IREN MEHN KASUKUHL 37

Dahme Paipel Mahsaniheki Duwen Doadoahk oh Mwohni

Me kin print

Mie pak ke toutoukihla pwunod en doadoahk de mwohni? E kak apwal en apwalihala atail anahn kan oh pil papah Siohwa ni mohngiong unsek. Paipel kin kihda kaweid kan me uhdahn kak sewese kitail.

1. Dahme Paipel mahsaniheki duwen doadoahk?

Koht ketin kupwurki kitail en perenki atail doadoahk. Paipel mahsanih, “me keieu mwahu ong aramas emen en wia iei . . . pereperenki wahn eh doadoahk.” (Eklesiasdes 2:24) Siohwa kin ketin doadoahk laud. Ni atail kin kahlemengih ih sang ni atail kin doadoahk laud, kitail kin kaperenda kupwure oh kitail pil kin nsenamwahu.

Doadoahk kin kesempwal. Ahpw kitail dehr mweidohng met en kesempwalsang atail kaudok ong Siohwa. (Sohn 6:27) E ketin inoukihda me ma kitail pahn mwohneki mahs ih, e pahn ketikihong kitail dahme kitail anahne.

2. Dahme Paipel mahsaniheki duwen mwohni?

Paipel kin kasalehda me mwohni wia mehn perehre, e pil kin katamankihong kitail me mwohni kelehpw sohte kak kihong kitail nsenamwahu. (Eklesiasdes 7:12) Kahrehda, e kangoange kitail en dehr poakohng mwohni ahpw kitail en ‘itarki dahme kitail ahneki.’ (Wadek Ipru 13:5.) Ni atail kin itarki dahme kitail ahneki, kitail kin kasaledengkitailsang pwunod en men ahneki laudsang dahme miehier. Kitail pil sohte kin wiahda pweipwand me sohte anahn. (Lepin Padahk 22:7) Oh kitail kin soikala keperpen pilein mwohni oh pilahn keper en mwadang kepwehpwehla.

3. Ia duwen atail kak doadoahngki neitail mwohni ni kadek?

Siohwa iei Koht kadek sapan men, oh kitail kin kahlemengih ih ni atail ‘kin sapan, perenki ehukihong meteikan dahme kitail ahneki.’ (1 Timoty 6:18) Kitail kak doadoahngki neitail mwohni ni kadek ni atail sewese mwomwohdiso oh irail me anahne sawas, ahpw mehlel riatail Kristian kan. Siohwa kin ketin kesempwalki kahrepen atail kin kihwei ahpw kaidehn uwen laud me kitail kihwei. Ni atail kin kihwei ni kadek sang nan mohngiong, kitail pahn nsenamwahu oh kaperenda kupwuren Siohwa.—Wadek Wiewia 20:35.

KALAUDEHLA OMW ESE MET

Kilang kamwahupen ahneki madamadau pwung ong doadoahk oh itarki dahme mie.

4. Kawauwih Siohwa sang ni mwomwen omw doadoahk

Atail nanpwungmwahu rehn Siohwa pahn kamwakid atail madamadau ong doadoahk. Kilang KISIN KASDO, oh mwuri koasoiapene peidek pwukat.

KISIN KASDO: Work Whole-Souled for Jehovah (4:39)

Dahme ke mwahuki duwen en Jason madamadau oh wiewia nan eh wasahn doadoahko?
Dahme e wia pwehn dehr nohn kedirepwki eh doadoahko?

Wadek Kolose 3:23, 24, oh mwuri koasoiapene peidek wet:

Dahme kahrehda e kesempwal kitail en doadoahk laud?

Kilel kan: Ohl emen kin mwohneki eh doadoahk en mwohni. 1. E doadoahk nan ohpis ehu nin rahn. 2. E doadoahkte lao lel nin soutik. 3. E wie doadoahkte mwurin ienge tohndoadoahk ko ar kohkohla ni imwarail kan. 4. E kelehpw mwengehn soutik ni imweo.

Doadoahk kin kesempwal. Ahpw kitail dehr mweidohng met en kesempwalsang atail kaudok ong Siohwa

Kilel kan: Ohlohte wiahda ahnsou ong dahme keieu kesempwal. 1. E doadoahk nan ohpis ehu nin rahn. 2. E kohkohla mwurin doadoahk. 3. E kauwada peh erein mihting en mwomwohdiso ehu. 4. E iang eh pwoudo oh nah seri riemen mwengehn soutik.

5. Mie kamwahupen itarki dahme mie

Aramas tohto kin song en alehdi mwohni tohto ni uwen me re kak. Ahpw Paipel kin kihong kitail kaweid me weksang met. Wadek 1 Timoty 6:6-8, oh mwuri koasoiapene peidek wet:

Dahme Paipel kin kangoangehkin kitail en wia?

Mehnda ma kitail sohte ahneki soahng tohto, kitail kak nsenamwahu. Kilang KISIN KASDO, oh mwuri koasoiapene peidek wet.

KISIN KASDO: Be “Content With the Present Things” (3:20)

Mendahki peneinei pwukat sohte naineki mwohni tohto, dahme kahrehda re kin nsenamwahu?

Ia duwen ma kitail ahneki soahng tohto ahpw pil men katohtowehla dahme kitail ahneki? Sises ketin karasahda keperpen met. Wadek Luk 12:15-21, oh mwuri koasoiapene peidek wet:

Dahme ke sukuhlkihsang sapwellimen Sises karasaraso?—Kilang iretikitik 15.

Wadek Lepin Padahk 10:22 oh 1 Timoty 6:10. Mwuri koasoiapene peidek pwukat:

Mehnia me ke medewe me kesempwal, ahneki nanpwungmwahu rehn Siohwa de naineki mwohni tohto? Dahme kahrehda?
Kahpwal dah kan me kin kohsang men naineki mwohni tohto?

6. Siohwa pahn ketin apwalih atail anahn kan

Kahpwal en doadoahk oh mwohni kak kasonge atail pwoson Siohwa. Kilang KISIN KASDO pwehn kilang dahme kitail kak wia ni atail lelohng kahpwal pwukat, oh mwuri koasoiapene peidek pwukat.

KISIN KASDO: Jehovah Will Care for Our Needs (6:21)

Kahpwal dah me brothero lelohng?
Dahme e wia pwehn powehdi kahpwal ko?

Wadek Madiu 6:25-34, oh mwuri koasoiapene peidek wet:

Dahme Siohwa ketin inoukihong irail akan me kin mwohneki mahs ih?

EKEI ARAMAS KIN NDA: “I anahne doadoahk laud pwe I en apwalih ei peneinei. I sohte kak iang mihting en mwomwohdiso kan wihk koaros.”

Mehnia iren Paipel me kamehlelehiong uhk me mwohneki mahs kaudok en Siohwa iei pilipil me kin keieu mwahu?

DAHME KE SUKUHLKIER

Doadoahk oh mwohni kin anahn, ahpw mepwukat en dehr kauwehla atail papah Siohwa.

Kousapahl

Dahme kak seweseiuk en ahneki madamadau toupahrek ong doadoahk?
Ia duwen eh wia kamwahupomw ni omw itarki dahme mie?
Ia duwen omw kak kasalehda omw likih sapwellimen Siohwa inou en apwalih sapwellime aramas?

Rahn me ke kanekehla:

Dahme ke kak wia

Kilang ma omw doadoahk kin kalapw kahrehiong uhk en sohte iang towehda mihting kan erein sounpwong samwalahr ko. Ma ei, wiahda koasoandi pwe ken kamwahwihala met.

Soahng teikan:

Your other goal

PIL TEHK

Tehk ma Paipel kin kasalehda ma mwohni kin suwed.

“Is Money the Root of All Evil?” (Web article)

Sukuhlki ia duwen atail kak doadoahngki neitail mwohni pwehn kaperenda Koht.

“What Does the Bible Say About Giving?” (Web article)

Pilein mwohni sohte keper?

“The Bible’s Viewpoint—Gambling” (Awake!, March 2015)

Kilang dahme kamwakid sounpilein mwohni oh pirap men en wekidala eh mour.

“I Was Passionate About Racehorses” (The Watchtower, November 1, 2011)