Pwoson En Kristian Pahn Kasongosong Kan
“Pwe kaidehn aramas koaros kin kamehlele mahseno.—2 DESELONIKA 3:2.
1. Iaduwen poadoapoad en aramas kin kasalehda me kaidehn koaros ahneki pwoson mehlel?
EREIN poadoapoad en aramas, mie ohl akan, lih akan, oh seri kan me ahneki pwoson mehlel. Anahnepen lepin lokaia wet “mehlel” me konehng pwehki aramas rar teikan kin kasalehda soahngen pwoson me re kin mwadang kamehlele mehkot mendahki sohte poahsoanpe mwahu de kahrepe mwahu. Soahngen pwoson wet kin kalap pidada koht likamw kan de soahngen kaudok me sohte kin pahrekiong kupwuren Siohwa, Koht Lapalahpie, oh sapwellime Mahsan sansal. Ihme wahnpoaron Pohl ntingihdi: “Pwe kaidehn aramas koaros kin kamehlele mahseno.”—2 Deselonika 3:2.
2. Dahme karehda e kesempwal kitail en kasawih pein atail pwoson?
2 Ahpw mahsan en Pohl kasalehda me mahso mie me ahneki pwoson mehlel oh sang ni mahsan pwukat mie me pil ahneki pwoson mehlel rahnwet. Pali moron en irail kan me kin wadek makasihn wet kin inengieng en ahneki oh kalaudehla soahngen pwoson mehlel wet—pwoson me pahrekiong loalokong pwung en padahk sarawi. (Sohn 18:37; Ipru 11:6) Ke pil men ahneki oh kalaudehla soahngen pwoson mehlel wet? Eri e inenen kesempwal me ken pohnese oh kaunopada pwe ahmw pwoson pahn mihla pahn kasongosong kan. Dahme se ndahki met?
3, 4. Dahme karehda kitail en kilangwohng Sises me pid kasongepen pwoson?
3 Kitail wehwehki me Sises Krais iei poahsoan en atail pwoson. Ni mehlel, Paipel kin mahsanihki ih me iei Sounkaunsekpen atail pwoson. Met pwehki mehkan me Sises mahsanih oh wia, keieu ni ah kapwaiada kokohp akan. E kin kakehlailla poahsoano me aramas kak kauwada pwoson mehlel powe. (Ipru 12:2; Kaudial 1:1, 2) Kitail wadek me Sises “kin ale songosong ni soahng koaros duwehte kitail, ahpw ihte, e sohte ketin wiahda dihp.” (Ipru 4:15) Ehi, en Sises pwoson mihla pahn kasongosong kan. Met sohte pahn kamworuskitailla de kamasepwehkih kitail, ahpw met en kamweitkitailla.
4 Ni ah mihla pahn kasongosong laud lau e pil mehla pohn tuhkehn kalokolok, Sises “mwahngihala peik.” (Ipru 5:8) E kadehdehda me aramas kak mourki pwoson mehlel mendahki kasongosong kan me kin lellohng irail. Met kin wiahla mehkot kesempwal ni atail kin medewehda dahme Sises mahsanihki sapwellimen werek kan: “Kumwail tamataman dahme I ndaiongkumwailehr: ‘Sohte ladu men kin laudsang eh soumas.’” (Sohn 15:20) Ni mehlel, me pid sapwellime werek kan nan atail ahnsou, Sises kohpada: “Tohn wehi koaros pahn kailongkin kumwail pwehki ngehi.”—Madiu 24:9.
5. Iaduwen Pwuhk Sarawi kasalehda me kitail pahn lelohng kasongosong kan?
5 Nan tepin pahr en 1900 kan, kadeik tepida rehn imwen Koht. Pwuhk Sarawi kohpada: “E leledohr ahnsoun kadeik, oh e pahn tepida sang rehn sapwellimen Koht souleng kan. Eri, ma e pahn tepida sang rehtail, ia pahn imwilahn irail kan sohte pwoson Rongamwahuwo sang rehn Koht? Duwen Pwuhk Sarawi eh mahsanih, ‘Me apwal mehlel ong me lelepek kan en mourla, a dahme pahn wiawihong me seupwoson oh me dipan akan?’”—1 Piter 4:17, 18.
Pwoson Pahn Kasongosong kan—Pwekihda?
6. Dahme karehda e kesempwal pwoson en mihla pahn kasongosong kan?
6 Pwoson me sohte mihla pahn kasongosong kan sohte kak dehde ma mie kahtepe, de dehde ma e uhdahn mehlel. Ele e pahn duwehte ehu check me saikinte welianohng ni weren mwohni. Ele pwehki doadoahk ehu me ke wiahda, de dipwisou kan me ke netikihla, de nin duwen kisakis ehu emen kihong uhk check ehu. Checko ele mwahu, ahpw met mehlel? Mehlel me ih uwen mwohnio me pwarada pohn checko? Me rasehng met, atail pwoson anahne en laudsang ihte kitail en liksansalmwahuki de wiahte atail kaudok. Atail pwoson anahne en mihla pahn kasongosong kan pwe kitail en kadehdehda me mie audepe oh me e mehlel. Ni ahnsou me atail pwoson pahn mihla pahn kasongosong kan, kitail pahn diarada me e kehlail oh mie katepe. Kasongosong kan kin pil kasalehda wasa kan me atail pwoson anahne en kamwahula de anahne en kakehlailla.
7, 8. Iawasa kasongepen atail pwoson kin kohsang ie?
7 Koht kin mweidohng kalokolok oh kasongepen pwoson teikan en wiawihong kitail. Kitail wadek: “Mehmen me lelohng nan songosong pwehki apwal me kohiengehr en dehr nda me, ‘Kasongosong wet sang rehn Koht.’ Pwe sohte me suwed kot kak kasongosonge Koht, oh pein Koht sohte kin kasongosonge aramas.” (Seims 1:13) Ihs oh dahme kin pwukoahki soahngen kasongosong pwukat? Met iei Sehdan, sampah, oh pein atail sohunsek.
8 Kitail kak nda me Sehdan kin ahneki manaman laud pohn sampah, lamalam oh wiewia kan en aramas. (1 Sohn 5:19) Oh kitail ese me ih me kin kamwekidada kalokolok kan me kin wiawihong Kristian kan. (Kaudial 12:17) Ahpw kitail kin pil kamehlele me Sehdan kin songosong en pitih kitail ni ah kin kaperenih atail pali uduk me sohunsek, ni ah kin kasongehkin kitail ineng en sampah, oh kin kasikasik me kitail en lohdiong nan lidip pwukat, oh sapeik ong Koht, oh imwikihla Siohwa sohla pahn kupwure kitail? Ni mehlel, kitail endehr pwuriamweiki widing kan en Sehdan, pwehki e kin doadoahngki soahngen widingohte ni ahnsou me e kin songosong en kasonge Sises.—Madiu 4:1-11.
9. Iaduwen kitail kak paiekihda sang irail me wia mehn kalimeng mwahu en ahneki pwoson kehlail?
9 Ki sapwellime Mahsan oh mowmwohdiso en Kristian, Siohwa ketikihong kitail mehn kalimeng mwahu kan en ahneki pwoson kehlail me kitail kak alasang. Pohl panawihki: “Riei ko koaros, kumwail en pil nantihong alasang ie. Se wiadahr mehn kahlemengih mwahu ehu ong kumwail; kumwail eri tehk irail kan me kin idawehn.” (Pilipai 3:17) Nin duwen emen sapwellimen Koht ladu lelepek kan nan senturi keieu, Pohl kin tiengla mwowe wiahda wiewiahn pwoson kan mendahki kasongosong laud kan me e kin lellohng. Rahnwet, miete irail kan me kin kasalehda soahngen mehn kalemeng mwahu en pwoson wet. Mahsan kan en Ipru 13:7 kin kadoadoahk ahnsouwet duwehte ahnsouwo me Pohl ntingihdi mahsan pwukat: “Kumwail tamanda amwail sounpadahk en mahs ako, me kawehwehiong kumwail mahsen en Koht. Medemedewe duwen ar mour, duwen ar mehla, oh kahlemengih ar pwoson.”
10. Mehn kalimeng en pwoson dahkei me sansalda ahnsouwet?
10 Kaweid wet kin keieu kehlail ni atail kin medemedewe ia imwilahn wiewiahn luhwen me keidi kan. Kitail kak doudouloale arail mehn kalimeng mwahu oh alasang arail pwoson. Arail pwoson me mehlel pwehki e kin kamwahukihla kasongosong kan. Ni arail tepida malaulau nan 1870 samwa, met re wialahr pokon en pirien en Kristian ehu nan sampah pwon. Pwehki wahn pwoson oh kanengamah me keidi kan kin kasalehda sang ahnsouwo kohdo lel met, miehiehr Sounkadehdehn Siohwa pohnangin me limerar samwa me ahnsouwet kin wie kalokalohngki oh padapadahngki Wehin Koht. Mwomwohdisohn tohnkaudok mehlel idipek kan nan sampah pwon ahnsouwet kin wia mehn kadehde me arail pwoson kasongosongehr.—Taitus 2:14.
Pwoson Pahn Kasongosong Me Pid 1914
11. Iaduwen 1914 wia pahr kesempwal ehu ong C. T. Russell oh ienge kan?
11 Sounpahr tohto mwohn Mahwen Keieu en Sampah tepida, luhwen me keidi kan kin pakapakairki me 1914 pahn wia sounpar kesempwal ehu nan kokohp en Paipel. Ahpw, ekei soahng kan me re kasikasik sohte pweida nan ahnsouwo me re nda me pahn wiawi, oh arail lamalam ong dahme pahn wiawi sohte kin pwung. Karasepe ehu, C. T. Russell, tepin president en Watch Tower Society, oh ienge kan kak kilangada me doadoahk lap en kalohk ehu anahne en wiawihda. Re wadek: “Rongamwahu wet en Wehio pahn kalohkseli nan sampah pwon pwehn wia kadehde ehu ong wehi kan koaros; oh mwuri imwi ahpw pahn kohdo.” (Madiu 24:14, King James Version) Ahpw, iaduwen, arail kisin pwihno kak wiahda doadoahk lap wet?
12. Iaduwen emen iengen Russell ko mwekidiki padahk mehlel en Paipel?
12 Tehk iaduwen met kamwekidada A. H. Macmillan, emen iengen Russell. Macmillan ipwidi nan Canada, oh ni ahnsou me e alehda nein Russell pwuhko The Plan of the Ages, e saikinte sounpar 20. (Pwuhk wet, me pil adaneki The Divine Plan of the Ages, wiahla Volume 1 en pwuhko me kohpeseng tohto Studies in the Scriptures. Volume 2, The Time Is at Hand [1889], kin idialahng 1914 me iei imwin “ahnsoun Mehn Liki kan.” [Luke 21:24, KJ]) Pwohngohte Macmillan tepiada wadek, oh e medemedewe: “Met iei padahk mehlel!” Nan 1900, e tuhwong Russell ni kapokon en Tohnsukuhl en Paipel kan, eden Sounkadehdehn Siohwa kan ahnsouwo. Mwurinte met Macmillan papidaisla oh tepiada iang Brother Russell doadoahk ni poasen kaun en Society nan New York.
13. Kahpwal dahieu Macmillan oh mehteikan kilang me pid pweidahn Madiu 24:14?
13 Me poahsoanda sang arail wadek Paipel, irail Kristian keidi ko kin idialahng 1914 me e kin wia pahr kesempwal ehu nan kupwuren Koht. Ahpw Macmillan oh mehteikan kin medemedewe iaduwen kalohk me pahn wiawihong wehi kan me Madiu 24:14 kohpada pahn kak wiawihda nan ahnsou mwotomwot me luhluhwe. Mwuhr e koasoia: “I tamanda ahi kin kalapw koasoiaiong Brother Russell duwen met, oh e kin nda, ‘Eri, brother, wasaht nan New York mie mehn Suhs me tohtohsang nan Serusalem. Mie mehn Irish wasaht me pil tohtohsang nan Dublin. Oh mie mehn Itali wasaht me tohtohsang nan Rom. Eri, ma kitail kak kalohkohng irail koaros wasaht, met pahn duwehte atail kalohngki rongamwahuwo nan sampah pwon.’ Ahpw met sohte kaitarala aht lamalam. Ihme se medewehda en wiahda kilel mwekido ‘Photo-Drama.’”
14. Mwohn 1914, doadoahk kaselel dahieu wiawihda?
14 Ia uwen doadoahk en wiahda “Photo-Drama of Creation” kin wia mehkot kapw! Met iei kapatapatpenen kilel mwekid kan oh kilel silaid kan me kin mwekid pahrekiong padahk en Paipel kan oh ngilen keseng en record kan. Nan 1913, The Watch Tower koasoiahki ehu kapokon nan Arkansas, U.S.A.: “Society pwungkihda me ahnsou lelehr me re pahn doadoahngki kilel mwekid pwehn padahngki padahk mehlel kan en Paipel. . . . [Russell] kawehwehda me e koadoakoadoahke pilahn wet ereinehr sounpar siluh oh ahnsouwet kihpeneiehr kereniong kilel kaselel epwiki, me pahn ni mehlel karehong me tohto en men rong padahk mehlel oh met pahn pakairki Rongamwahuwo, oh sewese wehipokon en pwurehng pwoson Koht.”
15. Ia imwilahn kilel mwekido “Photo-Drama”?
15 Kilel mwekido “Photo-Drama” kin wia met mwurin ah tepin kasansalda nan January 1914. Ripoht pwukat me kilkilel pah kohsang The Watch Tower en 1914:
April 1: “Emen minister, mwurin ah kilang pali riau en kilel mwekido, koasoia, ‘I kilangete elep en kilel mwekido PHOTO-DRAMA OF CREATION, ahpw I sukuhlkisangehr kilel mwekid wet soahng tohto duwen Paipel laudsang dahme I sukuhlki erein sounpar siluh nan ahi sukuhl en sarawi.’ Emen mehn Suhs me mwurin ah kilang met koasoia, ‘I pwurewei wiahla emen mehn Suhs me mwahusang ahnsou me I kohdo.’ Padre en Kadolik tohto oh lih kadek tohto kin kilang DRAMA oh kasalehda arail kalahnganki met. . . . Ihte kilel mwekid en DRAMA eisek riau me kaneknekla ahnsouwet . . . Mendahki met se kasalehdahr kilel mwekid wet nan kahnimw silisek ehu . . . Pohnangin aramas silinen limekid ehu ehu rahn kin kilang, rong, kasalehda arail wadekala met, kin medemedewe oh ale kapai.”
June 15: “Kilelo karehong ie en ngoangki kalohkiseli Padahk Mehlel, oh kalaudehla ahi limpoak ong Samatail Nanleng oh Riatail Mah Sises. Rahn koaros I kin kapakapki me Koht en ketin kapaiada PHOTO-DRAMA OF CREATION oh irail ko koaros me iang wiahda kilel mwekid wet . . . Ngehi amwail ladu rehn Koht, F. W. KNOCHE.—Iowa.”
July 15: “Se perenki en kilang duwen lipwalipw mwahu me kilel mwekido wiahiong kahnimw wet, oh se koapworopworki me kadehde wet ong sampah kin pil kadoadoahk pwehn kihpene me tohto kan me kihda mehn kadehde me re wia takai kesempwal me Kauno pein pilada. Se ese ekei tohnsukuhl en Paipel kan me ahnsouwet kin werekiong Pwihn wasaht pwehki doadoahk en Photo-Drama. . . . Riamwail lih Kristian rehn Kauno, EMMA L. BRICKER.”
November 15: “Se koapworopworki me kumwail pahn perenki rong duwen kadehde kaselel me PHOTO-DRAMA OF CREATION ni The London Opera House, Kingsway wiahda. Kaweid en limen Kauno kin sansal nan mwekid koaros en kilel mwekid wet me karehong riatail Kristian kan en inenen perenkihda. . . Tohnmwomwohd me kin kilang kilel mwekido kin wiawihkihda soangsoangen aramas koaros; se kilang me kaun en pelien lamalam tohto kin iang kilang kilel mwekid wet. Emen kaun en pelien lamalam . . . peki nah ticket riau pwe ih oh ah pwoudo en kak pwuredo oh pwurehng kilang. Emen kaun en lamalam en Church of England kin kilang DRAMA pak tohto, oh . . . kin wahdo kompoakepah kan en iang kilang kilel mwekid wet. Bishop riemen pil iang towehda, iangahki aramas tohto me ahneki mwar laud kan.”
December 1: “Ahi pwoudo oh ngehi uhdahn kalahnganki ong Samatail Nanleng kapai laud oh kesempwal kan me kodohng kiht sang rehmwail. Noumwail kilel mwekid kaselelo PHOTO-DRAMA me karehda sen kilang oh pwungkihla Padahk Mehlel . . . Se naineki volumes weneu en noumwail STUDIES IN THE SCRIPTURES. Re inenen wia sawas laud.”
Mwekidiki Kasongosong kan Ahnsouwo
16. Dahme karehda arail pwoson mihla pahn kasongosong kan nan pahr 1914?
16 Ahpw, iaduwen, ni ahnsou me Kristian mehlel oh lelepek kan diarada me arail kasikasik en tuhwong Kauno nanleng nan 1914 sohte pweida? Irail me keidi ko mihla nan ahnsoun kasongosong ehu. The Watch Tower en November 1, 1914, koasoia: “Kitail en tamataman me kitail mih nan ahnsoun kasongosong ehu.” Me pid duwen met, Jehovah’s Witnesses—Proclaimers of God’s Kingdom (1993) koasoia: “Pahr ko sang nan 1914 lau lel 1918 wia ‘ahnsoun kasongosong’ ehu ong Tohnsukuhl en Paipel kan.” Re pahn mweidohng arail pwoson en kamwahula oh arail lamalam en kopwungpwungla pwe ren kak wiahda doadoahk lap me mih mwohrail?
17. Iaduwen me keidi lelepek kan mwekidiki arail mihmihte nan sampah mwurin pahr 1914?
17 The Watch Tower en September 1, 1916, koasoia: “Se kin medemedewe me doadoahk en Rahk en kihpene Mwomwohdiso [me keidi kan] pahn wiawihda mwohn imwin Ahnsoun Mehn Liki kan; ahpw Paipel sohte koasoia duwen met. . . . Se kin koluhkihla me doadoahk en Rahko kin pouehlahte wiawi? . . . Kompoakepahtail ko, atail lamalam ahnsouwet, iei en kasalehda atail uhdahn kalahngan ong Koht, kalaudehla atail kalahnganki Padahk Mehlel kaselel me E ketikihong kitail kapai en kilang oh wehwehki, ni atail kekeirada ngoangki seweseki mehteikan Padahk Mehlel.” Arail pwoson kin mihla pahn kasongosong, oh re kin ale kasongosong pwukat oh powehdi. Ahpw kitail Kristian kan en pohnese me songosongpen atail pwoson pahn tohto oh wekwekpeseng.
18, 19. Kasongosong en pwoson dah teikan wiawihong sapwellimen Koht aramas kan mwurinte Brother Russell mehla?
18 Karasepe ehu, ehu soahngen kasongosong wiawihong luhwen me keidi kan mwurinte Brother Charles T. Russell mehla. Met iei kasongosong en arail loaloapwoat oh pwoson. Ihs ‘ladu lelepek oh loalokong’ me kileledi nan Madiu 24:45? Ekei lemeleme me ladu menet iei Brother Russell, oh re uhdisang miniminiong koasoandi kapw en pwihn. Ma ih iei laduwo, dahme brother kan pahn wia pwe e melahr? Re pahn idawenla emen aramas me re ahpwtehn idiada, de ih ahnsouwo me ren pohnese me Siohwa kin ketin doadoahngki, kaidehn emen aramas, ahpw pwihn en Kristian ehu me iei sapwellime mehn doadoahk, de pwihn en ladu ehu?
19 Ehu kasongosong pil wiawihong Kristian mehlel kan nan 1918 ni ahnsou me kaun kan en pelien lamalam en Kristendom idingkiohng manaman kan en sampah en wia ‘kopwung sapahrek’ ong pwihn en Siohwa. (Melkahka 94:20, KJ) Kalokolok suwed wiawihong Tohnsukuhl en Paipel kan nan North America oh Iurop. Uhwong kan me kaun akan en pelien lamalam kamwekidada laudla ni May 7, 1918, ni ahnsou me koperment en U.S. wiahda mweimwei en koledi oh salihdi J. F. Rutherford oh ekei ienge kan, iangahki A. H. Macmillan. Re ale karaun me dene re kin uhwong koperment, oh koperment sohte men rong arail pekipek me sohte diparail.
20, 21. Nin duwen me Malakai 3:1-3 kasalehda, doadoahk dahieu wiawihda nanpwungen me keidi kan?
20 Mendahki e saikinte sansal ahnsouwo, mie ehu doadoahk en kamwakel me wiwiawi, nin duwen me Malakai 3:1-3 kasalehda: “Ahpw ihs me pahn kakohng rahno me e pahn ketido? Ihs me pahn kak momour ni eh pahn ketido? E pahn ketin rasehng kisiniei me kin kamwakele mete, oh pil rasehng sohpw kehlail. E pahn ketidohn wia kopwung, rasehng me kin inim oh kamwakelehda samworo kan, duwehte souninim oh kamwakelehda silper oh kohl. Eri, re ahpw pahn wahdohng Kauno (Siohwa) soangen meirong me konehng.”
21 Nindoken Mahwen Keieu en Sampah kin kereniongehr imwisekla, ekei Tohnsukuhl en Paipel kan kin pil mihla pahn ehu kasongepen arail pwoson—ma re pahn kolokolte sohpoupalihki wiewiahn mahwen en sampah. (Sohn 17:16; 18:36) Ekei sohte kolokol arail sohpoupali. Ihme nan 1918, Siohwa kadaredo “meninkeder en inou,” Krais Sises, ong sapwellime koasoandi en tehnpas ngehnin pwehn kamwakelehsang rehn sapwellime kisin pwihn en tohnkaudok kan samin en sampah. Irail ko me kolokolte arail kasalehda pwoson mehlel sukuhlkihsang mehkot met oh wohnlahte mwowe, pouselahte kalohk ni idipek.
22. Me pid kasongosong en pwoson, dahme kitail pahn tehkpene mwuri?
22 Dahme kitail tehkpeneiehr kaidehn ihte mehkot me wiawi nan poadoapoad. E kin pidada irair en pali ngehnin sapwellimen Siohwa mwomwohdiso nan sampah pwon. Ahpw kitail en tehkpene nan artikel en mwuri ekei kasongepen pwoson kan me sapwellimen Koht aramas rahnwet kin lelohng oh kilang iaduwen atail kak powehdi kasongosong pwukat.
Komw Tamataman?
◻ Dahme karehda sapwellimen Siohwa aramas kan en kasikasik me arail pwoson pahn ale kasongepe?
◻ Nannanti dahieu en kalohkiseli rohngen Koht wiawihda mwohn 1914?
◻ Dahkot “Photo-Drama,” oh imwila dah kei me e wahdo?
◻ Iaduwen wiewia kan nan 1914-18 kasonge me keidi kan?
[Kilel nan pali 12]
Ni imwin pahr en 1800 ko oh tepin pahr en 1900 ko, aramas kan nan sahpw tohto kin onopki Paipel ki sawas en pwuhk kan me oaralap koasoia “Millennial Dawn,” me mwuri adanekihla “Studies in the Scriptures”
[Kilel nan pali 13]
Kisinlikou ehu sang rehn C. T. Russell ong dahme e pahn rekordi me e ntingihdi: “‘Kilel mwekido Photo-Drama of Creation’ me IBSA—the International Bible Students Association (Tohnsukuhl en Papel kan nan sampah pwon) kapwarehda. Ah mehn akadei iei en wia kasukuhl ong wehipokon me pid pelien lamalam oh sains, ni ah kin doare Paipel.”
[Kilel nan pali 15]
Demetrius Papageorge seiloakseli kasalehseli kilel mwekido “Photo-Drama of Creation.” Mwuri, e selidi pwehki ah sohpoupali en Kristian