Emen Nanmwarki Me Kepwehpwe Oh Erpit

Komw lemeleme me kepwehpwe pahn karehong komwi en nsenamwahu? Ma aramas emen pahn kihong komwi mwohni tohto, komw soh pahn perenki? Ele komw pahn perenki met. Ele komw pahn medewehda soahngen ahl kan me komw pahn doadoahngki mwohni wet.

KEN WEHKADA ME mie soahng tohto me komw kak pwainda me pahn wiahiong mour en kansenamwahu oh kaperen. Mwohni kin pil wia “mehn perepe ehu” sang kahpwal kan me kitail kin sasairki, duwehte soumwahu de apwal en doadoahk en mwohni.​—⁠Eklesiasdes 7:12.

Ahpw iaduwen mwohni oh nsenamwahu kin dokpene? Komw ahneki soahngen lamalamohte me tohto kin kasalehda me nsenamwahu kin kohsang kepwehpwe? Rapahkihda pasapeng ong peidek pwukat ele pahn apwal pwehki mwohni kak wadawadi, ahpw nsenamwahu sohte kak. Komw sohte kak kihong nsenamwahu pohn mehn tenek oh teneki.

Eri, pil ekei aramas kepwehpwe kan kin mwomwen nsenamwahu, ahpw mehteikan soh. Met kin pil wiawihong me semwehmwe kan. Ahpw mendahki met, aramas tohto​—⁠pil iangahki irail ko me kepwehpwe​—⁠kin kamehlele me naineki mwohni tohto pahn wahdohng irail nsenamwahu laud.

Emen aramas me ntingihdi soahngen ire pwukat iei Nanmwarki Solomon en Israel en mahs. Ih ohlo me keieu kepwehpwe me mour mahso. Komw kak wadek duwen uwen laud en ah kepwehpwe nan irelaud kaieisek en Paipel pwuhk en Nanmwarki Keieu. Tehk, karasepe ehu, nan iretikitik 14 me mahsanih: “Nan pahr koaros Nanmwarki Solomon kin aliale talent en kohl wenepwiki weneisek weneu.” Nempe wet kin parekiong pohnangin ten 25 en kohl. Rahnwet, uwen pweinen kohl wet kin mihmi pohnangin mwohni en U.S. tala 200,000,000!

Ahpw mendahki met, Solomon sohte ihte kepwehpwe; Koht kapaiakihda erpit. Paipel mahsanih: “Nanmwarki Solomon me keiou erpit oh kepwehpwe sang nanmwarki teikan koaros, oh tohn sampah koaros kin anahne en kin patohdo pahn kupwure pwe re en rong duwen erpit me Koht ketikihong.” (1 Nanmwarki 10:​23, 24) Kitail pil kak paiekihda erpit en Solomon, pwehki ah nting kan kin wia kisehn Paipel. Kitail en kilang iaduwen e kin kadokepene kepwehpwe oh nsenamwahu.

[Credit Line]

Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart