Kekeirada Ngehnin Kalahngan
EMEN TOAHKTE nan State en New York doarehla mouren Marie nan irair ehu me pid mour oh mehla. Ahpw Marie me mahki sounpar 50 sohte kasapahlkalahngankihong toahkteo met oh pil sohte pwainla ah koadoake ih. Ia uwen met kasalehda en aramas sohte kin kalahngan!
Paipel kasalehda me ahnsou ehu, ni ah pedolong nan kisin kahnimw ehu, Sises tuhwong ohl ehk me soumwahuki soumwahu en tokutok. Re ngihl laudida ndahiong Sises: “Maing, Sises, at Mohnsapw! Komw ketin kupwurei kiht!” Sises kaweidkin irail: “Kumwail kohwei rehn samworo ko oh ale keseu rehrail.” Me tokutok ko peikiong dahme e mahsanih, oh ni arail kohkohla, re tepiada kilang oh pehm arail mwahula sang arail tokutok.
Ohl duwemeno me mwahula sang arail soumwahuwo eri kohkohla. Ahpw me tokutok teio, mehn Sameria men, pwuredo oh rapahki Sises. Ohl menet me tokutok mahso ahpw met mwahulahr eri kapinga Koht, oh ni ah diarada Sises, e pwupwediong ni aluweluwe, kapinga ih. Sises sapeng ih oh mahsanih: “Kaidehk me ehk me mwakelekellahro? A ia me duwemeno? Dahme men liki menette me pwuredo pwe en kasapahlkalahngan ong Koht?”—Luk 17:11-19.
Mehn kasukuhl kesempwal ehu kin kapwarehda peideko: “A ia me duwemeno?” Duwehte Marie, tokutok duwemeno ahneki luwet toutou ehu—re sohte kasalehda arail kalahngan. Soahngen soh kalahngan wet kin inenen rek rahnwet. Ia karepen met?
Karepen Soh Kalahngan
Soh kalahngan kin kohsang roporop. Tehk atail tepin pahpa oh nohno, Adam oh Ihp. Siohwa kapikihda ira irair en Koht akan oh ketikihda soahng koaros pwe ira en nsenamwahuki, iangahki mwetwel wasahn kousoan kaselel ehu, oh wasa unsek me kapilpene ira, oh iangahki doadoahk me mie kahtepe oh kansenamwahu. (Senesis 1:26-29; 2:16, 17) Ahpw, ni ahnsou me ira mihla pahn kapwunod sang en Sehdan doadoahngki ara roporop, nin duwen pwopwoud ehu re sapeikla oh re mwamwahlekihla sapwellimen Siohwa kadek.—Senesis 3:1-5; Kaudial 12:9.
Pil tehk duwen aramas en Israel kan en mahso, me Siohwa pilada en wia sapwellime aramas pilipil. Ia uwen pahpa oh nohno kan en mehn Israel koaros kin kasalehda ahr kalahngan, ni pwong en Nisan 14, 1513 B.C.E.! Ni pwong kesempwalo, tohnleng en Koht emen kemehla “mesenih koaros nan sapwen Isip” ahpw kin douluhlwei pohn imwen mehn Israel kan me kilel mih powe. (Eksodus 12:12, 21-24, 30) Ni arail pitsang sounpeien Parao ni Sehd Weitahta, ki mohngiong me dirki kalahngan, ‘Moses oh mehn Israel kan eri koul en kaping ong Siohwa.’—Eksodus 14:19-28; 15:1-21.
Mendahki met, wihk keite mwurin arail pwursang Isip, “pokon en mehn Israel kan pil tepiada lipahned.” Ia uwen arail mwadang en sohla kalahngan! Re loaleidki “mwomwohdete mpen nait einpwoat en uduk ko oh tungutungoale uwen sali me se anahne,” me re kin perenki nan Isip, sahpw me re kaliduhla ie. (Eksodus 16:1-3) E sansal me, doadoahk en roporop sohte kak kekeirada oh kasalehda irair en kalahngan.
Pwehki kitail kadaudek en Adam me dipan, aramas koaros ipwikihdi irair en roporop oh lamalam en soh kalahngan. (Rom 5:12) Soh kalahngan kin pil wia kisehn ngehnin roporop me kin kaunda aramas en sampah wet. Duwehte ahng me kitail kin esingeki, ngehn wet kin mih wasa koaros, oh angi kin lelohng kitail. (Episos 2:1, 2) Eri, kitail anahne kekeirada lamalam en kalahngan. Iaduwen kitail kak wia met?
Anahne Doudouloale!
Webster’s Third New International Dictionary kin kawehwe kalahngan me iei “irair en kalahnganki: ahneki pepehm en limpoak oh kadek ong emen sounkatingpe me kamwekid meno en pwainong wiewia mwahu ehu.” Pepehm sohte kin pein pwarada; e anahne kohsang loalen emen. Kasalehda kalahngan kin wia laudsang ihte pwehki e wia tiahk mwahu ehu; e kin kohsang nan mohngiong.
Iaduwen atail kak sukuhlkihdi en ahneki pepehm en kalahngan sang nan mohngiong? Paipel kin ketikihda soahng tohto en atail pepehm ong atail pilipil en madamadau. (Episos 4:22-24) Sukuhlki en kalahnganki mehkot kin tepikihda atail doudouloale kadek me emen kasalehong kitail. Me parekiong met, Dr. Wayne W. Dyer, me kin doadoahk nan pelien madamadau oh roson en paliwar, koasoia: “Ke sohte kak pehm mehkot ma ke sohte pahn mahs doudouloale.”
Tehk, karasepe wet, irair en kalahnganki kapikipikda kan me kapilpene kitail. Ni omw kin kilangdahla nanleng ni pwong me mwoale oh kilang nanleng eh audaudki diren usu kan, ia omw pepehm ong met? Nanmwarki Depit kasalehda eh pwuriamweiki met: “Ni ei kin kilengdawohng pahnlahng, iei wiepen nin limomwi, maram oh usu kan me komw ketin koasoanedier nan dewerail—dahkot aramas, me komwi kin ketin kupwukupwure; aramas mwahl, me komwi kin ketin apwahpwalih?” Oh ni pwong mwoale kan, usu kan kin mwomwen kosoiong Depit, me kamwekidih en ntingihdi: “Ia uwen sansal en pahnlahng eh kasalehda sapwellimen Koht lingan! Ia uwen eh kasalehda mwahu mehkan me eh ketin wiahda!” Dahme kahrehda nanleng me dirki usu kan kin inenen kamwekidih ih? Pein ih sapengki: “I tamataman rahn akan me samwalahr; I medemedewe duwen soahng koaros me komw ketin wiadahr, oh katamandohng ie wiepen nin limomwi kan koaros.”—Melkahka 8:3, 4; 19:1; 143:5.
Nein Depit pwutako Solomon kin pil kalahnganki kesempwalpen en medemedewe kapikipik kapwuriamwei kan. Karasepe ehu, me pid kadoadoakpen depwek en keteu ah kin kalamwurih atail sampah, e ntingihdi: “Pillap koaros kin pwilpwilahng nan madau, ahpw sehd saikinte dirala. Pihl kan kin pwurodohng wasa me pillap kin tepisang ie oh pwurehng pwilpwilwei.” (Eklesiasdes 1:7) Ihme mwurin keteu oh pillap kan kin kalamwurih pwelen sampah, re kin pwurlahng nansed oh adirail kan kin pwurehng pwurdala nan depwek kan. Ia pahn mwomwen sampah ma sohte pihl wet me kin kamwakel oh pwurehng kadoadoak pwehn kamourih mour kan? Ia uwen Solomon kin kalahnganki met ni ah kin doudouloale ire pwukat!
Aramas men me kin kalahngan kin kesempwalki ah nanpwung rehn tohn ah peneinei, kompoakepah kan, oh irail kan me e kin tuhwong. Arail wiewiahn kadek kin karehong en perenkin irail. Ni ah kin kalahnganki doudouloale me mwahu kan me re wiahda, e kin kalahnganki met sang nan mohngiongih.
Kasalehda Danke
Ia uwen mengei lepin lokaia wet “kalahngan”! E inenen mengei en nda lepin lokaia wet. Oh mie ahnsou mwahu tohto en nda met. Ia uwen kansenamwahu en nda “Kalahngan” ong emen me ritingada wenihmw ong kitail de pwekada mehkot me kitail kesehdi! Ni en sounnetinet men de sounsapis men nan imwen mwenge de sounwahseli kisinlikou kin rong soangen lokaia wet, e kin kamengeila arail doadoahk oh pil karehong en mie katingpen arail doadoahk.
Kadarlahng emen kisinlikoun (card) kalahngan kin wia ahl mengei en kasalehda kalahnganki wiewiahn kadek kan. Tohtohn kisinlikou (card) kan me kin netila nan sidowa kan kin kasalehda soangen pepehm pwukat ni ahl kaselel. Ahpw e sohte pahn wia elen limpoak oh en kapataiong pein omw lokaiahn kalahngan ni omw pahn pein ntingihdi omw pepehm? Ekei sohte kin kadar kisinlikoun kalahngan (card) me ntingdahr oh kin netila nan sidohwa , ahpw re kin kadar kisinlikou kan me pein irail ntingihda.—Kaparekiong Lepin Padahk 25:11.
Ni mehlel, irail ko me keieu warohng atail kalahngan iei irail ko me kerenih kitail nan atail peneinei. Paipel mahsanihki lih pwopwoud koahiek men: “Eh pwoud pil kin kapikapinga.” (Lepin Padahk 31:28) Kaidehn en ohl pwopwoud men ah kalahngan ong ah pwoudo sang nan mohngiongih kin karehda meleilei oh nsenamwahu nan peneinei? Oh ohl pwopwoudo soh pahn pil perenki kohdo nan ihmw oh ah pwoudo kin kasamwo ni limpoak oh kalahngan? Rahnpwukat, kapwunod kan me kin lelohng pwopwoud me inenen tohto, oh ni ahnsou me kapwunod kan kin laudla, akamai kin mengei en wiawi. Meno me ahneki lamalam en kalahngan pahn mweidalahte pwehn dehr mie akamai oh kin mwadang en itarkihlahte oh mahkohng.
Me pwulopwul kan pil anahne pohnese kasalehong arail pahpa oh nohno arail kalahngan sang nan mohngiongarail. Ni mehlel, pahpa oh nohno kan sohte unsek, ahpw met sohte pahn wia kahrepe en soh kalahnganki dahme re wiahiongehr uhk. Limpoak oh epwel me re wiahiong uhk sangete ni ahnsou me ke ipwidi sohte kak pweipweida. Ma re padahkihonguhkehr loalokong en Koht, ke ahneki kahrepe laud en pil kasalehda omw kalahngan.
Melkahka 127:3 mahsanih: “Seri kan, iei kisakis ehu sang rehn Kauno (Siohwa).” Ihme pahpa oh nohno kan en rapahki ahnsou mwahu kan en kapinga neirail seri kan ahpw endehr kin wedewedeikiohng neirail seri kan soahng kan me sohte nohn kesempwal. (Episos 6:4) Oh ia uwen e wia kapai ehu en sewese me pwulopwul kan me re kin apwalih en kekeirada ngehnin kalahngan!—Pil tehk Lepin Padahk 29:21.
Kalahngan Ong Koht
Siohwa Koht iei Sounketikihda “kisakis mwahu koaros.” (Seims 1:17) Me keiou kesempwal iei kisakis en mour, pwe soahng koaros me kitail ahneki de pahn pilahni pahn sohla katepe ma kitail mehla. Pwuhk Sarawi kangoangehkin kitail en tamataman me “rehn [Siohwa] iei utupen mour.” (Melkahka 36:5, 7, 9; Wiewia 17:28) Pwehn kekeirada mohngiong kalahngan ong Koht, kitail anahne doudouloale sapwellime koasoandi kadek kan me e ketikihda pwehn komour atail mour ni paliwar oh pali ngehn. (Melkahka 1:1-3; 77:11, 12) Soahngen mohngiong wet pahn kamwekid kitail en kasalehda atail kalahngan ni lokaia kan oh wiewia kan.
Kapakap iei ehu ahl sansal en kasalehong Koht atail kalahngan. Sounmelkahkao Depit mahsanih: “Maing Kaun (Siohwa), at Koht, ia uwen tohtohn soahng kapwuriamwei kan me komw ketin wiahiong kiht; sohte emen me mie me duwehte komwi! Ia uwen tohtohn koasoandi kan me komw ketin wiahiong kiht! Ma I pahn song en kasalehda koaros—re uhdahn pahn tohtohsang me I kak kasalehda!” (Melkahka 40:5) Kitail en pil ahneki soahngen pepehmohte.
Depit pil nantiong kasalehong Koht ah kalahngan sang ni lokaia kan me e kosoiaiong meteikan. E mahsanih: “Maing Kaun (Siohwa), I pahn patohwan kapinga komwi sang nan kapehdi unsek; I pahn patohwan koasoia wiewia kapwuriamwei koaros me komw ketin wiadahr.” (Melkahka 9:1) Kosoiaiong meteikan duwen Koht, oh ehukiong irail padahk mehlel sang sapwellime Mahsan iei ahl me keieu mwahu en kasalehong Koht atail kalahngan. Oh met pahn sewese kitail en kasalehda kalahngan nan irair teikan en mour.
Siohwa mahsanih: “Me kin meirongkihong ie kapingkalahngan, iei irail me kin waunekin ie, oh I uhdahn pahn doareirailla koaros me kin peikiong ie.” Komwi en alehda peren me kin kohsang ahmw kasalehong Koht omw kalahngan sang nan mohngiongomw.
[Kilel nan pali 7]
Mour iei kisakis ehu sang rehn Koht. En tehk pwe ken kasalehda pein omw pepehm en kalahngan