Kolokol Wiewia Mwahu Nan Sampah Ehu Me Dirki Wiewia Suwed
“Kumwail dehr lipahned de akamai ni amwail kin wia soahng koaros, pwe kumwail en kak pwung oh mwakelekel nin duwen sapwellimen Koht seri dei kei me kin koukousoan nanpwungen aramas suwed oh dipan akan.”—PILIPAI 2:14, 15.
1, 2. Dahme karehda Koht kupwurki kamwomwala mehn Kenan kan?
SAPWELLIMEN Siohwa kosonned kan sohte wiawihda pwe emen en kahmahmkihla. Ni ahnsou me mehn Israel kan nektehn pahn pedolong nan Sapwen Inou soukohp Moses padahkiong irail: “Kamwomwala aramas koaros: mehn Id, mehn Amor, mehn Kenan, Mehn Peris, mehn Ip, oh mehn Sepus kan, duwen Kauno (Siohwa) eh ketin koasoanediong kumwail.”—Deuderonomi 7:2; 20:17.
2 Pwehki Siohwa kin wia Koht en mahk men, dahme karehda e kupwurki tohn Kenan kan en kamwomwla? (Eksodus 34:6) Ehu karepe ‘pwe re dehr karehiong kumwail nan dihp mwohn Kauno (Siohwa) ni ar pahn padahkiong kumwail soahngen tiahk suwed kan me re kin wia ni ar kin kaudekiong ar koht kan.’ (Deuderonomi 20:18) Moses pil mahsanih: “Pwehki sang ni suwed en wehi pwukat me Kauno (Siohwa) ketin kupwurehkihda re en pekedersang mwohmwail.” (Deuderonomi 9:4) Mehn Kenan kan kin wia mouren wiewia suwed. Nenek oh pwongih dikedik en eni kin wia kilelpen arail kaudek. (Eksodus 23:24; 34:12, 13; Nempe 33:52; Deuderonomi 7:5) Ngangar suwed, oh wia dipen Sodom kan, oh nenekiong mahn akan kin wia ‘elen mehn Kenan kan.’ (Lipai 18:3-25) Seri kan kin meironglahng koht likamw kan. (Deuderonomi 18:9-12) Ihme e sohte kapwuriamweiki ahn Siohwa kin kilangwohng mouren wehi pwukat me e wia keper ong paliwar, pali en tiahk mwakelekel oh pali ngehnin sapwellime aramas kan!—Eksodus 34:14-16.
3. Dahme imwila pwehki mehn Israel kan sohte uhdahn kapwaiada kaweid en Koht me pid tohn Kenan?
3 Pwehki mehn Israel kan sohte uhdahn kapwaiada kaweid kan en Koht, tohn Kenan tohto pitla ni ahnsou me Israel kalowehdi Sapwen Inou. (Sounkopwung 1:19-21) Kedekedeo, re kakehr pehm lipwalipw suwed en mehn Kenan kan oh kosoipe kak wiawi: “Re [mehn Israel kan] soikala sapwellime kaweid, re sohte kapwaiada inou me e ketin wiahiong arail pahpa kahlap ako, oh re soikala sapwellime kehkehlik. Re kaudokiong dikedik en eni mwahl akan oh pein irail wiahkinirailla aramas me sohte katepe, oh re kahlemengih tiahk en wehi kan me kapilirailpene, re sapeikiong sapwellimen Kauno (Siohwa) mahsen me re en dehr alasang irail.” (2 Nanmwarki 17:15) Ehi, erein sounpar kan me dower powe mehn Israel tohto kin wia wiewia suwed kohte me karehong Koht en kaweidki kamwomwalahn mehn Kenan kan—pwongih dikedik, nenek, oh pil iangahki meirongki seri!—Sounkopwung 10:6; 2 Nanmwarki 17:17; Seremaia 13:27.
4, 5. (a) Dahme wiawihong Israel oh Suda salelepek? (b) Kaweid dahieu me kohda nan Pilipai 2:14, 15, oh peidek dahkei me pwarada?
4 Ihme karehda soukohp Oseia pakairki: “Rong, Israel, rong dahme e mahsanih: ‘Sohte loaloapwoat oh limpoak nan sahpw wet, oh re sohte pohnese me ngehi Koht. Aramas akan kin wiahda inou oh kauwehla; re kin lokaia likamw, kamaramas, pirap, oh kin kamwahl. Ar wiewia suwed kan laudlahr, oh re kin kalap kemehla aramas. Eri, met pahn karehda sahpw wet eh pahn madekengda, oh soahng koaros me kin momour loale pahn mehla. Mahn oh menpihr koaros, oh pil mwahmw akan, pahn mehla.’” (Oseia 4:1-3) Nan pahr 740 B.C.E., wehin Israel suwedo ni paliepeng lohdi pahn mehn Asiria kan. Mpen sounpar 100 mwuri, wehin Suhda salelepeko ni palieir lohdi pahn Papilon.
5 Wiewia pwukat kin karasahda duwen ia uwen e pahn keper en mweidala pein kitail en mihla pahn wiewia suwed kan. Koht kin ketin tateki mehkan me sapwung oh sohte pahn mweidong en wiawi nanpwungen sapwellime aramas akan. (1 Piter 1:14-16) Mehlel me kitail momour ni “imwin koasoandi suwed en mehkan,” nan sampah ehu me suwed wie kekeirada. (Kalesia 1:4; 2 Timoty 3:13) Mendahki met, Mahsan en Koht panauwihki Kristian koaros en kaukaule mwekid ni soahngen ahl ehu pwe ren “pwung oh mwakelekel nin duwen sapwellimen Koht seri dei kei me kin koukousoan nanpwungen aramas suwed oh dipan akan. Kumwail en lingalingki marain nanpwungarail, rasehng usu kan me dakedaker nanleng.” (Pilipai 2:14, 15) Ahpw iaduwen atail kak kolokol wiewia mwahu nan sampah ehu me diren wiewia suwed? Met uhdahn kak wiawi?
Sampahn Rom Me Diren Wiewia Suwed
6. Dahme karehda Kristian kan nan tepin pahr kin mihla pahn apwal en kolokol arail wiewia mwahu?
6 Kristian kan nan tepin pahr akan kin mihla pahn apwal en kolokol wiewia mwahu pwehki wiewia suwed ah kadirehla koasoandi koaros en Rom. Sounpadahk en Rom Seneca ndahki ah diho: “Ohl akan kin siaikihpene wiewia suwed. Rahn koaros ineng en wia mehkot suwed kin laudla, oh masak wiahda kin tikitikla.” E kaparekiong koasoandi en Rom me e duwehte “koasoandi en mahn lawalo.” Ihme, e sohte kapwuriamwei, me ong arail mehn kamweit mehn Rom kan kin perenki kilang siai en pei kan me sounimweteng kan kin wiapene, me aramaso me kana kin kemehla me luhso oh pil iangahki sipai kan me nenek kin pidada.
7. Iaduwen Pohl kasalehda duwen wiewia suwed kan me kalap wiawi nanpwungen me tohto nan tepin pahr kan en C.E.?
7 Wahnpoaron Pohl ele kin medemedewe wiewia samin en aramas kan ni mwein Kristian kan ni ah ntingihdi: “Pwehki ar kin wia soahng pwukat, Koht ketin mweidiraillahng nan ineng kanamenek kei. Lih akan solahr inengieng ohl, ahpw re kin pein kalel nanpwungarail. Pil duwehte ohl akan, re kin pwilikihdi arail inengieng lih, re ahpw kin pein kalel nanpwungarail. Ohl akan kin wiapene soahng kanamenek kan nanpwungarail; oh ni imwilah re pahn ale kalokaparail me konehng arail wiewia suwed kan.” (Rom 1:26, 27) Ni ah ngoangkihla raparapahki ineng en uduk kan, koasoandi en Rom kin dirkihla wiewia suwed.
8. Iaduwen seri kan kin kalap mihla pahn mwersuwed nan koasoandi en Krihk oh Rom?
8 Poadoapoad sohte kasalehda sansal ia uwen tohtohn wiewiahn ohl mwahuki ohl de lih lih rehn mehn Rom akan. Ahpw, ni mehlel, re mihla pahn lamalam en mehn Krihk kan mwohrail, me kin wia wiewia wet. E wia tiahk ehu ong ohl mah kan en mwadong saut ong pwutak pwulopwul kan, ni arail pahn apwalih pwutak pwukat ni koasoandi ehu me duwehte nanpwungen tohnsukuhl men oh sounpadahk men me kin kalap kahlwalahng me pwulopwulo nan tiahk en nenek. Ni mehlel, Sehdan oh nah ngehn saut kan me kin kamwekidada soahngen wiewia suwed pwukat oh wiekau seri kan.—Soel 3:3; Suhd 6, 7.
9, 10. (a) Ni ahl dahieu 1 Korint 6:9, 10 kin kadeikada wiewia suwed en soahng koaros? (b) Ia mour en ekei nan mwomwohdisohn Korint, oh wekidekla dahieu wiawi nan arail mour?
9 Ni ah nting pahn mwekid en ngehn sarawi, Pohl padahkiong Kristian kan nan Korint: “Kumwail sehse me aramas suwed kan sohte pahn iang sohsohki Wehin Koht? Kumwail dehr nan kapehd rotorot, pwe me kin nenek kan, me kin pwongih dikedik en eni kan, me kamwahl akan, me wia dipen Sodom kan, me lipirap akan, me noahroke kepwe kan, me kamamsakau akan, oh me loallap suwed kan, re sohte pahn iang sohsohki Wehin Koht. Eri, ekei kumwail iang mihmi ni soangen aramas pwukat mahso, ahpw met kumwail mwakelekelsangehr dihp, oh kasarawihongehr Koht, oh pwunglahr rehn Koht ni mwaren atail Kaun Sises Krais oh ni Ngenen atail Koht.”—1 Korint 6:9-11.
10 Kisinlikou sarawi en Pohl eri kadeikada tiahk en nenek, ni ah mahsanih me “nenek kan sohte pahn iang sohsohki Wehin Koht.” Ahpw, mwurin ah kairekihdi ekei soahngen wiewia suwed kan, Pohl mahsanih: “Eri, ekei kumwail iang mihmi ni soangen aramas pwukat mahso, ahpw met kumwail mwakelekelsangehr dihp.” Ki sawas en Koht irail kan me kin wiahda me suwed kan kak mwakelekella mwohn silangih.
11. Ia iren Kristian kan nan tepin pahr nan irair suwed en arail ahnsou?
11 Ehi, wiewia mwahu en Kristian kin pweida mwahu pil nan sampah me diren suwed nan tepin pahr kan en Kristian. Me pwoson kan en ‘kawiliakapwala loalamwail kan unsek.’ (Rom 12:2) Re kesehla arail “mouren mahs” oh ‘mohngiongerail oh arail lamalam uhdahn pahn onohnsapahlda.’ Ihme re tangasang wiewia suwed en sampah oh “onehda sapahl pein irail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.”—Episos 4:22-24.
Sampah En Rahnwet Me Diren Wiewia Suwed
12. Wekidekla dahieu mihla pohn sampah sangete nan 1914?
12 Iaduwen atail ahnsou? Sampah me kitail momour loale me inenen audaudki wiewia suwed me laud sang mahs. Keiou sangete nan 1914 tiahk mwakelekel en sampah wie susuwedla. (2 Timoty 3:1-5) Ni arail kin soikala lamalam akan duwen wiewia mwahu, tiahk mwakelekel, wahu, oh tiahk pwung en aramas, me tohto kin mwohnekihla pein irail nan arail lamalam oh “solahr arail namenek.” (Episos 4:19) Makasihno Newsweek kosoia: “Kitail momour nan dih ehu me sohte uhdahn tiahk mwakelekel,” oh kapataiong me irair en tiahk me mie ahnsouwet “wiahkilahr lamalam kan koaros en dahme pwung oh sapwung ong irair en pilipil en emen, pepehm en dahme emen mwahuki de pilipil en tiahk kan.”
13. (a) Ia uwen laud en mehn kamweit kan en nan rahnpwukat kin utungada wiewia suwed? (b) Lipwalipw suwed dahieu mehn kamweit suwed kan kin wiahiong emen emen aramas?
13 Me duwehte nan tepin pahr kan en Kristian, mehn kamwadong samin kan tohtolahr nan rahnpwukat. T.V., radio, kasdo, oh video kan kin kaukaule kapwarehda mehn kamweit kan me pid tiahk en nenek. Wiewia suwed pil pwaradaiehr nan komputer kan. Kilel suwed kan de nting suwed kan kin pil pwarada nan komputer kan, oh aramas sohte lipilipil ia uwen arail mah de pwulopwul kak kilang mehpwukat. Ia lipwen mehpwukat koaros? Emen souninting en nuhspehpa kosoia: “Ni ahnsou me nta oh mwersuwed oh nenek kin kadirehla atail tiahk ndand kan, kitail kin ahnla kilang nta oh mwersuwed oh nenek. Kitail kin koinsla. Wiewia suwed sohla wia mehkot laud pwehki e sohla wia mehkot kanamenek ong kitail.”—Kaparekiong 1 Timoty 4:1, 2.
14, 15. Ia mehn kadehde me tiahk mwakelekel kin wie susuwedla nan sampah pwon?
14 Tehk ripoht wet nan The New York Times: “Dahme kin wia mehkot kanamenek sounpar 25 samwalahro ahnsouwet wialahr koasoandi en mour pwung ehu. Nempehn ohl oh lih kan me pilada me re pahn mihmihpene ni ahr soh pwopwoud kin keirkihda persent 80 [nan United States] nanpwungen pahr 1980 oh 1991.” Met sohte kin ihte wiawi nan North America. Makasihno Asiaweek ripohtki: “Akamai ehu me pid tiahk en mour kin wiawi nan [Asia]. Iren uhpene ko iei ma en saledekiong wia tiahk en nenek de en ahneki tiahk kesempwal kan, oh idihd en wekila kin wie lalaudla.” Ripoht kan kasalehda me nan sahpw tohto aramas tohto kin pwungki tiahk en kamwahl oh nenek.
15 Paipel kohpada me wiewiahn Sehdan pahn laudla nan atail ahnsou. (Kaudial 12:12) Eri, e sohte pahn wia mehkot kapwuriamwei ong kitail, me wiewia suwed kin rekla. Karaspe ehu, kauwehla seri kan ni tiahk en nenek kin kaparaparla wasa koaros.a United Nations Children’s Fund ripohtki me “netikih tiahk en nenek kin kauwehla seri kan kereniong nan sahpw koaros en sampah.” Ehu ehu sounpar “ripoht kan kasalehda me pohnangin seri rar nan sampah pwon kin mihla pahn idihd en netikih paliwararail, oh kin mihla nan pisnes en pweipweida oh netla ong wiewiahn nenek kan, oh kin pil kadoadoahk ong wiawihdahn kilel suwed kan me pid seri.” Tiahk en ohl mwahuki ohl oh lih mwahuki lih pil wie tohtohla, me ekei kaun en politic kan oh kaun en lamalam kan kin tiengla mwowe utungada pwehki dene “e wia tiahk en mour kapw.”
Soikala Wiewia Suwed En Sampah
16. Ia lamalam en Sounkadehde kan en Siohwa me pid tiahk en nenek?
16 Sounkadehdehn Siohwa kan sohte kin iang pwungki irail ko me kin utungada mour salelepek en tiahk en nenek. Taitus 2:11, 12 mahsanih: “Pwe Koht ketin kasalehda sapwellime kalahngan pwe en komourla aramas koaros. Kalahngan wet kin padahkiong kitail en kesehla mouren seupwoson Koht oh ineng suwed en sampah, oh ese kaunda nsenarail, oh momourki mour pwung oh sarawi nin sampah wet.” Ehi, kitail en kekeirada atail kailongki mehlel, oh kasautki, soahngen wiewia suwed kan me duwehte nenek, kamwahl, oh tiahk en ohl mwahuki ohl oh lih lih.b (Rom 12:9; Episos 5:3-5) Pohl kihda peneu wet: “Mehmen me kin koasoakoasoia me ih sapwellimen Kauno (Siohwa) uhdahn pahn sohpeisang wiewia suwed kan.”—2 Timoty 2:19.
17. Iaduwen Kristian mehlel kan kin kilangwohng nim sakau?
17 Kristian mehlel kan kin soikala lamalam en sampah ong wiewia kan me dene sohte nohn suwed. Karaspe ehu, aramas tohto nan rahnpwukat sohte kin wiahki mehkot suwed en sakaula. Ahpw sapwellimen Siohwa aramas kan kin peikiong kaweido nan Episos 5:18: “Kumwail dehr kin sakaukihla douluhl wain, pwe e pahn kaweikumwailla; a kumwail en kin direkihla Ngehn Sarawi.” Ma Kristian men pilada en nim sakau, en nimte ekis, dehr kamamsakau.—Lepin Padahk 23:29-32.
18. Iaduwen mouren kosonned kan en Paipel kin kaweidih sapwellimen Siohwa ladu kan nan arail wiewia ong arail tohn peneinei?
18 Nin duwen ladu kan en Siohwa, kitail pil soikala lamalam en ekei nan sampah me dene ma emen kin weriwer ong eh pwoud oh nah seri kan de peliankin irail lokaia kamedek kan me pwung. Pwehki irail kin nantiong rapahki elen wiewia pwung, Kristian ohl pwopwoud kan oh lih pwopwoud kan en doadoahkpene pwehn kapwaiada kaweid en Pohl: “Kumwail kadohwanewei sang kumwail soangen mwakar koaros, soangen ineng suwed koaros, soangen lingeringer koaros, soangen men pei koaros, soangen lahlahwe koaros, soangen kailok koaros en nan kapehdamwail. A kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.”—Episos 4:31, 32.
19. Ia uwen kekeiradahn wiewia suwed nan pisnes kan?
19 Wiewia likamw kan, lokaia likamw kan, pisnes lemei kan, oh pirap kin pil rekla nan rahnpwukat. Artikel ehu nan makasihn en pisneso CFO ripohtki: “Roporop en tohndoadoahk 4,000. . . diarada me persent 31 en irail kan me sapeng roporopo kilangehr ‘wiewia suwed toutou kan’ erein sounparo mwowe.” Soahngen wiewia suwed pwukat me iangahki wia lokaia likamw, wiahda rekord likamw kan, doahke wasa kan me soh konehng rehn emen de lokaia suwed ong emen, oh pirap. Ma kitail men kolokol atail tiahk mwakelekel mwohn silangen Siohwa, kitail anahne liksang soahngen wiewia pwukat oh en mehlel nan atail wiewiahn pisnes kan.—Maika 6:10, 11.
20. Dahme karehda Kristian kan anahne en saledek sang “limpoak ong mwohni”?
20 Tehk dahme wiawihiong emen ohl me lemeleme me e kak ahneki ahnsou laud ong doadoahk en Koht ma e pahn mwadang wiahda mwohni tohto nan ehu wiewiahn pisnes. E kainengieng meteikan nan ehu pilahn en kanaitikih mwohni ni ah kosoia me dahme re pahn wihnkihda pahn inenen laudsang uhdahno. Ni ahnsou me mepwukat sohte pweida, e ngoangkihla pwehn pwainla mwohni tohto me re luhskihla me karehong en pirapahda mwohni me kohwohng en apwalih. Pwehki ah wiewia oh lamalam en kahng koluhla, e piskensang mwomwohdisohn Kristian. Uhdahn mehlel peneu en Paipel: “Ahpw irail kan me men kepwehpwehla kin pwupwudiong nan songosong oh lohdiong nan lidip en ineng pweipwei oh keper tohto, me kin kauweirailla. Pwe limpoak ong mwohni, iei tepin soangen suwed koaros. Mie ekei me kin inenen kasikasik en naineki mwohni, eri, re ahpw salongalahsang pwoson oh kauwehkihla mohngiongirail soangen kapahtou tohtohie.”—1 Timoty 6:9, 10.
21. Wiewia dahieu me kalap pwarada nanpwungen ohl akan me ahneki manaman nan sampah, ahpw ia pahn wiewia en irail ko me ahneki pwukoa nan mwomwohdisohn Kristian?
21 Ohl en sampah kan me ahneki manaman oh kehl pohn meteikan kin kalap sohte kasalehda wiewia mwahu oh kin kasalehda pwung en ire wet, ‘Manaman me mwersuwed.’ (Eklesiasdes 8:9) Nan ekei sahpw, ale pweipwei sapwung ni rir oh soangen mwersuwed teikan kin wia elen mouren irail sounkopwung kan, polismen kan, oh sounpolitic kan. Ahpw, irail ko me kin tiengla mwowe nan mwomwohdisohn Kristian anahne en kasalehda wiewia mwahu oh en dehr kaune meteikan. (Luk 22:25, 26) Elder kan, iangahki ministerial servant kan, sohte kin papah pwehki “arail pahn ale pweipweiki.” Re anahne pere irail sang songosong en doadoahngki sapwung arail koasoandi en tenek de en mweidohng meteikan en kamwekidih dahme re koasoanehdi pwehki ren alekihsang met arail pai.—1 Piter 5:2; Eksodus 23:8; Lepin Padahk 17:23; 1 Timoty 5:21.
22. Dahme artikel en mwuhr pahn kosoia?
22 Ahnsou tohto, Kristian kan kin pweida mwahu ni arail kin powehdi kahpwal akan en rahnpwukat en kolokol wiewia mwahu nan atail sampah me diren wiewia suwed. Ahpw, wiewia mwahu kin pidada laudsang ihte en liksang wiewia suwed. Artikel en mwuri pahn kosoiada dahme anahn pwehn kak kekeirada wiewia mwahu.
[Nting tikitik kan me mi pah]
a Kilang artikel kan pahnangin oarelapo “Protect Your Children!,” me pwarada nan Awake! en lokaiahn wai en October 8, 1993.
b Irail ko me kin wia tiahk en ohl mwahuki ohl oh lih mwahuki lih mahso kak wekidala arail mour duwehte dahme ekei wia nan tepin pahr kan en Kristian. (1 Korint 6:11) Iren sawas kan mih nan Awake! en lokaiahn wai en March 22, 1995, pali 21-3.
Iren Kousapahl
◻ Dahme karehda Siohwa kupwurki kamwomwalahn mehn Kenan kan?
◻ Wiewia suwed dahkei kalap wiawi nan tepin pahr kan, oh ia iren Kristian kan nan soahngen irair pwukat?
◻ Ia mehn kadehde me sampah kadehdehier tiahk samin ah kekeirada sangete nan 1914?
◻ Wiewia suwed rek dahkei sapwellimen Siohwa aramas kan en liksang?
[Kilel nan pali 9]
Kristian kan nan tepin pahr kin kasalehda wiewia pwung, mendahki re momour nan sampah ehu me diren wiewia suwed
[Kilel nan pali 10]
Wiewia suwed pil pwaradaiehr nan komputer kan, kamengeiong me pwulopwul tohto oh meteikan en kilang de wadek kilel suwed oh nting suwed kan