Dahme Kitail en Kalahnganki?
PWAL en tihnsowe karehong Harley en wekidala ah doadoahk sang emen sounwia misihn ong emen soundoadoahk en nan ohpis. Ni arail kalelepek reh ia ah pepehm ong wekidekla wet, Harley koasoia: “I loaleidki ahi men pwurehng koadoahke misihn kan. Ahpw, ni mehlel, I perenki ahi doadoahk en met sang mehn mahso.”
Ni ah kihda karepen ah nsenamwahuki met, Harley koasoia: “Met pwehki lamalam en aramas kan me ih kin doadoahk reh. Me weksang irail ko nan ahi wasahn doadoahk en mahso, ahi kaun en doadoahk oh iengei tohndoadoahk kan en ahi doadoahk en ahnsouwet kin kalahnganki doadoahk kan me I kin wiahda, oh re sohte kin uhdihsang kapinga ie. Ih wekpeseng laudo met.” Pwehki e pehm me mie katepe oh e anahn, Harley kin ahnsouwet wia tohndoadoahk peren men.
Lokaiahn kaping oh kalahngan, me warohng emen, kin inenen kansenamwahu. Ahpw, ni pali teio, lipwen soh kalahngan, kin kak kamworus, nin duwen me Shakespeare koasoia: “Ipiwei, ipiwei, kowe kisinieng en paliepeng, ke sohte suwed duwehte en aramas kin soh kalahngan.” E inenen kansensuwed pwe, me tohto kin lelohng soangen soh kadek wet.
Liksang Wiewiahn Soh Kalahngan
Nan sampah rahnwet aramas sohla kin kasalehda kalahngan mehlel. Karasepe ehu, emen souninting, kapwarehda peidek ehu: “Ma liho me pahn kapwopwoud pahn kak ahneki ahnsou en kadarpeseng kisinlikoun luk ong aramas 200, dahme karehda e sohte kak rapahkihda ahnsoun ntingihda kisinlikoun kalahnganki kisakis en kapwopwoud 163 ko?” Pak tohto aramas sohte kin pil nda kisin lokaia mengei duwehte “kalahngan.” Lamalam en roporop ong pein emen kin kekeirada wiliandi lamalam en kalahngan. Irair wet iei ehu kilelpen imwin rahn. Pohl panawihki: “Kumwail en wehwehki me ni imwin rahn akan pahn dirkihla keper. Aramas kan pahn inenen roporop. . .Re pahn uhdahn sohte kasalehda kalahngan.”—2 Timothy 3:1, 2, Phillips.
Nan irair teikan, aramas solahr kin kalahngan ahpw re kin pitihki mehteikan arail kaping. Irair en kalahngan kin kohsang nan mohngiong ni omw sohte medemedewe en alehkihsang mehkot met. Ahpw kaping likamw, me kin kalap sohte mehlel oh nohn daulihla, kin kohsang lamalam en ndandkihla de alehkihsang mehkot met. (Sud 16) Likin pitih aramas, soahngen lokaia pwukat kin kohsang wahn aklapalap oh pohnmwaso. Eri, ihs me men emen en kalahngan ong ni ah soh mehlelki? Ahpw kalahngan mehlel kin uhdahn kansenamwahu.
Aramaso me kin kasalehda kalahngan kin paiekihda ah wia met. Pepehm mwahu me e alehda pwehki e kalahngan sang nan mohngiongih kin karehong en nsenamwahu oh meleilei. (Kaparekiong Lepin Padahk 15:13, 15.) Oh pwehki e wia irair pwung ehu, kalahngan kin pere aramaso sang soahngen pepehm sapwung duwehte mwakar, peirin, oh kailok.
“Kumwail En Kalahngan”
Paipel kangoangehkin kitail en kekeirada ngehnin kalahngan. Pohl ntingihdi: “Kumwail kasapahlkalahngan ong Koht ni mehkoaros. Pwe iei met me Koht kin ketin kupwurki kumwail en kin wia nan amwail mour rehn Krais Sises.” (1 Deselonika 5:18) Oh Pohl kaweidki mehn Kolose kan: “Popohl en Krais en kin kakaun nan mohngiongamwail kan. . .Eri, kumwail en kin kasapahlkalahngan ong Koht.” (Kolose 3:15) Koul en mehlkahka tohto kin audaudki kasalepen kalahngan, kasalehda me kalahngan sang nan mongiong kin wia irair ehu en Koht. (Melkahka 27:4; 75:1) E sansal me, Siohwa Koht kin kupwurperenki atail kin kasalehda kalahngan nan irair kan koaros en mour.
Ahpw irair dah kei nan sampah soh kalahngan wet me kahrehda e apwal ong kitail en kekeirada ngehnin kalahngan? Iaduwen atail en kasalehda lamalam en kalahngan nan atail mour en ehu ehu rahn? Peidek pwukat pahn pwarada nan artikel en mwuhr.