Siohwa Kesempwalki Amwail Papah Ih Ki Mouramwail Unsek

“Sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Kauno (Siohwa), ahpw kaidehn ong aramas.”​—KOLOSE 3:23.

1, 2. (a) Kapai laud dahieu me kitail kak ahneki? (b) Dahme karehda ekei pak kitail sohte kin kak wia soahng kan koaros me kitail men wia ni atail papah Koht?

PAPAH Siohwa iei pwukoa ehu me keieu lapalap me kitail kak wiahiong. Ihme ki kahrepe mwahu, makasihn wet kin ahnsou werei kangoangehki Kristian kan en iang wia doadoahk en kalohk, pil iangahki papah “ni uwe ehu me laud” ahnsou kan koaros me re kakohng. (1 Deselonika 4:⁠1) Ahpw, kitail sohte kak ahnsou koaros wia soahng kan koaros me mohngiongatail inengieng wia nan atail papah Koht. Emen sister kiripw me papdaisla kereniong sounpar 40 samwalahro kawehwe: “Ahi irair karehda I anahne doadoahk en mwohni ahnsou koaros. Kahrepen ahi doadoahk iei, kaidehn pwe I en pwainda likou kaselel kan de pwainda kohla mwemweit, ahpw pwehn pwainda kisin anahn en mour, iangahki pweinen wini oh pweinen wia ngih. Ahi pepehm iei me likamwete I kin kihong Siohwa dahme luhwehdi.”

² Limpoak ong Siohwa kin kamwekidih kitail en men wia uwen me kitail kakohng nan doadoahk en kalohk. Ahpw irair kan nan mour kin kalap irehdi dahme kitail kak wia. Apwalih pwukoa teikan me Pwuhk Sarawi kangoangehkin kitail en wia, iangahki pwukoahn peneinei, pahn kak kihsang pali laud en atail ahnsou oh kehl. (1 Timoty 5:​4, 8) Nan “ahnsou apwal pwukat,” mour kin wie apwalla. (2 Timoty 3:⁠1) Ni ahnsou me kitail sohte kin kak wia soahng kan koaros me kitail men wia nan doadoahk en kalohk, mohngiongatail kin koarompwa kitail. Ele kitail pahn kak medemedewe ma Koht pahn kupwurki atail kaudek ong ih.

Kaselelpen Papah Ki Mour Unsek

3. Dahme Siohwa kasik sang kitail koaros?

³ Nan Melkahka 103:​14, Paipel kihong kitail koapworopwor me Siohwa “mwahngih dahme kitail wiawihkihda, e pil ketin tamataman me kitail uhdahn pwehl.” Me laud sang aramas koaros, e wehwehki me mie ididi en dahme kitail kak wia. E sohte ketin kasik laud sang dahme kitail kak wiahda. Dahme e kasik sang kitail? Mehkot me aramas koaros, mendahki ia ah irair nan mour, kak wia: “Sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Kauno (Siohwa), ahpw kaidehn ong aramas.” (Kolose 3:23) Ehi, Siohwa kasik me kitail​—⁠kitail koaros​—⁠en papah ih ki mouratail unsek.

4. Ia wehwehn en papah Siohwa ki mour unsek?

⁴ Ia wehwehn en papah Siohwa ki moure unsek? Lepin lokaiahn Krihk me kin kawehwe lokaiao “moure unsek” kin uhdahn wehwehki “sang nan moure (soul).” Lepin lokaiahn wai wet “soul” kin wehwehki aramaso pwon, ah koahiek kan koaros en wahr oh lamalam. Papah ki moure unsek eri kin wehwehki kihda pein emen emen kitail, doadoahngki atail koahiek kan koaros oh kauhlahng atail kehl koaros ong uwen me keieu laud me kitail kakohng nan atail papah Koht. Ni lokaia mengei, e kin wehwehki wia uwen me mouretail (de soul) kakohng wia.​—⁠Mark 12:​29, 30.

5. Iaduwen karasaras en wahnpoaron kan kasalehda me kaidehn koaros kak wia soahngen dei ohte nan kalohk?

⁵ Papah ki mour unsek kin wehwehki me kitail koaros en wia uwe teieu nan kalohk? Met sohte kak wiawi, pwehki irair en emen oh ah koahiek kin weksang ahn mehteio. Tehk sapwellimen Sises wahnpoaron lelepek kan. Arail doadoahk sohte kin uwe teieu. Karasepe ehu, kitail sohte nohn ese ekei wahnpoaron kan, duwehte Saimon mehn Kenan oh Seims nein Alpius. Ele ara doadoahk nin duwen wahnpoaron kei me sohte laud. (Madiu 10:​2-4) Me weksang met, Piter kakohng alehda pwukoa toutou tohto​—⁠Sises ketikihong ih “kih en Wehin Koht”! (Madiu 16:19) Mendahki met, Piter sohte kasapwilda sang wahnpoaron teikan. Ni ahnsou me Sohn kilangada kasansal en Serusalem Kapw nan Kaudial (mpen pahr 96 C.E.), e kilangada poahsoan takai 12 oh pohn poahsoan pwukat “mwaren wahnpoaron ehk riemen ko” nting powe.a (Kaudial 21:14) Siohwa kin ketin kesempwalki doadoahk en wahnpoaron kan koaros, mendahki ekei ni sansal kak wia laud sang dahme mehteikan kak wia.

6. Nan ahn Sises karasaras en sounkamwarako, dahme wiawihong wahro me mwerediong pohn “pwehl mwahu,” oh peidek dah kei pwarada?

⁶ Me duwehte met, Siohwa sohte kasik me kitail koaros pahn kak wia uwen dei en kalohk teieu. Sises kasalehda duwen met nan karasaras en sounkamwarak, me e karasahiong doadoahk en kalohk duwehte kamwarak kisin werentuhke kan. Werentuhkeo pwupwudiong pohn soangsoangen pwehl kan, me rasehng soangsoangen irair en mohngiong kan me irail ko me kin rong rongamwahuwo kin kasalehda. “A me pwupwudiong nan pwelmwahuwo,” Sises kawehwe, “wehwehki irail kan me kin rong mahseno oh wehwehki mwahu mehlel; e ahpw kin wa rehrail, rehn ekei uwen tohtohn wa epwiki, a rehn ekei weneisek, a rehn ekei silihsek.” (Madiu 13:​3-8, 18-23) Dahkot wah wet, oh dahme karehda wah ko kin pwarada ni soangsoangen uwen tohto kan?

7. Ia wahn wahro me kamweremwerdi, oh dahme karehda tohtohn wah kan kin wekpeseng?

⁷ Pwehki waho me kamwerdi iei “mahsen en wehio,” kapwarehda waho kin wehwehkiong kaparaselih mahseno, de koasoiaiong mehteikan duwen met. (Madiu 13:19) Uwen tohtohn waho me wosada kin wekpeseng​—⁠sang meh silihsek lellahng meh epwiki​—⁠me rasehng wekpeseng en emen emen koahiek oh irair kan nan ahr mour. Aramas emen me ahneki roson mwahu oh paliwar kehlail pahn kak kalohk laud sang emen me luwet ni paliwar pwehki e kalap soumwahu de pwehki e mahla. Aramas pwulopwul emen me kiripw me sohte ahneki pwukoahn peneinei pahn kak kalohk laud sang emen me anahne doadoahk en mwohni kaukaule pwehn kak apwalihki ah peneinei.​—⁠Pil tehk Lepin Padahk 20:⁠29.

8. Iaduwen Siohwa kin kilangwohng irail ko me kin kihda uwen me keieu mwahu me mourarail kakohng?

⁸ Mwohn silangen Koht, aramaso me kapwarehda wah silihsek ni ah papah ki moure unsek kin wehwehki me ah lelepek tikitik sang meno me kapwarehda wah epwiki? Soh douluhl! Uwen tohtohn wah ko pahn kin wekpeseng, ahpw Siohwa kin kupwurperenki met ma atail papah kin uwen me keiou mwahu me mouratail kakohng wiahda. Tamataman me, wekpeseng en uwen wah kan koaros kin kohsang mohngiong kan me wia “pwehl mwahu.” Lepin lokaiahn Krihko (kalos) me kin kawehwe “mwahu” kin wehwehkiong mehkot me “kaselel” oh me kin “kaperenda mohngiong, oh kin kaperenih mese.” Ia uwen kansenamwahu en ese me ni ahnsou me kitail kin wia uwen me keieu mwahu me kitail kakohng, mohngiongatail me kaselel mwohn silangen Koht!

Dehr Kaparekihpene Emen Emen

9, 10. (a) Mohngiongatail kak kalwakitaillahng nan soahngen madamadau sapwung dah? (b) Iaduwen karasaraso nan 1 Korint 12:​14-26 kin kasalehda me Siohwa sohte kin kaparekih dahme kitail wiahda ong dahme mehteikan wiahda?

⁹ Mohngiongatail me soh unsek ele pahn kak kadeik soahng kan. E kak kaparekih atail papah ong en mehteikan. Ele e kak medemedewe, ‘Mehteikan kin kak kalohk laud sang ie. Iaduwen Siohwa pahn kak kupwurperenki ahi papah ih?’​—⁠Pil tehk 1 Sohn 3:​19, 20.

¹⁰ Madamadau en Siohwa oh ele kan me ileile sang pein atail. (Aiseia 55:⁠9) Kitail kak wehwehkihla elen ahn Siohwa kin kilangwohng en emen emen atail papah ih sang nan pwuhk en 1 Korint 12:​14-26, ireo me kasalehda me mwomwohdiso kin rasehng paliwar ehu me ahneki kakon en paliwar tohto​—⁠mese kan, peh kan, neh kan, salonge kan, oh kakon teikan. Medemedewe mahs, duwen uhdahn paliwaren aramas. Ia uwen e pahn pweipwei en kaparekih mesomw kan ong pehmw kan de kaparekih nehmw kan ong salongomw kan! Ehu ehu kakon en paliwar kin wia doadoahk me weksang doadoahk en mehteio, ahpw mendahki met, kakon koaros me katapan oh kesempwal. Me rasehng met, Siohwa kin ketin kesempwalki omw papah ki mouromw unsek mendahki ma mehteikan kin wia met laud sang de tikitik sang uhk.​—⁠Kalesia 6:⁠4.

11, 12. (a) Dahme karehda ekei kin pehm me re “luwet” de “sohte kesempwal”? (b) Iaduwen Siohwa kin kilangwohng atail papah?

¹¹ Pwehki soumwahu, mahla, de irair teikan kin irehdi uwen deilahn atail papah, ekei pak ekei kitail ele pahn pehm me kitail “luwet” de “sohte kesempwal.” Ahpw met kaidehn ih duwen me Siohwa kin kilangwohng ire kan. Paipel padahkihong kitail: “Kakon en paliwar akan me mwomwen luwet rehtail, e pil uhdahn kesempwal ong kitail. A kakon teikan me kitail kin lemeleme me sohte nohn kesempwal, ih me kitail kin apwali mwahu. . . . Ahpw Koht ketin koasoanehdi paliwaratail kan oh ketikihong wahu laud kakon akan me sohte ar lingan.” (1 Korint 12:​22-24) Ihme Siohwa kin kesempwalki aramas koaros. E kesempwalki uwen doadoahk me kitail kakohng wiahda mendahki irair kan me kin irekitaildi. Mohngiongomw soh kin kamwekid uhk en men wia uwen me ke kakohng ni omw papah soahngen Koht men me kin wehwehkin kitail oh poakohng kitail?

¹² Eri, dahme Siohwa kesempwalki, kaidehn me komw en wia duwehte uwen me mehteikan kin wiahda ahpw komw en wia dahme komwi​—⁠omw mour​—⁠kak wiahda. Me Siohwa kin kesempwalki nannanti me emen emen kitail kakohng kin sansalda ni ahl ehu me kin kamwekidih kitail sang ni en Sises lamalam ong lih riemen erein kaimwseklahn ah mour pohn sampah.

Kisakis “Inenen Pweilaud” Ehu Sang Ni Kalahngan en Lih Emen

13. (a) Ia irair ko me kapilpene en Mery kieldiong leh pwohmwahuwo pohn moangen Sises oh pohn peten neh kan? (b) Ia uwen pweilaud en ahn Mery leho?

¹³ Ni soutik en Ni Alem, Nisan 8, Sises pwaredohng Pedani, kisin kahnimw kis pohn ukadahn ni palimesehn Dolen Ohlip, mpen mwaihl riau dohkisang Serusalem. Mie kompoakepahn Sises nan kahnimwet​—⁠Mery, Marda, oh riara ohlo, Laserus. Ele Sises kin kalap mwemweitdo rehrail. Ahpw ni soutik en Rahn Kaunop, Sises oh kompoakepah kan iang mwengehn soutik ni imwen Saimon, ohl emen me mahso soumwahuki soumwahu en tokutok me Sises kamwahuwiala. Nin doken Sises wie mwomwohd nin tehpelo, Mery wiahda wiewia karakarahk ehu me kasalehda ah limpoak loal ong ohlo me kaiasada rie ohlo. E kauwehla kisin pwoatolo me diren leh pohmwahu, me “inenen pweilaud.” Ehi, inenen pweilaud! Pweine mihmi ni uwen mwohni silper 300, me parekiong uwen pweinen doadoahk en sounpahr ehu. E kieldiong leh pwohmwahuwo pohn moangen Sises oh pohn peten neh kan. Liho pil limwikihda peten nehn Sises kan piten moange.​—⁠Mark 14:3; Luk 10:​38-42; Sohn 11:​38-44; 12:​1-3.

14. (a) Iaduwen tohnpadahk kan mwekidikih dahme Mery wiahda? (b) Iaduwen Sises doarehla dahme Mery wiadahro?

¹⁴ Tohnpadahk kan lingeringerkihda met! Re kalelepek, ‘Dahme mehn kei pwohmwahu wet ohkihlar mwahl?’ Sudas, ni ah ekihla ah ineng en pirap, ahpw koasoia me leho kak netila mehn sewesehda me paisuwedlahr kan, oh koasoia: “Dahme karehda leh wet sohte netila ni mwohni silper silipwiki, pwe mwohni wet en kohieng me semwehmwe kan?” Ahpw Mery nennenlahte. Sises, ahpw, padahkihong tohnpadahk kan: “Kumwail piseksang! Kumwail dehr direpwki lihet! Tiahk kaselel [kalos] ehu me e wiahiong ie. . . . E wiadahr uwen me e kak: e wiadahr marekeiso wet ong paliwereiet pwe en kaunopada me pahn wiawihong ie mwohn ei pahn seridi. Eri, kumwail en ese pwe wasa koaros nin sampah me rongamwahu pahn lohkseli ie, me e wiadahret pahn pil iang lohkseli ie, pwe en kin wiewia katamanpe.” Ia uwen limpoak en mahsen kan en Sises kin kansenamwahu ong mohngiong en Mery!​—⁠Mark 14:​4-9; Sohn 12:​4-8.

15. Dahme karehda Sises inenen mwekidikih dahme Mery wiadahro, oh dahme met kasukuhlkihong kitail duwen papahki mour unsek?

¹⁵ Sises inenen mwekidikih dahme Mery wiahda. Nan ah madamadau, liho wiahda wiewia ehu me warohng kaping. Kaidehn pweilaud en kisakiso me Sises kesempwalki ahpw ire mehlelo me “e wiadahr uwen me e kak.” E doadoahngki ahnsou mwahuwo oh kihda dahme e kakohng wiahda. Ekei kawehwehn Paipel kawehwe mahsen pwukat, “E wia uwen me e kakohng,” de “E wiadahr dahme mih pahn ah manaman en wia.” (An American Translation; The Jerusalem Bible) Dahme Mery wia kin kohsang nan moure unsek pwehki e kihda uwen me e kak koaros. Ih met wehwehn papah sang nan moure unsek.

Nein Liohdi Men “Kisin Sens Toantoal Riau”

16. (a) Iaduwen Sises kin kilangwohng meirong en liohdi semwehmwe men? (b) Nein liohdio kisin sens ko mihmi ni uwen soahngen pweipwei dahieu?

¹⁶ Rahn kei mwuri, ni Nisan 11, Sises ketiket rahn ehu pwon nan tehnpas sarawio, wasao me Parisi kan peidengki ah manaman oh e sapengla peidek kan me pid taks, oh kaiasada, oh ire teikan. E kadeikada Sounkawehwehn Kosonnedo oh Parisi kan pwehki, nanpwungen soahng teikan, re kin “adihasang audepen imwen liohdi kan.” (Mark 12:40) Sises eri mwohndi, nan wasao me adaneki Kelen Lih, wasa me tiahk en mehn Suhs kan ki kose me, mie kohpwahn nekinek 13 kin mih mwo. Sises eri mwomwohd wasao ahnsou kis, mahmahsanih aramas akan ahr kesehdiong nair mwohni ko nan dewen meirongo. Aramas kepwehpwe kidalap kohdo, ekei ele ni mwomwen me re uhdahn pwung, ekei ni mwomwen suwei. (Pil tehk Madiu 6:⁠2) Sises eri mahsanihada lih emen. Aramas akan ele sohte kilang mehkot tohrohr rehn liho de ah kisakiso. Ahpw Sises, me kin mwahngih mohngiong en mehteikan, mwahngih me e wia “liohdi semwehmwe men.” E pil mwahngih ia uwen ah kisakiso​—⁠“sens toantoal riau.”b​—⁠Mark 12:​41, 42.

17. Iaduwen Sises kin kesempwalki meirong en liohdio, oh eri dahme kitail sukuhlkihdi duwen tohnmetei ong Koht?

¹⁷ Sises ekerpene sapwellime tohnpadahk kan, pwe e men ren uhdahn kilang mehn kasukuhlo me e pahn padahngki. Liho “kesehdiong eh meirong me inenen laud sang en mehteikan koaros,” Sises mahsanih. Nan ahn Sises madamadau, liho kesehdi laud sang dahme aramas ko koaros kesehdi. Liho kihda “mehkoaros me e ahneki​—⁠nah mwohni kan koaros. Ni ah wia met, e pwilikihdi pein ih nan epwelpen nin limen Siohwa. Aramaso me wia mehn kalimeng en wia tohnmetei ong Koht, iei meno me ah kisakis sohte pweilaud. Ahpw, mwohn silangen Koht, ah kisakiso me inenen pweilaud!​—⁠Mark 12:​43, 44; Seims 1:⁠27.

Sukuhlkihsang Lamalam En Siohwa Ong Papah Ki Mour Unsek

18. Dahme kitail sukuhlkihsang madamadau en Sises ong lih riemenet?

¹⁸ Sang ahn Sises lamalam ong lih riemen, kitail sukuhlkihdi mehn kasukuhl kaselel kei duwen iaduwen Siohwa kin kilangwohng en emen papah ki moure unsek. (Sohn 5:19) Sises sohte kin kaparekih liohdio ong Mery. E kesempwalki nein liohdio kisin sens toantoal riauwo duwehte en Mery leh “inenen pweilaudo.” Pwehki emen emen lih ko kin tohnmeteiki dahme keieu mwahu me e ahneki, mwohn silangen Koht ara kisakis kan koaros me kesempwal tehieu. Ihme ma pepehm en souitar kin mihla loalomw pwehki komw sohte kak wia soahng kan koaros me komw men wia ni omw papah Koht, endehr nan kapehd tikitikla. Siohwa kin kupwurperenki en ale uwen me keieu mwahu me komw kakohng kihda. Tamataman me, Siohwa kin “kasawih nan mohngiong en aramas akan,” eri e uhdahn mwahngih ineng en mohngiongomwen.​—⁠1 Samuel 16:⁠7.

19. Dahme karehda kitail endehr kadeikih dahme meteikan wia ni ahr papah Koht?

¹⁹ Lamalam en Siohwa ong en emen papahki moure unsek en kamwekid elen atail madamadau ong oh wiewia ong emen emen. Ia uwen sempoak en kauwe nannanti en mehteikan de en kaparekih en emen papah ong en mehteio! E kansensuwed pwe, emen Kristian ntingihdi: “Ekei ahnsou ekei kin ahneki soahngen lamalam me ma kaidehn kowe emen pioneer eri sohte mehkot kowe. Kiht ko me nannanti en ‘wiahte’ sounkalohk en Wehio anahne pehm me meteikan pil kalahngankin kiht.” Kitail en tamataman me sohte atail manaman en tenekihong emen iengetail Kristian ia mwomwen ah pahn papah ki moure unsek. (Rom 14:​10-12) Siohwa kin kesempwalki papah me emen emen irail sounkalohk rar kan en Wehio kin wiahiong ih ki mourarail unsek, oh kitail en pil kesempwalkin irail.

20. E pahn keiou mwahu en lemeleme dah duwen iengetail tohnkaudek kan?

²⁰ Ahpw, iaduwen ma, en ekei doadoahk en kalohk kin tikitikla sang dahme re uhdahn kak wiahda? Tikitiklahn en emen me pwoson ah kalohk pahn kasalehong elder nsenoh kan me menet anahne sawas de kangoang. Ni ahnsouwohte, kitail en dehpa manokehla me ong ekei, arail nannanti papah ki mourarail unsek kin rasehng nein liohdio kisin sens toantoal kan ah kaidehn en Mery leh pweilaudo. E pahn keiou mwahu en lemeleme me riatail brother oh sister kan kin poakohng Siohwa oh me soahngen limpoak wet pahn kamwekidih irail en wia uwen me keieu laud me re kakohng​—⁠kaidehn uwen me keieu tikitik​—⁠me re kakohng. Ni mehlel sohte ladu pwatiet men en Siohwa pahn men papah tikitik sang dahme e kak wia ni ah papah Koht!​—⁠1 Korint 13:​4, 7.

21. Doadoahk kating dahieu me tohto kin akadeiohng, oh peidek dah kan me pwarada?

²¹ Ahpw, ong sapwellimen Koht aramas tohto, papah ki mourarail unsek kin wehwehki akadeiohng doadoahk ehu me inenen kating laud​—⁠met iei doadoahk en pioneer. Kapai dah kei re kin alehsang met? Oh iaduwen kitail ko me saikinte kak pioneer​—⁠iaduwen atail kak kapwarehda ngehnin pioneer? Peidek pwukat pahn sansalda nan artikel en mwuhr.

[Nting tikitik kan me mi pah]

Iaduwen Komw Pahn Sapeng?

◻ Ia wehwehn en papah Siohwa ki mour unsek?

◻ Iaduwen karasaraso nan 1 Korint 12:​14-26 kin kasalehda me Siohwa sohte kin kaparekihpene uwen dei en atail papah ong en mehteikan?

◻ Dahme kitail sukuhlkihsang tohnmetei sang nan mour unsek me Sises mahsanihki duwen en Mery leh pweilaudo oh nein liohdio sens toantoal riauwo?

◻ Iaduwen lamalam en Siohwa ong papahki mouren emen unsek pahn kamwekidih elen atail kin kilangwohng emen emen?

[Kilel nan pali 10]

Mery tohnmeteikihla dahme keieu mwahu me e ahneki, e kapwohmwahuwihki paliweren Sises leh “inenen pweilaud”

[Kilel nan pali 11]

Nein liohdio kisin sens kan​—⁠me kereniong sohte kak pwainda mehkot ahpw mwohn silangen Siohwa, me inenen pweilaud