Koapworopwor En Iasada​—Mehkot Me Uhdahn Pahn Wiawi!

“I koapworopworki Koht . . . me aramas akan pahn iasada sang mehla.”—WIEWIA 24:15.

1. Dahme kahrehda kitail kak koapworopworki me iasada uhdahn pahn wiawi?

SIOHWA me ketikihong kitail kahrepe kaselel kan pwe kitail kak kamehlele koapworopwor en iasada. E inoukihong kitail me aramas mehlahr kan pahn iasada, pwurehng mourada. Oh sapwellime kupwur kan me kin pidada irail me mehlahr akan uhdahn pahn pweida. (Aiseia 55:11; Luk 18:27) Oh pil, Koht kasalehdahr sapwellime manaman en kaiasada aramas mehlahr akan.

2. Iaduwen koapworopwor en iasada kak sewese kitail?

² Pwoson sapwellimen Koht koasoandi en kaiasada aramas mehlahr akan ki sapwellime Ohl, Sises Krais, pahn kak sewese kitail ni ahnsoun pwunod akan. Koapworopwor en iasada pahn pil kak sewese kitail en kolokolete atail lelepek ong Samatail nanleng mendahki kitail pahn mehla. Atail koapworopwor en iasada pahn kehlailda ni ahnsou me kitail pahn koasoiada duwen aramas akan me iasada me ntingihdi nan Paipel. Manaman pwukat koaros kin pweida pwehki e kin kohsang rehn Siohwa Wasa Lapalapie.

Re Aleier Neir Seri Kei Me Pwurehng Mourda Sang Mehla

3. Manaman dahieu Elaisa wiahda ni ahnsou me nein liohdi pwutak emen mehla nan Sarepad?

³ Ni ah kousapahlih duwen mehn kahlemeng en pwoson me sapwellimen Siohwa sounkadehde kan mwohn ahnsoun Kristian akan kin kasalehda, wahnpoaron Pohl ntingihdi: “Lih ekei mie me aleier nair seri kei me pwurehng mourda sang mehla pwehki pwoson.” (Ipru 11:35; 12:1) Sang rehn irail lih pwukat, emen rehrail iei liohdi men me kohsang kahnimw en Sarepad nan sapwen Penisia. Pwehki lih menet kadek ong sapwellimen Koht soukohp Elaisa, ni manaman ehu, kene pilawa oh leh sohte kin nekla erein ahnsoun duhpek me wiawi me pahn kakete kemehla liho oh nah pwutak. Ahpw mwurin ahnsou ehu, serio mehla, Elaisa ahpw ale pwutako oh kaunehdiong pohn pehto, e ahpw kapakap oh wendiong pohn pwutako pak siluh, oh kapakap ngihl laud: “Maing Kaun, ei Koht, komw ketin kapwuredohng mouren pwutaket.” Koht kahrehong pwutak menet en pwurehng mourada. (1 Nanmwarki 17:8-24) Medemedewe duwen peren laud me liohdi menet ahnekier, pwehki e ale katamanpen eh pwoson, kaiasada me Paipel tepin ntingihdi​—iei nah pwutak!

4. Manaman dahieu Elisa wia nan Sunem?

⁴ Nan kahnimw en Sunem, mie lih emen me aleiehr nah seri me pwurehng mourada sang mehla. Lih menet pwoudki emen ohl laud, oh liho kin kadek ong soukohp Elisa oh nah ladu. Mwurin met, e ale kating en nainekihda pwutak emen. Mwurin sounpar kei, liho eri lukehdo soukohpo, oh soukohpo kilangada pwutak menet mehla nan imwen eh nohno. Mwurin Elisa kapakap oh aluseli nan pereo, “paliweren pwutako pa karakarada. Pwutako ahpw asi pak isuh, e ahpw pehdpeseng.” Kaiasada wet me wahdohng nohno menet oh nah pwutak peren laud. (2 Nanmwarki 4:8-37; 8:1-6) Ahpw, ira pahn ale peren me pahn laudsang met ni ahnsou me ira pahn iasadahng mour nin sampah iei me “iasadahng mour me mwahusang met”​—pwehki ira kakete sohte pahn pwurehng mehla! Kahrepe laud ehu en kasalehda atail kalahnganki Koht limpoak en iasada, iei Siohwa!—​Ipru 11:35.

5. Iaduwen Elisa kin iang pidada manaman ehu mwurin e mehla?

⁵ Mwurin Elisa mehla oh seridi, Koht ketin kakehlailda tihn Elisa ki ngehn sarawi. Kitail wadek: “Ehu ahnsou, aramas ekei [mehn Israel kan] me weuwa kolahng sarepedi me mehla men ahpw kilangada sounpei en Mohap kei; re ahpw kesehdiongete aramas mehlao nan sousoun Elisa, oh tangdoaui. Eri, ni paliweren aramas mehlao eh sairada tihn Elisa ko, aramas mehlao ahpw pwurehng mourda oh kesihnenda.” (2 Nanmwarki 13:20, 21) Ohlo inenen pwuriamwekihla oh perenda! Medemedewe duwen peren me kitail pahn ahneki ni ahnsou me kompoakpatail kan pahn iasada me pahn pahrekiong kupwuren Siohwa Koht me uhdahn pahn pweida!

Sapwellimen Koht Ohl Kin Kaiasada Irail Aramas Mehlahr Akan

6. Mehnia manaman me Sises wiahda karanih kahnimw en Nain, oh ni ahl dahieu manaman wet kin kamwekidada kitail?

⁶ Sapwellimen Koht Ohl, Sises Krais, kin kihong kitail kahrepe mwahu kan en kamehlele me aramas mehlahr akan pahn kak iang iasada oh ale mour soutuk. Dahme wiawi karanih kahnimw en Nain pahn kak sewese kitail en kamehlele me manaman wet pahn kak wiawi ki sapwellimen Koht manaman. Ahnsou ehu, Sises tuhwong kapar en mehla ieu weuwa paliwar en ohl pwulopwul men pwehn sarepedi. Ih nein liohdi men nah iehros. Sises padahkiong ih: “Lih ke dehr seng.” Ih eri ketin keiong mpen kohpwao oh ketikidahng limeo powe oh mahsanih: “Mwahnakapw, pwourda!” Ni ahnsowohte e mwohdada oh tapihada lokolokaia. (Luk 7:11-15) Manaman wet kin kakehlailda atail pwoson koapworopwor en iasada.

7. Dahme wiawier ong nein Sairus serepein?

⁷ Medemedewe dahme wiaiong Sairus, soumas emen nan sinakoke en Kapernaum. E peki rehn Sises en sewese nah serepein kompoake me mahki sounpar 12, me kereniong pahn mehla. Oh ahnsou kis mwurin met, serepeino mehla. Sises kangoange Sairus en pwosonte, oh e iangala Sairus nan imwe, oh pokon ehu me mwahmwahieiki. Irail ahpw kouruhr ni ahnsou me Sises mahsanihong irail: “Serien sohte mehla, e wie memeir!” E uhdahn mehla, ahpw Sises pahn kasalehong irail me aramas akan pahn kak pwurehng mourada duwehte irail meir kelik. E ahpw ketin kolada pehn serepeino oh mahsanih ong: “Serepein, pwourda!” Eri, ni ahnsowohte serepeino ahpw pwourda, oh ahn serepeino pahpa oh nohno pwuriamweikihla mehlel. (Mark 5:35-43; Luk 8:49-56) Sohte peikidpe, tohnpeneinei kan pil pahn pwuriamweikihla ahnsou me kompoakeparail kan pahn iasada nin paradais sampah.

8. Dahme Sises wia ni wasahn sousou en Lasarus?

⁸ Lasarus mehlahr erein rahn pahieu ni ahnsou me Sises ketilahng sousou en Lasarus oh katapwursang takaio me ritingdi sousouo. Mwurin e wie eh kapakap mwohn wehi pokon pwe irail pahn ese me e kin likih manaman me kohsang rehn Koht, Sises ahpw kapitie laudida, mahsanih: “Lasarus, pedoido!” E ahpw pedoido! Peh oh neh kan kidikidkipene likoun nan sousou, oh likou ehu pirepene mese. Sises mahsanih, “Kumwail sapwadada ohlen oh kasaladakala.” Mie aramas tohto me kohdo rehn rien Lasarus serepein kan, Mery oh Mahda pwehn kamweitala ira, ahpw ni ahnsou me irail kilang manaman wet, irail tohto me tepida pwosonla Sises. (Sohn 11:1-45) Dahme wiawi wasaht sohte kin kadirehkinuhkala koapworopwor me mwein kompoakpamwail kan pahn kak iasada nan sapwellimen Koht sampah kapw?

9. Ni ahnsouwet, dahme kahrehda kitail kak kamehlele me Sises pahn kak kaiasada me melahr akan?

⁹ Ni ahnsou Sohn Sounpapidais sensel nan imweteng, Sises kadarodohng ih rong kaselel wet: “Me maskun kan ar kilangada wasa, . . . duwen me melahr akan ar kin mourda.” (Madiu 11:4-6) Pwehki Sises kin kaiasada aramas akan ni ahnsou me e ketiket nin sampah, e pil pahn kak pwurehng wia met nin duwen ngehn kehlail men me ale eh manaman sang rehn Koht. Sises iei “mour sapahl oh Sounkomour,” oh ia uwen kansenamwahu en wehwehki me ni ahnsou keren “irail koaros me mihmi nan sousou kan pahn rong kapitie, oh re pahn pedoisang nan arail sousou kan”!​—Sohn 5:28, 29; 11:25.

Komourada en Aramas Teikan kin Kakehlailda Atail Koapworopwor

10. Iaduwen ke pahn kawehwehda duwen keieun kaiasada me wahnpoaron men wiahda?

¹⁰ Ni ahnsou me Sises poaronepeseng sapwellime wahnpoaron kan nin duwen sounkalohk kan en Wehio, e mahsanih: “Komourada me melahr akan.” (Madiu 10:5-8) Irail anahne likih sapwellimen Koht kehl en sewese irail en wia met. Nan Sopa ni pahr 36 C.E. Dorkas (Dapida), lih emen me kin pwoson Koht, mehla. Mie aramas tohto me wie sengisengki e mehla, pwe ni ahnsou me e momour, e kin kadek ong aramas akan oh e pil kin wiahda likou kan ong irail liohdi semwehmwe kan. Tohnpadahk kan kamwakelehda paliwaro pwehn kaunopada ong sarepedi oh irail padahkiong wahnpoaron Piter en kohdo rehrail, ele mwein irail men ale kamweit sang rehn Piter. (Wiewia 9:32-38) E ahpw kihirailieisang nan pereo, ahpw kapakap, oh nda: “Dapida, pwourda!” E ahpw pehdpeseng, mwohdada, koledi pehn Piter, oh Piter ahpw sewese liho en pwourda. Met iei iasada me keieu ntingihdiher duwen emen wahnpoaron me wia soangen manaman wet, oh met kahrehong tohto en pwosonla Koht. (Wiewia 9:39-42) E pil kin kihong kitail kahrepe en koapworopworki me kaiasada uhdahn pahn wiawi.

11. Ia kaimwiseklahn kaiasada me ntingihdi nan Paipel?

¹¹ Kaimwiseklahn kaiasada me ntingihdi nan Paipel me wiawiehr nan Troas. Ni ahnsou me Pohl wia kesiluhn seiloak, e uhdi wasao oh e wia padahk reirei lel ni lukopen pwong. Pwehki aramas tohto pokonpene wasao oh pil karakar me kin kohsang lamp tohto, ele mwein met kahrehong ohl pwulopwul me adaneki Eutikus en meirla oh pwupwudihsang nan poasoake kesiluh en ihmwo. “Irail pwekada, e melahr,” kaidehn lipwongmaslahte. Pohl lukupoardiong powe oh pwoalehdi Eutikus, oh ndaiong aramas akan: “Kumwail dehr nsensuwed, pwe e momourte.” Mahsen pwukat en wahnpoaron Pohl kin wehwehki me ohl pwulopwul menet pwurehng mourada. Irail akan me mih wasao “nsenamwahula mehlel.” (Wiewia 20:7-12) Rahnwet, sapwellimen Koht ladu kan kin nsenamwahula mehlel ni ahnsou me re kin sukuhliki me iengerail sounpapah en Koht pahn iang kilang pweidahn koapworopwor en iasada.

Iasada​—Koapworopwor Ehu Me Tepsang Mahs

12. Lamalam dahieu Pohl kawehwehda mwohn Kepina en Rom Peliks?

¹² Ni ahnsou me kopwung wiawi, Pohl kadehdehda mwohn Kepina en Rom Peliks duwen met: “I pil kamehlele soahng koaros me ntingdier nan Kosonned en Moses oh pil nan pwuhken soukohp akan. I koapworopworki Koht, . . . me aramas koaros, me mwahu oh suwed, pahn iasada sang mehla.” (Wiewia 24:14, 15) Iaduwen ekei wasa kan nan Mahsen en Koht, duwehte “Kosonnedo,” kin kawehwehda duwen iasadahn mehlahr akan?

13. Dahme kahrehda kitail kak nda me Koht kin mahsanih duwen kaiasada ni ahnsou me e wiahda tepin kokohpo?

¹³ Koht pein kasalehda me kaiasada pahn wiawi ehu rahn ni ahnsou me e wiahda keieun kokohp nan Ihden. Koht kadeikada “serpent en mahso” ni e mahsanih: “Kowe oh liho pahn kin imwintihtipene; nein liho oh pil noumw kan pahn pil kin imwintihtipene kohkohlahte. E pahn sok pohn moangomwen pwe en kamwutepene; oh ke pahn ke keimwen neh.” (Kaudiahl 12:9; Senesis 3:14, 15) “Ke keimwen neh” en nein liho kin wehwehki kamakamalahn Sises Krais. Mwurin met, ma kadaudok menet pahn sok pohn moangen serpent, e sansal me Krais anahne en iasada sang mehla pwehn wia met.

14. Iaduwen Siohwa iei “Koht en me momour kan, a kaidehk Koht en me melahr akan”?

¹⁴ Sises mahsanih: “Moses pil kadehdeier ni mehlel duwen me melahr akan ar pahn mourda. Pwe ni koasoiepen kisin tuhke tekatek me mpwumwpwulo, Moses kahdaneki Kauno ‘Koht en Eipraam, Koht en Aisek, Koht en Seikop.’ Met wehwehki duwen eh wia Koht en me momour kan, a kaidehk Koht en me melahr akan​—pwe aramas koaros kin momouriong ih.” (Luk 20:27, 37, 38; Eksodus 3:6) Eipraam, Aisek, oh Seikop mehlahr, ahpw ong Koht, irail memour pwehki sapwellime kupwure en kaiasada irail uhdahn pahn pweida.

15. Dahme kahrehda Eipraam ahneki kahrepe mwahu en kamehlele kaiasada?

¹⁵ Eipraam ahneki kahrepe mwahu en koapworopworki me kaiasada uhdahn pahn wiawi pwe ni ahnsou me ih oh eh pwoud, Sera, mahlahr, oh ira mwomwen mehla ni ahl me ira sohte kak wiahda seri kan, ahpw Koht ni manaman ehu kahrehong ira en naineki seri men. Met kin duwehte kaiasada ehu. (Senesis 18:9-11; 21:1-3; Ipru 11:11, 12) Ni ahnsou me neira pwutak, Aisek, mahki mpen sounpar 25, Koht mahsanihong Eipraam en meirongkihong ih nah pwutak. Mwohnte Eipraam pahn kemehla Aisek, sapwellimen Siohwa tohnleng men kauhdi ih. Eipraam “lemelemehte me Koht kak ketin komourada Aisek sang mehla​—eri, kitail kak nda me Eipraam pwurehng ale Aisek sang mehla.”​—Ipru 11:17-19; Senesis 22:1-18.

16. Ni ahnsou wet, Eipraam mehlahr, ahpw awiawih dah?

¹⁶ Eipraam koapworopworki me kaiasada pahn wiawi pahn kaundahn Mesaia, iei Kadaudokeo me inoudahr. Mwohn Sapwellimen Koht Ohl ketido nin sampah, e kilang duwen ahn Eipraam pwoson. Ni ahnsou me e wiahla aramas, Sises Krais, e mahsanihong mehn Suhs akan: “Samamwail Eipraam perenkihda eh pahn kilang ei rahn.” (Sohn 8:56-58; Lepin Padahk 8:30, 31) Ni ahnsou wet, Eipraam mehlahr, awiawih kaiasada nin sampah pahn kaundahn Sapwellimen Koht Wehin Mesaia.​—Ipru 11:8-10, 13.

Kadehde kan Sang Kosonnedo oh Sang Melkahka kan

17. Iaduwen mehkan me “ntingdier nan Kosonnedo” kin doake kaiasadahn Sises Krais?

¹⁷ Koapworopwor en iasada me Pohl kin ahneki kin peikiong dahme “ntingdier nan Kosonnedo.” Koht mahsanihong Mehn Israel akan: “Ke anahne . . . mwowehiong samworo kan tepin wahnsapwamwail kan. Samworo eri pahn [ni Nisan 16] patohwandahng wahnsahpw ako ong Kauno nin duwen meirong tohrohr ehu, pwe kumwail en ale kupwuramwahu.” (Lipai 23:9-14) Mwein Pohl kin medemedewe duwen kosonned wet ni ahnsou me e ntingihdi met: “Krais ketin iasadasangehr me melahr akan; kahrehda, e ketin wialahr mwohn rahk en irail kan me melahr, nin duwen ar pahn pil iasada.” Ni ah wia “mwohn rahk,” Sises iasada nan Nisan 16, 33 C.E. Mwuri, erein e pahn wia ketiket nan mwoale nanleng, iasadahn ‘wahn mwuhr akan’ pahn wiawi​—sapwellime tohnpadahk keidi kan.​—1 Korint 15:20-23, New World Translation; 2 Korint 1:21; 1 Sohn 2:20, 27.

18. Iaduwen Piter kasansalehda me pwuhken Melkahka kan kin kohpadahr duwen kaiasadahn Sises?

¹⁸ Melkahka kan pil kin utungada koapworopwor en iasada. Ni rahnen Pendekos 33 C.E., wahnpoaron Piter mahsanih: “Pwe iet me Depit patohwan duwen Sises Krais, ‘I kilangehr Kauno eh ketiket mwohi ahnsou koaros, e kin ketiket limwahi, ihme kahrehda I sohte pahn diar apwal. Eri, I kin direkihla peren oh nsenamwahu. Oh ngehi, mehnda ma I pahn mehla, ahpw I pahn meleilei pwehki ei koapworopwor; pwe komwi sohte pahn ketin keseiehla nan wasahn me melahr akan; komwi sohte pahn likidmeliehla sapwellimomwi ladu poadidi pwe paliwere en mwerpeseng nan sousou.’” Piter kapataiong met: “[Depit] eh kilangehr dahme Koht pahn ketin wia, e ahpw patohwan duwen iasadahn Mesaia, ni eh patohwan: ‘E sohte lekdekla nan wasahn me melahr akan, paliwere sohte mwerpeseng nan sousou. Ahpw Koht ketin kaiasadahr Sises menet sang mehla.”​—Wiewia 2:25-32.

19, 20. Iahd me Piter doadoahngki Melkahka 118:22, oh iaduwen met kin pidada pwoulahn oh kaiasadahn Sises?

¹⁹ Rahn kei mwuri, Piter kesihnenda mwohn Sanhedrin oh pwurehng doadoahngki Melkahka kan. Ni ahnsou me re idek rehn Piter, iaduwen e kamwahuwiahla ohl mwoator men, e sapengki met: “Eri, kumwail koaros en ese me ohl menet me kesikesihnen mwohmwail met mwahulahr mehlel sang ni manaman en mwaren Sises Krais mehn Nasaret, iei ih me kumwail [kemehla], oh Koht ketin kaiasadahr sang mehla. Iei ih Sises menet me Pwuhk Sarawi mahsaniheki, ‘Takai me kumwail sounkou ihmw kan kesepwekelahr uhd wiahla takain pwukakeimw.’ Sangete reh me komourpen aramas kak dierekdahsang, pwe ihte mwar wet me Koht ketikihong aramas akan, pwe en wia Sounkomourpatail nin sampah.”​—Wiewia 4:10-12.

²⁰ Piter doadoahngki Melkahka 118:22, oh kawehwehda me dahme iren Paipel wet koasoia kin pid duwen pwoulahn oh kaiasadahn Sises. Arail kaun en pelien lamalam kan kin kangoange mehn Suhs akan en soikala Sises. (Sohn 19:14-18; Wiewia 3:14, 15) Takai me ‘sounkou ihmw kan’ kesepwekelahr me imwikihla pwoulahn Sises, ahpw e ‘uhd wiahla takain pwukakeimw’ kin wehwehki me e pahn iasadahng mour lingan nanleng nin duwen ngehn ehu. Nin duwen me sounmelkahka kohpadahr, ‘Siohwa me ketin wiahda met.’ (Melkahka 118:23) “Takai” me pahn wiahla takain pwukakeimw kin wehwehki me e pahn kasapwilada nin duwen Nanmwarki men.​—Episos 1:19, 20.

Kehlailkihda Koapworopwor en Iasada

21, 22. Koapworopwor dahieu me Sohp kasalehda, nin duwen me ntingihdi nan Sohp 14:13-15, oh iaduwen met pahn kak kamweitala irail me kin mwahieiki kompoakparail mehla akan?

²¹ Mendahki kitail saikinte kilang emen iasada sang mehla, kitail wadekehr ekei iren Paipel kan me kin kamehlelehong kitail duwen kaiasada. Kitail kak medemedewe duwen koapworopwor me ohl lelepek Sohp koasoia duwe. Ni ahnsou me e lelohng kalokolok, e peki rehn Koht: “I ahpw men komwi [Siohwa] en ketin nekidiehla nan sapwen me melahr akan, . . . komwi ahpw ketin kilelehdi ahnsou me komwi pahn ketin taman ie. Ma aramas emen pahn mehla, e kak pwurehng mourda? . . . Eri, ahnsowo, komw pahn ketin malipe ie, I ahpw pahn patohwan sapeng, komw ahpw pahn kupwurperenkiniehda, wiepen nin limomwiet.” (Sohp 14:13-15) Koht ‘ahpw pahn kupwurperenkihda’ kaiasada Sohp. Ia uwen laud koapworopwor wet ong kitail!

²² Emen tohn peneinei me kin lemmwiki Koht ele mwein pahn kak soumwahuda laud, duwehte Sohp, oh pil mwein pahn mehla. Irail me kin poakepoake ih pahn sengiseng duwehte Sises ahpw ketin tentenihr ni ahnsou me Lasarus mehla. (Sohn 11:35) Ahpw, ia uwen kansenamwahu en esehla me Koht pahn malipe irail, oh irail akan me Koht kin kupwurki pahn sapeng! E pahn rasehng re pwurodo sang seiloak ehu​—ahpw re pahn pwurodo oh re pahn kehlail sohla soumwahu.

23. Iaduwen ekei kin pein koasoia duwen ahr koapworopwor en iasada?

²³ Mehlahn Kristian lelepek mah emen kin kamwekid ienge pwoson akan en ntingihdi met: “Komw kupwurehla oh alehda aht iang poakehla mehlel mehlahn omwi nohno. Ni ahnsou keren, kitail pahn kasamwodo ih​—ni eh pahn silang mwahu oh roson!” Pahpa oh nohno men me neira pwutak mehla koasoia met: “Se kin kasikasik rahno me Jason pahn pwourda! E pahn kilangseli oh kilangada Paradais me e kin kasikasik. . . . Met kin kamwekid irail akan me kin poakohng ih en nantihong mih wasao.” Ei, ia uwen laud atail kalahnganki koapworopwor en kaiasada me e uhdahn pahn pweida!

Ia Omw Pasepeng?

• Iaduwen pwoson sapwellimen Koht koasoandi en iasada pahn kak sewese kitail?

• Mehnia wiewia kan me ntingihdi nan Pwuhk Sarawi pahn kak kihong kitail kahrepe mwahu en koapworopworki me kaiasada pahn uhdahn wiawi?

• Dahme kahrehda kitail kak nda me koapworopwor en iasada tepida sangete mahs?

• Me kin pid me mehlahr akan, mehnia koapworopwor kitail kak medemedewe pwehn kakehle kitail?

[Kilel nan Pali 8]

Ki sapwellimen Siohwa manaman, Elaisa kaiasada nein liohdi men nah pwutak pwulopwul

[Kilel nan Pali 10]

Ni ahnsou Sises kaiasada nein Sairus serepein, eh pahpa oh nohno pwuriamweikihla mehlel

[Kilel nan Pali 13]

Ni rahn en Pendekos 33 C.E., wahnpoaron Piter ni eimah kadehdehda me Sises iasada sang mehla