwail kahnimw kan, pwe re en rong oh esehla duwen ar pahn lemmwiki Kauno amwail Koht, oh loalopwoatohng kapwaiada sapwellime padahk kan. Eri, kadaudokamwail, me sohte iang rong Kosonned en Kauno, amwail Koht, pahn rong oh esehla duwen ar pahn peikiong erein arail pahn mihmi nan sahpw me kumwail pahn sapwenikihla palio Pillap Sordan.” (Deuderonomi 31:11-13) Sises mih pahn Kosonnedo, oh ni ahnsou me e pwulopwul sounpar 12, e kin perenki wehwehki duwen kosonned akan en Seme. (Luk 2:41-49) Mwuhr, e kin ahnsou koaros rong oh wadek Pwuhk Sarawi nan sinakoke. (Luk 4:16; Wiewia 15:21) E pahn mwahu ma irail me pwulopwul kan nan rahnpwukat en idawehn mehn kahlemeng mwahu en Sises en wadewadek Mahsen en Koht rahn koaros oh kaukaule iang towehda mihding kan wasa me aramas akan kin wadek oh onopki Pwuhk Sarawi.

Wadawad en Pwuhk Sarawi​—Keieu Kesempwal

9. (a)Dahme kahrehda kitail anahne en pilada mwahu dahme kitail pahn wadek? (b) Dahme aramaso me tepin wiahda makisihn wet koasoia duwen sawaspen Paipel kan?

⁹ Nanmwarki loalokong Solomon ntingihdi met: “Samwa, mie ehu soahng tohrohr me ke pahn mwasamwasahn. Ntingdien pwuhk kan pahn wiewiawi kohkohlahte, oh ke pahn pwangada ma ke pahn song sukuhlki koaros.” (Eklesiasdes 12:12) Oh pil, wadewadek pwuhk tohto me kin wiawihda nan rahnpwukat sohte pahn ihte kahrehong emen en pwangada, ahpw, ni mehlel e pahn keper ong madamadau en aramas akan. Ih kahrepe kitail anahne en pilada mehnia pwuhk kan me mwahu en wadek. Likin wadewadek pwuhk kan en sawaspen Paipel, kitail anahne wadek Pwuhk Sarawi. Aramas men me tepin wiahda makisihn wet ntingwong aramas akan me kin wadek makisihn wet: “Menlau dehr manokehla me Pwuhk Sarawi iei poahsonpen atail kaweid kan oh edetehn sawaspen Paipel teikan me kin kohsang rehn Koht, mehpwukat ihte ‘sawaspen Paipel’ kaidehn sawas kan me pahn wiliandi Paipel.”a Ihme kahrehda, kitail en dehr manokehla wadek sawaspen Pwuhk Sarawi kan, ahpw, ni mehlel, kitail en menlau dehr manokehla wadek pwuhko me keieu kesempwal: Pwuhk Sarawi.

10. Iaduwen irail me kisehn pwihn en “ladu lelepek oh loalokong” kawehwehda duwen kesempwalpen wadek Pwuhk Sarawi?

¹⁰ Erein sounpar tohto, pwihn en “ladu lelepek oh loalokong” kin nsenohki en koasoanehdi koasoandi ehu en wadewadek Pwuhk Sarawi nan prokram en Theocratic Ministry Sukuhl nan mwomwohdiso koaros. (Madiu 24:45) Prokram wet en wadek Pwuhk Sarawi kin koasoanehdi emen en wadek nah Pwuhk Sarawi pwon erein mpen sounpar isuh. Koasoandi wet kin mwahu ong koaros ahpw keieu irail me kapw kan me saikinte wadek Pwuhk Sarawi pwon. Irail akan me kin iang Watchtower Bible School of Gilead pwehn wiahla misineri kan oh Ministerial Training School oh pil irail me kapw kan nan Bethel, anahne wadek Pwuhk Sarawi pwon nan sounpar ehu. Sohte lipilipil koasoandi dah ke kin idawehn, ma ke kelepw de iang ahmw peneinei wadek Pwuhk Sarawi, ke kak kolokolete ahmw koasoandi ma ke kin mwohniki ahnsoun wadewadek Pwuhk Sarawi.

Dahme Ahnepemw ong Wadawad kan Kin Kasansalehda?

11. Iaduwen oh ia kahrepe kitail anahne wadek duwen sapwellimen Siohwa kupwur kan ni ehu ehu rahn?

¹¹ Ma ke apwaliki daur omw koasoandi en wadawad en Pwuhk Sarawi, mwein e konehng ke pahn idek pein rehmw peidek pwukat: ‘Ahnsou me I kin wadek pwuhk sohte lipilipil de kilang TV, met kin kauwehla ahi koasoandi en wadek Mahsen en Siohwa?’ Tamanda dahme Moses ntingihdi​—oh Sises pwurehng mahsanih duwen dahme Moses ntingihdi—​me “kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.” (Madiu 4:4; Deuderonomi 8:3) Pwehki kitail koaros anahne kang pilawa oh mwenge teikan rahn koaros pwehn ale ketihnain en paliwaratail, eri e pil sansal me rahn koaros kitail pil anahne ale ketihnain en pali ngehnatail. Sang ni atail kin wadewadek Nting Sarawi kan, kitail pahn kak mengei ong sukuhliki oh esehla sapwellimen Koht kupwur kan ni ehu ehu rahn.

12, 13. (a) Iaduwen wahnpoaron Piter karasaiong ngoang me kitail anahne ong Mahsen en Koht? (b) Iaduwen Pohl kin doadoahngki karasaras en milik ni ahl tohrohr sang Piter?

¹² Ma kitail kin kalahnganki Pwuhk Sarawi, “kaidehn nin duwen padahk en aramas, ahpw nin duwen mahsen en Koht me iei me mehlel,” kitail pahn perenki wadek Pwuhk Sarawi duwehte seri pwelel men kin ngoangkihte kang pilen dihdi en eh nohno. (1 Deselonika 2:13) Wahnpoaron Piter mahsanih duwen met: “Kumwail duwehla seri pwelel kan, me kin ngoangkihte kang pilen dihdi mehlel en pali ngehn pwe kumwail en keirda oh mourkihla. Pwe duwen Pwuhk Sarawi eh mahsanih, ‘kumwail songadahr ia uwen mwahu en kalahngan en Kauno.’” (1 Piter 2:2, 3) Ma kitail pein kehn “kalangan en Kauno,” kitail pahn ngoangkihte wadek Pwuhk Sarawi.

¹³ Kitail anahne pil wehwehki me Piter kin doadoahngki karasaras me pid milik ni ehu ahl tohrohr sang wahnpoaron Pohl. Ong seri pwelel men, milik kin kaitarala ni unsek anahn en serio. Karasaras en Piter kin kasansalehda me Mahsen en Koht kin kaitarala anahn koaros ni pali ngehn me kitail anahne pwehn “keirda oh mourkihla.” Ahpw, Pohl kin doadoahngki karasaras me pil milik ong irail akan me dene irail me mah ni pali ngehn ahpw sohte kin ale ketihnain en pali ngehn me pahn kaitarala arail anahn akan. Nan sapwellime kisinlikou ong irail mehn Ipru Kristian akan, Pohl ntingihdi: “Pwe lel ahnsou wet e itar kumwail en wiahla sounpadahk; ahpw soh, pwe kumwail anahnehte emen en kin padahkihong kumwail keieun padahk kan duwen mahsen en Koht. Kumwail me saikinte kakohng tungoale kisin tungoal kekeluwak; ihte me kumwail kakohng, pilendihdi. Mehmen me kin tungutungoalehte pilendihdi, sohte eh koahiek en ese dahme mwahu de suwed, pwehki eh wiewiahte seri pwelel. Kisin tungoal kekeluwak, iei ih me aramas koahieklahr kan kin tungoale, irail kan me ahnlahr oh eselahr wekpeseng en me mwahu oh me suwed.” (Ipru 5:12-14) Ma kitail kin wia atail wadawad en Pwuhk Sarawi, met pahn kak kakehle atail kehlen kasawihada dahme pwung oh dahme sapwung oh pil kainengiada atail ngoang en sukuhliki soahng ngehnin kan.

Iaduwen Kitail Kak Wadek Pwuhk Sarawi

14, 15. (a) Pwais kaselel dahieu Meno me wiahda Pwuhk Sarawi kin ketikihong kitail? (b) Iaduwen kitail kak paiekihda erpit me kohsang powe? (Kihda karasaras kan.)

¹⁴ Pweidahn wadawad en Pwuhk Sarawi pahn tepikihda kaidehn wadawad ahpw kapakap. Kapakap kin wia pwais kaselel ehu. E pahn duwehte ma mwohn ke pahn wadek pwuhk ehu me audepe kan inenen loal, ke pahn mahs peki sawas sang rehn aramaso me wiahda pwuhko pwehn sewese iuk en wehwehki audepe kan. Sawas laud mehlel me pahn kohwong uhk! Audepen Pwuhk Sarawi kin kohsang rehn Siohwa, oh e pil kin ketkihong kitail sawas wet. Emen me iang pwihn en governing body nan keieun senturi ntingwong rie kan ni pali ngehn: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie. Ahpw kumwail uhdahn pahn kapakap ni pwoson oh sohte peikasal.” (Seims 1:5, 6) Governing Body en nan rahnpwukat kin ahnsou koaros kangoange kitail en kapakap ni ahnsou kitail kin wia atail wadawad en Pwuhk Sarawi.

¹⁵ Erpit kin wehwehki doadoahngki loalokong ni ahl me konehng oh pwung. Eri, mwohn ke pahn pahkpeseng noumw Pwuhk Sarawi, peki rehn Siohwa en sewese iuk en wehwehki ire kesempwal kan nan ahmw wadawad me pahn kak sewese iuk nan ahmw mour. Medemedewe iaduwen ire kesempwal kapw kan me ke sukuhliki kin dokedoke dahme ke esehier. Koasoanehdi ire kesempwal pwukat ong ni “mahsen mehlel kan” me ke wehwehkiher. (2 Timoty 1:13) Doudouloale duwen mour en sapwellimen Siohwa ladu kan en mahs, oh medemedewe dahme ke pahn wia ma ke pil mihmi nan soangen irair kohte.​—Senesis 39:7-9; Daniel 3:3-6, 16-18; Wiewia 4:18-20.

16. Sawas dah kei pahn kak sewese kitail en paiekihda sang atail wadawad en Pwuhk Sarawi?

¹⁶ Menlau dehr wadekete pwehn kanokehla koasoandi en wadawad kan. Ken dehr karuwaru ahnsou me ke wia ahmw wadawad. Doudouloale dahme ke wadewadek. Ni ahnsou me ke wadek ire ehu me ke sohte nohn wehwehki, ke kak doadoahngki “cross references” ma ke doadoahngki soangen Pwuhk Sarawi me mie. Ma ke saikinte wehwehki ireo, ke kak ntingihdi mehn kataman ong pein kowe pwe ken wiahda ahmw “research” mwuhr. Ni ahnsou ke kin wia omw wadawad, kileledi iren Pwuhk Sarawi kan me ke men tamataman. Ke pil kak ntingihdi mehn kataman kan ni keilen noumw pwuhk. Iren Pwuhk Sarawi kan me ke lemeleme ke kak doadoahngki nan kalohk oh padahk, tehk lepin lokaia kesempwal kan oh kilang nan index en mahsen kan nan Pwuhk Sarawi.b

Perenkihda Omw Wadawad en Pwuhk Sarawi

17. Dahme kahrehda kitail en perenki wadewadek Pwuhk Sarawi?

¹⁷ Sounmelkahka mahsanih duwen aramas emen kin pai pwehki e kin “perenki sapwellimen Siohwa Mahsen ko, oh e kin wadewadek ni rahn oh nipwong.” (Melkahka 1:2, NW) Atail wadewadek Pwuhk Sarawi en wia mehkot me kaperen ong kitail, kaidehn mehkot kapwang. Ehu ahl me pahn sewese kitail en perenki wadek Pwuhk Sarawi iei ma kitail pahn tamataman me dahme kitail kin sukuhliki kin inenen katapan ong kitail. Nanmwarki loalokong Solomon ntingihdi: “Meid kaperen ong aramas me kin ahneki erpit . . . pwe e pahn kak kaperenda omw mour, oh kahluwaiuk pwe ke en dehr perki mehkot. Irail kan me ahneki erpit kin pereperen oh erpit pahn kihong irail mour.” (Lepin Padahk 3:13, 17, 18, NW) Ma kitail nantihong ahneki erpit kin inenen katapan, pwe e kin peren, popohl, nsenamwahu, oh komour.

18. Likin atail kin wia wadawad en Pwuhk Sarawi, dahme pil kesempwal, oh dahme kitail pahn sukuhliki nan artikel en mwuhr?

¹⁸ Ei, wadawad en Pwuhk Sarawi inenen katapan oh kaperen. Ahpw ihte met kesempwal? Towe kan en Kristendom kin wia wadawad en Pwuhk Sarawi sangete sounpar epwiki epwiki kei samwalahr lel met, “re en padahngki mehkot, ahpw re sohte kak dehdehkihla me mehlelo.”​—2 Timoty 3:7) Pwehn kilang wahn wadawad en Pwuhk Sarawi, kitail anahne wadek neitail Pwuhk Sarawi oh kapwaiada dahme kitail sukuhlikier nan pein atail mour oh nan atail doadoahk en kalohk oh padahk. (Madiu 24:14; 28:19, 20) Kitail anahne en nantihong en kapwaiada met oh doadoahngki koasoandi mwahu kan en wia atail onop Pwuhk Sarawi, oh mehpwukat kak kaperen oh katapan, nin duwen kitail pahn sukuhliki nan artikel en mwuhr.

[Nting tikitik me mi pahs]

Peidek kan en Kousapahl

• Kaweid dahieu me kohwong nanmwarki kan en Wehin Israel me kin pil konehng sounapwalih kan en nan rahnpwukat, oh dahme kahrehda?

• Rahnwet, ihs irail me kin rasehng “mehn liki kan” oh “seri kan,” oh dahme kahrehda re anahne wadek Pwuhk Sarawi rahn koaros?

• Ni ahl konehng dah kei irail pwihn en “ladu lelepek oh loalokong” sewese kitail en wadek neitail Pwuhk Sarawi ahnsou koaros?

• Iaduwen kitail kak paiekihda oh perenkihda atail kin wadewadek Pwuhk Sarawi?

[Kilel nan pali 18]

Sises kin kalapw iang wadawad en Nting Sarawi kan nan sinakoke