Komw Kin Akadeiong Elen Wiewia Pwung?
“Kumwail en audehkihda nan kapehdamwail soahng mwahu kan me kapingpe mie:. . . me pwung, me mwakelekel, me kaselel oh waun.”—PILIPAI 4:8.
1. Dahkot wiewia suwed, oh dahme karehda e sohte kak kasaminehla kaudek en Siohwa?
WIEWIA suwed kin kauwehla tiahk mwakelekel. E audelahr sampah wet me kitail momour loale. (Episos 2:1-3) Ahpw, Siohwa Koht sohte pahn mweidong sapwellime kaudok mwakelekel en saminla. Pwuhk kan en Kristian, mihding kan, kapokon tikitik kan oh me laud kan kin kihong kitail peneu kan ni ahnsou kan me konehng en pelianki wiewia sapwung kan. Kitail kin ale sawas en Pwuhk Sarawi en “tengeteng ni me mwahu kan” mwohn silangen Koht. (Rom 12:9) Ihme karehda, nin duwen pwihn ehu, Sounkadehde kan en Siohwa kin nantiong en mwakelekel, oh tiahk pwung. Ahpw iaduwen emen emen pein kitail? Ni mehlel, komw kin akadeiong elen wiewia pwung?
2. Dahkot wiewia mwahu, oh dahme karehda emen anahne nantiong pwehn kolokol wiewia pwung?
2 Wiewia pwung iei tiahk mwakelekel, kamwahu, oh wiewia oh lamalam pwung. Met kaidehn irair ehu me pahn karehong emen en nennenweite, ahpw e wia irair ehu me pahn kamwekid emen ong wiewia pwung. Wiewia pwung kin pidada laudsang ihte en liksang wiahda dihp; e kin wehwehki en akadeiong dahme mwahu. (1 Timoty 6:11) Wahnpoaron Piter panauwihki ienge Kristian kan: “Kapataiong amwail pwoson, wiewia mwahu.” Iaduwen? Ni arail pahn “nantihkihong en wia uwen me irail kak, pwehki ih kahrepe wet [sapwellimen Koht inou kesempwal kan].” (2 Piter 1:5) Pwehki atail irair dipan, kitail uhdahn anahne nannanti kehlail pwehn kak kolokol atail wiewia pwung. Ahpw mendahki met, irail kan en mahsie me kin lahn Koht kin wia met, mendahkihla mehn koarompwa laud kan.
E Akadeiong Wiewia Pwung
3. Wiewia suwed dahieu Nanmwarki Ahas dipkihda?
3 Pwhuk Sarawi audaudki koasoipen irail me tohto kan me kin akadeiong wiewia pwung. Karaspe ehu, tehk duwen wiewia pwung en Esekaia. Ah pahpa, Nanmwarki Ahas en Suhda, kin kaudokiong Molech. “Ni e sounpar rieisek, oh e kakaunki nan Serusalem erein sounpar eisek weneu. E sohte idawehn karaspe mwahu en eh pahpa kahlap Nanmwarki Depit; ahpw e wia dahme sohte kaparanda kupwur en Kauno (Siohwa) eh Koht oh kahlemengih karaspen nanmwarki kan en Israel. E pil wiahkihla pein sapwellime pwutak meirong isihs ong dikedik en eni kan, alasang tiahk saut en aramas akan me Kauno (Siohwa) kin kohkohsang nan sahpwo ni ahnsou me mehn Israel ko kohkolang wasao. Ahas kin wia meirong oh isik warpwohmwahu wasahn kaudek en me rotorot akan, pohn dohl kan, oh pahn mwetehn tuhke koaros.” (2 Nanmwarki 16:2-4) Ekei kin kose me dene ‘kihong nan kisiniei’ kin wehwehki mwomwen tiahk en kamwakel ahpw kaidehn meirongki aramas. Ahpw, pwuhko me adaneki Molech—A God of Human Sacrifice in the Old Testament, sang rehn John Day, koasoia: “ Mie mehn kadehde sang ire kan me pid Punic [Carthaginian], iangahki mehn kadehde kan sang mehkan me re weirda sang nan pwehl, me kadehdehda me mie meirongki aramas. . . rehn mehn Kenan kan, oh ihme karehda sohte karepe en kalikamwe en Kadehde Mering ah kosoiahki [ahr kin meirongki aramas].” Pil ehu, 2 Kronikel 28:3 kasalehda me Ahas kin “meirongkihla sapwellime pwutak kan nin duwen meirong isihs.” (Kaparekiong Deuderonomi 12:31; Melkahka 106:37, 38.) Ia uwen wiewia pwukat ah inenen suwed!
4. Ia wiewiahn Esekaia nan wasao me dirki wiewia suwed?
4 Ia iren Esekaia nan wasa kiset me dirkihla wiewia suwed? Kitail en tehk Melkahka 119, pwe ekei kin kamehlele me Esekaia me ntingihdi ire wet, ni ahnsou me e wiahte emen soupeidi. (Melkahka 119:46, 99, 100) Ihme ah irairo me e mihla loale kin sansalda sang mahsan pwukat: “Me lapalap akan kin ehupene oh wia ar koasoandi en uhwong ie, a I pahn medemedewehte sapwellimwomwi padahk kan. I solahr kak meirki ahi nsensuwed.” (Melkahka 119:23, 28, NW) Ni ah kapilpilkihpene sounkaudek kan en kaudek likamw, Esekaia ele kin wiahla iren mehn kapailok ehu nanpwungen tohn pokon en soupeidi kan, me karehong en sohte kak meir. Ahpw mendahki met, e kin akadeiong wiewia pwung, oh kedekedeo wiahla nanmwarki, oh “posehlate wia dahme pwung mwohn silangen Siohwa. . .E kin likih Siohwa Koht en Israel.”—2 Nanmwarki 18:1-5.
Re Kolokol Ahr Wiewia Pwung
5. Kasongosong dahieu Daniel oh ienge me silimeno lelohng?
5 Daniel oh ienge mehn Ipru silimeno, me adaneki Ananaia, Misel, oh Asaraia kin pil wia mehn kalimeng mwahu en wiewia pwung. Re pokousang nan udakarailo oh kalipilipla Papilon. Me pwulopwul pahmeno eri kohwong eden mehn Papilon pwe ren adanekihla—Peldesasar, Sadrak, Mihsak, oh Apedneko. “Tungoal me duwehte ahn nanmwarkio” eri kohwong irail en tungoale, iangahki mwenge kainapw kan nan kosonned en Koht. Pil ehu, re mihla pahn idihd en ale kasukuhl en “nting oh lokaiahn Kaldiha (Papilon)” me reireiki sounpar silu. Met kin pidada laud sang en ihte sukuhlkihdi ehu lokaia tohrohr, pwe mwein uhdahno lepin lokaia kan “Mehn Kaldiha kan” wasaht kin wehwehki pwihn en tohnsukuhl me kasukuhlda. Ihme karehda, mehn Ipru pwulopwul pwukat pil lelohng padahk likamw kan en Papilon.—Daniel 1:1-7.
6. Dahme karehda kitail kak ndahki me Daniel kin akadeiong wiewia pwung?
6 Mendahki re mihla pahn kapwunod laud en wekiong met, Daniel oh ienge meh silimeno pilada en wia dahme pwung ah kadehn wiewia sapwung. Daniel 1:21 mahsanih: “Daniel eri mihmihte nan tehnpaso lao lel ahnsou me Sairus, nanmwarki lapalap en Persia, kalowehdi Papilonia.” Ehi, Daniel “kaukaulehte” mour nin duwen ladu wiewia mwahu men en Siohwa erein sounpar 80 samwa—sang ni kaunda oh pwupwudi en nanmwarki kehlail tohto. E kolokol ah lelepek ong Koht mendahki pilahn rir akan oh pilahn mwersuwed kan en kaun en koperment mwersuwed kan on wiewiahn nenek kan me audehlahr kaudek en Papilon. Daniel kaukaule akadeiong elen wiewia pwung.
7. Dahme kitail kak sukuhlkihsang ahlo me Daniel oh ienge meh silimeno idawenla?
7 Kitail kak sukuhlki soahng tohto sang Daniel oh ienge kan me kin lammwiki Koht. Re kin akadeiong wiewia pwung oh sohte men alehda tiahk en Papilon. Mendahki re adanekihla eden mehn Papilon, re sohte kesehla kasalehda me irail iei ladu kan en Siohwa. Sounpar 70 samwa mwuri, nanmwarki en Papilon ekerki Daniel edeo ni Ipru! (Daniel 5:13) Erein ah mour reirei, Daniel sohte men kahmahmkihla ah pwoson pil nan ire kan me tikitik. Nin duwen me pwulopwul men, e “lemedahr me e sohte pahn kasaminehkihla paliwere kisin tungoal oh wain me kin kohda nan tehnpaso.” (Daniel 1:8) Irair wet me Daniel oh ienge meh silimeno alehda ni mehlel kakehlailla irail en pitsang kasongosong kan en mour oh mehla me mwuhr lelohng irail.—Daniel, irelaud 3 oh 6.
Akadeiong Wiewia Pwung Rahnwet
8. Iaduwen Kristian me pwulopwul kan kak pelianda pwehn dehr mihla pahn en Sehdan sampah?
8 Duwehte Daniel oh ienge meh silimeno, sapwellimen Koht aramas akan nan rahn pwukat kin pelianda en dehr mihla pahn ahn Sehdan sampah. (1 Sohn 5:19) Ma kowe emen Kristian pwulopwul, ele ke kin lelohng kahpwal kehlail kan sang iengemw kan en alasang arail sidail en likou kan, kapwat kan oh pwungki arail keseng kan me re kin perenki me nohn daulihla. En dehr kin idawenla mwomwen koasoandi kapw kan de sidail kapw kan koaros me kohda, ahpw kumwail en kesihnenda kehlail, oh sohte mweidong pein kumwail en “kahlimengih wiewia kan en sampah wet.” (Rom 12:2) “Kesehla mouren seupwoson Koht oh ineng suwed en sampah, oh ese kaunda nsenarail, oh momourki mour pwung oh sarawi nin sampah wet.” (Taitus 2:11, 12) Me keiou kesempwal iei me Siohwa en pwungkin uhk ahpw kaidehn me iengemw kan en pwungkin uhk.—Lepin Padahk 12:2.
9. Soahngen kapwunod dah kan me Kristian kan me mih nan pisnes kak lelohng, oh dahme ren wia?
9 Kristian me mah kan kin pil lelohng kapwunod kan oh re pil anahne kasalehda wiewia pwung. Kristian ohl en pisnes kan ele pahn mihla pahn kasongosong kan en doaoahngki wiepen pisnes kan me kin uhwong kosonned de en pohnsowehla kosonned kan en koperment oh kosonned en taks kan. Ahpw, mendahki ia mwomwen wiewiahn sounpisnes kan de tohndoadoahk kan, “kitail en kin men wia dahme pwung ahnsou koaros.” (Ipru 13:18) Pwuhk Sarawi kasalehda me kitail anahne mehlel oh touparek ong atail kaun en doadoahk, tohndoadoahk, sounnetinet kan oh koperment en sampah. (Deuderonomi 25:13-16; Madiu 5:37; Rom 13:1; 1 Timoty 5:18; Taitus 2:9, 10) Kitail en pil koasoanehdi mwahu atail wiewiahn pisnes kan. Ni atail kin wiahda rekord pwung oh ntingihdi nan doarepwe me kitail oh emen pwungkipene, met pahn ahnsou koaros irehdi sawehwe kan.
Pereh Sang!
10. Dahme karehda kitail anahne ‘pere kitail’ ni ahnsou me e kin pid atail pilipil en koul kan?
10 Melkahka 119:9 kin kasalehda ehu iren kolokol wiewia pwung mwohn silangen Koht. Sounmelkahkao koulki: “Iaduwen mwahnakapw men eh kak kamwakelehda ele kan? Ni ah pahn pere ih pwehn kapwaiada sapwellimwomwi mahsan.” Ehu ahn Sehdan mehn kaluwet me keiou lipwalipw iei ngilen koul kan, me ahneki kehl en kamwekidada pepehm akan. E inenin kansensuwed pwe, ekei Kristian sohte kin ‘pere irailla’ ni ahnsou me e kin pid koul kan, oh re kin diarada me pein irail kin perenki koul kan me nohn daulihla, duwehte soahngen koul me adaneki ni lokaiahn wai rap oh heavy metal. Ekei kin akamaiki me dene soahngen koul pwukat sohte kin kaluwetela irail de re sohte kin rong lokaiahn koul ko. Meteikan kin kose me dene re kin ihte perenki rong ngihl laud en mehn kesengo kidda. Ahpw, ong Kristian kan, ireo kaidehn ma mehkot kaperen de soh. Dahme ren insenohki iei ma e “pwung mwohn Kauno.” (Epsos 5:10) Pak tohto, koul kan me adaneki rap oh heavy metal kin utungada soahngen wiewia suwed duwehte peined, nenek, oh kaudek en Sehdan—mehkan me uhdahn sohte pahn wiawi nanpwungen sapwelimen Koht aramas kan.a (Episos 5:3) Pwulopwul de mah, emen emen kitail anahne en medemewede peidek wet, Sang ni ahi pilada soahngen koul me ih perenki, met kin kasalehda me I kin akadeiong wiewia pwung de wiewia sapwung?
11. Iaduwen Kristian emen kak pere ih ni ahnsou me e kin pid prokram en T.V. kan, video kan, oh kasdo kan?
11 Prokram en TV tohto, video kan, oh kasdo kan kin kapwarehda wiewia suwed kan. Ni duwen me emen semen en pali roson en madamadau oh paliwar kosoia, me ‘loaloapwoat ong arail ineng kan, nenek, mwersuwed, noarohk, oh roporop’ kin kadirehla pali laud en kasdo kan me wiawihda nan rahnpwukat. Ihme karehda, en pere kitail kin pidada en pilada dahme kitail pahn kilang. Sounmelkahkao kapakapki: “Kupwureie pwe mesei kat en dehr kilang mehkan me sohte katepe.” (Melkahka 119:37, NW) Emen Kristian pwulopwul me adaneki Sosep kin kapwaiada mouren kosonned wet. Ni ahnsou me kasdo ehu tepiada kasalehda wiewiahn nenek oh mwersuwed, e pidoi sang nan imwen kasdo. E namenekin wia met? Sosep kosoia: “Soh. I medemedewe Siohwa mahs oh en kaperenda ih.”
Pwukoahn Onop oh Doudouloale
12. Dahme karehda wia pein omw onop en Paipel oh doudouloale mepwukat me anahn pwehn akadeiong wiewia pwung?
12 E sohte itar en ihte liksang me suwed kan. Akadeiong wiewia pwung kin pil pidada onop oh doudouloale soahng mwahu kan me kileledi nan Mahsan en Koht pwe ah kosonned pwung kan en kak kadoadoahk nan mour. Sounmelkahkao kosoia: “Ia uwen ei poakohng sapwellimwomwi kosonnedo! I kin medemedewe sang nimenseng lel nipwong.” (Melkahka 119:97) Pein onop Paipel oh pwuhk kan en Kristian kin wia kisehn amw koasoandi en ehu ehu wihk? Mehlel, e kin pil apwal en wiahda ahnsoun onop pwatiet Mahsan en Koht oh doudouloale mepwukat. Ahpw pak tohto kitail kak rapahkihda ahnsou ong met ni atail pahn wiliankihdi wiewia teikan. (Episos 5:15, 16) Ele ni sorahn kan kak wia amw ahnsoun kapakap, onop, oh doudouloale ire kan.—Kaparekiong Melkahka 119:147.
13, 14. (a) Dahme karehda en doudouloale ire kan me kesempwal? (b) Doudouloale iren Pwuhk Sarawi dahkei kak sewese kitail en tateki nenek?
13 Doudouloale ire kan me kesempwal, pwehki e pahn sewese kitail en tamatamante dahme kitail sukuhlkihdi. Ahpw me kesempwal sang met iei, me e kin sewese kekeirada lamalam en Koht. Pwehn karasahda met: En ihte ese me Koht kin kainapwih nenek kin weksang en ‘tateki dahme suwed oh tengediong dahme mwahu.’ (Rom 12:9) Kitail kak uhdahn ahneki pepehm en Siohwa ong tiahk en nenek ni atail kin doudouloale iren Paipel kesempwal kan me duwehte Kolose 3:5, me kangoangehkin: “Eri, kumwail uhdahn pahn kemehla ineng kan en sampah me kin wie doadoahk loalemwail, eri, iet akan; kamwahl, sarsuwed, ineng suwed, oh noahrok kepwe (pwe noahrok kepwe iei ehu soahngen kaudek ong dikedik en eni kan).” Pein kalelepek rehmw: ‘Soahngen ineng en uduk dah me ih anahne kemehla? Dahme I en liksang me kak kainengihada ineng samin kan? Mie wekdekla kei me I anahne wiahda nan ahi wiewia ong lih kan oh serepein kan ma ngehi Kristian ohl emen de pwutak men de ong ohl akan de pwutak kan ma ngehi Kristian lih emen de serepein men?’—Kaparekiong 1 Timoty 5:1, 2.
14 Pohl kangoangehki Kristian kan en liksang nenek oh en liksang me suwed pwe “emen de wia sapwung ehu ong rie souleng, de kauwehla eh pwung kan.” (1 Deselonika 4:3-7) Pein kalelepek rehmw: ‘Dahme karehda wiahda tiahk en nenek me suwed? Suwed dah me I pahn wiahiong pein ngehi de aramas teio ma I dipada nan wiewia wet? Iaduwen met pahn kamwekid ahi pali ngehn, pali en pepehm, oh paliwar? Iaduwen irail kan nan mwomwohdiso me kauwela kosonned en Koht oh sohte men koluhla? Ia imwilahn met ong irail? Alehong nan mongiongatail dahme Pwuhk Sarawi kin kosoiahki soahngen wiewia wet kak kalaudehla atail kailongki dahme suwed mwohn silangen Koht. (Eksodus 20:14; 1 Korint 5:11-13; 6:9, 10; Kalesia 5:19-21; Kaudial 21:8) Pohl mahsanih me emen me kin nenek “kin mwamwahleki Koht, ahpw kaidehn aramas.” (1 Deselonika 4:8) Kristain mehlel dah me pahn mwamwahleki Semeo nanleng?
Wiewia Pwung oh Werek
15. Iaduwen werek kin pidada atail akadeiong wiewia pwung?
15 Ehu mehn sawas pwehn kak kolokol wiewia pwung iei werek mwahu. Sounmelkahkao koulki: “I kin kompoakehpahnki irail koaros me kin papah komwi, irail koaros me kin peikiong sapwellimwomwi kosonned kan.” (Melkahka 119:63) Kitail anahne werek mwahu kan me kin mih nan mihding en Kristian kan. (Ipru 10:24, 25) Ma kitail kin kadohwanla pein kitail en kelekelepw, kitail kakete ahnekihla lamalam en roporop ong pein kitail, oh mengeiong alehda wiewia suwed. (Lepin Pdahk 18:1) Ahpw, werek limpoak en Kristian, kak kakehlailla atail lamalam en kolokolte wiewia pwung. Ehi, kitail anahne liksang werek suwed. Kitail kak kadekong mehn mpatail kan, iengetail tohndoadoahk kan, oh iengetail tohnsukuhl kan. Ahpw ma kitail kin uhdahn weweidwei ni loaloakong, kitail pahn kalikdihsang pein kitail en nohn karanihla irail ko me sohte kin akadeiong wiewia pwung en Kristian.—Kaparekiong Kolose 4:5.
16. Iaduwen doadoahngki 1 Korint 15:33 kak sewese kitail en akadeiong wiewia pwung rahnwet?
16 Pohl ntingihdi: “Werek suwed kin kauwehla tiahk mwahu.” Ni ah wiahda mahsan pwukat, e kin panauwihki me pwoson kan me re kakete katiasang arail pwoson ma irail kin werekiong irail ko me dene irail Kristian ahpw kin soikala padahk en Paipel me pid kaiasada. Mouren kosonned me poahsonehda en Pohl peneu kin kadoadoahkohng atail werek likin mwomwohdiso oh nan mwomwohdiso. (1 Korint 15:12, 33) Uhdahno, kitail sohte men irehdi atail werekiong riatail Kristian ohl oh lih kan pwehki dene re sohte pwungki pein atail lamalam. (Madiu 7:4, 5; Rom 14:1-12) Mendahki met, anahne kanaieng ma ekei nan mwomwohdiso kin wiahda tiahk kan me sohte konehng de kin kasalehda ngehnin kailok de ngehnin kaulim. (2 Timoty 2:20-22) E loaloakong en mih rehn irail ko me kitail kak paikihda “sawaspene kangoang kan.” (Rom 1:11, 12) Met pahn sewese kitail en akadeiong wiewia pwung oh mihmihte pohn “elen mour.”—Melkahka 16:11.
Kaukaule Akadeiong Wiewia Pwung
17. Nin duwen Nempe irelaud 25, apwal dahieu lelohng mehn Israel kan, oh mehn kasukuhl dahieu me met wiahiong kitail?
17 Mwohnte mehn Israel kan sapwenikihla Sapwen Inou, kid kei rehrail pilada en idawenla wiewia suwed—oh lelohng apwal. (Nempe, irelaud 25) Rahnwet, sapwellimen Siohwa aramas akan kin kesikesihnen mwohn sampah kapw pwungo. Irail ko me kin kaukaule soikala wiewia suwed en sampah wet pahn paikihda kapai en pedolong loale. Nin duwen aramas soh unsek, kitail kin ahneki lamalam sapwung kan, ahpw Koht kak sewese kitail en idawenla kaweid pwung en sapwellime ngehn sarawi. (Kalesia 5:16; 1 Deselonika 4:3, 4) Ihme kitail en kapwaiada peneu en Sosua ong Israel: “Kumwail wauneki Kauno (Siohwa), oh papah ih ni mehlel oh loalopwoat.” (Sosua 24:14) Lammwiki kansensuwedihla Siohwa pahn sewese kitail en akadeiong elen wiewia pwung.
18. Me pid wiewia suwed oh wiewia pwung, dahme Kristian koaros en nantiong wia?
18 Ma inengen omw mongiong iei en kaperenda Koht, eri en nantiong kapwaiada peneu en Pohl: “Kumwail en audehkhda nan kapehdamwail kan soahng mwahu kan me kapingpe mie: soahng kan me mehlel, me kesempwal, me pwung, me mwakelekel, me kaselel oh waun.” Ma komw pahn wia met, ia pahn imwila? Pohl mahsanih: “Doadoahngki dahme kumwail padahngki oh ale sang rehi, sang ni ei lokaia oh pil ei wiewia kan. Eri, Koht me kin ketikihong kitail popohl, en ketin ieiang kumwail.” (Pilipai 4:8, 9) Ehi, ki sawas en Siohwa ke kak soikala wiewia suwed oh akadeiong wiewia pwung.
[Nting tikitik me mi pah]
a Kilang The Watchtower en April 15, 1993, ni lokaiahn wai, pali 19-24, oh oarelap ko “Young People Ask. . . ” nan Awake! en February 8, February 22, oh March 22, 1993, oh November 22, 1996.
Iren Kousapahl
◻ Dahme anahn pwehn kak akadeiong wiewia pwung?
◻ Pahn soahngen irair dahkei me Esekaia, Daniel, oh mehn Ipru silimeno kolokolte arail wiewia pwung?
◻ Iaduwen kitail kak duwehte Daniel me pelianda widing kan en Sehdan?
◻ Dahme karehda Kristian kan anahne pere irail me pid mehn kamweit kan?
◻ Iaduwen onop, doudouloale ire kan, oh werek kin pidada akadeiong wiewia pwung?
[Kilel nan pali 15]
Me pwulopwul Esekaia kin akadeiong wiewia pwung mendahki e kapilpilkihpene tohnkaudok kan en Molech
[Kilel kan nan pali 17]
Kristain kan anahne en pere irail ni ahnsou me e kin pid mehn kamweit kan