Kaiasada—Padahk Ehu Me Kin Kamwekid Uhk
“I koapworopworki Koht . . . me aramas koaros, me mwahu oh suwed, pahn iasada sang mehla.”—WIEWIA 24:15.
1. Iaduwen padahk en kaiasada eh wia kahpwal ehu ong Sanhedrin?
NI KAIMWISEKLAHN eh seiloak kesiluh en misineri nan 56 C.E., wahnpoaron Pohl mihmi nan Serusalem. Mwurin mehn Rom akan saliediehr ih, e ahpw mweimweidahr en kesinenda mwohn Sanhedrin, mwohlen kopwung Lapalap en Mehn Suhs. (Wiewia 22:29, 30) Ni en Pohl kilikilang me towehda mwoalen kopwungo, e tehkada me ekei irail Sadusi ah ekei Parisi. Pwihn riau pwukat wekpeseng ni ahl ehu. Sadusi kan sohte kamehlele kaiasada; Parisi kan kamehlele. Pwehn kasalehda eh kamehlele duwen kaiasada, Pohl pakairki: “Riei ko, ngehi Parisi men, pil nein Parisi men. I pakadeikdahr wasakiset pwehki ei koapworopworki me melahr kan pahn pil pwurehng iasadahng mour.” Ni eh mahsanih met, e kahrehda pokono en pingida!—Wiewia 23:6-9.
2. Dahme kahrehda Pohl onopkihdahr en kasalehda eh kamehlele kaiasada?
2 Pahr kei mwowe sang, ahnsou me e seiseiloak pohn elen Damaskus, Pohl mahsanihada kaudiahl ehu me e rongada ngilen Sises. Pohl pil kalelepak rehn Sises: “A dahme I pahn wia, Maing ei Kaun?” Sises ahpw sapeng mahsanih: “Uhda oh kohwei Damaskus, pwe ke pahn ese wasao soahng koaros me Koht ketin koasoanediong uhk ke en wia.” Ni en pohl lelehr Damaskus, emen sounpadahk Kristian men me inenen sawas laud ahpw diaradahr Pohl oh kawehwehda: “Koht en samatail kahlap ako ketin piluhkada pwe ke en esehla kupwure, oh ke en kilang sapwellime Ladu pwung, oh ke en rong kapitie.” (Wiewia 22:6-16) E sohte kapwuriamwei, me Pohl onopadahr en kawehwehda duwen eh kamehlele me mie kaiasada.—1 Piter 3:15.
En Pakairkiong Wehi Pokon Duwen Koapworoapwoarpen Kaiasada
3, 4. Iaduwen Pohl kasalehda me e wia sounkalohk lelepek men ong padahk en kaiasada, oh dahme kitail sukuhlkihsang eh mehn kahlemeng mwahu?
3 Mwuhr Pohl pwarala rehn Kepina Felix. Ni ahnsowo, Tertullus, “Sounkapahrek nan pokon” me weliandi mehn Suhs me uhwong Pohl oh kasalehda ahr palio me dene Pohl wia kaun en pwihn ehu me kin idawehn ih oh me e dipkihdahr dipen uhwong koperment. Ni soh peikasal, Pohl mahsanih: “I kasalehiong komwi met: I kin kaudokiong Koht en samat kahlap ako ni ei kin ideidawehn Ahlo me irail koasoia dene me likamw.” Oh mwurin met e koasoiada mouren ah padahk, e pousehla koasoia: “I koapworopworki Koht, duwen me pein ohl pwukat kin koapworopworki, me aramas koaros, me mwahu oh suwed, pahn iasada sang mehla.”—Wiewia 23:23, 24; 24:1-8, 14, 15.
4 Mpen sounpar riau mwuri, me weliandi Felix, Porcius Festus, luhke Nanmwarki Herod Akripa en iang ih kapeidekih Pohl. Festus kawehwehda me irail ko me kedipa Pohl sohte pwungki en Pohl pakairki me “ohl emen me melahr me adaneki Sises . . . wie momourte.” Pohl idek: “Eri dahme kahrehda kumwail mehn Suhs akan sohte kak kamehlelehki me Koht kin ketin kaiasada me melahr akan?” Ih pil pousehla oh kasalehda: “Ahpw lel rahnwet Koht ketin sewese ie, oh met I patohier wasaht oh wia ei kadehdehiong kumwail koaros, me tikitik oh me lapalap akan. Eri, met me I patopatohwan, iei soahngohte me soukohp ako oh Moses pil mahsaniher me pahn wiawi; me Mesaia uhdahn pahn lokolok oh ih me pahn tepin iasada sang mehla, pwe en kasalehda marain en komour ong mehn Suhs akan oh pil ong mehn liki kan.” (Wiewia 24:27; 25:13-22; 26:8, 22, 23) Pohl kin inenen utung padahk en kaiasada! Kitail en pil duwehte Pohl oh kalohki ni soh peikasal me mie kaiasada. Ahpw soangen irair dah kan me kitail en kasik sang rehn aramas akan? Soangen irairohte me lelohng Pohl.
5, 6. (a) Ahn wahnpoaron kan kin kalohki duwen kaiasada imwikihla dah? (b) Ni atail kin kasalehda atail koapworopworki kaiasada, dahme kesempwal?
5 Nna, song medewehla dahme wiawiher mwowe ahnsou me Pohl wia eh seiloak en misineri keriau (mpen pahr 49-52 C.E.) ahnsou me e mwemweitala Adens. E kawehwehiong aramas akan me kin kamehlele soangsoangen koht tohto, oh padahkiong irail en pohnese kupwuren Koht duwen eh pahn ketin kadeikada tohnsampah ni pwung ki sapwellime ohl me e ketin pilidahr ohl menet iei Sises. Ohl menet iei Sises. Pohl kawehwehda me Koht ketin kamehlelehda me e pahn ketin wia met ni ah ketin kaiasada Sises. Iaduwen aramas pwukat mwekidki met? Kitail wadek: “Ni ahnsou me irail rong en Pohl eh koasoakoasoia duwen iasada sang mehla, ekei irail ahpw kouruhrki, a ekei nda, “Se pil men pwurehng rong uhk ni omw pahn pil pwurehng koasoia met.’ ”—Wiewia 17:29-32.
6 Mwomwen ahr mwekidki met duwehte dahme Piter oh Sohn pehmehr ahnsoukis mwurin Pendekos 33 C.E. Sadusi ko pil iang pidada nan irairo. Wiewia 4:1-4 kasalehda dahme wiawi: “Eri, ni en Piter oh Sohn ara koasoakoasoiong aramas ako, samworo ko, oh kaun me kin apwahpwalih silepe kan en Tehnpas Sarawio, oh pil Sadusi kei, ahpw lel rehra. Irail inenen pwunodkihda en wahnpoaron riemenet ara padahkihong aramas akan me Sises ketin iasadahr sang mehla; pwehki koasoio wia kadehdepen me melahr akan ar pahn pil pwurehng mourda.” Ahpw ekei pwungki. “Ahpw me tohto me rong mahseno re pwosonla; oh ohl ako wie tohtohla ele lel me limekid.” Met kasalehda me kitail en kasik me en aramas akan ahr pahn mwekidki atail koasoiong irail duwen koapworopwoarpen kaiasada pahn wekpeseng. Pwehki met, e kesempwal kitail en kakehlaka atail pwoson.
Pwoson oh Kaiasada
7, 8. (a) Nin duwen me sansalda sang kisin likou ong mwomwohdisohn Korint en senturi keieu, iaduwen pwoson eh kak sohte katepe? (b) Iaduwen wehwe pwung duwen koapworopwoarpen kaiasada kak katohrehwei Kristian mehlel kan?
7 Kaidehn koaros me wiahla Kristian nan keieun senturi C.E. mwadangete kamehlelehla duwen koapworopwoarpen kaiasada. Ekei me apwaliki kamehlele met iang mwomwohdisohn Korint. Pohl ntinglahng irail: “Eri, iet padahk me keieu kesempwal me I aleier, oh I pil peusehiongkumwailehr: duwen Krais eh ketin pwoukilahr dipatail kan, nin duwen eh ntingdier nan Pwuhk Sarawi; duwen eh ketin seridi oh iasada ni kesiluhn rahn, nin duwen eh ntingdier nan Pwuhk Sarawi.” Pohl pil kasalehda mehlelpen met ni eh mahsanih me Krais me iasadahro “pwaroahng Kristian limepwiki samwao,” oh Pohl pil kasalehda me pali laud en irail wie momourte ahnsowo. (1 Korint 15:3-8) E pil kawehwehda: “Eri, pwehki audepen at padahk, iei duwen Krais eh ketin iasada sang me melahr akan, dahme ekei kumwail ndindahki dene me melahr akan sohte pahn iasada? Pwe ma mehlel pwoat met, eri, Krais sohte pil iasada. A ma Krais sohte ketin iasada sang mehla, eri, at padahk, padahk mwahl ehu, oh amwail pwoson, pwoson mwahl ehu.”—1 Korint 15:12-14.
8 Ehi, padahk en kaiasada me inenen mengei me kahrehda pwoson en Kristian akan pahn sohte katepe ma irail sohte kamehlele kaiasada. Ehi, wehwe pwung duwen kaiasada kin katohrehpeseng Kristian mehlel kan sang Kristian likamw akan. (Senesis 3:4; Esekiel 18:4) Ihme kahrehda Pohl wiahki padahk en kaiasada kisehn “tepin padahk” en Kristian. Kitail en koasonehdi teng me kitail en “kekeirada.” Pohl kangoangehki, “Kitail pahn wia met, ma Koht ketin kupwurki.”—Ipru 6:1-3.
Koapworopworpen Kaiasada
9, 10. Ia wehwehn kaiasada me Pwuhk Sarawi kin koasoia?
9 Pwehn kakehlaka atail pwoson kaiasada, kitail en idek peidek kan me duwehte met: Ia wehwehn kaiasada me Pwuhk Sarawi kin mahsanih? Iaduwen padahk en kaiasada kin kasalehda duwen sapwellimen Siohwa limpoak? Pasapengpen peidek pwukat pahn kakerenihkitailahng rehn Koht oh pil ahnsowohte sewese kitail en kak padahkiong meteikan duwen kaiasada.—2 Timoty 2:2; Seims 4:8.
10 “Kaiasada” ni lepin lokaiahn Krihk kin wehwehki “en pil ehu kesihnenda.” Dahme lepin lokaia wet pidada? Nin duwen me Pwuhk Sarawi kasalehda, koapworopworpen kaiasada iei kamehlelepen me aramas mehla men kak pwurehng mour. Pwuhk Sarawi pil pousehla oh kasalehda me aramas emen pahn iaskihda war en aramas de war ngehn, met pidada ma e ahneki koapworopwor en mour pohn sampah de nanleng. Kitail kin pwuriamwekihla sapwellimen Siohwa limpoak, erpit, oh kehl me kin sansal sang koapworopwoar kaselel en kaiasada.
11. Soangen koapworopwor en kaiasada dah me kohwong sapwellimen Koht ladu keidi kan?
11 Kaiasadahn Sises oh sapwellime me keidi ko ki paliwar ngehn inenen konehng ahr pwukoa nanleng. (1 Korint 15:35-38, 42-53) Irail pahn papah nin duwen kaun ekei nan Wehin Mesaia, me pahn wahdo paradais nin sampah. Sises pahn wia Samworo Lapalap emen oh kaun irail me keidi kan me pahn wia soupeidi, en pwihnen samworo kei. Irail pahn wahdo kamwahu akan en sapwellimen Krais meirong tomw ong aramas akan nan sampah kapw me diren pwung. (Ipru 7:25, 26; 9:24; 1 Piter 2:9; Kaudiahl 22:1, 2) Nan ahnsou pwukat, irail me keidi kan me momourte pohn sampah men pousehlahte oh wia mehkan me pwung mwohn Koht. Ni ahr pahn mehla, irail pahn ale arail “kating” ki kaiasada ong mour ngehn nanleng. (2 Korint 5:1-3, 6-8, 10; 1 Korint 15:51, 52; Kaudiahl 14:13) Pohl ntingihdi, “Pwe ma kitail miniminiong Krais ni atail iang sapwellime pwoula, eri, kitail pahn pil miniminiong ni atail pil iang sapwellime iasada. (Rom 6:5) Ahpw iaduwen irail akan me pahn iasada oh pwurehng mour nin sampah nin duwen aramas ekei? Iaduwen koapworopworpen kaiasada kak kakerenihiraillahng Koht? Kitail kak sukuhliki soahng tohto sang ni mehn kahlemeng en Eipraam.
Kaiasada oh Kompoakepahnki Siohwa
12, 13. Kahrepe kehlail dahieu me Eipraam ahneki me e kak pwosonki kaiasada?
12 Eipraam, me wia “kompoakepen Siohwa,” kin wia ohl emen me ahneki pwoson laud. (Seims 2:23) Pak silu Pohl kasalehda duwen pwoson en Eipraam ni ahnsou me e kilelehdi irail ohl oh lih akan me pwoson nan irelaud 11 en Ipru. (Ipru 11:8, 9, 17) Kesilipak en eh kasalehda duwen pwoson en Eipraam e kasalehda duwen pwoson me Eipraam kasalehda ni peik oh onopadahr en meirongkihla nah pwutak Aisek. Eipraam koapworopwoarki me Siohwa pahn kolokolte sapwellime inoupen keinek me pahn kohsang Aisek. Mehnda ma Aisek mehla nin duwen meirong ehu, Eipraam koapworopwoarki me Siohwa pahn kak ketin kaiasada ih sang mehla.”
13 Ahpw nin duwen me wiawi, ni Siohwa eh mahsanihada duwen kehlail en ahn Eipraam pwoson, e koasonehiong pwe emen mahn en weliandi oh wia meirong. Irair en Aisek wia men karaspen ehu en kaiasada, nin duwen me Pohl kawehwehda: “Pwe Eipraam lemelemehte me Koht kak ketin komourada Aisek sang mehla-eri, kitail kak nda me Eipraam pwurehng ale Aisek sang mehla.” (Ipru 11:19) Ahpw mie ehu kahrepe me laud sang met me kahrehda Eipraam en kamehlele duwen kaiasada. Siohwa soh pwurehng kapwurdiong Eipraam kehl en naineki seri ni ih oh eh pwoud Sera nainekidahr Aisek ni ara likeilapalahr?—Senesis 18:10-14; 21:1-3; Rom 4:19-21.
14. (a) Nin duwen me Ipru 11:9, 10, dahme Eipraam awiawih? (b) Pwehn kak ale kapaipen Wehio nan sampah kapw, dahme anahne en wiawihong Eipraam? (c) Iaduwen atail kak alehdi kapai kan en Wehio?
14 Pohl kawehwehda Eipraam nin duwen aramas en liki men oh me kin mihmi nan impwal likou kei me kin “awiawih kahnimw ehu me Koht ketin kupwurehla oh kauwada, kahnimw me poahsoan poatopoat.” (Ipru 11:9, 10) Met kaidehn uhdahn kahnimw ehu me duwehte Serusalem, me wia wasa me tehnpesen Koht mih ie. Ahpw, kahnimw wet wia karasaras ehu. Met iei sapwellimen Koht Wehin nanleng me wiawihkihda Sises Krais oh irail meh 144,000 me pahn iang ih kakaun. Irail 144,000 me mih nan ahr lingan en lahng pil kin wia “kahnimw sarawi, Serusalem Kapw,” me wia “lih kamwohd” en Krais. (Kaudiahl 21:2) Nan 1914, Siohwa kasapwilada Sises nan mwoale nin duwen Nanmwarki keidi men en Wehin nanleng oh ruwesehkin ih en kaunda nanpwungen eh imwintihti kan. (Melkahka 110:1, 2; Kaudiahl 11:15) Pwehn ale kapaipen kaundahn wehio, Eipraam, “koampoakepahn Siohwa,” anahne en pwurehng mourda. Pil duwehte, pwe kitail en kak ale kapai en Wehio, kitail anahne en momour nan sapwellimen Koht sampah kapw, nin duwen kisehn pokon kalaimwun me pitsang Armakedon de nin duwen irail me kaiasada sang mehla. (Kaudiahl 7:9, 14) Ahpw, dahme poasoanehda koapworopworpen kaiasada?
Sapwellimen Koht Limpoak—Poahsoanpen Koapworopwoar en Kaiasada
15, 16. (a) Iaduwen tepin kokohp nan Pwuhk Sarawi wia poahsoanpen atail koapworopworpen kaiasada? (b) Iaduwen atail kamehlele kaiasada kak kakerenih kitail lahng Siohwa?
15 Atail nanpwungmwahu rehn Samatail limpoak nanleng, atail pwoson kehlail duwehte Eipraam, oh atail peikiong sapwellimen Koht kosonned akan kak kahrehiong kitail en kak pwungla rehn Siohwa oh wia kompoakepah kei. Met kihong kitail ahnsou mwahu en ale kapai kan sang sapwellime Wehi. Ni mehlel, tepin kokohp me kileledi nan sapwellimen Koht Mahsen, nan Senesis 3:15, wia poahsoanpen koapworopworpen kaiasada oh ahneki nanpwungmwahu rehn Koht. E sohte kohpadahte duwen aramas akan pahn sok pohn moangen Sehdan ahpw ni paliteio, e pil kohpada duwen keikeidi en keimwin nehn nein sapwellimen Koht lih. Sapwellimen Sises pwoula pohn tuhkeo mwete keikeidi en keimwin neh. Kaiasadahn Sises ni rahn kesiluho kamwohdiher ohlao oh wiahda ahl ieu en kak kauwehla “Tepilo, me kakaun mehla.”—Ipru 2:14.
16 Pohl katamankin kitail me “Koht ketin kasalehiong kitail ia uwen laud en sapwellime limpoak ong kitail; pwe ni ahnsou me kitail mihmi nan dihp, Krais ketin pwoukinkitailla!” (Rom 5:8) Kalahnganki kadek sapan wet pahn kahrehong kitail en kak karanihla Sises oh Samatail kadek me ketiket nanleng.—2 Korint 5:14, 15.
17. (a) Soangen koapworopwor dah me Sohp kasalehda? (b) Dahme Sohp 14:15 kasalehda duwen Siohwa, oh iaduwen met kamwekid omw pepehm?
17 Sohp, me mour mwohn mwehin Kristian kin pil kasikasik kaiasada. E lelohng nan lokolok laud pwehki dahme Sehdan wiahiong ih. Weksang kompoakepah likamw ko, me sohte koasoia duwen kaiasada, Sohp kin ale kamweit sang koapworopwor wet oh idek: “Ma aramas emen pahn mehla, e kak pwurehng mourda?” Sohp pein kin sapengki peidek wet: “Ahpw I pahn awiawihete ahnsou mwahu sang met, oh kasikasik ahnsou apwal wet lao sohrala.” Ni ah koasoiong ah Koht, Siohwa, e pohnesehki: “Eri, ahnsowo, komw pahn ketin malipe ie, I ahpw pahn patohwan sapeng.” Me pid duwen pepehm en atail Sounkapikada limpoako, Sohp koasoia: “Komw ahpw pahn kupwurperenkiniehda, wiepen nin limomwiet.” (Sohp 14:14, 15) Ei, Siohwa kin kaskasik ahnsou me irail me lelepek kan pahn pwurehng mourda ni ahnsou en kaiasada. Ei, Siohwa kin kasikasik ahnsou me irail me lelepek kan pahn pwurehng mourda ni ahnsou en kaiasada. Ia uwen met eh kin kakerenihkitaillahng ih ni atail kin doudouloale duwen limpoak oh kadek sapan me e kin ketin kasalehiong kitail mendahkihte atail sohunsek!—Rom 5:21; Seims 4:8.
18, 19. (a) Koapworopwor dah me Daniel ahneki me pid duwen eh pahn pwurehng mour? (b) Dahme kitail pahn kousapahlih nan artikel en mwurin met?
18 Soukohp Daniel me sapwellimen Koht tohnleng kawehwehda nin duwen “ohl emen me Koht ketin poakohng,” kin papah ni lelepek ahnsou reirei. (Daniel 10:11, 19) Eh loaloapwoat ong Siohwa sohte tokedi sangete ni ahnsou me e sella nan 617 B.C.E. lao lel ni eh mehla mwurin eh alehdier kaudiahl ehu nan 536 B.C.E., pahr kesilu me Sairus, nanmwarki en Persia kakauniki. (Daniel 1:1; 10:1) Ahnsoukis mwuri, ni kesiluh en pahr me Sairus kakaunki, Daniel alehdi kaudiahl ehu me pid irerekdi en wehi kehlail en sampah kan me pahn imwikihla kahn kamakam kowahlap. (Daniel 11:1–12:13) Pwehki eh sohte wehwehki mwahu kaudiahl wet, Daniel idek rehn tohnleng en kairo: “Maing, ahpw ia duwen eh pahn imwisekla?” Pwehn sapeng met tohnlengo kawetalahng eh madamadau ong ni “imwilahn ahnsou,” ahnsou ehu me “irail kante me kupwurokong me pahn dehdehki.” Ahpw ong pein Daniel, ia eh koapworopwor ong ahnsou kohkohdo? Tohnlengo pohnesehki: “Ke pahn mehla, ahpw ke pahn ale katingpomw ni imwilahn ahnsowo.” (Daniel 12:8-10, 13) Daniel pahn pwurodo “ni kaiasadahn irail me pwung kan,” ni pahr kid me Krais pahn kakaunki.—Luk 14:14.
19 Kitail momour ni imwin rahn akan oh e kerenlahngehr tepin ahnsou me Krais pahn kakaun erein pahr kid, kerensangehr ahnsou me kitail ahpwtehn iangala padahk mehlel. Kahrehda, ‘Kitail anahne pein idek rehtail, ‘Iaduwen, I pahn iang kousoan nan sampah kapw oh werekiong Eipraam, Sohp, Daniel, oh iangahki ohl oh lih lelepek teikan?’ Kitail pahn iang mih mwo ma kitail kin karanih Siohwa oh peikiong sapwellime kosonned akan. Nan artikel en mwuhr, kitail pahn kousapahlih koapworopwoarpen kaiasada ni oaritik pwe kitail en kak wehwehki ihs irail akan me pahn kaiasada.
Ke Tamataman?
• Iaduwen aramas akan mwekidki en Pohl kasalehda me e koapworoapworki kaiasada?
• Dahme kahrehda koapworopworpen kaiasada kin katohrehsang Kristian mehlel kan sang Kristian likamw akan?
• Iaduwen kitail ese me Eipraam, Sohp, oh Daniel kin pwoson kaiasada?
[Kilel nan Pali 7]
Pohl, me pwarada mwohn Kepina Felix, kasalehda ni eh kamehlele duwen koapworopwor en kaiasada
[Kilel nan Pali 8]
Dahme kahrehda Eipraam pwoson kaiasada?
[Kilel nan Pali 10]
Sohp kin ale kamweit sang koapworopworpen kaiasada
[Kilel nan Pali 10]
Daniel pahn pwuredo ni kaiasadahn irail me pwung kan