Dahme Koht Kupwurki Kitail En Wia?
“Pwe iet duwen wehwehn poakohng Koht: kitail en peikiong sapwelime kosonned akan. Oh sapwelime kosonned akan me sohte apwal.”—1 SOHN 5:3.
1, 2. Dahme karehda e sohte kapwuriamweiki me mie sapwelimen Koht kosonned kan me e kupwurki irail ko me kaudekong ih ni pwung anahne kapwaiada?
“HI KAUDEK mwahuehr!” Kaidehn met me aramas kalap inda? Ahpw, ni mehlel, peideko pahn kalelepek, “Ahi pelien lamalam kin kaperenda Koht?” Ehi, mie sapwelimen Koht kosonned kan me e kupwurki irail ko me men kaudekohng ih ni pwung anahne kapwaiada. Met kin wia mehkot kapwuriamwei ong kitail? Soh. Iaduwen ma ke imwaneki ihmw kaselel ehu, ehu me ke ahpwtehn onehda sapahl me inenin pweilaud. Ke pahn mweidohng aramas soh lipilipil en kousonla loale? Uhdahn soh! Irail ko me pahn kouson loale anahne kapwaiada kosonned kan me ke pahn wiahda.
2 Me rasehng met, Siohwa Koht ketikidahr sampah wet ong peneinei en aramas kan. Pahnangin ah kaunda, sampah pahn ahnsou keren “onohn sapahlda”—wiliakapwala wiahla paradais lingan ehu. Siohwa pahn ketin wiahda met. Me uhdahn wia pweipwei laud ehu ong ih, e ketikihda sapwelime Ohl tehmeno pwe mehwet en kak wiawi. Ni mehlel, Koht sapwelimanki kosonned kan me e kupwurki irail ko me pahn mour pohn sampah en kapwaiada!—Melkahka 115:16; Madiu 6:9, 10; Sohn 3:16.
3. Iaduwen Solomon oarelapiada dahme Koht kupwurki kitail en wia?
3 Iaduwen atail kak diarada ia kupwuren Koht? Siohwa kamwekid Nanmwarki loaloakong Solomon en oarelapihada dahme E kupwurki kitail en wia. Mwurin ah medemedewe soang kan koaros me e kin raparapahki—me iangahki kepwehpwe, kokou ihmw, koul oh keseng kan, oh limpoak nanpwungen ohl oh lih—Solomon ahpw wehwehkihla met: “Mwurin mepwukat koaros, meteieu me I pahn inda: lemmwiki Koht, oh kapwaiada sapwelime mahsen, pwehki ih karepe wet me aramas kapikipikihda.”—Eklesiasdes 12:13.
“Sapwelime Kosonned Akan Me Sohte Apwal”
4-6. (a) Ia wehwehn lokaiahn Krihko me kawehwe “katoutou”? (b) Dahme karehda kitail kak inda me kosonned kan en Koht sohte toutou?
4 “Kapwaiada sapwelime kosonned akan.” Ni mehlel, ihmet me Siohwa kupwurki kitail en wia. E nohn daulihla dahme e kupwurki kitail en wia? Soh, kaidehn. Wahnpoaron Sohn padahkiong kitail mehkot me inenin pahn karehong kitail en koapworopworki kosonned en Koht, de dahme e ketin kupwurki kitail en wia. E intingihdi: “Pwe iet duwen wehwehn poakohng Koht: kitail en peikiong sapwelime kosonned akan. Oh sapwelime akan me sohte apwal.”—1 Sohn 5:3.
5 Lepin lokaiahn Krihk me kin kawehwe “apwal” kin wehwehkiong “toutou.” E kin kak wehwehki mehkot me apwal en mourki de apwal en kapwaiada. Nan Madiu 23:4, e kin kadoadoahk ong “wisik toutou kan,” de kosonned kan oh tiahk kan me aramas pein wiahda, me souninting en kosonnedo oh Parisi kan kin katoutouwikihla aramas kan. Komw kin wehwehki mouren dahme wahnpoaron maho Sohn kin kosokosoia? Sapwelimen Siohwa kosonned kan sohte kin wia mehkot me duwehte wisik toutou kei, oh re pil sohte apwal ong ktail en kapwaiada. (Kaparekiong Deuderonomi 30:11) Me weksang met, pwehki atail poakohng Koht, eri kapwaiada sapwelime kosonned kan kin kaperenih kitail. E kin kihong kitail ahnsou kesemwpwal en kasalehda atail limpoak ong Siohwa.
6 Pwehn kasalehda atail limpoak ong Koht, kitail anahne ese ni mengihtik kan dahme e kupwurki kitail en wia. Kitail en ahnsouwet kosoiada sapwelimen Koht kosonned limau me e kupwurki kitail en kapwaiada. Ni atail wia met, tamataman dahme Sohn intingihdi: ‘Sapwelime kosonned akan me sohte apwal.’
Loaloakongkihla Koht
7. Dahme atail komourla kin poahsonda powe?
7 Kosonned keiou me e kupurki kitail en wia iei en loaloakongkihla Koht. Kasawih mahsan en Sises me kileledi nan Sohn irelaud 17. Ahnsouwo iei kaimwseklahn pwohng me Sises wia aramas men. Ni soutiko pwon Sises kin kaukaunop nah wahnpoaron kan ong ah pahn mweselsang irail. E kin insenohki arail mour en ahnsou kohkohdo, arail mour en ahnsou kohkohdo me pahn poatopaot. E sarada nanleng oh kapakapkin irail. Nan iretikitik 3, kitail wadek: “Oh iet mour soutuk: aramas akan en eseikomwihla, me komwihte Koht mehlel, oh pil esehla Sises Krais me komwi ketin poaronehdohr.” Ehi, arail komourla kin poahsonda pohn arail “esehla” de loaloakongkihla ira koaros, Koht oh Krais. Met pil kin doakedoake kitail. Pwehn ale mour, kitail anahne ale soangen loaloakong wet.
8. Ia wehwehn en ‘loaloakongkihla’ Koht?
8 Ia wehwehn en ‘esehla’ de loaloakongkihla Koht? Lepin lokaiahn Krihk wasaht me kin kawehwe “esehla” kin wehwehki “en loaloakongkihla, de pohnese,” de “erkihla.” En pil tehk me, wehwehn “esehla” kin wehwehki me kasukuhl wet sohte kin uhdi ahpw kin wiwiawi kohkohwei. Eri pwehn esehla Koht kin wehwehki me kaidehn en esehte ih ahpw en esehla ih ni irair ehu me loal, me pahn kak kekeirada atail koampoakepahki ih. Atail ahneki nanpwung ehu rehn Koht me poatopoat kin pil kalaudehla atail esehla ih. Kasukuhl wet pahn wiawi kohkohlahte, pwe kitail sohte kak sukuhlki soang koaros duwen Siohwa.—Rom 11:33.
9. Dahme kitail kak sukuhlkihsang mehn kapikipik kan me pid duwen Siohwa?
9 Iaduwen atail pahn esehla duwen Koht? Mie pwuhk riau me kak sewesehkin kitail duwen met. Ehu iei kapikipik kan. Mehkan me Siohwa ketin kapikada—mehkan me mie arail mour oh mehkan me sohte mour—mepwukat kin karehong kitail en wehwehkihla duwen soangen Koht dah men ih. (Rom 1:20) Tehk duwen ekei karasaras pwukat. Ngilen tehnir ah kin kuskusdi, ngilen kumwukumwusek en ilok ni ahnsoun melimel, lingan en usu kan nanleng ni pwohng mwoale kan—soahng pwukat soh kin padahkiong kitail me Siohwa iei Koht emen me ahneki “kehl manaman”? (Aiseia 40:26) En seri men ah kin kouruhrki ah kilang kisin kidi men ah kin pwakipwakih ikio de ah kin kilang kisin kaht men kin mwadomwadonge umwpwein dereht ehu—met soh kin kasalehda me Siohwa, “Koht pereno,” kin pil ese perenki mehkan me kemen kouruhr? (1 Timoty 1:11) Nemen mwenge iou, pohmwahu en wahnrohs kan nan mohs, lingan en pohn liparuhru men, ngilen mehn pihr kan me kin kokoul, limpaoahk en emen me ke poakohng ah kin pwoaleuhkpene—soahng pwukat soh kin kadehdehiong kitail me atail Sounkapikada iei Koht en limpoak men, me kupwurki kitail en insenamwahuki mour?—1 Sohn 4:8.
10, 11. (a) Dahkan duwen Siohwa oh kupwure kan me kitail sohte kak sukuhkihsang kapikipik kan? (b) Pasapeng ong peidek dahkei me kak dierek ihte nan Paipel?
10 Ahpw, mie imwin dahme kitail kak sukuhlki duwen Siohwa sang mehkan me e ketin kapikada. Karaspe ehu: Ia mwaren Koht? Dahme karehda e kapikada sampah oh pwilikidiohng aramas powe? Dahme karehda Koht mweidohng me suwed kan en mihmihki? Dahme ahnsou kohkohdo kin kolokol ong kitail? Pwehn sapengla peidek pwukat, kitail anahne tehk ehu pwuhk tohror me pahn kaloaloakongkin kitailla duwen Koht—pwuhko iei Paipel. Nan pwuhk wet, Siohwa kin ketin kasalehda soahng kan me pid duwen ih, ianghki mware, ah irair kan, oh kupwure kan—ire kan me kitail sohte kak sukuhlkisang ekis wasa tohror likin Paipel.—Eksodus 34:6, 7; Melkahka 83:18; Eimwos 3:7.
11 Nan Pwuhk Sarawi, Siohwa kin pil ketikihda mehn kasukuhl kesemwpwal me pid soangen aramas kan me kitail anahne esehla. Karaspe ehu, ihs me Sises Krais, oh pwukoa dahieu e kin wia ni pweidahn kupwur kan en Siohwa? (Wiewia 4:12) Ihs me Sehdan me Tehpel? Ni ahl dahkei me e kin pitih aramas? Ia duwen atail kak irekitaildi sang ih pwe endehr pitikitaildi? (1 Piter 5:8) Pasepeng en komour ong peidek pwukat kin dierek ihte nan Paipel.
12. Iaduwen komw kak kawehwehda karepen e sohte wia katoutou ehu en loaloakongkihla Koht oh kupwure kan?
12 E kin wia mehkot katoutou en alehda soangen loaloakong pwukat me pid duwen Koht oh kupwure kan? Soh! Ke kak tamanda ahmw pepehm ahnsou me ke tepin sukuhlkihdi me mwaren Koht iei Siohwa, oh me ah Wehio pahn kapwurehdohng pohn sampah wet Paradais, oh me e ketikihda sapwelime Ohl koampoako nin duwen meirong ehu pwehn pwaindi dipatail kan, iangahki padahk mehlel teikan? E soh kin duwehte amw kin kihsang perepen sawehwe oh ni tepin ahnsou kilangada ni sansal mehkan? Loaloakongkihla duwen Koht sohte kin wia katoutou ehu. E kin wia mehkot kaperen!—Melkahka 1:1-3; 119:97.
Mour Parekiong Kosonned en Koht
13, 14. (a) Ni atail kin loaloakongkihla duwen Koht, wekidekla dahkei kitail anahne wiahda nan atail mour? (b) Koht kupwurki me kitail en liksang soangen tiahk samin dahkei?
13 Ni atail kin loaloakongkihla duwen Koht, kitail kin diarada me se anahne wiahda wekidekla kei nan atail mour. Met kin pidada kosonned keriou me kitail anahne kapwaiada. Kitail anahne mour parekiong kosonned en Koht me e kupwurki ong wiewia me pwung oh pwoson sapwelime padahk mehlel. Dahkot padahk mehlel? Koht kin insenohki dahme kitail kin kamehlele oh dahme kitail kin wia? Sansal me aramas tohto nan rahnwet sohte kin leme me Koht kin wia met. Ehu ripoht me Church of England intingihdi nan 1995 kasalehda me dene wendihpene ahpw sohte pwopwoud kaidehn dihp ehu. Emen bishop kosoia: “Lepin lokaiao me kosoia ‘mihmihpene nan dihp’ kin wia lokaia kanamenek ehu oh sohte kin sewese ire wet.”
14 Eri, “mihmihpene nan dihp” kaidehn dihp ehu? Siohwa padahkiong kitail sansal ia ah pepehm ong duwen wiewia wet. Sapwelime Mahsan, Paipel, kosoia: “Kumwail koaros uhdahn pahn wauneki kasarawien kapwopwoud, oh kumwail ohl pwopwoud oh lih pwopwoud kan, kumwail uhdahn pahn kin loalopwoatpene. Koht pahn ketin kadeikada me kin mouren kamwahl oh me kin mouren nenek.” (Ipru 13:4) Ong kaun en lamalam kan oh tohn sarawi kan wendihpene mwohn pwopwoud sohte kin wia dihp ehu ong irail, ahpw ong mwohn silang en Koht met kin wia dihp toutou ehu! Met kin duwehte kamwahl, ngangar suwed, oh ohl mwahuki ohl oh lih lih. (Lipai 18:6; 1 Korint 6:9, 10) Koht kupwurki me kitail en liksang wiewia pwukat, pwe mwohn silangih mepwukat me samin.
15. Iaduwen dahme Koht kupwurki kitail en wia kin pidada atail wiewia ong meteikan oh dahme se kamehlele?
15 Ahpw, e sohte itar en ihte liksang wiewia kan me Koht kin kupwursuwedki. Dahme Koht kupwurki kitail en wia kin pil pidada mwomwen atail wiewia ong meteikan. Nan peneinei, e kupwurki ohl pwopwoudo oh lih pwopwoudo en limpoakpene oh wauneki emen emen. Koht kupwurki me pahpa oh nohno kan en apwalih anahn en pali war, pali ngehn, oh pali en pepehm en neirail seri kan. E padahkiong seri kan en peikiong arail pahpa oh nohno kan. (Lepin Padahk 22:6; Kolose 3:18-21) Oh iaduwen padahk kan me kitail kin kamehlele? Siohwa Koht men kitail en liksang padahk kan oh tiahk kan me kohsang kaudek likamw oh me kin uhwong padahk mehlel me Paipel kin padahki.—Deuderonomi 18:9-13; 2 Korint 6:14-17.
16. Kawehwehda dahme karehda e sohte wia katoutou ehu en mour parekiong kosonned kan en Koht ong duwen tiahk pwung oh duwen en pwosonla sapwelime padahk mehlel.
16 E wia katoutou ehu ong kitail en mour parekiong kosonned en Koht ong duwen wiewia pwung oh en pwosonla sapwelime padahk mehlel kan? Soh ma kitail pahn tehk duwen kamwahupen met—duwehte pwopwoud kan me ohl pwopwoudo oh lih pwopwoudo kin limpoakpene oh likih emen emen ahpw kaidehn pwopwoud me kin ohkihla salelepek en emen ira; de peneinei kan me seri kan kin ahneki pepehm me arail pahpa oh nohno kan poakohng irail oh perenkin irail ahpw kaidehn peneinei me pahpa oh nohno kan sohte kin poakohng neirail seri kan, oh kin apwalih suwed seri kan oh sohte perenkin irail; de ahneki pepehm en nsenmwakelekel oh roson mwahu ahpw kaidehn pepehm en insensuwed oh ahneki paliwar ehu me soumwahuki AIDS de ekei soangen soumwahu en wasahn kaparapar. Ni mehlel, kosonned en Siohwa sohte kihsang rehtail mehkot me kitail anahne pwehn kak insenamwahuki mour!—Deuderonomi 10:12, 13.
Kasalehda Wauneki Mour oh Inta
17. Iaduwen Siohwa kin kilangwohng mour oh inta?
17 Ni amw kin mourki amw mour parekiong kosonned en Koht, ke kin tepiadahr kalahnganki ia uwen mour ah uhdahn kesemwpwal. Kitail en ahnsouwet kosoiapene kosonned kesilu en Koht. Kitail anahne kasalehda wauneki mour oh inta. Mour kin wia mehkot me sarawi ong Siohwa. Met uhdahn pahn wiawi pwehki ih me Utupen mour. (Melkahka 36:9) Pil mour en seri nan kapehden ine kin pil wia mehkot kesemwpawal ong Siohwa! (Eksodus 21:22, 23) Inta iei wiliepen mour. Ihme karehda, inta pil wia mehkot me sarawi mwohn silang en Koht. (Lipai 17:14) Eri, ihme e sohte kapwuriamwei, me Koht pil kupwurki me kitail en pil ahneki soangen madamadauohte me e ahneki ong mepwukat.
18. Pwehki lamalam en Koht ong mour oh inta, dahme e kupwurki kitail en wia?
18 Dahme kitail anahne wia pwehki atail wauneki mour oh inta? Nin duwen Kristian kan, kitail sohte pahn wia soangen mwadong soh katepe kan me pahn kihong atail mour nan keper. Kitail kin insenohki atail mour ni atail kin perekitail sang keper kan oh eri tehk mwahu pwe weretail sidosa kan oh imwetail kan sohte pahn kauwehla atail mour. (Deuderonomi 22:8) Kitail sohte kin doadoahngki sika, kang pwuh, de ale wini en kasaliel kan. (2 Korint 7:1) Pwehki atail kin peikiong Koht ni ah kin mahsanih me kitail en ‘liksang inta,’ kitail sohte kin mweidong inta en kohieng nan paliwaratail kan. (Wiewia 15:28, 29) Mendahki atail poakohng mour, kitail sohte pahn song en doarehla pein atail en ahnsouwet ni atail pahn kauwehla kosonned en Koht oh eri kauwehla atail koapworopwor en mour soutuk!—Madiu 16:25.
19. Kawehwehda ia duwen atail kin paikihda atail kin kasalehda atail wauneki mour oh inta.
19 E wia katoutou ehu ong kitail en wiahki mour oh inta mehkot me sarawi? Soh! Medemedewe duwen met. E wia katoutou ehu en saledeksang kanser en ngolongol me kin kohsang simwok sika? E wia katoutou ehu ma atail mwaliel oh paliwar kin pitsang tengala pahn wini suwed kan? E wia katoutou ehu en pitsang soumwahu en AIDS, hepatitis, de soangen soumwahu kan me kohsang doken inta? E sansal me, atail liksang tiahk oh wiewia suwed kan kin wiawi ong kamwahupatail.—Aiseia 48:17.
20. Iaduwen peneinei ehu paikihda arail ahneki lamalam en Koht ong mour?
20 Tehk duwen eksperiens wet. Sounpar kei samwalahro, lih Sounkadehde men me liseianki impen sounpwong siluh elep tepiada inta pwilipwil ehu ni soutik oh e ahpw wisiklahng imwen wini. Mwurin toahkteo kasawih liho, liho rong toahkteo indaiong emen nohr kan me re anahne kauwehla liseiano. Pwehki liho ese ia lamalam en Siohwa ong mour me mih nan kapehden nohno kan, liho sohte pwungki ren kemehla serio nan kapehde, oh e padahkiong toahkteo: “Ma serio momourte, mweidohng en mihmihte nan kapehdei!” Inta eri kohsang rehn liho ahnsou kis, ahpw mwurin sounpwong kei e neitikihdi kisin pwutak kis me roson mendahki e sohte lel ah sounpwong en ipwidi, oh ahnsouwet pwutako mahkier sounpar 17. Liho kawehwehda: “Se padahkiong nait pwutako soang pwukat koaros, oh e kosoia me e perenki pwe e sohte lekdekiohng nan wasahn kihd. E ese me karepehteieu me e mourkihla pwehki at kin papah Siohwa.” Mehlel, ahneki lamalam en Koht ong duwen mour sohte kin wia mehkot toutou ong peneinei wet!
Iang Sapwelimen Siohwa Pwihn En Aramas Papah Ih
21, 22. (a) Ihs me Koht kupwurki kitail en iang irail papah ih? (b) Iaduwen atail kak esehda ihs me wia sapwelime pwihn en aramas?
21 Kitail sohte kelepw ni atail kin wiahda wekidekla kan nan atail mour pwehn parekiohng kosonned kan en Koht. Siohwa sapwelimanki aramas kei pohn sampah wet, oh e kupwurki me kitail en iang irail papah ih. Met kihong kitail kosonned kapaiou. Kitail anahne iang sapwelime pwihn me e kin ketin kaweidi ngehn sarawi papah Siohwa.
22 Ahpw, iaduwen atail kak kasawiada ihs irail me wia sapwelimen Koht pwihn en aramas kan? Nin duwen me kosonned kan kasalehda nan Pwuhk Sarawi, re ahneki limpoak mehlel nanpwungarail, re kin wauneki Paipel, re kin kawauwih mwaren Koht, re kin kalohki sapwelime Wehio, oh re sohte kin iang kisehn sampah suwed wet. (Madiu 6:9; 24:14; Sohn 13:34, 35; 17:16, 17) Mie pwihn en kaudek ehute pohn sampah wet me kin ahneki kilel en Kristian mehlel pwukat koaros—irail iei Sounkadehde kan en Siohwa!
23, 24. Iaduwen atail kak karasahda me e sohte wia katoutou ehu en iang sapwelimen Siohwa pwihn papah ih?
23 E wia katoutou ehu en iang sapwelimen Siohwa pwihn en aramas kan papah ih? Soh, doulul! Me weksang met, e wia kapai kesemwpwal ehu en ahneki limpoak oh utut en peneinei en Kristian brother oh sister kan nan sampah pwon. (1 Piter 2:17) Medewehla me ke pitsang sohp ehu me serda oh ke diarada me ke mihla nan sehdo, nananti en peipei oh dehr duhla. Ni ahnsou me ke pepehm me ke sohlar kak peipei, pehn aramas men engdohng uhk sang nan ehu kisin pwohto oh sewese uhk ong loale. Ehi, mie irail kan me pitla! Nan kisin pwohto, komwi oh meteikan kin weliali amwail kin seikihlong pwohto nan sapw, oh kumwail kin sewesehlong nan kisin pwohto meteikan me wie peipei nan sehdo.
24 Ke sohte pil mih nan soangen irairohte? Mie me apih kitail sang nan “pihl” keper en sampah suwed wet ong nan “kisin pwoht” en sapwelimen Siohwa pwihn sampah. Nan pwihn wet, kitail kin miniminpene ni kaudek ni atail kin kohkohwohng ni “oaroar” en sampah kapw pwungo. Ma kapwunod kan en mour kin karehong kitail en pwangada ni atail kin kohkohwei, ia uwen atail kin kalahngankli sawas oh kamweit, me kin kohsang koampoakepatail Kristian mehlel kan!—Lepin Padahk 17:17.
25. (a) Pwukoa dahieu kitail ahneki ong irail ko me mihmihte nan “pihl” en sampah suwed wet? (b) Kosonned dahkei en Koht me e kupwurki sen wiahda me pahn pwarada nan artikel en mwuhr?
25 Iaduwen meteikan—aramas mongiong mehlel kan me mihmihte nan “pihlo”? Mie atail pwukoa en sewese kapedelong irail nan pwihn en Siohwa, kaidehn? (1 Timoty 2:3, 4) Re anahne sawas en sukuhlki dahme Koht kupwurki ren wia. Met wadohng kitail kosonned kalimau en Koht. Kitail anahne wia sounkalohk loaloapwoat en Wehin Koht. Dahme met kin pidada pahn pwarada nan artikel en mwuhr.
Komw Tamataman?
◻ Dahme karehda kosonned kan en Koht sohte toutou?
◻ Iaduwen atail kin loaloakongkihla duwen Koht?
◻ Dahme karehda e sohte wia katoutou ehu en mourki kosonned kan en Koht ong duwen tiahk me pwung oh pil en pwosonla sapwelime padahk mehlel?
◻ Dahme kitail anahne wia pwehki lamalam en Koht ong mour oh inta?
◻ Ihs me Koht kupwurki kitail en iang irail papah ih, oh iaduwen atail kak kasawiada ihs iraii pwukat?