Sapwelimen Siohwa Peneinei Paiekihda Minimin Kesempwal
“Ia uwen lingan, ia uwen kansenamwahu en sapwelimen Koht aramas akan ar kin miniminpene!—MELKAHKA 133:1.
1. Ia irair en peneinei rahnwet?
PENEINEI mihlar nan kapwahl rahnwet. Nan peneinei tohto, pwopwoud kan kin kereniong ohla. Mweipeseng en pwopwoud reklar wasa koaros, oh seri tohto sang soangen pwopwoud pwukat kin inenin insensuwed. Peneinei rar kan kin insensuwed oh tohrorpeseng. Ahpw, mie peneinei ehu me kin ese peren oh minimin mehlel. Peneinei wet iei sapwelimen Siohwa peneinei en lahng oh sampah. Nan peneinei wet, tohnleng soh sansal kid kei kin kapwaiada arail pwukoah kan me kin kohong ren wia me parekiong kupwur sarawio. (Melkahka 103:20, 21) Mie soangen peneinei wet nan sampah me kin paiekihda soangen minimin wet?
2, 3. (a) Ihs me ahnsouwet wia kisehn sapwelimen Siohwa peneinei sampah pwon, oh dahme kitail kak karasahong Sounkadehde kan en Siohwa koaros rahnwet? (b) Peidek dahkan kitail pahn kosoiapene?
2 Wahpoaron Pohl intingihdi: “Ihme karehda I kelehpwikihdi mwohn Samatail, me iei tapwin peneinei koaros me mih nanleng oh sampah.” (Episos 3:14, 15) Peneinei koaros pohn sampah pweipwandki ederail ong Koht pwe ih me Sounkapikada. Mendahki sohte peneinei en aramas nanleng, ni lokaian karasaras werek en Koht iei sapwelimen pwihn nanleng, oh Sises pahn sapwelimanki werek en lihkamwohd men me pahn miniminiong ih nanleng. (Aiseia 54:5; Luk 20:34, 35; 1 Korint 15:50; 2 Korint 11:2) Me keidi lelepek kan pohn sampah ahnsouwet wia kisehn sapwelimen Koht peneinei en lahng oh sampah, oh sapwelimen Sises “sihpw teikan,” me ahneki koapworopwor en sampah, kin wia towekan. (Sohn 10:16; Rom 8:14-17; The Watchtower, January 15, 1996, pali 31) Ahpw, Sounkadehde kan en Siohwa kan koaros rahnwet kin duwehte peneinei minimin ehu sampah pwon.
3 Komw iang kisehn sapwelimen Siohwa peneinei en ladu kan en sampah pwon? Ma ehi, komw paikihda ehu pai lapalapie. Me rar kan pahn kadehde me sapwelimen Siohwa peneinei nan sampah pwon—sapwelime pwihn sansal—kin wia wasahn meleilei oh minimin nan sampah ehu me dirkihla pepei oh saminimin. Ia duwen atail kak kosoiada minimin en sapwelimen Siohwa peneinei en sampah pwon? Oh ire dahkan me kin karehda soangen minimin wet?
Ia uwen Mwahu oh Kansenamwahu!
4. Ni pein amw lokaia, iaduwen amw pahn kasalehda dahme Melkahka 133 kosoiaki minimin en perien?
4 Sounmelkahkao Depit inenin kalanganki minimin en perien. E mwekidki ngehn sarawi en koulki duwen met! Medewehla ah doadoahngki nah arp ni ah koulki: “Ia uwen lingan, ia uwen kansenamwahu en sapwelimen Koht aramas akan ar kin miniminpene! E rasehng lehn kei kesemwpwal me kin dingidingdi sang pohn moangen oh alis en Aaron, dingidingdiong pohn tepinweren eh likou puhp. E rasehng pwoik pohn Nahna Ermon, me kin mweremwerediong pohn dohl kan en Saion. Pwe iei wasao me Kaun-o (Siohwa) ketin inoukihda me e pahn ketikihong kitail sapwelime kupwuramwahu-mour me sohte kak mwisekla.”—Melkahka 133:1-3.
5. Me poahsonda pohn Melkahka 133:1, 2, iaduwen mehn Israel oh laduhn Koht akan rahnwet ara duwehpenehte?
5 Mahsan ko kin kadoadoahkong minimin en perien me sapwelimen Koht aramas en mahs akan, mehn Israel kan kin paikihda. Ni arail kin tuhpene nan Serusalem ong arail kasarawi me re kin wia pak silu nan pahr ehu, re kin kousonpene ni minimin. Mendahki re kohsang soangesoangen keinek kan, re kin wia peneinei ehu. Arail kin mihmihpene kin wia mehkot mwahuong irail, duwehte lehn kei pohmwahu. Ni ahnsou me soangen leh wet kin wudekidiong pohn moangen Aaron, e kin dingidingidiong pohn ah alis oh pohn tepinweren ah likou puhp. Ong mehn Israel kan, arail miniminpene kin wia mehkot mwahuong irail koaros. Sawehwe kan kin kopwungpwungla, oh minimin kin mihela. Soangen miniminohte kin mih nan sapwelimen Siohwa peneinei nan sampah pwon rahnwet. Kaukaule werekpene kin wia mehkot mwahu ni pali ngehn ong towe kan. Kaweid en Mahsan en Koht kin kadoadoahk pwehn kihsang sawehwe kan oh kapwal kan. (Madiu 5:23, 24; 18:15-17) Sapwelimen Siohwa aramas kan kin inenin kalanganki mehn kangoang me kohsang arail minimin en perien.
6, 7. Iaduwen minimin en Israel kin rasehng pwoik pohn Nahna Ermon, oh iawasa kapai kan en Koht kin dierek ie?
6 Iaduwen ahn mehn Israel kan kin miniminpene kin pil duwehte pwoik en Nahna Ermon? Eri, pwehki nahna wet reireiki piht 9,000, koadoke kin sinoh pahr koaros. Sinoh me mih pohn koadoke kin katenepene ahd en nipwong oh eri wia pwoik me kin kamourih tuhke kan erein ahnsoun karakar kan. Ahng en kisinieng kan sang pohn Ermon kin kak ipirwei ahd pwukat lellahng ni palieir en Serusalem, wasa re wiahla pwoik. Eri sounmelkahkao pwung ni ah kosoia duwen ‘pwoik pohn Nahna Ermon, me kin mweremwerediong pohn dohlkan en Saion.’ Ia uwen met wia mehn kataman en mwekid mwahu me kin karehda minimin en sapwelimen Siohwa peneinei en tohnkaudek kan!
7 Mwohn mwomwodisohn Kristian ah kokouda, Saion, de Serusalem, kin wia poahson en kaudek mehlel. Ihme karehda, iei wasao me Koht kupwurki kapai kan en mihe. Pwehki Utupen kapai koaros mih nan tehnpas sarawi nan Serusalem, kapai kan pahn kohsang wasao. Ahpw, pwehki kaudek mehlel sohlar poahsonda pohn wasatehkis, kapai kan, limpoak, oh minimin en sapwelimen Koht ladu kan kak diarek wasa koaros nan sampah rahnwet. (Sohn 13:34, 35) Ia ekei ire kan me kin karehda minimin wet?
Ire kan me kin karehda Minimin
8. Dahme kitail kak sukuhlki sang minimin me kileledi nan Sohn 17:20, 21?
8 Minimin en sapwelimen Siohwa tohnkaudek kan kin poahsonda pohn arail peikiong loaloakong pwung en Mahsan en Koht, iangaki padahk kan en Sises Krais. Ni en Siohwa kadardo sapwelime Ohlo nan sampah pwehn kadehde me mehlel oh mehla nin duwen meirong ehu, met ritingada ahl ong kokoudahn mwowmodisohn Kristian minimin ehu. (Sohn 3:16; 18:37) Me minimin mehlel uhdahn mihe nanpwungen towe kan kin sansalda ni ahnsou me Sises kapakapki: “I sohte kapakapkin irailte, pwe pil irail kan me pahn pwoson ie pwehki arail padahk. I kapakap pwe irail koaros en wiahla ehu. Maing Semei! Irail en wiahla ehu nan kupwureta, duwehte omwi ket rehi, oh ngehi rehmwi. Irail en wiahla ehu, pwe sampah en kamehlele me komwi me ketin kadariehdo.” (Sohn 17:20, 21) Sapwelimen Sises werek kan pil ahneki miniminohte me mih nanpwungen Koht oh sapwelime Ohlo. Met wiawi pwehki re kin kapwaiada Mahsan en Koht oh iangaki padahk kan en Sises. Lamalam wette kin wia ireo nan minimin en sapwelimen Siohwa peneinei nan sampah pwohn rahnwet.
9. Doadoahk dah ngehn sarawi pwukoahki nan minimin en sapwelimen Siohwa aramas kan?
9 Ehu ire me kin kaminiminpene sapwelimen Siohwa aramas kan iei me re ahneki ngehn sarawi en Koht, de kehl manaman. E wiahiong kitail en kak wehweki padahk mehlel me sansalda nan Mahsan en Siohwa oh eri kitail kak papah ih ni minimin. (Sohn 16:12, 13) Ngehno sewese kitail en liksang soangen doadoahk en uduk me kin karehda saminimin duwehte uhpene, peirin, mwakar, oh pepei. Ahpw, ngehnin Koht kapwarehda loalotail wahn kaminimin kan duwehte limpoak, peren, popohl, kanangamah, kadek, kamwahu, pwoson, opampap, oh liksang me suwed.—Kalesia 5:19-23.
10. (a) Parekpene dahieu mihè nanpwungen limpoak me mih nan peneinei minimin en aramas oh limpoak me kin sansalda nanpwungenirail ko me lelepek ong Siohwa? (b) Iaduwen emen tohn Governing Body kasalehda ah pepehm duwen iang rie kan ni pali ngehn mihdingpene?
10 Tohnpeneinei minimin ehu kin limpoakpene oh perenki mihmihpene. Me rasehng met, irail ko nan sapwelimen Siohwa peneinei minimin en tohnkaudek kan kin poakong ih, oh sapwelime Ohlo, oh iengerail me pwoson kan. (Mark 12:30; Sohn 21:15-17; 1 Sohn 4:21) Duwehte peneinei limpoak ehu me kin perenki mwengepene irail ko me lelepek ong Koht kin perenki iang mihding en Kristian kan,kapokon kan, oh kapokon laud pwehn paikihda werek mwahu kan oh mwengehn ngehn kaselel kan. (Madiu 24:45-47; Ipru 10:24, 25) Emen tohn Governing Body en Sounkadehdehn Siohwa indahki ire wet: “Ong ie, iang riei kan mihding kin wia mehkot kaperen oh kangoang. I perenki iang irail kan me tepin mih nan Kingdom Hall mwohn tepidahn mihding, oh lahs en pidoi, ma kak. I kin peren ni ahi kin kosoi ong sapwelimen Koht aramas kan. Ni ahnsou me I kin mih nanpwungarail I pehm me I mih rehn ahi peneinei.” Ke kin ahneki soangen pepehm wet?—Melkahka 27:4.
11. Doadoahk dahieu Suonkadehdehn Siohwa kan keiou perenki, oh dahme kin imwikihla arail kin wiakihla papah Koht keiou nan arail mour?
11 Peneinei minimin ehu kin diar peren ni arail kin wiahpene mehkan. Me rasehng met, irail ko nan peneinei en sapwelimen Siohwa tohnkaudek kan kin diar peren ni arail kin miniminpene wia arail doadoahk en kalohki-Weio oh doadoahk en katohnpadahk. (Madiu 24:14; 28:19, 20) Kaukaule iang wia doadoahk pwukat pahn kakereni kitaillahng Sounkadehde teikan en Siohwa. Wiahkihla papah Koht me keiou kesemwpwal nan atail mour oh utungada wiewia kan koaros en sapwelime aramas kan pahn pil kalaudehla ngehnin peneinei nanpwungatail.
Koasoandi sang Powe me Katapan
12. Irair dah kan me kin kasalehda peneinei ehu me kin peren oh minimin, oh koasoandi dahieu me karehda minimin nan mwomwohdisohn Kristian nan senturi keiou?
12 Peneinei ehu me ahneki tapwi ehu me kelail oh limpoak oh me soandi mwahu uhdahn pahn miniminpene oh peren. (Epsos 5:22, 33; 6:1) Siohwa iei Koht en soandi mwahu, oh irail ko koaros nan sapwelime peneinei kin kilangwong ih me iei “Me Lapalapie.” (Daniel 7:18, 22, 25, 27; 1 Korint 14:33) Re pil pohnese me e ketin idiada sapwelime Ohlo, Sises Krais, en wia sounsohso en mehkoaros oh kasapwildahng ih manaman koaros en nanleng oh sampah. (Madiu 28:18; Ipru 1:1, 2) Ki Krais me iei Tapwi, mwomwodisohn Kristian kin wia pwihn ehu me minimin oh soandi mwahu. (Episos 5:23) Pwehn kaweidih wiewiahn mwomwodiso nan senturi keiou, mie governing body me wiawikihda wahnpoaron kan oh ekei “ohl mah” ngehnin kan. Ehu ehu mwomwodiso ahneki sounapwalih idihdda kan, de elder kan, oh ministerial servant kan. (Wiewia 15:6; Pilipai 1:1) Peikiong irail ko me tiengla mwohwe kin karehda minimin.—Ipru 13:17.
13. Iaduwen Siohwa kin kerenih aramas, oh ia imwilahn met?
13 Ahpw soandi wet kin kasalehda me minimin en sapwelimen Siohwa tohnkaudek kin kak mihe pwehki arail tapwi me lemei? Soh douluhl! Sohte mehot me kasalehda me Koht oh sapwelime pwihn me sempoak. Siohwa kin kerenih aramas kan ni ah kin kasalehiong irail limpoak, oh ehu ehu sounpar me kid kei kin pein toukihda oh perenki wiahla kisehn pwihn en Siohwa ni arail kin papdaisla pwehn kasalehda arail inou ong Koht. Re ahneki soangen ngehno me duwehte ahn Sosua, me kangoangeki ienge mehn Israel kan: “Kumwail pilada rahnwet ihs me kumwail pahn papah. . . A Ngehi oh ei peneinei, se pahn papah Kaun-o (Siohwa).”—Sosua 24:15.
14. Dahme karehda kitail kak indahki me pwihn en Siohwa kin mih pahn kaunda sang powe?
14 Nin duwen kisehn sapwelimen Siohwa peneinei, kitail sohte kin ihte peren ahpw pil meleilei. Met pwehki sapwelime pwihn kin mih pahn kaunda sang powe. Wein Koht iei kaunda ehu sang powe (sang lokaian Krihk theos, koht oh kratos, kaunda). Met iei kaunda ehu sang rehn Koht, me Koht koasoanehdi oh kauwada. Sapwelimen Siohwa “wei sarawi” keidio kin uhpaiong sapwelime kaunda oh ihme karehda e mih pahn kaunda sang powe. (1 Piter 2:9) Ki Kaun Lapalapo, Siohwa, me wia atail Sounkopwung, Sounketikihda Kosonned, oh Nanmwarki, kitail ahneki karepe tohto en ahneki pepehm en meleilei. (Aiseia 33:22) Ahpw, iaduwen ma akamai pwarada oh kauwe atail peren, meleilei, oh minimin?
Mwekid me Governing Body Wiahda
15, 16. Akamai dahieu pwarada nan senturi keiou, oh dahme karehda?
15 Pwehn kolokol minimin en peneinei ehu, ekei pak akamai anahne kopwungpwungla. Eri, iaduwen ma kahpwal en pali ngehn ehu pwarada me anahne kopwungpwungla pwehn kolokol minimin en sapwelimen Siohwa peneinei en tohnkaudek nan senturi keiou C.E. Eri dahme pahn wiawi? Governing body mwekidki met, oh re wiahda koasoandi kan ong ire ngehnin kan. Mie record en Pwuhk Sarawi me kasalehda mwekid wet.
16 Impen pahr 49 C.E., governing body tuhpene nan Serusalem pwehn kopwungla kahpwal toutou ehu oh eri en kak kolokol minimin en “tehnpasen Koht.” (Episos 2:19) Sounpar 13 mwohwe, wahnpoaron Piter kalohkongehr Kornelios, oh keioun Mehn Liki, de aramas en wei kan, wia me pwoson papdais kan. (Wiewia, irelaud 10) Erein ahn Pohl seilok keiou en misineri, Mehn Liki tohto iangala padahk en palien Kristian. (Wiewia 13:1–14:28) Ni mehlel, mwomwodisohn Kristian Mehn Liki kan kakaudahr nan Andiok, Siria. Ekei Kristian mehn Suhs lemeleme me irail Mehn Liki pwosonla kan anahne sirkumsaisla oh kapwaiada Kosonned en Moseso, ahpw meteikan sapwungki. (Wiewia 15:1-5) Akamai wet kak karehda saminimin, me pahn imwikihla wiawihdahn mwomwodisohn mehn Suhs oh Mehn Liki me tohrorpeseng. Ihme karehda governing body mwadang mwekidki met pwehn kolokol minimin en Kristian.
17. Wiepe minimin dahieu sansalda nan Wiewia 15?
17 Nin duwen Wiewia 15:6-22, “wahnpoaron ako oh me mah ko ahpw pokonpene pwe re en wie kupwurki ire wet.” Meteikan pil iang mih wasao, iangaki pwihn ehu sang Andiok. Piter mahs kawehwehda me ‘kumwail ese me mahso Koht ketin piliehda sang nanpwungamwail pwe I en kalohki Rongamwahu ong irail mehn liki kan, pwe irail en kak rong oh kamehlele.’ Eri “pokono pwon” wie rongorong en Parnapas oh Pohl kosoiahda “manaman kapwuriamwei kan koaros me ire wiahkidahr roson en Koht nanpwungen mehn liki kan.” Mwuri Seims kawehwehda iaduwen arail pahn kopwungla kahpwalo. Mwurin governing body wiahda koasoandi ehu, kitail wadek: “Eri, wahnpoaron ako oh me mah ko, iangahki tohn mwomwohdiso kan koaros, re ahpw pwungkihda re en pilada ekei ohl sang nanpwungarail pwe re en kadariraillahng Andiok pwe re en iang Pohl oh Parnapas.” “Ohl ko me pilipil”—Sudas oh Sailas—walahng iengerail me pwoson kan kisin likou en kangoang ehu.
18. Governing body wiahda koasoandi dahieu me pid Kosonned en Moses, oh iaduwen met e kamwekid Kristian mehn Suhs oh Mehn Liki kan?
18 Kisin likouwo me pakairki koasoandi me governing body wiahda tepkihda mahsan pwukat: “Iet kiht riamwail kan, wahnpoaron oh me mah kan, se kadarwohng kumwail at rahnmwahu, ong kumwail riat koaros me ipwidi wia mehn liki mahso, nan Andiok oh Siria oh Silisia.” Meteikan iang towehda mihding wet, ahpw e sansal me governing body kin wiawihkihda “wahnpoaron kan oh ohl mah kan.” Ngehnin Koht kin kaweid irail, pwehki kisin likouwo kosoia: “Pwe ngehn sarawi oh kiht pwungkipenehr me se sohte pahn katautauwihhkin kumwail mehkot likin soangen kosonned pwukat me konehng: kumwail dehr tungoale mwenge kan me meirongalahr ong dikedik en eni kan; dehr tungoale nta; dehr tungoale mahn mwopula; oh kumwail en pil liksang nenek. (Wiewia 15:23-29) Kristian kan sohte anahne sirkumsaisla de en kolokol Kosonned en Moses. Koasoandio sewese Kristian mehn Suhs oh Mehn Liki en ahnekipene soangen mwekid oh lokia tehieu. Mwomwohdiso kan perenda, oh minimin mihmihte, duwehte me kin wiawi nan sapwelimen Koht peneinei sampah pwon rahnwet pahn kaweid ngehnin en Governing Body en Soundadehde kan en Siohwa.—Wiewia 15:30-35.
Papah nan Minimin sang Powe
19. Dahme karehda minimin pweida mwahu nan sapwelimen Siohwa peinei en tohnkaudek kan?
19 Minimin kin mihe ma tohn peneinei ehu kin doadoahkpene. Met pil duwehte nan pneinei en tohn kaudek kan en Siohwa. Pwehki re mih pahn manaman sang powe, elder kan oh meteikan nan mwomwohdiso en senturi keiou kin papah Koht ni arail kin miniminiong governing body oh pwungki koasoandi me e wiahda. Ki sawas en governing body, elder kan kin ‘kalohki mahsano’ oh tohn mwomwohdiso koaros kin ‘pwungkipene dahme re potohwanda.’ (2 Timoty 4:1, 2; 1 Korint 1:10) Eri padahk mehlel en Pwuhk Sarawi ohte kin kohda nan kalohk oh nan mihding en Kristian kan, mendahki ma nan Serusalem, nan Andiok, nan Rom, nan Korint, de wasa soh lipilipil. Soangen minimin sang powe wet mihe nan rahnpwukat.
20. Pwehn kolokol atail minimin en Kristian, dahme kitail anahne wia?
20 Pwehn kolokol atail minimin, kitail koaros me iang kisehn sapwelimen Siohwa peneinei en sampah pwon anahne doadoahk pwehn kasalehda limpoak me kin mwekidki manaman sang powe. (1 Sohn 4:16) Kitail anahne uhpaiong kupwuren Koht oh kasalehda wauneki ‘ladu lelepek’ oh Governing Body. Duwehte atail inou ong Koht, ni mehlel, atail peik en sang mongiong oh kaperen. (1 Sohn 5:3) Ia uwen mwahu sounmelkahkao kin kadokehpene peren oh peik! E koulki: “Kapinga Jah, kumwail aramas kan! Meid pai aramas me kin wauneki Kaun-o (Siohwa), me kin alehki eh peren sang ni eh kin kapwaiada sapwelime kosonned akan.”—Melkahka 112:1.
21. Iaduwen atail pahn kasalehda me pein kitail kin mwekidki manaman sang powe?
21 Sises, me Tapwin mwomwohdiso, kin peikiong manaman sang powe oh ahnsou koaros wia kupwuren Semeo. (Sohn 5:30) Ihme karehda, kitail en idawen atail Mehn Kalimengo ni atail pahn mwekidki manaman sang powe oh miniminpene wia kupwuren Siohwa ni atail pahn doadoahkong Sapwelime pwihn. Eri ki peren sang nan mongiong oh kalangan, kitail kak iang koulki en sounmelkahkao ah koulo: “Ia uwen lingan, ia uwen kansenamwahu en sapwelimen Koht aramas akan ar kin miniminpene!”
Iaduwen Komw Pahn Sapeng?
◻ Iaduwen atail minimin en Kristian kin pidada Melkahka 133?
◻ Ia ekei ire me kin karehda miniminpene?
◻ Dahme karehda koasoandi sang powe me katapan ong minimin en sapwelimen Koht aramas kan?
◻ Iaduwen governing body en senturi keiou mwekid pwehn kolokol minimin?
◻ Dahme minimin sang powe kin wehwehkiong uhk?
[Kilel nan pali 11]
Governing body mwekid pwehn kolokol minimin