Koapworopwor en Iasada Kin Kamwekid Aramas

“I keselahr soahng koaros pwehki ih . . . I en ese Krais oh pehm manaman en sapwellime iasada.”​—PILIPAI 3:8-10.

1, 2. (a) Sounpar kan samwalahr, iaduwen sounpadahk men en pelien lamalam kawehwehda duwen kaiasada? (b) Iaduwen kaiasada pahn wiawi?

NAN sounpar kan mwurin pahr 1890, pelien nuhs ripohtki duwen kapahrek kapwurimwei ehu me kohsang rehn sounpadahk men en pelien lamalam nan Brooklyn, New York, U.S.A. E kawehwehda me kaiasada pahn wehwehki me tih kan oh uduk en paliwar en aramas emen pahn kohpene oh pwurehng mourda, mendahki ma aramas menet mehkihla kisiniei de aksident, de mahn lawalo me kangala ih de paliware wiahla koiasi. Sounkapahreko koasoia me ehu rahn me reireiki awa 24 pahn kohdo me ahng en nan wehwe pahn toantoalla ki peh kan, neh kan, sendinpe kan, tih kan oh sahl akan, oh kilin aramas lik kei. Kisehn paliwar pwukat pahn rapahki kisehn paliwar teikan me kin wiahda ehu paliwar en aramas. Soul akan pahn kohdidohsang nanleng oh kohdahsang nan ehl pwehn mihla nan paliwar kan me iasada.

² Kaiasada ni mwomwen en pwurehng kohpene cell kan en uhdahn paliwar en aramas akan sohte wia madamadau loalokong ehu, oh pil aramas akan sohte kin ahneki soul ehu me sohte kak mehla. (Eklesiasdes 9:5, 10; Esekiel 18:4) Siohwa, Koht en kaiasada, sohte anahne pwurehng kihpene cell kan me kohsang paliwar en aramaso. E kak wiahda paliwar kapw kan ong irail akan me pahn iang iasada. Ong sapwellime Ohl, Sises Krais, Siohwa me ketikihong ih manaman en kaiasada me mehlahr akan, oh irail mwein pil pahn kak mour kohkohlahte. (Sohn 5:26) Sises mahsanih: “Ngehi me mour sapahl oh Sounkomour. Mehmen me pwoson ie, mehnda ma e pahn mehla, ahpw e pahn mour.” (Sohn 11:25, 26) Inou kansenamwahu mehlel ieu! E kin kakehlahka kitail en dadaurete pahn kasongosong kan oh pil kak lelohng mehla nin duwen Sounkadehdehn Siohwa lelepek men.

3. Dahme kahrehda Pohl anahne utungada laud koapworopwor en iasada?

³ Padahk en kaiasada sohte kin pahrekiong padahk me aramas kin ahneki soul me sohte kak mehla​—emen sounpadahk en loalokong en mehn Krihk akan, Plato kin kamehlele met. Eri, dahme wiawi ni ahnsou me wahnpoaron Pohl kadehde ong irail me lapalap akan en mehn Krihk ni Areopagus nan Athens, me Koht ketin kaiasada Sises? Paipel mahsanih duwen met, “ni ahnsou me irail rong en Pohl eh koasoakoasoia duwen iasada sang mehla, ekei irail ahpw kouruhrki.” (Wiewia 17:29-34) Irail aramas tohto me kilang en Sises Krais iasadahr sang mehla, memourete, oh mendahki kapailok kan, re kin kadehde me e iasada sang mehla. Ahpw, sounpadahk likamw akan nan mwomwohdiso en Korint kin kahmahmki kaiasada. Ih kahrepe Pohl utungada laud padahk wet en Kristian nan pwuhken 1 Korint irelaud 15. Menlau kasawih mwahu en Pohl koasoi kan pahn kasansalehda ni soh pekidpe duwen mehlelpen oh manaman en koapworopwor en iasada.

Mehn Kadehde Kehlail kan en Kaiasadahn Sises

4. Ihs irail akan me wia sounkadehde kan en kaiasadahn Sises me Pohl koasoia duwen?

⁴ Tehk duwen tepin koasoi kan me Pohl doadoahngki pwehn utungada padahk en kaiasada. (1 Korint 15:1-11) Mehn Korint kan pahn koledi teng rongamwahu en komour ma irail me iangala pwosono ki kahrepe mwahu. Krais pwoula pwehki dipatail kan, seridiehr, oh iasada. Mwurin Sises iasada, e pwarada mwohn Cephas (Piter), “ahpw mwuhr ong tohnpadahk ehk riemeno.” (Sohn 20:19-23) Aramas 500 me kilang ih, mwein ni ahnsou e wia kehkehlik wet: ‘Kumwail eri kohwei oh katohnpadahk.’ (Madiu 28:19, 20) Seims oh wahnpoaron lelepek koaros me kilang ih. (Wiewia 1:6-11) Karanih Damaskus, Sises pwarohng Sohl nin duwen “seri men me ipwidi ni kaidehn uhdahn ahnsoun eh ipwidi”​—mwomwen Sohl me iasadahng mour nin duwen ngehn. (Wiewia 9:1-9) Mehn Korint kan iangala pwoson pwehki Pohl kalohk ong irail, oh re tepida kamehlele Rongamwahu.

5. Ia mouren padahk en Pohl ni e kin sewese aramas en wehwehki duwen kaiasada me ntingihdi nan 1 Korint 15:12-19?

⁵ Tehk iaduwen Pohl kin song en sewese aramas teikan en kamehlele me kaiasada uhdahn pahn wiawi. (1 Korint 15:12-19) Pwehki mie sounkadehde kan me kin kalohki me Krais iasadahr, iaduwen aramas akan kak nda me sohte kaiasada? Ma Sises sohte iasada sang mehla, atail doadoahk en kalohk oh atail pwoson kin wia mehkot sohte katepe, oh kitail wiahla aramas likamw akan me kin uhwongada Koht sang ni atail kin nda me Ih me ketin kaiasada Krais. Ma irail mehlahr akan sohte pahn iasada, ‘kitail mihmihte nan dipatail kan,’ oh irail akan me melahr oh pwoson Krais, re lekdeklahr. Oh pil, “ma atail koapworopworki Krais e dokedokehte atail mouren sampah wet, eri, kitail paisuwed sang aramas koaros nin sampah.”

6. (a) Dahme Pohl koasoia en utungada iasadahn Krais? (b) Dahkot “imwintihti me pahn lohdi keieu mwuhr” oh iaduwen e pahn sohrala?

⁶ Pohl kin utungada padahk me Sises iasadasangehr mehla. (1 Korint 15:20-28) Nin duwen me Krais “wialahr tepin kilel en irail kan me melahr,” meteikan pil pahn iasada. Aramas koaros kin mehla pwehki sapeik en emen ohl: Adam, ahpw, aramas akan kak iasada pwehki dahme emen ohl (Sises) wia. Irail akan me kin miniminiong Krais pahn iasada ni erein e pahn ketier. Krais kin ketin “powehdi kaun akan koaros, me lapalap oh manaman akan” me kin uhwongada sapwellimen Koht kaunda oh e kin kaunda nin duwen Nanmwarki men lao lel ahnsou me Siohwa pahn ketin kalowehdi sapwellime imwintihti kan oh ketikihdiong pahn aluweluwe kan. “Imwintihti me pahn lohdi keieu mwuhr, iei mehla”​—mehla me kitail sohsohki sang Adam—​pahn solahr wiawi pwehki meirong tomw en Sises. Oh mwuhr Krais pahn kapwurehla Wehio rehn Koht oh Seme, oh pein Krais pahn ketin uhpaiong “Koht me ketikihdiong mehkoaros pah. Eri, Koht ahpw pahn ketin kakaun mehkoaruhsie.”

Papidais ong Me Mehlahr Akan?

7. Ihs irail me kin “papidaisla pwehn wiahla aramas mehla kan,” oh ia wehwehn met ong irail?

⁷ Peidek wet kin kohwong irail akan me kin uhwong padahk en kaiasada: “Eri, dahme re pahn wia, irail akan me kin papidaisla pwehn wiahla aramas mehla akan?” (1 Korint 15:29, New World Translation) Peidek me Pohl wia sohte kin wehwehki me aramas momour akan pahn kin wiliandi me melahr akan oh papidaisla pwehki sapwellimen Sises tohnpadahk kan anahne pein sukuhliki padahk mehlel, kamehlele dahme re sukuhliki, oh papidaisla. (Madiu 28:19, 20; Wiewia 2:41) Kristian me keidi kan kin “papidais pwehn wiahla me mehlahr kan” sang ni ahr kin poadidi nan mour me pahn kahluwalahng mehla oh kaiasada. Soangen papidais kin tepida ni ahnsou me sapwellimen Koht ngehn sarawi kin kihong aramas akan koapworopwor en mour nanleng oh kin kaimwisekla ni ahnsou me re iasada sang mehla oh ale ngehn mour me sohte kak mehla nanleng.​—Rom 6:3-5; 8:16, 17; 1 Korint 6:14.

8. Dahme Kristian akan kak kamehlele mehnda ma Sehdan oh nah ladu kan pahn kemehla irail?

⁸ Mahsen kan en Pohl kin kawehwehda me koapworopwor en iasada kin sewese Kristian akan en eimah wia doadoahk en kalohki Wehio mendahki irail pahn ahnsou koaros lelohng keper kan oh mwein mehla. (1 Korint 15:30, 31) Re ese me Siohwa kak kaiasada irail ma e pahn mweidong Sehdan oh nah ladu kan en kemehla irail. Ihte Koht pahn kak kemehla ahr soul, de mour, nan Gehenna, me karasaiong mehla soutuk.​—Luk 12:5.

Kesempwal Kitail en Pepehd

9. Dahme kitail anahne liksang ma atail koapworopwor en iasada pahn kak kakehlailda kitail?

⁹ Koapworopwor en iasada kin kakehle Pohl. Ni ahnsou me e mihmi nan Episos, mwein ah imwintihti kan kesehla ih nan wasahn mwadong kan pwehn peiong mahn lawalo kan. (1 Korint 15:32) Ma met uhdahn wiawi, e pitasang mahn lawalo kan, duwehte Daniel me pitsang mahn laion kan. (Daniel 6:16-22; Ipru 11:32, 33) Pwehki Pohl kin koapworopworki me kaiasada uhdahn pahn wiawi, e sohte kin ahneki madamadau duwehte irail mehn Suda kan me kin lahlahwe padahk mehlel ni mwehin Aiseia. Irail kin nda: “Nna, kitail kamakamadipw oh sakasakau! Pwe lakapw kitail pahn mehla.” (Aiseia 22:13, Septuagint) Ma koapworopwor en iasada pahn pousehlahte en kakehlailda kitail duwehte me e kin wia ong Pohl, kitail en dehr werekiong aramas akan me kin ahneki soangen madamadau keper kan. Pohl kihda kaweid wet, “Kaleke kumwail pitida pahn meteikan! Werekiong aramas suwed kan e kin kauwehla tiahk mwahu.” (1 Korint 15:33) Ni mehlel, kaweid wet kin dokedoke soangsoangen irairen mour tohto.

10. Iaduwen atail koapworopwor en kaiasada en wia kakehlailte?

¹⁰ Pohl mahsanih ong irail akan me kin peikasalki padahk en kaiasada: “Kumwail pwurodohng nan amwail lamalam pwung kan oh katokihedi amwail wiewia sapwung kan. Pwe mie ekei rehmwail me sehse Koht; I ndawohng kumwail mepwukat pwe kumwail en namenengkihda.” (1 Korint 15:34) Nan “imwin ahnsou,” kitail anahne en kapwaiada loalokong pwung en Koht oh Krais. (Daniel 12:4; Sohn 17:3) Met pahn sewese atail koapworopwor en iasada en sohte luwetala.

Soangen Paliwar Dah me Pahn Iasada?

11. Iaduwen Pohl kawehwehda duwen kaiasadahn Kristian me keidi kan?

¹¹ Pohl uhd sapengla peidek pwukat. (1 Korint 15:35-41) Ele emen pahn song en peikasalki koapworopwor en iasada, e pahn kak nda: “A ia duwen me melahr akan ar pahn iasada? Soangen paliwar dah me re pahn ahneki?” Nin duwen me Pohl kawehwehda, werentuhke me emen pahn padokedi nan pwehl sohte pahn wosada ma e sohte pahn mehla. Duhduwehte, aramas me keidi men pahn pil anahne mehla. Nin duwen kisin tuhke ehu kin wosada sang werentuhke ehu oh wiahla tuhke kapw ehu, paliwar en Kristian keidi me iasadahr kin weksang paliwar uduk. Mendahki eh mour kin duwehte mour mwohn eh mehla, e iaskihda paliwar ngehn me pahn kak momour nanleng. Ahpw, irail akan me pahn iang iasada nin sampah, irail pahn iaskihda paliwar uduk.

12. Ia wehwehn “mwomwen war ekei mehn nanleng” oh “mwomwen war ekei mehn sampah”?

¹² Nin duwen Pohl mahsanih, uduk en aramas kin weksang uduk en mahn akan. Pil mie soangsoangen uduk en mahn tohto. (Senesis 1:20-25) “Mwomwen war ekei mehn nanleng” en ngehn akan kin weksang lingan en “mwomwen war ekei mehn sampah” en uduk. Pil lingan en ketipin, maram, oh usu kan kin wekpeseng. Ahpw irail me keidi kan me iasadahr pahn ale lingan laudsang mehpwukat.

13. Nin duwen 1 Korint 15:42-44, dahme kin kamwermwerdi oh dahme kin iasada?

¹³ Mwurin Pohl koasoia duwen wekpeseng en paliwar akan e kapataiong met: “Ih duwen me pahn pil wiawi ni ahnsou me me melahr akan pahn iasada.” (1 Korint 15:42-44) E mahsanih: “Ni paliwararail kan ar pahn seridi, re melahr oh pahn mwerpeseng; a ni eh pahn iasada, e solahr kak mehla de mwerpeseng.” Wasaht, mwein Pohl kin koasoia duwen aramas me keidi kan nin duwen pwihn ehu. Mendahki sampah wet sohte kin wauneki irail, irail kin iasadahng mour nanleng oh sansalada oh iang ahneki sapwellime Krais lingan. (Wiewia 5:41; Kolose 3:4) Ni ahnsoun mehla, e kin wiahla “paliwar ehu me kisehn pwehl” a ni eh kin iasada, “e pahn wiahla paliwar ehu me kisehn ngehn.” Pwehki met kin wiaiong irail Kristian me keidi kan, kitail kak likih me aramas teikan pahn iasadahng nin sampah.

14. Iaduwen Pohl kawehwehda wekpeseng en Krais oh Adam?

¹⁴ Mwurin met, Pohl kawehwehda duwen wekpeseng en nanpwungen Krais oh Adam. (1 Korint 15:45-49) Adam, tepin aramas, “wiawihda oh wiahla aramas mour men.” (Senesis 2:7) “A Adam en keieun dihen mwuhro”​—Sises—​“wiahla ngenen komour.” E toukihda moure nin duwen meirong tomw ehu, keieu ong sapwellime tohnpadahk me keidi kan. (Mark 10:45) Nin duwen aramas akan, re kin ‘weuwa mwomwen aramaso me wiawihda sang pwehl,’ ahpw ni ahnsou me re pahn kaiasada, irail pahn duwehte Adam en keieun dihen mwuhro. Ni mehlel, meirong en Sises pahn kapaiada aramas peik akan koaros, iangahki irail akan me pahn iasada nin sampah.​—1 Sohn 2:1, 2.

15. Dahme kahrehda Kristian me keidi kan sohte kin iasada ni paliwar uduk, oh iaduwen re pahn iasada ni ahnsou me Sises ketiket nan mwoale nanleng?

¹⁵ Ni ahnsou me Kristian me keidi kan kin mehla, re sohte kin iasada ni paliwar uduk. (1 Korint 15:50-53) Paliwar me wiawihda uduk oh nta kin mwerpeseng oh sohte kak sohsohki Wehin Koht nanleng. Ekei irail me keidi kan sohte anahne mihmi nan sousou ahnsou werei. Ni ahnsou re pahn ni lelepek kapwaiada ahr pwukoa nin sampah oh mehla ni erein ahnsoun ketier en Sises, re pahn “kiewekla ni ahnsoutehkis, ni marepteieu.” Irail pahn ni ahnsoutehkis, iasadahng mour en ngehn me solahr kak mehla. Sapwellimen Krais “lih kamwohd” nanleng pahn tohtohki meh 144,000.​—Kaudiahl 14:1; 19:7-9; 21:9; 1 Deselonika 4:15-17.

Powehdi Mehla!

16. Nin duwen me Pohl oh soukohp kan en mahs mahsanih, dahme pahn wiaiong mehla me kin kohsang rehn Adam me dipan?

¹⁶ Pohl koasoia ni ngihlen kana, me mehla kamwomwmwomwlahr kohkohlahte. (1 Korint 15:54-57) Ni ahnsou me pahn me kin mwerpeseng uhd pahn kieweklahng ni soahng me sohte kin mwerpeseng, iei ahnsou me mahsen pwukat pahn pweida: “Kauno, Wasa Lapalapie pahn ketin kamwomwala mehla kohkohlahte.” “Kowe, mehla, a ia omw manaman en powehdi? Ia omw tehtehn meninkau?” (Aiseia 25:8; Oseia 13:14) Tehtehn meninkau me kin kahrehong mehla iei dihp, oh tehtehn dihp kin sang ni Kosonnedo, me kadeikada aramas dipan akan en mehla. Ahpw, pwehki meirong en Sises oh eh kaiasada, mehla me kin kohsang rehn dipan Adam, pahn solahr powehdi aramas akan.​—Rom 5:12; 6:23.

17. Iaduwen mahsen kan en 1 Korint 15:58 kadoadoahkong nan rahnpwukat?

¹⁷ Pohl mahsanih, “Eri, riei kompoakepahi ko, kumwail kehlail oh dadaur oh loalenohng amwail doadoahk ong Kauno ahnsou koaros, pwe kumwail ese me papah Kauno kaidehk doadoahk mwahl ehu.” (1 Korint 15:58) Mahsen pwukat kin dokedoke irail luwen me keidi kan en nan rahnpwukat oh ong sapwellimen Sises “sihpw teikan” mendahki ma re pahn mehla nan imwin rahn akan. (Sohn 10:16) Arail doadoahk kan nin duwen sounkalohk kan en Wehio mie katepe laud, pwe irail pahn iang kaiasada. Nin duwen sapwellimen Siohwa ladu kan, kitail loalenohng doadoahk en Kauno oh awiawih ni ahnsowo me kitail kak ni peren ngisingiski: “Mehla, a ia omw manaman en powehdi?”

Koapworopwor en Kaiasada Pweidaher!

18. Ia uwen kehlail ahn Pohl koapworopwor en iasada?

¹⁸ Mahsen en Pohl me ntingihdi nan 1 Korint irelaud 15 kin kasansalehda me koapworopwor en kaiasada kin kamwekidada eh mour. E kin uhdahn kamehlele me Sises iasada sang mehla oh aramas teikan pahn iasada sang sousou kan. Ke kin uhdahn kamehlele me kaiasada pahn wiawi? Pohl kin kilangwong soahng kan koaros me e kin pein roporopki nin duwen “mehn lekdekla kei” oh ‘keselahr soahng koaros’ pwe e kak ese ‘Krais oh pehm manaman en sapwellime iasada.’ Wahnpoarono pil men duwehla Krais nan sapwellime pwoula oh koapworopworki me e pahn “iasada sang mehla en mahs.” Met pil kin kahdaneki “ias keieu,” oh irail sapwellimen Sises me keidi 144,000 kin ekspiriens kaiasada wet. Ei, re kin iasadahng ngehn mour nanleng, oh “me melahr teikan” pahn iasada nin sampah.​—Pilipai 3:8-11; Kaudiahl 7:4; 20:5, 6.

19, 20. (a) Mehnia aramas sang nan rekohd en Paipel me pahn iang iasada nin sampah? (b) Ihs ke kin kasikasik en kilang iasada sang mehla?

¹⁹ Ong irail me keidi kan me kin lelepek lel mehla, koapworopwor en iasada kin pweida mehlel. (Rom 8:18; 1 Deselonika 4:15-18; Kaudiahl 2:10) Irail akan me pitsang “kahn kamakam kohwalap” pahn kilang koapworopwor en iasada pweida nin sampah nin duwen ‘madau eri kapehda me melahr akan. Mehla oh wasahn melahr akan pil kapehda me melahr akan me ira kolokol.’ (Kaudiahl 7:9, 13, 14; 20:13) Sohp me pahn pil iang irail akan me pahn iang iasada nin sampah, me nsensuwedkihla laud nah pwutak isimen oh serepein silimen me mehla​—oh ia uwen laud arail peren ni ahnsou me re pahn kilang riarail pwutak isimen oh riarail serepein kaselel silimen!​—Sohp 1:1, 2, 18, 19; 42:12-15.

²⁰ Kapai laud ehu en kilang Eipraam oh Sera, Aisek oh Rebeka​—oh pil aramas teikan iangahki “soukohp akan koaros”—​iasada sang mehla nin sampah wet! (Luk 13:28) Emen soukohp rehrail iei Daniel, me aleier inou ehu me e pahn iang iasada pahnangin kaunda en Mesaia. Erein sounpar 2,500, Daniel wia komkommoal nan sousou, ahpw sang ni manaman en kaiasada, e pahn kerenihong ‘pwurehng iasada’ nin duwen emen “soupeidi kan nin sampah pwon.” (Daniel 12:13; Melkahka 45:16) Ia uwen kaperen en kasamwo kaidehn ihte irail me lelepek kan en mahs mahsie, ahpw pil omw pahpa oh nohno, noumw pwutak de serepein, de kompoakepahmw teikan me mehlahr!

21. Dahme kahrehda kitail en dehr pwand en wia mehkan me mwahu ong aramas teikan?

²¹ Ekei kompoakpatail kan kin papah Koht erein sounpar tohto, oh irail likelapalahr. Arail mahla kin kahrehong irail en apwaliki powehdi kahpwal kan en mour. E pahn wia elen limpoak ehu en sewese irail ni ahnsouwet, ni uwen me kitail kak! Eri, mwuhr kitail sohte pahn koluhla pwandala pwe kitail sohte kapwaiada atail pwukoa en sewese irail ma irail pahn mehla ehu rahn. (Eklesiasdes 9:11; 12:1-7; 1 Timoty 5:3, 8) Kitail kak likih me Siohwa sohte pahn likidmeliehla wiewia mwahu kan me kitail kin wiaiong mehteikan, sohte lipilipil sounpar depe de irair akan me re kin lelohng. Pohl ntingihdi, “Eri, nindokon eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.”​—Kalesia 6:10; Ipru 6:10.

22. Lao lel pweidahn koapworopwor en iasada, dahme kitail en nantihong wia?

²² Siohwa iei “Samatail me kalahngan oh Koht me pwarer en kansenamwahu koaros.” (2 Korint 1:3, 4) Sapwellime Mahsen kin sewese kitail en kamweitala mehteikan ki koapworopwor en iasada. Lao lel kitail pahn uhdahn kilangada pweidahn koapworopwor en iasada nin sampah, kitail en duwehte Pohl, me kin pwoson kaiasada. Kitail en keieu kahlemengih Sises, me e kin koapworopworki sapwellimen Koht manaman en kaiasada ih pweidaher. Irail akan nan sousou kan pahn rong kapitien Krais oh pedoi. Met pahn wahdohng kitail popohl oh nsenamwahu. Ahpw me keieu, kitail en kasalehda atail kalahngan ong Siohwa, me mweidong kitail en kak powehdi mehla ki atail Kaun Sises Krais!

Iaduwen Ke Pahn Sapeng?

• Mehnia sounkadehde kan en kaiasadahn Sises me Pohl koasoia duwen?

• Dahkot “imwintihti me keieu mwuhr,” oh iaduwen e pahn sohrala?

• Ong irail Kristian me keidi kan, dahme kamweremwerdi oh dahme iasada?

• Mehnia aramas akan me ntingihdi nan Paipel me ke men tuhwong ni ahnsou me re pahn iasadahng mour nin sampah?

[Kilel nan Pali 14]

Wahnpoaron Pohl wia kadehde kehlail me kaiasada uhdahn pahn wiawi

[Kilel nan Pali 18]

Kaiasadahn Sohp, eh peneinei, oh aramas tohto pahn wahdohng aramas peren laud me sohte pahn imwi!