Kihda Sawas Nan Ahnsoun Apwal Akan
ARAMAS ar kin nantiong kihda sawas mwurin kahpwal akan uhdahn anahne kaping en kohwong. Koasoandi en sawas tohto kin sewesehda pwurehng onohnda sapahl en ihmw akan, kapwurehpene peneinei kan, oh mwohn mehkoaros, doarehla mour en aramas akan.
Ni ahnsou me kahpwal akan kin leledo, Sounkadehde kan en Siohwa kin isaneki—oh kalahnganki—sawas kan me koasoandi en sawas en sampah kin kihda. Ni ahnsouohte, re ahneki pwukoah sang Pwuhk Sarawi en “wia mwahu. . .mehlel ong [irail] kan me kisehn atail pwoson.” (Kalesia 6:10) Ehi, Sounkadehde kan kin ahneki pepehm me re peneinei; re kin kilangwohng emen emen ni duwen arail “peneinei.” Ihme karehda re kin ekerki emen emen “rie ohl” oh “rie lih.”—Kaparekiong Mark 3:31-35; Pailimwon 1, 2.
Eri ni ahnsou ehu me kahpwal kin lelohng wasa kis, elder kan nanpwungen Sounkadehde kan en Siohwa kin nantiong tehkada wasa oh anahnepen emen emen tohn mwomwohdiso oh wiahda koasoandi ong kihda sawas. Tehk ia uwen met mehlel nan Accra, Ghana; San Angelo, U.S.A.; oh Kobe, Japan.
Accra—“Kisin Rahn en Noha”
Keteu tepiada mweredi impen kuloak 11 ni soutik, oh wie mweremwerdi ahnsou reirei. John Twumasi, emen Sounkadehdehn Siohwa nan Accra, kosoia: “E keteu mosul me karehda ahi peneinei pwon sohte kak meirla.” Nuhspehpe Daily Graphic kahdaneki keteuwo “kisin rahn en Noha.” John pousehla kosoia: “Se nantiong wadala ekei dipwsou kesemwpwal nan pere kan powe, ahpw ni ahnsou me se ritingada wenihmw me kohdalahng pere kan powe, pihl kuslong nan ihmwo.”
Lapalap kan pakairki me aramas en kohsang nan imwerail kan, ahpw me tohto pweiek, re masak pwe ma sohte tohnimwerail—mendahki ma e pil dirkihla pihl—pahn kak karehong sounpirap akan en pidelong oh pirap. Ekei sohte kak pidoi mendahki ma re men pidoi. Emen kisin serepein me adaneki Paulina kosoia: “Ahi nohno oh ngehi sohte kak ritingada wenihmwo. Pihlo wie kohkohda, me karehda se kesihnenda pohn ehu diroam tuhke oh wie kolokol rehu en ihmwo. Ikmwuri, impen kuloak limau ni sohrahn, mehn impat kan seweseda kiht.”
Mwadangete mwurin met, Sounkadehde kan en Siohwa tepiada sawas. Emen Kristian sister me adaneki Beatrice kosoia: “Elder kan en mwomwohdiso kin raparapahkin kiht, oh re diarkihtda ni imwen iengetail Sounkadehde men, wasa se rukla ie. Rahn siluhte mwurin lapakeo, elder kan oh me pwulopwul kan en mwomwohdiso kohdo reht oh oare sang pwelimatak nan ihmw oh likin ihmw. Watch Tower Society kihda sohp, wini en kamwakel, litopw, maderes, pilangkes, likou, oh likou en seri kan. Rietail Kristian kan pil kadardohng kiht mwenge ong rahn tohto. I uhdahn kalahnganki met!”
John Twumasi, me sansalda mwohwe, repotki: “I padahkiong ekei aramas kan me kin iang mih nan ihmwo me I kin kouson loale me atail Society kadardohng kiht sohp oh wini en kamwakel kan—me itar ong kamwakeleda ihmwo pwon. Mpen aramas 40 me kin iang mih nan ihmwo iang sewese kamwakeleda ihmwo. I kihong mehn impei kan ekei sohp akan, iangahki pil ong emen ohl me wia padirehn ihmw sarawi en wasao. Iengei tohndoadoahk kan kin sapwung ni arail kin lemeleme me Sounkadehde kan en Siohwa kin kasalehda limpoak ongete tohn arail pelien lamalam.”
Kristian brother oh sister kan kin inenin kalahnganki sawas limpoak me kin kohwong irail. Brother Twumasi kaimwsekihla kosoi wet: “Mendahki ahi kepwe kan me salongala nan lapakeo me pweilaudsang kepwe kan me sawas kan kihda, ahi peneinei oh ngehi pepehm me pwehki koasoandi en sawas limpoak wet sang Society, se mwomwen aledahr kepwe tohtosang me se katiasang.”
San Angelo—“Ngilen me Sampah Pahn Imwsekla”
Melimel kan me kauwehla San Angelo ni May 28, 1995, karehong tuhke kan en sansarada, katumwpeseng deisenpasara kan, oh kesehdiong pohn ahl akan. Kisinieng kan marahrahkihla mwail 100 awa ehu, oh e kauwehla tuhken lioal teikan. Sohla lioal me kohwong ihmw 20,000. Mwuri keteu ais takai eri mweredi. National Weather Service repotki me “keteu ais takai me uwe umpwein kolp,” mwuri re uhd kahdaneki “keteu ais takai me uwe umpwein iakiu,” oh kaimwsekla re kahdaneki “kotoun ais takai me uwe wahn tuhke grapefruit.” Soangen kotou wet me inenin katairong. Emen me kin kouson wasao kosoia: “Ngilen me sampah pahn imwisekla.”
Nan wehwe eri meleileidi mwurin soangen melimel wet. Ni soh karuaru aramas kan eri pidoisang nan ihmwarail ohla kan pwehn kasawihada ia uwen ohla kan me wiawida. Tuhke kan me wie kesikesihnen sohla tehrail. Ihmw kan me kesikesihnente sohla dihdarail. Nan ekei wasa ais takai kan pwaindi pwehlo oh kin kosokosokda lel piht siluh. Wenihmw tok kilahs kid kei en ihmw akan oh sidosa kan pwalpeseng nan melimelo, me karehong diper en kilahs kan kin wie lingaling sang nan ais takai kan me pwaindi nan pwehl. Emen lih kosoia: “Ni ahnsou me I lel ni ihmweo, I mwohndihte nan werei sidosao oh wie sengiseng. Ohla sang melimel wet me inenin laud, oh e uhdahn kansensuwedih ie.”
Koasoandi en sawas kan oh imwen wini kan mwadangete kihda sawas en pelien mwohni, oh dipwsoun kauwada ihmw kan, oh wini kan, oh sawas en kaweid kan. Kaping pil anahne kohwong me tohto, me pein irail mihla pahn kahpwalo sang melimelo ahpw kin wia dahme re kak wia pwehn sewese meteikan.
Mwomwohdisohn Sounkadehde kan en Siohwa kin pil iang sawas. Aubrey Conner, emen elder nan San Angelo, repotki: “Mwurin melimelo uhdi, se tepiada dengwaseli pwehn esehda iren emen emen. Se sewese pein kiht oh mehn impat kan me kaidehn Sounkadehde pwehn poasuriong ni wenihmw tok kan dinapw, kihong pohn oahs mete kan plasdik, oh katengehdi ihmw kan sang melimel uwen me se kakohng. Kiht eri wiahda repot en aramas koaros nan mwomwohdiso me ihmwerail kan ohla. Mpen ihmw epwiki kei anahne onohn sapahlda, oh dipwisoun kouihmw kan sang pwihn en sawas kan sohte itar. Kiht eri pwainda pil ekei dipwsoun kouihmw oh eri wiahda koasoandi en tepiada doadoahk. Koaros patpene, Sounkadehde 1,000 kei me pein toukihda arail sawas, mpen aramas 250 me kin doadoahk ni imwin wihk koaros. Irail kohdo sang wasa doh impen mwail 450. Koaros kin doadoahk pwerisek, pak tohto pahn mesen lahng me dekri 100. Pil emen sister me mahki sounpar 70 kin iang kiht doadoahk imwin wihk koaros ihte ehu me e sohte iang, met iei rahn me pein imweo onohn sapahlda. Oh ni imwin wihko e mih pohn oahs en imweo iang sewese onehda imweo!
“Se kalap rong aramas kan kin nda, ‘E sohte pahn mwahu ma pelien lamalam teikan pahn pil wia met ong towe kan?’ Mehn mpat kan pwuriamweiki kilang pwihn en Sounkadehde 10 lel 12 me pein toukihda arail sawas (iangahki sister kan) me pwerisang ni imwen emen Sounkadehde ni mensengie en Ni Alem, oh onopadahr pwehn onehda sapahl de pil kauwada sapahl oahs metehn ihmwo pwon ni soh isepe. Nan irair tohto doadoahko kin kaneknekla erein imwin whik ehute. Mie ahnsou kan me, emen tohndoadoahk me kaidehn Sounkadehde kin mih nanpwungen ah kadoakoadoahke oahs metehn ehu ihmw ni en atail pwihn en doadoahk kin pwerisang ni ihmw teio me kereni ihmw me e wiewia. Se pahn kihsang oahs en ihmwo oh onehda sapahl oh kamwakelehda likin ihmwo mwohn pwihn teio kanekehla arail doadoahko. Ekei pak re kin uhdisang arail doadoahk pwehn kilang at doadoahk!”
Brother Conner kaimwsekihla kosoi wet: “Kiht koaros pahn loaleidkihda ekperiens kan me se kin paikihda ni at kin miniminpene. Se eselahr emen emen ni at kin kasalehda oh re kin pil kasalehong kiht limpoak ni uwe ehu me sohte kin wiawi sang mahs. Se pepehm me met ihte karaspen dahme pahn pweida nan sampah kapw en Koht, wasao me brother kan oh sister kan pahn sewese emen emen pwehki re uhdahn inengieng wia met.”—2 Piter 3:13.
Kobe—“Kihd en Tuhke kan, Plasder oh Paliwaren Aramas”
Tohn Kobe kan lemeleme me re onopadaiher. Met mehlel, pwe Septempe 1 koaros re kin kawahuwi rahn me adaneki Disaster Prevention Day. Seri en sukuhl kan kin kamwomweda mwekid en dahme re pahn wia ma mie rerrer en sahpw, sounpei kan kin kamwomweda iaduwen re pahn doadoahngki elikapter pwehn kapitala aramas kan, oh pelien kisiniei kin wahdo neirail misihn kan me kin kamwomweda me mie rerrer en sahpw, me voluteer kan kin kaianehda arail koaiok en pitla nan kisin pere ehu me kin rerrer duwehte rerrer en sahpw. Ahpw ni ahnsou me rerer en sahpw uhdahn wiawi ni January 17, 1995, kaunopada pwukat koaros sohla katepe. Oahs en ihmw kid kid kei rengedi—mehkot me sohte wiawi nan misihn en kamwomweda rerrer en sahpw. Train kan wekidekdi; kisehn ahl pave akan mwerpeseng; paip en kahs kan oh pihl akan pwospeseng; ihmw kan rengedi duwehte doarepwe. Time makasihn kosoiaki met me duwehte “kihd en tuhke kan, plasder oh paliweren aramas.”
Mwurin met kisiniei lulda wasa koaros. Ihmw kan lulda oh sounkakun kisiniei kan sohte kak sewese pwe wererail sidosa kan tengala nanpwungen sidosa kan me sohte kak tang pwehki wen tohtolahn sidosa. Irail ko me kasaingedi kisinieio kin kalap diarada me sohte pihl kak kohsang nan paip kan pwehki ah ohla. Emen me lapalap kosoia: “Tepin rahno inenin kasalo. I saikinte pehm soangen soh katepe nan ahi mour, ni ahi ese me aramas tohto tengala pahn ihmw ko me lulda. Oh ahi ese me sohte mehkot ih kak wiahiong met.”
Koaros patpene, impen aramas 5,000 mehla, oh kereniong ihmw 50,000 ohla. Ihte silikis ehu en mwenge me mih nan Kobe. Pwehn ale pihl ekei aramas kin edipada pihl samin me mih pahn paip en pihl ko me pwospeseng. Irail aramas tohto me sohla ihmwerail kin tangalahng wasahn rukla kan, ekei wasa pwukat kin nekohng aramas kan uwen me emen pahn kangala, ni arail kin nekohng emen emen aramas rahn ehu pwonopwon en rais ehu. Aramas kan ahpw sohla nsenamwauki met. Emen ohl kampleinki: “Kaun akan sohte sawas. Ma se mihmihte oh awiawih irail se pahn dupekla oh mehla.”
Mwomwohdiso kan nan Kobe oh nan wasa kan me kerenih irail eri mwadangete pein onopadahng met. Emen sountangahki elikapter me kilang arail doadoahk kosoia: “I kohla wasa me rerrer en sahpwo wiawi ni rahno me rerrer wet wiawi oh mihmihki mwo erein wihk ehu. Ni ahnsoun me I lel ehu wasan rukla, soang koaros me pingiping. Sohte doadoahk en sawas ehu me wiawihda. Sounkadehdehn Siohwa kan kelepw me mwadangewohng wasao me ohla, oh apwalhiala kahpwal kan me kin pwarada.”
Mehlel, tohto doadoahk me anahne wiawihda. Kingdom Hall eisek ohla oh re sohte kak pwurehng doadoahngki, oh pohnangin Sounkadehde 430 me sohla imwerail. Ihmw 1,206 me re kin kouson loale anahne onohnda. Kaidehn ihte met ahpw pil peneinei en Sounkadehde 15 me mehla nan kahpwal wet anahne kamweit.
Mpen Sounkadehde 1,000 sang nan sahpwo pein toukihda arail ahnsou pwehn sewese doadoahk en onohn sapahl. Emen brother kosoia: “Ni ahnsou me se kin koadoahke imwen irail kan me kin onop Paipel ahpw saikinte papdaisla, re kin kalelepek reht,‘Ia uwen pweine me se pahn pwainong kumwail?’ Ni at kin padahkiong irail me doadoahko kin kohsang ni sawas en mwomwohdiso, re kin kasalehda arail kalahngan, oh nda, ‘Dahme se sukuhlki ahnsouwet pweidahier!’”
Me tohto kin wadekala Sounkadehde kan ar kin mwadang oh kin loaleniong sewese anahn en kahpwalo. Sountangahki elikaptero me sansalda mwowe kosoia: “I uhdahn wadekala kumwail. Kumwail kin lukwerihki emen emen ‘brother’ oh ‘sister.’ I kilangehr mwomwen amwail kin sewese emen emen; kumwail uhdahn wia peneinei mehlel ehu.”
Pein Sounkadehde kan sukuhlkihdi mehn kasukuhl kesemwpwal ehu sang rerrer en sahpwo. Emen sister wehkada: “Ahnsou koaros I kin medemedewe me ma tohn pwihn ehu kin tohtohla, eri e pahn apwalla en kasalehda nsenohki emen emen.” Ahpw epwel limpoak me lih menet alehdi wekidala ah lamalam. E kosoia: “Ahnsouwet I esedahr me Siohwa kin ketin apwahpwalih kitail kaidehn nin duwen pwihn ehute ahpw pil nin duwen emen emen aramas.” Ahpw sawas poatopoat sang kahpwal kan mihmih mwohtail.
Maiou Poatopoat Sang Kahpwal Kerendohr!
Sounkadehde kan en Siohwa kin kilikilangwohng ahnsou ehu me mour en aramas oh dahme re koadoahkeda sohte pahn ohkihla kahpwal. Nan sapwelimen Koht sampah kapw, aramas pahn ale kasukuhl en ehuwiohng koasoandi en kapikipik kan. Ni en aramas pwilikihdi arail wiewia roporop kan, re sohla pahn mengeiohng kahpwal kan me kin kohsang koasoandi en kapikipik kan.
Pil ehu, Siohwa Koht—Sounkapikipen kehl en kapikipik kan—pahn apwaliahla pwe sapwelime peneinei en sampah oh kapikipik kan pohn sampah en dehpa pwurehng mihla nan keper en kehl kan en kapikipik kan. Eri sampah pahn uhdahn wiahla paradais ehu. (Aiseia 65:17, 21, 23; Luk 23:43) Kokohpo nan Kaudiahl 21:4 pahn pweida mehlel: “E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”
[Kilel nan pali 5]
Beatrice Jones (ni pali meing) kamwomwehda iaduwen ih oh meteikan wiahda mwomwen sahl ehu pwe ren kak kotehla pihlo
[Kilel nan pali 6]
Sawas en doadoahk mwurin melimel