Kiripw—Ahl Ong Doadoahk Ni Soh Koaromwpwe
Pwe kumwail en kin papah Kaun-o [Siohwa] ni kapehd mehlel oh unsek.”—1 KORINT 7:35.
1. Rohng kansensuwed dah me Pohl alehdisang Kristian kan nan Korint?
ME wia wahnpoarono Pohl kin insenohki rie Kristian kan nan Korint, Krihs. Impen sounpar limau mwohwe, e kauwada mwomwohdioso nan kahnimw kepwehpweo me kin indandki ah tiahk samin. Met, impen pahr 55 C.E., nin doken ah mihmi nan Epsos, nan Eisia Mainor, e alehdi rohng sang Korint duwen arail saminimin oh duwen arail kin mweidala tiahk samin. Pil ehu, Pohl alehdi kisin likou ehu sang Kristian kan nan Korint me kin pekipekih kaweid me pid insenen pwopwoud, inoun kiripw kohkohlate, pwopwoud, tohrorpeseng, oh pwurehng pwopwouda sapahl.
2. Iaduwen tiahk samin ah rekla nan Korint kin sansal me e kin lellohng Kristian kan nan kahnimwo?
2 Tiahk samin me rekla nan Korint kin mwomwen kauwehla mwomwohdioshn wasao ni ahl riau. Ekei Kristian kin dukla pahn irair en pohnsowehla tiak mwakelekel oh kin mweidala tiahk samin. (1 Korint 5:1; 6:15-17) E sansal me ekei, pwehki arail sapwungki soangen mehn kainsenamwahu kan me rekla nan kahnimwo, eri kin daulihla ni arail kin irehdi wiewiahn insenen pwopwoud, pil ong me pwopwoud kan.—1 Korint 7:5.
3. Ire dahkei me Pohl mahs kapwungala nan nah kisinlikou keiou ong mehn Korint kan?
3 Nan nein Pohl kisin likou me e intingihlahng mehn Korint kan, e mahs kosoia duwen kahpwal en saminimin. (1 Korint, irelaud 1-4) E panauwihin irail en liksang idawen aramas, me kak imwikihla saminimin nan mwomwohdioso. Irail anahne miniminpene nin duwen “iengerail tohndoadoahk” en Koht. Mwuri e kihong irail kaweid oaretik kan ong iaduwen arail en kolokol mwomwohdiso en tiahk mwakelekel. (Irelaud 5, 6) Wahnpoarono eri uhd pwurelahng neirail kisin likouwo.
Anahnepen en Kiripw
4. Ia wehwehn mahsan en Pohl ni ah kosoia me “tiahk mwahu ehu rehn ohl, ma e sohte pahn pwopwoud”?
4 E tepikihda: “Iet pasapeng kei ong ni ire kei me audedahr noumwail kisinlikouwo. Tiahk mwahu ehu rehn ohl, ma e sohte pahn pwopwoud.” (1 Korint7:1) “Sohte pahn pwopwoud” wasaht kin wehwehkiong en liksang wia insenen pwopwoud ong lih emen. Pwehki Pohl mwohwe kadeikada duwen nenek, wasaht e kin kosokosoia insenen pwopwoud nan pwopwoud ehu. Ihme karehda, Pohl kin ahnsouwet kosoia duwen anahnepen en kiripw. (1 Korint 6:9, 16, 18; kaparekiong Senesis 20:6; Lepin Padahk 6:29.) Mwurin met, e intingihdi: “Ahpw iet ei peneu ong me sohte pwopwoud kan oh me liohdi kan: me pahn mwahu ma re en dadaurete ar kiripw, duwehte ngehi.” (1 Korint 7:8) Pohl sohte pwopwoud, ele ah pwoudo mehla.—1 Korint 9:5.
5, 6. (a) Dahme karehda e sansal me Pohl sohte kin kangoange mouren liksang peren en pwopwoud? (b) Dahme karehda Pohl kin kangoange emen en kiripw?
5 Ele Kristian kan nan Korint kin ese duwen padahk kan en Krihk, me ekei arail sukuhl kin kangoangehkin emen en mouren liksang soangen peren koaros. Ele ih karepe wet mehn Korint kan kalelepengki rehn Pohl ma e pahn “mwahu” ong Kristian kan en liksang wiewiahn insenen pwopwoud? En Pohl pasapeng sohte kin kasalehda padahk en Krihk. (Kolose 2:8) Me weksang sounpadahk kan en Kadolik, sohte wasa kis e kasalehda duwen anahnepen en mourki mouren liksang kaperen kan en pwopwoud oh mih nan ihmwen padire kan de lihkadek kan, me mwomwen aramas kiripw kan me keiou sarawi oh kak kamourala pein irail pwehki arail elen mour oh arail kapakap kan.
6 Pohl kin kasalehda anahnepen en kiripw “pwehki apwal en ahnsou pwukat.” (1 Korint 7:26) Ele e kin kosokosoia duwen ahnsou apwal kan me Kristian kan kin lelohng, me kin kohsang mouren pwopwoud. (1 Korint 7:28) A kaweid ong Kristian soh pwopwoud kan iei: “Me pahn mwahu ma re en dadaurete ar kiripw, duwehte ngehi.” Ong ohl akan me arail pwoud mehsang irail, e kosoia: “Ma aramas emen kiripw, a en dehr pwopwoudida.” Ong Kristian liohdi men, e intingihdi: “Ahpw liho pahn pai mehlel ma e dadaurete nan eh kiripw. Ih met ie lamalam, oh I pil lemeleme me Ngenen Koht me ketin audehkiniedahr met.”—1 Korint 7:8, 27, 40.
Kaiden Idihd Ehu En Kiripw
7, 8. Dahme kasalehda me Pohl sohte kin idingki Kristian kan en kolokolte arail kiripw?
7 Ngehn sarawi en Siohwa ni mehlel kin kaweidih Pohl ni ahnsou me e kin kihda kaweid wet. A padahk me pid duwen soh pwopwoud oh pwopwoud kin kasalehda touparek oh pil irairdi kan. E sohte kin padahngki me met wia irair en lelepek de salelepek. Ahpw, met kin pid pilipil saledek en emen, ahpw e pahn keiou mwahu ong irail en kiripw ma re kak kolokol arail mwakelekel nan irair wet.
8 Mwurinte e kosoia “tiahk mwahu ehu rehn ohl, ma e sohte pahn pwopwoud,” Pohl kapataiong: “Ahpw pwehki tiahk suwed eh nohn reklahr, e konehng ohl emen en mie eh pwoud, oh lih emen en mie eh pwoud.” (1 Korint 7:1, 2) Mwurin eh kaweidih me kiripw kan oh irail kan me arail pwoud kan mehsang irail en “dadaurete ar kiripw, duwehte ngehi,” Pohl pil mwadang kapataiong: “Ahpw ma re sohte kak kaunda ar ineng kan en nan pwopwoud, a re en pwopwoudida; pwe pwopwoudida mwahu sang mwasimwasingki engin ineng suwed kan.” (1 Korint 7:8, 9) E pil pwurehng kapwureheng e kaweid ong irail kan me arail pwoud kan mehsang irail: “Ma aramas emen kiripw, a en dehr pwopwoudida. Ahpw ma ohl kiripw men kowe, ke ahpw pwopwoudida, ke sohte wiahkihda dihp.” (1 Korint 7:27, 28) Kaweid touparek wet kin kasalehda me emen ahneki saledek en pilipil.
9. Nin duwen me Sises oh Pohl kasalehda, iaduwen irair pwukat koaros pwopwoud oh kiripw kin wia kisakis kei sang rehn Koht?
9 Pohl kasalehda me irair en pwopwoud oh irair en kiripw kin wia kisakis kei sang rehn Koht. “Pwe iet me I mwahukien: kumwail koaros en duwehte ngehi. Ahpw paien kalahngan en Koht kohiengehr emenemen kumwail koaros, ahpw tohrorpeseng, pwe ong emen ehu soahng, a ong emen ehu soahng.” (1 Korint 7:7) Ni mehlel e kin medemedewe dahme Sises kosoia. Mwurin ah kasalehda me koasoandien pwopwoud kohsang rehn Koht, Sises kasalehda me e wia kisakis ehu ma emen kin men kiripwte pwehn kak papah mehkan me pid Wehio: “Kaidehn koaros me kakohng ale padahk wet, pwe irailte me mweimweiong sang powe. Pwe karepe kei mie me karehda aramas sohte kak pwopwoudida: rehn ekei, pwehki sang ni ar ipwidi paliwararail kan sohte unsek, rehn ekei, sang ni ar lekalahr paliwararail sohte unsek; a rehn ekei, sang ni pein nsenarail pwehki Wehin Koht, re sohte kin pwopwoud. Mehmen me kak ale padahk wet, a en ale.”—Madiu 19:4-6, 11, 12.
En Alehda Kisakis en Mouren Kiripw
10. Iaduwen emen kak “alehda” kisakis en kiripw?
10 Nin doken ira koaros Sises oh Pohl kin kosoia me kiripw kin wia “kisakis ehu,” ira sohte kin kosoia me e wia kisakis manaman ehu me ekeite kak wia. Sises mahsanih me “kaidehn aramas koaros me kak ale” kisakis wet, oh e panauwihki irail ko me kakohng met en “alehda mour wet,” mehkot me Sises oh Pohl kin wia. Mehlel, Pohl intingihdi: “Pwe pwopwoudida mwahu sang mwasimwasingki engin ineng suwed kan,” ahpw e kin kosokosia duwen irail kan me “sohte kak powehdi arail ineng kan.” (1 Korint 7:9) Nan nah kisinlikou kan en mwowe, Pohl kasalehda me Kristian kan kak liksang ineng suwed kan. (Kalesia 5:16, 22-24) Pwehn kekeidki ngehn kin wehwehkiong en mweidong ngehnin Siohwa en kalwa atail kahk kan koaros. Kristian pwulopwul kan kak wia met? Ehi, ma ni keneinei re idawen Mahsan en Siohwa. Sounmelkahkao intingihdi: “Ia duwen mwahnakapw men [de pehinakapw men] eh kak dadaur eh mour mwakelekel? Eh pahn kin kapwaiada sapwelimwomwi kosonned kan.”—Melkahka 119:9.
11. Ia wehwehn en ‘momour nin duwen kupwur en ngehno’?
11 Met kin pidada pere kitail sang lamalam en mour saledek me TV kan, kasdo kan, makasihn kan, pwuhk kan, oh koul kan kin kapwarehda. Soangen lamalam pwukat kin kamwekidada ineng en pali uduk. Kristian ohl de lih pwulopwul men me men alehda mouren kiripw anahne “momour nin duwen kupwur en ngehno, kaidehn ni duwen ahnepen aramas. Pwe irail akan me kin momour nin duwen ahnepen aramas, re kin insenohki duwen arail pahn kapwaiada ahnepen aramas. A irail akan me kin monour nin duwen kupwur en ngehno, re kin insenohki duwen arail pahn kapwaiada kupwur en ngehno.” (Rom 8:4, 5) Mehkan me pid ngehno kin pwung, mwakelekel, koampoake, waun. Kristian kan, me pwulopwul kan oh me mah kan, anahne “kaukaule audaudkihda mepwukat.”—Pilipai 4:8, 9.
12. Dahme kin keiou pidada alehda kisakis en mouren kiripw?
12 Pwehn kak alehda mouren kiripw, emen anahne koasoanehdi mongiongih pohn mehn akedei wet oh kapakapkiong Siohwa pwehn kak sewese ih kapwaiada met. (Pilipai 4:6, 7) Pohl intingihdi: “Ma emen koasoanehdi nan mongiongih, me e konehng, ahpw anehki manaman sang ni pein insene oh wiahda koasoandi wet nan mongiongih, pwehn kolokol ah meipwon, me mwahu. Emen me pil pwopwoudida pil mwahu, ahpw emen me sohte pwopwoudida pil mwahusang.”—1 Korint 7:37, 38, NW.
Kiripw Pwehki Karepe Ehu
13, 14. (a) Kaparekpene dahieu wahnpoaron Pohl wiahda nanpwungen Kristian kiripw kan oh Kristian pwopwoud kan? (b) Iaduwen Kristian kiripw men kin “wia mwahusang” irail ko me pwopwoud?
13 Emen kin kiripw kaidehn pwehn wahdo kaping ong pein ih. Eri, ni ahl dah, me e “mwahusang”? Met kin poahsonda pohn iaduwen emen kin doadoahngki saledek me mouren kiripw kin wahdo. Pohl intingihdi: “Ihme I men kumwail en dehr kin pwunodki kedirepw kan en sampah wet. Pwe aramas me sohte eh pwoud, kin ngoangki apwalih mehkan me sapwelimen Kaun-o; pwe e kin nantihong kaparanih Kaun-o. Ahpw aramas pwopwoud kin kedirepwki mehkan me kisehn sampah, duwen eh pahn kansenamwahuwih eh pwoud ape. Iei me nsenen nan kapehde kin pwalpeseng oh uhlang wasa riau. Lih kiripw de meipwon kin ngoangki mehlel apwalih mehkan me sapwelimen Kaun-o. Ihme e kin ngoangkihki kasarawihong Kaun-o paliwere oh pali ngene. A lih pwopwoud kin kedirepwki mehkan me kisehn sampah wet, pwehki eh kin men kansenamwahuwih eh pwoud. I ndawohng kumwail mepwukat, kaidehkin pwehn ireikumwaildi, ahpw pwe I en sewesehkin kumwail. Pwe I anahne kumwail en kin wia dahme mwahu oh dahme pwung, pwe kumwail en kin papah Kaun-o ni kapehd mehlel oh unsek.”—1 Korint 7:32-35.
14 Kristian kiripw men me kin doadoahngki ah irair en soh pwopwoud pwehn nantihong mehn akedei roporop kan sohte “mwahusang” Kristian pwopwoud kan. E kin kolokol ah irair en kiripw, kaidehn “pwehki mehkan me pid wehio,” ahpw pwehki pein ah ineng kan. (Madiu 19:12) Ohl kiripw men de lih kiripw men anahne “ngoangki apwalih mehkan me sapwelimen Kaun-o,” en “nantihong kaparanih Kaun-o,” oh en “papah Kaun-o ni kapehd mehlel oh unsek.” Met kin wehwehki en loaleniohng papah Siohwa oh Sises Krais. Ihte ma re wia met eri Kristian ohl oh lih kiripw kan kin “mwahusang” Kristian pwopwoud kan.
Doadoahk Ni Soh Keremwpwe
15. Ia mouren ahn Pohl padahk nan 1 Korint irelaud 7?
15 Mouren ahn Pohl padahk nan irelaud wet iei: Nin doken pwopwoud me pwung oh, pahn ekei irair, konehng ekei, kiripw ni mehlel kin mwahuwohng Kristian ohl oh lih kan me men papah Siohwa ni soh keremwpwe. Nin doken aramas pwopwoudo kin “pwalpeseng,” Kristian kiripwo kin saledek pwehn kak apwalih “mehkan me sapwelimen Kaun-o.”
16, 17. Iaduwen Kristian kiripw men kak apwalih mwahu “mehkan en Kaun-o”?
16 Dahkan sapwelimen Kaun-o me Kristian kiripw men kak apwalih ni saledek laudsang irail kan me pwopwoud? Nan ehu ire, Sises kin kosoia duwen “mehkan me sapwelimen Koht”—mehkan me Kristian kan sohte kak kihong Sihsar. (Madiu 22:21) Mepwukat kin pidada en Kristian men mour, kaudek, oh kalohk.—Madiu 4:10; Rom 14:8; 2 Korint 2:17; 3:5, 6; 4:1.
17 Irail kan me kiripw kin keiou saledek en kihda ahnsou laud ong papah Siohwa, me kak wia kapai ehu ong arail irair en pali ngehn oh kalaudehla arail kalohk. Re kak ahneki ahnsou laud ong pein onop oh medemedewe loal ire kan. Kristian kiripw kan kak koasoanehiong nan arail schedule arail wadek Paipel mengei sang irail ko me pwopwoud. Re kak kaunopada mwahu ong mihding oh kalohk. Mepwukat koaros pahn wiawi ong “katingparail.”—1 Korint 7:35.
18. Iaduwen brother kiripw tohto kasalehda me re men papah Siohwa “ni soh koaromwpwe”?
18 Brother kiripw tohto me kin papah nin duwen ministerial servant kan kin saledek en indahiong Siohwa: “Iet ngehi! Kadariehla.” (Aiseia 6:8) Irail kak kapidelong neirail kisinlikouhn pekipek pwehn iang towehda sukuhl me adaneki Ministerial Training School, me kin wiawihdahng ministerial servant kan oh elder kan me saledek en kak papah wasa kan me kalohk anahne wiawihie. Pil brother kan me ahneki peneinei oh sohte kak kohkohsang arail mwomwohdiso kak kihda pein irail pwehn papah riarail kan nin duwen ministerial servant kan de elder kan.—Pilipai 2:20-23.
19. Iaduwen sister kiripw kan kin ale kapai, oh ia ehu ahl me re kak wia kapai ehu ong mwowmohdiso?
19 Pwehki sohte arail tapwi me ren pehseiohng oh ehukihong ire rir kan, e kin mengeiong sister kiripw kan ‘mweidong Siohwa arail pwunod kan.’ (Melkahka 55:22; 1 Korint 11:3) Met me keiou kesemwpwal ong sister kan me kolokol arail irair en kiripw pwehki arail poakohng Siohwa. Ahpw ma re pwopwoudida “ihte ni mwaren Kaun-o,” met wehwehki en pwoudkihda emen laduhn Siohwa. (1 Korint 7:39) Elder kan kin kalahnganki sister kiripw kan nan arail mwomwohdiso; pwe sister pwukat kin kalap pwarek oh sewese me soumwahu kan oh me mah kan. Met kin wahdo peren ong koaros.—Wiewia 20:35.
20. Iaduwen Kristian tohto kin kasalehda me re kin “papah Kaun-o ni kapehd mehlel oh unsek”?
20 Kristian pwulopwul tohto kin koasoanehdi arail kedirepw kan pwe ren kak “papah Kaun-o ni kapehd mehlel oh unsek.” (1 Korint 7:35) Re kin papah Siohwa nin duwen pioneer kan, misineri kan, de papah ni ehu rahn ohpis kan en Watch Tower Society. Oh ia uwen arail kin wia pwihn peren ehu! Ia uwen kansenamwahu en arail wiewia! Mwohn silangen Siohwa oh Sises, re “rasehng pwoiken nimensehngie.”—Melkahka 110:3.
Sohte Inoun Kiripw Kohkohlahte
21. (a) Dahme karehda e sansalki me Pohl sohte kin kangoangehkin emen en alehda inoun kiripw kohkohlahte? (b) Ia wehwehn ah mahsan ni ah kosoia duwen “daulihla ineng en me pwulopwul”?
21 Ehu mouren ahn Pohl kaweid iei me e “mwahu” en kolokol mouren kiripw. (1 Korint 7:1, 8, 26, 37) Ahpw, e sohte inda me ren alehda inoun kiripw kohkohlahte. Me weksang met, e intingihdi: “Ma mehmen lemeleme e wiewia me sohte pwung ong ah mouren meipwon, ma e daulihlahr ineng en me pwulopwul, oh ih met me pahn wiawi, mweidong ih en wia nsene; e sohte dipada. Mweidong ren pwopwoudida.” (1 Korint 7:36, NW) Lepin lokaiahn Krihko (hy·peʹra·kmos) me kawehweh “daulihla ineng en me pwulopwul” kin wehwehki “daulihla irair me keiou laud” oh kin wehwehkiong daulihla ahnsou me ineng en uduk kin keiou laud. Eri irail ko me kolokol arail irair en kiripw wereilahr oh eri pepehm me ren pwopwoula saledek en pwoudikihda emen me pwoson.—2 Korint 6:14.
22. Dahme karehda e mwahuki Kristian men en dehr pwopwoudla ma e nohn pwulopwul?
22 Sounpar kan me Kristian pwulopwul men kin doadoahngkiohng papah Siohwa ni soh koaromwpwe kin wia elen erpit. Erein ahnsouwo e mweidong meno en alehda loaloakong, koahiok, oh wehwe. (Lepin Padahk 1:3, 4) Aramas emen me kolokol ah irair en kiripw pwehki Wehio kin mih nan irair mwahu ehu, ma mwuhr, e koasoanehdi, en alehda pwukoah kan en mouren pwopwoud oh ele pwukoahn naineki seri.
23. Dahme ekei me medemedewe ren pwopwoudla pahn kasikasik, ahpw peidek dahieu me pahn pasapengla nan artikek kan en mwuri?
23 Ekei Kristian me papah Siohwa nan doadoahk en ahnsou-kaukaule sounpar tohto nan irair en kiripw kin ni keneinei pilada arail pwoud kan me pahn iang irail pousehla arail papah en ahnsou-kaukaule. Kaping en keiou kohieng met. Ekei kin kasikasik me ni ahnsou me re pwopwoudla re sohte pahn mweidohng arail pwopwoud en irehdi arail papah. Ahpw anahne Kristian pwopwoud emen en lemeleme me e saledek en medemedewehte ah papah Siohwa duwehte ahnsou me e kiripw? Peidek wet pahn pasapengla nan artikel kan en mwuri.
Kousapahl
◻ Dahme karehda wahnpoaron Pohl pehm anahnepen en intinglahng mwomwohdiso nan Korint?
◻ Dahme karehda kitail esehki me Pohl sohte kin kangoange mouren liksang peren en pwopwoud?
◻ Iaduwen emen kak “alehda” mouren kiripw?
◻ Iaduwen sister kiripw kan kak paikihda arail irair en kiripw?
◻ Ni ahl dahkan brother kiripw kan kak isaneki arail saledek en papah Siohwa “ni soh koaromwpw”?