“Doadoahngki Mwahu Kisakis en Kiripw”
1 Ehu rahn, Sises mahsanih ong sapwellime tohnpadahk kan duwen pwopwoud, oh e mahsanih me kiripw wia ‘kisakis’ ong ekei aramas. Mwurin mwo, e mahsanih: “Emen en kiripw ma e kak.” (Madiu 19:10-12) Sounpahr kei mwuri, wahnpoaron Pohl pil ntingihdi duwen kamwahupen kiripw oh kangoange aramas en kahlemengih ih pwe e sohte pwopwoud. (1 Kor. 7:7, 38) Irail me tohto rahnwet kiripw oh kin perenki kamwahupe kan. Ia ekei kamwahupe kan?
2 Papah Siohwa “Ni Soh Kerempwa”: Pohl wehwehki me pwehki ah kiripw kahrehda e kak papah Siohwa “ni soh kerempwa.” Oh pil duwehte rahnwet, irail brother kan me kiripw kak iang Ministerial Training School, oh pil irail me kiripw kin saledek sang irail me pwopwoud kahrehda irail kak wiahla pioneer kei, sukuhliki lokaia kapw ehu, keseula wasakis me anahne sounkalohk, doadoahk nan Bethel, de wia pil ehu doadoahk tohrohr me pid duwen papah Siohwa. Irail me kiripw kin kak mie arail ahnsou en onop loal, doudouloale, oh pil kapakap ong Siohwa. Irail me sohte pwopwoud kin kak ahneki ahnsou en tohnmeteiki pein irail oh sewese meteikan. Doadoahk pwukat koaros kin wia soahng kan me pahn “wia pein kamwahuparail.”—1 Kor. 7:32-35; Wiewia 20:35.
3 Ma emen pahn papah Siohwa ni sohte mehkot pahn kerempwa ih, e pahn ale kapai tohto. Mwurin emen sister me kiripw kalohk nan Kenya sounpahr 27, e ntingihdi: “Kompoakepahi kan inenen tohto oh doadoahk tohto me se wia! Se kin ehupene wia soahng tohto oh se kin mwemweitpene. . . . I doadoahngki ahi ahnsou oh saledek me kohsang ahi kiripw pwehn kedirepwki doadoahk en kalohk, oh met kihong ie peren laud.” E kapataiong oh pil koasoia: “Ahi nanpwung mwahu rehn Siohwa kekeirada nan erein sounpahr tohto pwukat.”
4 Doadoahngki Mwahu Kisakis en Kiripw: Sises mahsanih me kahrepen emen e pahn kiripw iei “pwehki Wehin Koht.” (Madiu 19:12) Duwehte kisakis sohte lipilipil, ma emen pahn doadoahngki eh ahnsoun kiripw ni ahl me mwahu, e kak wahdohng ih peren oh kamwahu kan. Sang emen e pahn isaneki ahnsou mwahu kan me kin kohsang kiripw oh pil likih Siohwa pwehn ale erpit oh kehl, irail me kiripw tohto me wehwehkiehr duwen kamwahupe kan oh kesempwalpen doadoahngki mwahu arail kisakis en kiripw.