Kaleke Sounpadahk Likamw Akan!
“Sounpadahk likamw ekei pahn pwarada rehmwail.”—2 PITER 2:1.
1. Dahme Sud koasoanehdi me e pahn ntingih duwe, oh dahme karehda e wekidala dahme e pahn ntingih?
IA uwen e wia mehkot kapwuriamwei! Mie sounpadahk likamw kan nan mwomwohdisohn Kristian nan tepin pahr kan! (Madiu 7:15; Wiewia 20:29, 30) Rien Sises Sud wehwehki ire wet. E koasoia me e koasoanehdi pwehn ntinglahng ienge me pwoson kan duwen “komour me kitail koaros ahnekipenehr,” ahpw e kawehwe: “Ahpw met I pehmadahr anahn laud en wiahda kisinlikou kiset pwe I en kangoangngoangehkin kumwail, kumwail en kehlail nan mouren pwoson.” Dahme karehda Sud wekidala ireo me e pahn koasoia? Pwehki, e mahsanih, “me aramas mwersuwed kei me kin denderin mwoarong nanpwungatail, wekidalahr mahsen en rongamwahu duwen kalahngan en Koht ong ni poadoarepen ar tiahk suwed kan.”—Sud 3, 4.
2. Dahme karehda 2 Piter irelaud 2 oh Sud duwepenehki?
2 E sansal me, Sud nting mwurinte Piter ntingihdi nah kisinlikou keriauwo. Ni mehlel Sud wehwehki kisinlikou wet. Ni mehlel, e kasalehda soahngen lamalam ohte nan nah kisinlikou en peneu kehlailo. Ihme karehda, ni atail kasawih 2 Piter irelaud 2, kitail pahn tehkada ia uwen e duwehte nein Sud kisinlikouwo.
Imwilahn Padahk Likamw kan
3. Dahme wiawi mahs me Piter mahsanih me pahn pil pwurehng wiawi?
3 Mwurin Piter kangoangehki rie Kristian kan en tehk kanaiohng kokohp kan, e mahsanih: “Soukohp likamw ekei pwaradahr kawao rehn mehn Israel ko, oh met pahn pil duwehte rehmwail: sounpadahk likamw ekei pwarada.” (2 Piter 1:14–2:1) Sapwellimen Koht aramas kan en mahs alehiehr kokohp mehlel kan, ahpw re pil anahne peiong padahk likamw kan en soukohp likamw kan. (Seremaia 6:13, 14; 28:1-3, 15) Seremaia ntingihdi: “Ahpw I kilangehr soukohp en Serusalem kan, me re wiahda suwedsang; pwe re kin kamwahl oh wiahda likamw.”—Seremaia 23:14.
4. Dahme karehda sounpadahk likamw kan warohngki kasorala?
4 Ni ah kasalehda dahme sounpadahk likamw kan pahn wia nan mwomwohdisohn Kristian, Piter mahsanih: “Re pahn kahredohng pohmwail kaupamwail oh padahk likamw ekei, oh re pahn kahmahmkihla Mwohnsapw [Sises Krais] me kamourirailla, ihme re pahn kahrehkidohng pohrail kaupahr mwadang.” (2 Piter 2:1; Sud 4) Imwilahn soahngen saminimin wet nan tepin pahr kan en Kristian iei Kristendom nin duwen me kitail ese rahnwet. Piter kasalehda dahme karehda sounpadahk likamw kan uhdahn warohngki kasorala: “Eri, me tohto pahn idawehnla ar wiewia suwed kan; oh pwehki arail wiewia kan, aramas akan pahn lahlahwehkihla Elen Komour mehlel.”—2 Piter 2:2.
5. Dahme sounpadahk likamw kan pwukoahki?
5 Medewehla duwen met! Pwehki manaman en sounpadahk likamw kan, me tohto nan mwomwohdiso kin iang pidada tiahk suwed kan. Lepin lokaiahn Krihk me kawehwe “tiahk suwed” kin wehwehki tiahk samin, oh sohte kak koledi ahr ineng kan, oh kauwehla koasoandi en tiahk pwung, oh lemei, oh soh katapanki ahr wiewia suwed kan. Piter kosoiaiehr mwowe me Kristian kan kan “pitsang meninkau kan en sampah me ineng suwed kin karehda.” (2 Piter 1:4) Ahpw ekei pahn pwurelahng wiewia suwedo, oh sounpadahk likamw kan nan mowmwohdiso pahn keiou pwukoahki met! Ihme karehda elen me mehlelo pahn mwamwahlla. Ia uwen met kansensuwed! Ni mehlel, met iei ire ehu me sounkadehde kan en Siohwa rahnwet anahne tehk kanaiong. Kitail en dehpa manokehla me, dahme kitail wia kak wahdo kaping de kanamenek ong Siohwa Koht oh sapwellime aramas akan.—Lepin Padahk 27:11; Rom 2:24.
Kapedolong Padahk Likamw kan
6. Dahme kin kamwekid sounpadahk likamw kan, oh iaduwen re kin rapahki en ale dahme re mwahuki?
6 Ni loaloakong, kitail en tehk iaduwen sounpadahk likamw kan kin kapedelong arail lamalam samin kan. Piter mahs koasoia me re kin wia met ni soh sansal. E kapatahiong: “Pwehki ar noahrok, sounpadahk likamw pwukat pahn kepwehpwehkila ar pahn padokohng kumwail poadoapoad likamw kan.” Ineng roporop me kin kamwekid sounpadahk likamw kan, duwen me sansalda nan kawehwehn The Jerusalem Bible: “Re nantiong pwainkinkumwailda lokaiahn widing sohsansal kan.” Me rasehng met, kawehwe me James Moffat wiahda wasaht iei: “Nan ahr ineng suwed re pahn kauwekinkumwailla akamai widingek kan.” (2 Piter 2:1, 3) Lokaiahn soupahdahk likamw kan pahn mwomwen mehlel ong irail ko me sohte kehlail ni pali ngehn, ahpw arail lokaia kan kin uhdahn wiawihda pwehn “pwaine” aramas, pitih irail pwe ren peikiong ineng roporop kan en sounlikamw kan.
7. Padahk en aramas dahieu ndandla nan tepin pahr kan en Kristian?
7 Ni sohpeikidpe, sounpadahk likamw kan nan tepin pahr kin mihla pahn mwekid en lamalam en sampah en ahnsouwo. Ni ahnsou me Piter wie ah nting, padahko me adaneki Gnosticism me inenen ndand. Mehn Gnostic kan kin kamehlele me soahng koaros me suwed oh soahng kohte me pid ngehn me mwahu. Ihme karehda, ekei irail kin kose me e sohte katepe dahme aramas men wiahiong paliwere. Re koasoia me, kedekedeo, aramas sohla pahn ahneki paliwere. Ihme karehda, re kosoia me dihp ong paliwar—iangahki nenek—sohte kesempwal. E sansal me, ekei me kose me irail Kristian mihla pahn soahngen lamalam wet.
8, 9. (a) Padahk likamw dahkei kamwekidada ekei Kristian kan en mahs? (b) Nin duwen me Sud kasalehda, dahme ekei nan mwomwohdiso kin wiewia?
8 Emen me semenih Paipel koasoia me “mie irail kan nan pelien Sarawi me kin kawehwe sapwung padahk en mahk,” de “mahk kalahngan.” (Episos 1:5-7) Nin duwen me e kosoia, ekei kin akpwung ni ahl wet: “Komw kin koasoia me [mahk kalahngan] en Koht me tehlap itar ong pwaidi dihp koaros? . . . Eri kitail en wiewiahte dihp, pwehki [mahk kalahngan] en Koht kak kamwekelesang dihp koaros. Ni mehlel uwen laud en atail wiahda dihp ih uwen laud en [mahk kalahngan] en Koht pahn doadoahk.” Mieiehr pak me ke rong soahngen lamalam sapwung wet?
9 Wahnpoaron Pohl kin tuhwong irail kan me kin ahneki lamalam sapwung duwen mahk en Koht ni ah kalelepek: “Dene kitail en mihmihte nan dihp pwe kalahngan en Koht en laudla?” E pil idek: “Eri, dah? Kitail pahn wiahda dihp pwehki atail solahr mi pahn kosonned, ahpw pahn kalahngan en Koht?” Ong ehu ehu peidek pwukat Pohl sapengki: “Soh kowahlap!” (Rom 6:1, 2, 15) E sansal me, nin duwen me Sud kasalehda, mie irail kan me “wekidalahr mahsen en rongamwahu duwen kalahngan en Koht ong ni poadoarepen ar tiahk suwed kan.” Ahpw, Piter kasalehda me ong soahngen aramas pwukat ‘Sounkauparail kin ketin pepehd.’—Sud 4; 2 Piter 2:3.
Karasaras en Peneu kan
10, 11. Karasaras en peneu siluh dah kei Piter kapwarehda?
10 Pwehn kasalehda me Koht pahn pelianda irail kan me kin nsenki wia sapwung, Piter kihda sang nan Pwuhk Sarawi karasaras en peneu siluh. Keiou, e ntingihdi: “Pwe Koht sohte ketin kupwurehla tohnleng ko me wiahdahr dihp.” Irail pwukat, Sud mahsanih, “sohte mihmihte nan uhdahn dewerail, ahpw kesehla uhdahn ar wasa” nanleng. Re kohdo sampah mwohn Nohliko oh alehong irail paliweren aramas pwehn kak wia nsenen pwopwoud ong serepein kan en sampah. Pwehn kaloke irail pwehki arail wiewia soh konehng, re lekdekdiong nan “Tartarus,” de nin duwen me Sud mahsanih, re “salkihdi selmete poatopoat nan wasa rotorot mosul pah, oh ketin nekinekid irail ong kadeiparail ni Rahn Lapalapo.”—2 Piter 2:4; Sud 6; Senesis 6:1-3.
11 Mwuri, Piter kosoia duwen aramas kan ni mwein Noha. (Senesis 7:17-24) E kosoia me ni mwein Noha Koht “sohte ketin kupwurehla mehn kawa ko, ahpw e ketikihdiong pohn tohn sampah suwed ko Nohlik Lapalapo.” Ikmwuri, Piter ntingihdi me Koht ketikihda “kadehdehpen dahme pahn wiawihong me suwed kan” ni ah karongehkihla kisiniei kahnimw kan en Sodom oh Komora.” Sud kapatahiong ireo duwen irail ko me kin “pwurepwurehng wia nenek oh [rapahki] uduk ong wiewia samin kan.” (2 Piter 2:5, 6; Sud 7) Ohl akan sohte kin ihte nenekiong lih kan ahpw kin inangih ohl teikan, ele pil inangih wia dihp ong mahn akan.—Senesis 19:4, 5; Lipai 18:22-25.
12. Nin duwen me Piter kasalehda, iaduwen wiewia pwung kin ale katingpe?
12 Ahpw, ni ahnsouwohte, Piter kasalehda me Siohwa kin katingih irail ko me kin papah ih ni lelepek. Karaspe ehu, e kasalehda iaduwen Koht “komourala Noha, iei ih me lohkiseli duwen mour pwung pahn kupwur en Koht, oh pil iangahki aramas isimen” ni Ah wahdo Nohliko. E pil kosoia duwen en Siohwa kapitala “Lot, ohl lelepek men” ni ahnsoun Sodom, oh kaimwsekihla: “Eri, Kauno (Siohwa) ketin mwahngih kapitasang me poadidi kan nan ar apwal akan, oh pil ketin mwahngih nekinekid ong me suwed kan lokolok lao lel Rahnen Kadeik.”—2 Piter 2:5, 7-9.
Wiewia Kan Me Warohng Kalokepe
13. Ihs me keiou warohng kadeik, oh ouraman dah me re kin mweidala rehn ahneki?
13 Piter kasalehda ihsnge irail kan me keiou warohng ale kadeik en Koht, me iei irail ko me, “kin kapwaiada ineng pwelipwel en paliwararail kan oh kin mwamwahliki koasoandi kan en nin limen Koht.” Kitail kak uhdahn pehm engieng en Piter ni ah mahsanih: “Sounpadahk likamw pwukat me eimah oh aklapalap, re sohte wauneki lingaling en mehn powe kan, pwe re kin lahlahwe.” Sud ntingihdi me “aramas pwukat me kin kalap ouraman, kin kasaminehkihla dihp paliwararail kan . . . re kin lahlahwe lingan en tohnleng kan.” (2 Piter 2:10; Sud 8) Arail ouraman kan kin pidada tiahk en wendipene me kin kangoange ren rapahki nsenamwahu en nenek. Eri, ni ahl dah, me re kin “mwamwahliki Koht” oh “lahlahwe lingan en tohnleng kan”?
14. Ni ahl dah sounpadahk likamw kan kin “mwamwahleki Koht” oh “lahlahwe me lingan akan”?
14 Re wia met ni arail kin tateki manaman sang powe. Kristian elder kan kin mwete lingan en Siohwa Koht oh sapwellime Ohlo oh, pwehki met, mie lingan me kin kohieng elder pwukat. Mehlel, re kin wiahda sapwung kan, duwehte me pein Piter wiahda, ahpw Pwuhk Sarawi kin kangoangehkin tohn mwomwohdiso en uhpaiong soahngen me lingan pwukat. (Ipru 13:17) Arail luwet sohte kihong kitail pwung en kauwe irail. Piter mahsanih me tohnleng kan sohte kin “lahlahwe sounpadahk likamw pwukat,” mendahki re uhdahn warohng met. “Ahpw soahngen aramas pwukat,” Piter pousehla mahsanih, “re rasehng mahn lawalo kan, me ipwidiong poaropoardi oh kamakamla; re kin lahlahwe mehkot me re sehse de sohte dehdehki. Re pahn ohla duwehte mahn lawalo kan me kin kamakamla.”—2 Piter 2:10-13.
“Iang Amwail Kamadipw”
15. Wiepe dah kei sounpadahk likamw kan kin doadoahngki, oh iawasa re kin rapahki pwehn pitih meteikan?
15 Mendahki ohl mwersuwed pwukat kin “wiahki momour nsenamwahu ni rahn mehkot kaperen” oh me “mwaimwai oh samin,” re pil widingek. Re kin mwekid ni “soh sansal,” ni ar doadoahngki “lokaia likamw kan,” nin duwen me Piter kosoia mwowe. (2 Piter 2:1, 3, 13) Ihme karehda re sohte uhdahn pahn uhwong ahn elder kan songosong en utungada kosonned mwakelekel en Koht de uhdahn ni sansal rapahki pein arail nsenamwahu en uduk. Ahpw, Piter koasoia me re pahn “iang kumwail sak, oh pereperenki ar pitipitih kumwail ni ahnsouwo.” Oh Sud ntingihdi: “Re kin rasehng takai kan me kin ekiek pahn pihl nan amwail kamadipw en limpoak kan.” (Sud 12) Ehi, duwehte takai kengkeng kan pahn pihl me kak koapwoarehpeseng pahn pwoht me karehong sehla ko me sasairki met en duhla, ihme pil duwehte sounpadahk likamw kan kin kauwehla irail kan me sasairki met me re ni mwalahun kose me re limpoakong ahnsou me re kin wia “kamadipw en limpoak kan.”
16. (a) Dahkot “kamadipw en limpoak kan,” oh wasa dahkei me rasehng met me irail tiahk samin kan kin doadoahk ie rahnwet? (b) Ihs me sounpadahk likamw kan kin song en pitihdi, eri dahme soahngen aramas pwukat en wia?
16 “Kamadipw en limpoak” pwukat ni sansal kin wia ahnsoun werekpene ni ahnsou me Kristian kan ni tepin pahr kan kin kohpene pwehn paiekihda mwenge kan oh werek kan. Sounkadehde kan en Siohwa rahnwet kin ekei pak kohpene, ele ni kamadipw en kapwopwoud kan, ni piknik kan, de ong werekpene. Iaduwen aramas likamw kan kak doadoahngki soahngen ahnsou pwukat pwehn pitih irail kan me sasairki met? Piter ntingihdi: “Nan pwoaren masarail kan me diren kamwahl . . . , oh re kin pitihediong nan dihp me nan kapehd luwet akan.” Re kin kauhlahng “mongiongarail noahrok kan” pohn irail kan me soh tengeteng ni pali ngehn me sohte uhdahn wiahkihla padahk mehlel pein arail. Eri en ale peneu sang dahme wiawi ni mwein Piter, oh en kaleke met! En pelian ma emen men karehong uhk nan tiahk samin, oh en dehr mweidohng lokaia kadek de kaselel en emen me men karehong nan tiahk samin en pitiukidi!—2 Piter 2:14
“Elen Palaam”
17. Ia “elen Palaam,” oh iaduwen e kamwekidada irail me 24,000 kan?
17 Irail “riahla” pwukat eseiehr padahk mehlel ahnsou werei. Irail mwomwen kin pidada wiewiahn mwomwohdiso kan koaros. Ahpw Piter mahsanih: “Aramas me keselahr ahl inen oh salongalahr kei irail; re kin ideidawehn elen Palaam, nein Peor, me noahrokehda mwohni me e pahn alehki dipeo.” (2 Piter 2:14, 15) Elen soukohp Palaam iei en wia kaweid pwe aramas kan en lohdiong nenek pwehn alehki ong pein ih mehkot sang met. E padahkiong Nanmwarki en Mohap Palak me Koht pahn kariahla mehn Israel kan ma aramas kan pahn lohdiong nan dipen nenek. Pwehki met, lih en Midia kan pitihdi pali moaron en sapwellimen Koht aramas kan, oh aramas 24,000 kamakamla pwehki arail tiahk samin.—Nempe 25:1-9; 31:15, 16; Kaudial 2:14.
18. Ia uwen Palaam ngoangkihla dahme e men wia, oh ia imwilao ong sounpadahk likamw kan?
18 Piter kasalehda me Palaam mihla pahn idihd endehr wia met ni ahnsou me nah ahso lokaiaiong ih, ahpw ahn Palaam “noahrokehda mwohni me e pahn alehki dipeo” me inenen laud me karehda ni ahnsou me met wiawi, e sohte uhdisang ah “wiewiahn aramas pweipwei.” (2 Piter 2:15, 16) Ia uwen suwed en met! Meid suwediong irail ko me duwehte Palaam me kin songosong en pitih sapwellimen Koht aramas kan ni ahr kin kasonge irail en wia dipen nenek! Palaam mehkihla ah wiewia suwedo, kasalehda dahme pahn wiawiohng irail ko koaros me idawenla ele kan.—Nempe 31:8.
Arail Widing Me Kohsang Rehn Tepil
19, 20. (a) Dahme irail kan me rasehng Palaam kin duwehte, oh pwehkida? (b) Ihs me irail kin kasonge, oh iaduwen? (c) Dahme karehda kitail kak nda me arail widing kohsang rehn Tepil, oh iaduwen atail kak pere pein kitail oh meteikan sang irail pwukat?
19 Ni ah kasalehda irail kan me duwehte Palaam, Piter ntingihdi: “Eri, aramas pwukat rasehng utunpihl kei [de, pwarer] me madadahr, re rasehng depwek kei me melimel kin ipipirwei.” Ong sounseilok men me men nimpilada nan sahpwtehn, e kak mehla ma sohte pilen pwarero. Ihme e sohte kapwuriamwei me, “rotorot mosul en wasa loal kowahlahpie kin nekinekidohng” irail ko me rasehng soahng pwukat! “Re kin wiahda kapahrek en pohnmwahso kei me soh-audepe,” Piter pousehla mahsanih, “oh kin doadoahngki tiahk suwed pwelipwel kan en paliwar pwe en kainangihodohng rehrail irail kan me ahpwtehn mweidohsang nan mour sapwung.” Re kin pitih me soakoahiok kan ni ahr kin “inoukihong irail saledek,” Piter mahsanih, nin doken “pein irail ar kin wiewia lidun kaupar.”—2 Piter 2:17-19; Kalesia 5:13.
20 Widing en soahngen sounpadahk likamw pwukat kin kohsang rehn Tepil. Karaspe ehu, ele re pahn nda: ‘Koht mwahngih me kitail luwet oh kin mihla pahn ineng kan. Ma kitail mweidong kitail ineng pwukat oh kaitarala atail ineng en uduk kan, Koht pahn mahkohng kitail. Ma kitail wehkada dipetail kan, e pahn mahkohng kitail duwehte me e ketin wia ni ahnsou me kitail tepin pedolong nan padahk mehlel.’ Tamanda me Tepilo kin doadoahngki soahngen mwekidohte ong Ihp, ni ah inoukiohng liho me e kak dihp ni soh kalokepe. Ong Ihp, e kose me dene dihp ong Koht pahn kihong liho marain oh saledek. (Senesis 3:4, 5) Ma kitail tuhwong soahngen aramas duwehte met me kin werekiong mwomwohdiso, kitail ahneki pwukoah en pere pein kitail iangahki meteikan ni atail pahn kehsehki irail kan me ahneki pwukoah nan mwomwohdiso soahngen aramas pwukat.—Lipai 5:1.
Pereperkihla Loaloakong Pwung
21-23. (a)Ia imwilahn sohte kapwaiada loaloakong pwung? (b) Kahpwal dahieu me Piter pahn pil koasoia mwuhr?
21 Piter kaimwsekla wasaht nan nah kisinlikou ni ah kasalehda ia imwilahn soh kapwaiada loaloakongo me e mahsanih mwowe me kesempwal ong “mour oh lelepek ong Koht.” (2 Piter 1:2, 3, 8) E ntingihdi: “Pwe ma aramas akan pitlahsangehr manaman kehlail en sampah wet pwehki ar marainkilahr atail Kaun oh Sounkomour Sises Krais, re ahpw pwurehng liselipingkihla oh lohdiong pahn manaman pwukat, iren soangen aramas pwukat pahn suwed mehlel ni imwilah sang nin tepio.” (2 Piter 2:20) Ia uwen kansensuwed en met! Soahngen aramas pwukat ni mwein Piter kin kesehkihla koapwoaroapwoar kesempwal en mour soutuk nanleng kaperen mwotomwot en nenek.
22 Ihme karehda Piter mahsanih: “Mahkete e pahn mwahuwong irail ma re sohte mwahn marainkihla pwungen kalahngan en Koht sang esehla, oh mwuhr re ahpw sohpeisang mahsen sarawi me kohieng irail. Dahme pweida rehrail kadehdehda duwen pwung en lepin kahs ko: ‘Kidi men kin pwurehng kang eh mwus, oh pwihk men me duhduhwe, kin pwurehng tapwur nan pwelmatak.’”—2 Piter 2:21, 22;Lepin Padahk 26:11.
23 Ehu kahpwal me sansal kin tepiada lelohng Kristian kan en mahs kin duwehte kahpwalo me kin lelohng ekei rahnwet. Mahso, e sansal me ekei kin lipanedki mwomwen dene inoun ketier en Krais sohte pahn pwarada. Kitail en kilang iaduwen Piter apwaliala ire wet.
Komw Tamataman?
◻ Karasaras en peneu siluh dah kei Piter kasalehda?
◻ Iaduwen sounpadahk likamw kan kin “mwamwahliki Koht”?
◻ Ia elen Palaam, oh iaduwen irail ko me kin idawenla kin songosong en pitihdi meteikan?
◻ Ia imwilahn sohte kapwaiada loaloakong pwung?
[Kilel nan pali 23]
Palaam wia karasaras en peneu ehu