IREN MEHN KASUKUHL 51
Ia Duwen Omw Kak Kaperenda Siohwa Sang ni Omw Lokaia kan?
Ni ahnsou me Siohwa ketin kapikkitailda, e ketikihong kitail kisakis kaselel en kak lokaia. Ia duwe, e kin ketin nsenohki mwomwen atail doadoahngki kisakis wet? Ei uhdahn! (Wadek Seims 1:26.) Eri, dahme kitail kak wia pwe mwomwen atail koasoi en kin kaperenda kupwuren Siohwa?
1. Ia duwen atail kak doadoahngki kisakis en lokaia?
Paipel mahsanihong kitail en “kangkangoange oh kangkakehlailih emenemen.” (1 Deselonika 5:11) Ke kak medewehda ekei me anahne kangoang? Dahme ke kak wia pwehn kansenamwahwih irail? Kamehlelehiong irail me ke uhdahn nsenohkin irail. Mweinele ke kak ndaiong irail dahme ke kin kalahnganki duwen irail. Ke kak medewehda ehu iren Paipel me kak kangoange emen me ke ese? Mie iren Paipel tohto me ke kak pilada. Pil tamataman me mwomwen omw ndahla mehkot ehu kak uhdahn kangoange meteikan. Eri ahnsou koaros nantihong koasoi kadek oh mpahi.—Lepin Padahk 15:1.
2. Soangen lokaia dah me kitail en dehr wia?
Paipel mahsanih: “Dehr mweidohng koasoi suwed en kohieisang nan awamwail.” (Wadek Episos 4:29.) Met wehwehki kitail en dehr lokaia suwed de nda mehkot me pahn lemei oh kamedekihala en emen pepehm. Kitail pil anahne soikala lipahned oh karaun likamw.—Wadek Lepin Padahk 16:28.
3. Dahme pahn sewese kitail en koasoi ni ahl me pahn kangoange meteikan?
Dahme kitail kin kalapw koasoia kin kasalehda dahme uhdahn mi nan atail mohngiong oh madamadau. (Luk 6:45) Eri kitail anahne kin kaiahnehkin kitail en kin medemedewe soahng mwahu kan, soahng kan me pwung, mwakelekel, limpoak oh me warohng kaping. (Pilipai 4:8) Pwe kitail en wia met, kitail anahne pilada mwahu mehn kamweit oh kompoakepatail kan. (Lepin Padahk 13:20) E pil pahn sawas ma kitail kin medewe mwahu dahme kitail pahn nda mwohn atail koasoi. Eri, medewe dahme omw koasoi pahn wiahiong meteikan. Paipel mahsanih: “Lokaia mwahl kin kauwehla wasa rasehng kedlahs, ahpw lokaiahn loalokong kin kamwahwihala wasa.”—Lepin Padahk 12:18.
KALAUDEHLA OMW ESE MET
Sukuhlki ia duwen omw kak koasoi ni ahl me pahn kaperenda Siohwa oh kangoange meteikan.
4. Kanahieng omw lokaia kan
Ekei pak, kitail koaros kin nda mehkot me kitail koluhkihla mwuhr. (Seims 3:2) Wadek Kalesia 5:22, 23, oh mwuri koasoiapene peidek pwukat:
Mehnia rehn irair pwukat me ke kak kapakapki pwehn seweseiuk en kin kanahieng omw lokaia kan? Ia duwen irair pwukat eh kak seweseiuk?
Wadek 1 Korint 15:33, oh mwuri koasoiapene peidek wet:
Dahme kompoakepahmw kan oh mehn kamweit kan kak wiahiong mwomwen omw kin lokaia?
Dahme pahn kakete kamwakid mwomwen omw lokaia kan?
Wadek Eklesiasdes 3:7, oh mwuri koasoiapene peidek wet:
Soangen ahnsou dah me pahn mwahu en nennenla de awih lao ahnsou me konehng en nda mehkot?
5. Koasoia soahng mwahu kan duwen meteikan
Ia duwen atail kak soikala kauwe de koasoi kamedek ong meteikan? Kilang KISIN KASDO, oh mwuri koasoiapene peidek pwukat.
Dahme kahrehda brother menet men wekidala mwomwen eh kin koasoia meteikan?
Dahme e wia pwehn wekila?
Wadek Eklesiasdes 7:16, oh mwuri koasoiapene peidek wet:
Dahme kitail anahne tamataman ma kitail men kauwe aramas emen?
Wadek Eklesiasdes 7:21, 22, oh mwuri koasoiapene peidek wet:
Ia duwen iretikitik pwukat eh kak seweseiuk en dehr lingeringerda ni ahnsou me emen kauweiuk?
6. Kin kadek ni omw koasoiong omw peneinei
Siohwa ketin kupwurki kitail en kin koasoiong atail peneinei ni elen kadek oh limpoak. Kilang KISIN KASDO, oh mwuri koasoiapene peidek wet.
Dahme pahn seweseiuk en kin koasoi kadek ong omw peneinei?
Wadek Episos 4:31, 32, oh mwuri koasoiapene peidek wet:
Soangen koasoi dah kan me pahn kak kansenamwahwih atail peneinei?
Siohwa ketin kasalehda sapwellime pepehm ong Sises, sapwellime Ohlo. Wadek Madiu 17:5, oh mwuri koasoiapene peidek wet:
Ia duwen omw kak kahlemengih Siohwa ni omw kin koasoiong omw peneinei?
Tetehk ahnsou mwahu en kapinga meteikan
EKEI ARAMAS KIN NDA: “I kin nda dahme I medewe. Mehnda rehi ma meteikan sapwungki dahme I nda.”
Ke pwungki met? Dahme kahrehda?
DAHME KE SUKUHLKIER
Mie manaman en koasoi. Kitail anahne medewe mwahu dahme kitail pahn nda, ahnsou me kitail pahn koasoi oh mwomwen atail pahn koasoi.
Kousapahl
Soahng dah kan me ke kak nda pwehn sewese meteikan?
Soangen lokaia dah kan me kitail anahne soikala?
Dahme kak sewese kitail en kin ahnsou koaros koasoi kadek oh kangoang?
PIL TEHK
Dahme kak sewese kitail en kin lokaia kadek oh mwahu?
Sukuhlki dahme kak seweseiuk en dehr kin lokaia suwed.
Kilang ia duwen omw kak dehr kin kauwe meteikan.
Kilang ia duwen Siohwa eh ketin sewese emen ohl me apwalki kesehla lokaia suwed.
“I Began to Think Seriously About Where My Life Was Headed” (The Watchtower, August 1, 2013)