OARITIK C
Mwomwen Atail Pahn Wia Onop en Paipel kan ni Atail Doadoahngki Pereperenki Mour Kohkohlahte!
Brother kan kapakap pak tohto oh medemedewe kanahieng soangen ire dah kan me pahn kileldi nan pwuhken Pereperenki Mour Kohkohlahte! Pwe kitail en uhdahn doadoahngki mwahu pwuhk wet, e mwahu en idawehn kaweid kan me kileldi pah ni atail wia onop en Paipel kan.
Mwohn onopo
1. Kaunopada mwahu. Ni omw wia met, medewe duwen en noumw tohnsukuhlo eh anahn akan, eh irair, oh dahme e kin kamehlele. Medewe duwen ire kan me e pahn kakete apwalki wehwehki de kapwaiada. Medewe ia duwen ire ko nan wasa me nda “Pil Tehk” eh kak sewese noumw tohnsukuhlo, oh onopada pwe ken doadoahngki, ma anahn, erein onopo.
Erein onopo
2. Kapakap mwohn oh mwurin onopo, ma noumw tohnsukuhlo pwungki.
3. Dehr nohn koasoakoasoi. Doadoahngkihte dahme mieier nan pwuhko oh mweidohng tohnsukuhlo en kasalehda eh madamadau.
4. Ni omw pahn tepida pali kapw ehu, wadekala wasa me nda “Iren Medemedewe” oh kasalehda ekei oaralap en iren mehn kasukuhl kan.
5. Ni omw pahn kanekehla ehu pali, doadoahngki kousapahl en pali wet pwehn sewese noumw tohnsukuhlo en tamataman padahk mehlel kan me e sukuhlkier.
6. Ni omw onopki ehuehu iren mehn kasukuhl rehn noumw tohnsukuhlo:
Wadekala pali keieun iren mehn kasukuhlo.
Wadekala iren Paipel koaros me kileldi pwe ken “Wadek.”
Wadek iren Paipel teikan ma anahn.
Kasalehda kisin kasdo kan koaros me nda “Kilang” (ma kak).
Idek rehn tohnsukuhlo ehuehu peidek ko.
Ndaiong tohnsukuhlo en kilang kilel ko nan wasa me nda “Kalaudehla Omw Ese Met” oh idek ia eh madamadau.
Doadoahngki koakon me nda “Dahme ke kak wia” pwehn sewese tohnsukuhlo en kak tetehk ia uwen laud me e kekeirda. Mwein ke kak kangoange ih en doadoahngki dahme kileldier nan koakono, de en pein wiahda mehn akadei teikan, de doadoahngki ira koaros.
Idek rehn noumw tohnsukuhlo ma mie oaralap kan de kisin kasdo kan me e uhdahn perenki nan wasa me nda “Pil Tehk” ni ahnsou me e kaunopada ong iren onopo.
Song en kanekehla ehu iren mehn kasukuhl ni ehuehu ahnsoun onop.
Mwurin onopo
7. Pousehlahte medemedewe duwen noumw tohnsukuhlo. Kapakapkihong Siohwa en ketin kapaiahda noumw tohnsukuhlo en kak kekeirda oh en ketikihong uhk erpit ken ese ia duwen omw pahn sewese tohnsukuhlo.