“Me Melahr Kan Pahn Iasada”

“Pwe ni ngilen sowio, me melahr akan ahpw pahn iasadahng mour me solahr kak mehla, a kitail koaros ahpw pahn kiewekla.”​—1 KORINT 15:52.

1, 2. (a) Inoun kamweit dahieu me kohieng soukohp Oseia en kasalehda? (b) Iaduwen kitail kak wehwehki me Koht kupwurki en kaiasada me melahr kan?

MIE pak me emen me komw kin poakohng mehla? Eri komw pehmehr medek me mehla kin wahdo. Mendahki met, Kristian kan kin kamweitkihla inouwo me Siohwa ketikihda me soukohp Oseia kasalehda: “I pahn kapwureiraildo sang nan Sheol; I pahn kapitirail sang mehla. O mehla, ia omw mehn kamedek? O Sheol, ia omw mehn kamwomwala wasa?”​—Oseia 13:14, New World Translation.

² Irail kan me kin peikasal kin kouruhrki padahk me melahr kan pahn pwurehng mourda. Ahpw Koht Lapalahpie ni mehlel ahneki manaman en wiahda soahngen manaman kapwuriamwei wet! Ire mehlelo iei ma Siohwa kupwurki en pwurehng kamourda me melahr kan. Ohl pwungo Sohp kalelepek: “Ma aramas emen pahn mehla, e kak pwurehng mourda?” Eri, e kihda pasapeng wet: “Eri, ahnsowo, komw pahn ketin malipe ie, I ahpw pahn patohwan sapeng, komw ahpw pahn kupwurperenkiniehda (inengieng), wiepen nin limomwiet.” (Sohp 14:14, 15) Lepin lokaia “inengieng” kin wehwehki ineng ehu me laud. (Pil tehk Melkahka 84:2.) Ehi, Siohwa kin uhdahn kasikasik kaiasada​—e inengieng en pwurehng kilang me lelepek melahr kan, me kin momourte nan sapwellime madamadau.​—Madiu 22:31, 32.

Sises Kamarainihada Padahk en Kaiasadao

3, 4. (a) Marain dahieu Sises kamarainihkihda koapworopwor en kaiasada? (b) Dahme karehda Sises iasada nin duwen ngehn emen, ahpw kaidehn ni uduk?

³ Ohl en mahs akan me duwehte Sohp wehwehki ekiste padahk en kaiasada. Ahpw Sises Krais me kamarainihada koapworopwor kaselel wet. E kasalehda sapwellime pwukoah keieu me e pahn ketin wia ni ah mahsanih: “Mehmen me kin pwosonla Sapwellime Iehros, iei ih me kin ahneki mour soutuk.” (Sohn 3:36) Iawasa me aramas pahn paiekihda ie mour wet? Ong pali moron en irail ko me kasalehda pwoson, re pahn paiekihda mour wet pohn sampah. (Melkahka 37:11) Ahpw, Sises padahkihong sapwellime tohnpadahk kan: “Kumwail kisin pwihn sihpw, kumwail dehr perki mehkot. Pwe Samamwail kupwurperenkidahr en ketikihong kumwail sapwellime wehi.” (Luk 12:32) Wehin Koht mihmi nanleng. Ihme karehda, inou wet kin wehwehki me “kisin pwihn” ehu pahn anahne iang Sises kohla nanleng nin duwen ngehn akan. (Sohn 14:2, 3; 1 Piter 1:3, 4) Ia uwen met wia koapworopwor kaselel ehu! Sises pousehla kasalehong wahnpoaron Sohn me nempehn “kisin pwihn” wet mihmihte ni wad 144,000.​—Kaudiahl 14:1.

⁴ Ahpw, iaduwen 144,000 ko kak pedolong nan lingan en nanleng? Sises “ketin irehdi manaman en mehla, oh ketin kasalehkihda mour soutuk rongamwahu.” Sang ni kadoadoahkpen nta, e kasarawihla “ahl kapw elen komour” ong nanleng. (2 Timoty 1:10; Ipru 10:19, 20) Keieu, e pwoula, nin duwen me Pwuhk Sarawi kohpada me e pahn wia. (Aiseia 53:12) Eri, nin duwen me wahnpoaron Piter koasoia mwuhr, “Koht ketin kaiasadahr Sises menet sang mehla.” (Wiewia 2:32) Ahpw Sises sohte iaskihda paliwar en aramas. E mahsaniehr: “Eri, pilawa me I pahn kihda, iei udukei, me I kihda pwe sampah en mourkihla.” (Sohn 6:51) Pwurehng alehda sapahl paliwere pahn kihsang manaman en meirongo. Ihme Sises “pwoula ni paliwar, e ahpw ketin ieias ni pali ngehn.” (1 Piter 3:18) Sises eri “ketikihong kitail mour soutuk,” me wehwehki ong “pwihn tikitik.” (Ipru 9:12) E ketilahng rehn Koht kesempwalpen sapwellime mouren aramas unsek nin duwen tomw ehu pwehki tohnsampah dipan kan, oh pwehki 144,000 me tepin paiekihda tomw wet.

5. Koapworopwor dahieu kohieng sapwellimen Sises werek kan en tepin pahr?

⁵ Kaidehn Sises kelehpw me iasadahng mour nanleng. Pohl padahkihong ienge Kristian kan nan Rom me re keiekihdi ngehn sarawi en wiahla sapwellimen Koht seri oh wia tohnsohso iang Krais ma re kadehdehda arail keiedi ni ahr dadaurete lel ni imwi. (Rom 8:16, 17) Pohl pil kawehwehda: “Pwe ma kitail miniminiong Krais ni atail iang sapwellime pwoula, eri, kitail pahn miniminiong ni atail pil iang sapwellime iasada.”​—Rom 6:5.

Pere Koapworopwor en Kaiasada

6. Dahme karehda padahk en kaiasada mihla pahn uhwong nan Korint, oh iaduwen wahnpoaron Pohl mwekidiki met?

⁶ Kaiasada kin wia kisehn “tepin padahk” kan en Kristian. (Ipru 6:1, 2) Mendahki met, padahk wet kin mihla pahn uhwong nan Korint. Ekei nan mwomwohdiso, pwehki e sansal me re mihla pahn manaman en padahk en Krihk, kin kose: “Me melahr akan sohte pahn iasada.” (1 Korint 15:12) Ni ahnsou me ripoht wet lel wahnpoaron Pohl, e pere koapworopwor en kaiasada, keieu koapworopwor en Kristian keidi kan. Kitail en kasawih mahsan en Pohl me kileledi nan 1 Korint irelaud 15. Ke pahn diarada me e wia sewese laud en wadekala irelaudo pwon, duwen me kangoang kohwong uhk en wia nan artikel en mwowe.

7. (a) Ire kesempwal dahieu Pohl kasalehda? (b) Ihs me kilang Sises me iasadahr?

⁷ Nan tepin iretikitik riau ko nan 1 Korint irelaud 15, Pohl kasalehda oarelap en ah padahk: “A met, riei ko, I men katamankin kumwail Rongamwahu me I padahkihongkumwailehr, me kumwail aleier oh katengehkidier amwail pwoson. Eri, rongamwahu wet, iei mahsen me I padahkihongkumwailehr, me kumwail mourkilahr, . . . pwe ma soh, amwail pwoson pahn wiahla mehkot mwahl.” Ma mehn Korint kan sohte kesihnenda teng nan rongamwahuwo, eri padahk mehlelo me re alehda sohla pahn katepe. Pohl pousehla mahsanih: “Eri, iet padahk me keieu kesempwal me I aleier, oh I pil peusehiongkumwailehr: duwen Krais eh ketin pwoukilahr dipatail kan, nin duwen eh ntingdier nan Pwuhk Sarawi; duwen eh ketin seridi oh iasada ni kesiluhn rahn, nin duwen e ntingdier nan Pwuhk Sarawi; duwen eh ketin pwarohng Piter, ah mwuhr ong wahnpoaron ehk riemeno koaros. Mwuhr, e ahpw pil ketin pwarohng souleng limepwiki samwao ahnsoutehkis, pali laud en irail momourte lel rahnwet, a ekei melahr; duwen eh pil ketin pwarohng Seims oh mwuhr, ong wahnpoaron ko koaros. E ahpw ketin pwarohng ie keieu mwuhr​—eri, I duwehte seri men me ipwidi ni kaidehn uhdahn ahnsoun eh ipwidi.”​—1 Korint 15:3-8.

8, 9. (a) Ia uwen e kesempwal en kamehlele kaiasada? (b) Ele ahnsou dahieu me Sises pwarohng “mpen Kristian limepwiki”?

⁸ Ong irail ko me kamehlele rongamwahuwo, kaidehn pilipil ehu en kamehlele kaiasadahn Sises de soh. Sounkadehde tohto kak kadehdehda me “Krais matkihla dipatail kan” oh me e iasadaiehr. Emen sounkadehde pwukat iei Kehpas, de Piter, ahd me koaros kin esehki. Mwurin Piter kahmahmkihla Sises ni pwong me Sises pangpangla oh kolokoldi, ele e uhdahn kin kamweitkihla en Sises pwarohng ih. Sises me iasadao pil pwarohng “me ehk riemeno,” wahnpoaron kan nin duwen pwihn ehu​—wiewia ehu me ni mehlel sewese irail en powehdi arail masepwehk oh uhd eimah kadehde en Sises kaiasada.​—Sohn 20:19-23; Wiewia 2:32.

⁹ Krais pil pwarohng pwihn kalaimwun ehu, “mpen Kristian limepwiki.” Pwehki nan Kalili te me e sapwellimanki soahngen werek tohto duwehte met, met iei ahnsouwo me kileledi nan Madiu 28:16-20, me Sises ketikihda kehkehlik en katohnpadahk. Ia uwen kadehde kehlail me aramas pwukat wiahda! Ekei momourte nan pahr 55 C.E. ni ahnsou me Pohl wiahda kisinlikou keieu wet ong mehn Korint kan. Ahpw, tehk me, irail ko me mehla Paipel kin mahsanih me re “memeir ni mehla.” Re saikinte kaiasada pwehn ale arail kating nanleng.

10. (a) Ia lipwen kaimwseklahn en Sises tuhwong sapwellime tohnpadahk kan? (b) Iaduwen en Sises pwarohng Pohl “duwehte seri men me ipwidi ni kaidehn uhdahn ahnsoun eh ipwidi”?

¹⁰ Emen me pil kadehde kaiasadahn Sises iei Seims, nein Sosep oh en Sises nohno, Mery. Mwohn en Sises kaiasada, e sansal me Seims saikinte pwosonla. (Sohn 7:5) Ahpw mwurin Sises pwarohng ih, Seims pwosonla oh ele pwukoahki kapwosonla rie ohl teikan. (Wiewia 1:13, 14) Ni kaimwseklahn ah tuhwong sapwellime tohnpadahk kan, ni ahnsouwo me e kohdala nanleng, Sises kehkehlikihong irail en “wia kadehde . . . lel ni irepen sampah.” (Wiewia 1:6-11) Mwuri, e pwarohng Sohl en Darsus, emen me kin kaloke Kristian akan. (Wiewia 22:6-8) Sises pwarohng Sohl “duwehte seri men me ipwidi ni kaidehn uhdahn ahnsoun eh ipwidi.” E mwomwen me Sohl kaiasadahngehr mour ngehnin oh kak kilang Kaun lingano sounpar epwiki kei mwohn kaiasadahn me keidi kan pahn wiawi. Dahme wiawihong Sohl wasaht kauhdi ih sang elen uhwong mwomwohdisohn Kristian oh karehong en wekila. (Wiewia 9:3-9, 17-19) Sohl wiahla wahnpoaron Pohl, emen me kin keieu tiengla mwowe pere pwoson en Kristian.​—1 Korint 15:9, 10.

Pwoson Kaiasada Me Katapan

11. Iaduwen Pohl kasalehda sapwung en nda: “Sohte kaiasada”?

¹¹ Kaiasadahn Sises kin wia ire mehlel ehu me mie kadehdepe. Pohl mahsanih: “Eri, pwehki audepen at padahk, iei duwen Krais eh ketin iasada sang me melahr akan, dahme ekei kumwail ndindahki dene me melahr akan sohte pahn iasada?” (1 Korint 15:12) Soahngen aramas pwukat sohte kin ihte peikasalki de peidengki duwen kaiasadao ahpw re kin ni sansal koasoia arail sohte kamehlele. Ihme Pohl kasansalehda duwen sapwung en arail lamalam. E mahsanih me ma Krais sohte iasada, eri rohng en Kristiano pahn wiahla likamw ehu, oh irail ko me kadehdehda kaiasadahn Krais pahn “wiahla sounkadehde likamw en Koht.” Ma Krais sohte kaiasada, eri sohte tomw me pweipweila ong Koht; Kristian kan ‘mihmihte nan diparail kan.’ (1 Korint 15:13-19; Rom 3:23, 24; Ipru 9:11-14) Oh Kristian kan me “memeir ni mehla,” ekei me mehkihla arail pwoson, pahn mehla ni arail sohte ahneki koapworopwor mehlel. Ia uwen kompoakehn irair me Kristian kan pahn mihla loale ma ihte mour en met me re kak kasik! Arail kalokolok kan pahn sohla kahtepe.

12. (a) Ia wehwehn en ekerki Krais “tepin wahn irail ko me memeir ni mehla”? (b) Iaduwen Krais karehda kaiasada en kak wiawi?

¹² Ahpw, kaidehn ih met me wiawi. Pohl pousehla mahsanih: “Krais ketin iasadasangehr me melahr akan.” Oh pil ehu, ih me “wialahr tepin kilel en irail kan me melahr.” (1 Korint 15:20) Ni ahnsou me mehn Israel kan ni peik kin kihong Siohwa tepin wahn sapwarail, Siohwa kapaikinirailda rahk kalaimwun. (Eksodus 22:29, 30; 23:19; Lepin Padahk 3:9, 10) Ni ah ekerkin Krais “tepin wah,” Pohl kasansalehda me pil mie ehu rahk en aramas me pahn iasada sang mehla ong mour nanleng. Pohl mahsanih: “Pwe duwen mehla eh tepisang aramastehmen, ih duwen iasada sang mehla eh tepido sang aramastehmen. Pwe duwen aramas koaros ar kin mehkihla ar miniminiong Adam, ih duwen koaros pahn iasadahng mour pwehki ar miniminiong Krais.” (1 Korint 15:21, 22) Sises karehda kaiasadao en kak wiawi ni ah ketikihda ah mour unsek nin duwen aramas men pwehn wia tomw ehu, oh ritingada ahlo ong tohnsampah en saledek sang dihp oh mehla.​—Kalesia 1:4; 1 Piter 1:18, 19.a

13. (a) Iahd me kaiasadahng nanleng pahn wiawi? (b) Iaduwen ekei me keidi kan sohte pahn “meir ni mehla”?

¹³ Pohl pousehla mahsanih: “Ahpw emenemen ni kaikairekdo wet: Krais mahs, a mwuhr, sapwellime kan, ni ahnsou me e pahn ketin pwarodo.” (1 Korint 15:23) Krais iasada nan pahr 33 C.E. Ahpw, sapwellime werek keidi kan​—“irail ko me sapwellimen Krais”​—pahn anahne awih lau mwurinte Sises tepiada ah ketier nan ah kaunda, me kokohp en Paipel kasalehda me e wiawi nan pahr 1914. (1 Deselonika 4:14-16; Kaudiahl 11:18) Iaduwen irail ko me pahn momour erein ah ketier? Pohl mahsanih: “Kumwail rong padahk rir wet: kaidehn kitail koaros pahn mehla, ahpw kitail koaros pahn kiewekla ni ahnsoutehkis, ni marepteieu, ni ahnsou me kaimwiseklahn sowi pahn pepeuk. Pwe ni ngilen sowi, me melahr akan ahpw pahn iasadahng mour me solahr kak mehla, a kitail koaros ahpw pahn pahn kiewekla.” (1 Korint 15:51, 52) E sansal me, kaidehn me keidi koaros me memeir nan sousou kin awiawih kaiasada ehu. Irail ko me mehla erein ketier en Krais pahn kiewekla ni marepteieu.​—Kaudiahl 14:13.

14. Iaduwen me keidi kan “wiliandi me melahr akan oh ale papidais”?

¹⁴ Pohl kalelepek: “Eri, ma me melahr akan sohte pahn iasada, a dahme pahn pweida rehn irail kan me kin wiliandi me melahr akan oh ale papidais? Dahme kahrehda re kin wiliankihdi me melahr akan oh ale papidais? Oh pil kiht, dahme kahrehda se pahn mweidala pein kiht ong lokolok oh apwal ahnsou koaros?” (1 Korint 15:29, 30) Mahsan en Pohl sohte kin wehwehki me aramas kan me momour pahn papidaiskihla me melahr kan, duwen me ekei kawehwehn Paipel kin kose. Pwe papidais kin pidada katohnpadahk en Kristian, oh soul melahr kan sohte kak wiahla tohnpadahk. (Sohn 4:1) Ahpw, Pohl kin koasoakoasoia Kristian momour akan, me tohto me duwehte pein Pohl, kin “mih nan keper nan awa koaros.” Kristian keidi kan kin ‘papidais ong matalahn Krais.’ (Rom 6:3) Sangete arail keidi, re kin “papidaisla,” duwehte ong nan mour ehu me pahn imwikihla mehla ehu me duwehte en Krais. (Mark 10:35-40) Ni ahr mehla re ahneki koapworopwor en ehu iasada kaselel nanleng.​—1 Korint 6:14; Pilipai 3:10, 11.

15. Keper dah kei Pohl lelohng, oh iaduwen ah pwoson kaiasada kin karehong en dadaurete keper pwukat?

¹⁵ Ahnsouwet Pohl kawehwehda me pein ih kin mihla nan uwen soahngen keper me e kak nda: “I kin mihmi nan keper en mehla rahn koaros.” Pwe ekei dehr karauneki me e kin kalaudehla met, Pohl kapataiong: “I koasoakoasoia met pwehki ei kin suweikin kumwail ni atail mouren miniminiong Krais Sises atail Kauno.” The Jerusalem Bible kawehwe ire wet ni ahl wet: “Riei kan, I kin kereniong mehla rahn koaros, oh I kak kaukihla met sang ni ahi suweikin kumwail rehn Krais Sises atail Kaun.” Nin duwen karasepen keper kan me e kin lelohng, nan iretikitik 32, Pohl kin koasoia duwen ‘ah kin peiong mahn lawalo kan nan Episos.’ Mehn Rom kan kin kalapw kemehla aramas mwersuwed ni ahr kin keseiraillong nan wasahn kapoudial kan. Ma Pohl uhdahn peiong mahn lawalo kan, e kak pitla ihte sang ni sawas en Siohwa. E uhdahn pahn pweipwei en pilada elen mour ehu me pahn kihong ih nan soahngen keper pwukat ma sohte koapworopwor en kaiasada. Dadaurete pahn kahpwal kan oh tohnmetei kan me kin kohsang papah Koht sohla pahn katepe ma sohte koapworopwor en ehu mour nan ahnsou kohkohdo. Pohl mahsanih: “A ma me melahr akan sohte pahn iasada, eri, ‘Kitail en kin kamakamadipwte, pwe lakapw kitail pahn mehla.’”​—1 Korint 15:31, 32; pil kilang 2 Korint 1:8, 9; 11:23-27.

16. (a) Lepin lokaia ko “kitail en kamakamadipwte, pwe lakapw kitail pahn mehla” kin tepisang ia? (b) Keper dahieu kin kohsang lamalam wet?

¹⁶ Ele Pohl kin koasoia ireo nan Aiseia 22:13, me kin kasalehda lamalam keper en tohn Serusalem sapeik kan. De e kin medemedewe padahk en mehn Epicurean kan, me kin sapwungki koapworopwor en mour mwurin mehla oh kin kamehlele me peren en uduk me keieu mwahu nan mour. Mendahki ia uhdahn ireo, padahko en “kamakamadipwte” sohte kohsang rehn Koht. Pohl panawihki: “Kaleke kumwail pitida pahn meteikan! Pwe ‘werekiong aramas suwed kan e kin kauwehla tiahk mwahu.’” (1 Korint 15:33) Patohng irail ko me sohte kin kamehlele kaiasada me keper duwehte poisin. Soahngen werek pwukat ele me kin karehda kahpwal kan me Pohl anahne apwaliala nan mwomwohdisohn Korint, me duwehte nenek, saminimin, lelki emenemen mwoalen kopwung, oh mwamwahleki Sak en Soutuk en Kauno.​—1 Korint 1:11; 5:1; 6:1; 11:20-22.

17. (a) Peneu dahieu Pohl kihong mehn Korint kan? (b) Peidek dah kei pahn pasapengla mwuhr?

¹⁷ Ihme Pohl kihong mehn Korint kan peneu mwahu wet: “Kumwail pwuredohng nan amwail lamalam pwung kan oh katokihedi amwail wiewia sapwung kan. Pwe mie ekei rehmwail me sehse Koht; I ndawohng kumwail mehpwukat pwe kumwail en namenengkihda.” (1 Korint 15:34) Sohte kamehlele kaiasada kin karehong ekei en sohla pehm ni pali ngehn, rasehng re sakaula. Re anahne pirida, oh pepehd. Kristian keidi kan rahnpwukat anahne en pil duwehte met ni ahr pahn pepehd ni pali ngehn, oh endehr mihla pahn manaman en lamalam peikasal en sampah. Re anahne koledi teng arail koapworopwor en iasadahng nanleng. Ahpw miehte peidek kan me anahne pasepengla​—ong mehn Korint kan en ahnsouwo oh ong kitail ahnsouwet. Karasepe ehu, ni mwohmw dah kei 144,000 ko pahn iasadahng nanleng? Oh iaduwen aramas rar teikan me mihmihte nan sousou oh sohte ahneki koapworopwor en nanleng? Dahme kaiasadao pahn wiahiong irail? Nan neitail artikel en mwuri, kitail pahn kasawih luhwen en Pohl padahk en kaiasada.

[Nting tikitik me mi pah]

Komw Tamataman?

◻ Marain dahieu Sises kamarainihkihda padahk en kaiasadao?

◻ Ihs ekei irail kan me kadehde en Krais kaiasada?

◻ Dahme karehda uhwong kin wiawihong padahk en kaiasada, oh iaduwen Pohl mwekidiki met?

◻ Dahme karehda pwoson kaiasada me katapan ong Kristian keidi kan?

[Kilel nan pali 21]

Nein Sairus serepeino wiahla mehn kadehde me kaiasada kak wiawi

[Kilel nan pali 22, 23]

Ma sohte koapworopwor en kaiasada, kamakamalahn Kristian lelepek kan sohla pahn katepe