“Mehla Pahn Lohdi”

“Oh imwintihti me pahn lohdi keieu mwuhr, iei mehla.”​—1 KORINT 15:26.

1, 2. (a) Koapworopwor dahieu me wahnpoaron Pohl kihda ong me melahr akan? (b) Peidek dahieu duwen kaiasadao me Pohl koasoia?

“IKAMEHLELE . . . kaiasadahn paliwar, oh mour soutuk.” Ihme Apostles’ Creed kin koasoia. Kadolik kan oh Prohs kan kin peikiong iang koasoia met, oh re sehse me dahme re kamehlele kin duwehte padahk en Krihk laudsang dahme wahnpoaron kan kin kamehlele. Ahpw, wahnpoaron Pohl, kin soikala padahk en Krihk oh sohte kin kamehlele me soul sohte kak mehla. E kamehlele ehu mour nan ahnsou kohkohdo oh ntingihdi pahn manaman en ngehn sarawi: “Oh imwintihti me pahn keieu lohdi mwuhr, iei mehla.” (1 Korint 15:26) Ia wehwehn met ong tohnsampah me mehmehla?

² Pwehn sapengla met, kitail en pwurelahng en Pohl padahk en kaiasada me kileledi nan 1 Korint irelaud 15. Ke pahn tamanda me nan tepin iretikitik kan, Pohl kasaledahr me kaiasadao kin wia kisehn padahk en Kristian kesempwal ehu. Met e kapwarehda ehu peidek: “Ele emen pahn nda, ‘A iaduwen me melahr akan ar pahn iasada? Soahngen paliwar dah me re pahn ahneki?’”​—⁠1 Korint 15:35.

Soahngen Paliwar Dah?

3. Dahme karehda ekei kin soikala kaiasadao?

³ Ni ah kapwarehda peidek wet, Pohl men pelianki manaman en padahk en Plato. Plato kin padahngki me aramas ahneki soul ehu me sohte kak mehla me kin momourte mwurin paliwar mehla. Ong irail ko me tengkihda soahngen padahk wet, padahk en Kristian duwen kaiasada ni mehlel sohla pahn katepe. Ma soulo kin momourte mwurin melahn paliwaro, ia katapan kaiasadao? Pil ehu, kaiasadao mwomwen sohte kak wiawi. Ni ahnsou me paliwaro wiepwella, iaduwen e kak kaiasada? Emen commentator en Paipel Heinrich Meyer koasoia me uhwong kan me ekei mehn Korint kan kin ahneki ele kin poahsoanda pohn “padahk en aramas me kapwurpwurpene paliwar sohte kak wiawi.”

4, 5. (a) Dahme karehda uhwong kan en me soh pwoson kan me sapwung? (b) Kawehwehda en Pohl karasaras en “kisin wartehkis.” (c) Soahngen mwomwen paliwar dahkei me Koht ketikihong irail me keidi kan me iasada?

⁴ Pohl kasalehda duwen soh audepen arail lamalam: “Pweipwei men kowehn! Ke sehse me kisin werentuhke me ke padokedi nan pwehl sohte pahn wosada ma e sohte pahn mehla? Me ke padokedi nan pwehl kaidehkin paliwar en tuhkeo, pwe kisin wartehkis, ele kisin weren pilawa, de kisin weren ehu soangen tuhke tohrohr. A Koht me kin ketikihong kisin waro mwomwen paliwar ehu me pahn wosada nin duwen me e kupwurki; e kin ketikihong mwomwen paliwar ong ni ehuehu kisin war akan duwen me pahn konehng.” (1 Korint 15:​36-38) Koht sohte pahn kaiasada paliwar uduk kan me aramas kan ahneki nin doken ar momour nan sampah. Ahpw, pahn mie wekidekla ehu me pahn wiawi.

⁵ Pohl kapahrekiong kaiasada duwehte wosadahn kisin weren tuhke ehu. Mwomwen kisin weren wihd ehu sohte kin duwehte tuhkeo me e pahn wiahla. The World Book Encyclopedia koasoia: “Ni ahnsou me wahro tepiada wosada, e kin nimada pihl laud. Pihlo kin karehda wekideklahn kemikel kan nan wahro. E kin pil karehda sahl akan nan wahro en mpwosda oh pwalangpeseng kilin wahro.” Imwilahn met, wahro kin mehla nin duwen wahr ehu oh uhd wiahla tuhke ehu me wia wosowosda. “Koht ketikihong paliwar ehu” me wehwehki e koasoanediehr kosonned kan me pid pelien sains me kaweidih ah kekeirada, oh ehuehu wahr kin alehda paliwar ehu nin duwen ah soahng. (Senesis 1:11) Me rasehng met, Kristian keidi kan pahn mahs mehla nin duwen aramas. Eri, ni ahnsouwo me Koht ketin kilelediong, e pahn ketin kapwureiraildohng mour nan paliwar kapw kan. Nin duwen me Pohl padahkihong mehn Pilipai kan, “Sises Krais . . . pahn ketin kawilianda paliwaratail luwet akan me kak mehla ong ni paliwar me rasehng kahlepe lingan.” (Pilipai 3:​20, 21; 2 Korint 5:​1, 2) Re iaskihda paliwar ngehnin kan oh mour nan wasahn ngehn kan.​—⁠1 Sohn 3:⁠2.

6. Dahme karehda e pwung en kamehlele me Koht kak ketikihong me iasada kan paliwar ngehnin kan me konehng?

⁶ Met me nohn apwal en kamehlele? Soh. Pohl kasalehda me mahn akan kin ahneki soangsoangen paliwar kan. Kapatohngete met, e kin kasalehda duwen wekpeseng en tohnleng kan nanleng oh aramas kan me uduk oh nta, oh mahsanih: “Pil mie mwomwen war ekei mehn nanleng oh mwomwen war ekei mehn sampah.” Pil mie wekpeseng en kapikipik kan me sohte ahr mour. Pohl mahsanih: “Lingan en usu kan wekpeseng,” oh e koasoia met mwohn pelien sains diarada soahngen mwutumwut en usu kan nanleng me adaneki, ni lokaiahn wai, “blue stars,” “red giants,” oh “white dwarfs.” Pwehki met, e soh pwung me Koht kak ketikihong me keidi kan me iasada paliwar ngehnin kan?​—⁠1 Korint 15:​39-41.

7. Ia wehwehn sohte kak mwerpeseng? mour me solahr kak mehla?

⁷ Pohl eri mahsanih: “Eri, ih duwen me pahn pil wiawi ni ahnsou me me melahr akan pahn iasada. Ni paliwararail kan ar pahn seridi, re melahr oh pahn mwerpeseng; a ni eh pahn iasada, e solahr kak mehla de mwerpeseng.” (1 Korint 15:42) Paliweren aramas, mendahki ma e unsek, kak mwerpeseng. E kak kamakamala. Karasepe ehu, Pohl mahsanih me Sises me iasadahro “me e sohte pahn pwurehng mwerpeseng.” (Wiewia 13:34) E sohte kak pwuredohng mour nan paliweren aramas ehu me kak mwerpeseng, mendahki ma paliwaro unsek. Paliwar kan me Koht ketikihong me keidi kan me iasada sohte kak mwerpeseng​—⁠sohte kak mehla de ohla. Pohl pousehla mahsanih: “Ni eh pahn nanpweldi, e mwomw suwed oh luwet; a ni eh pahn iasada, e pahn lingaling oh diren roson. Ni eh kin nanpweldi, e kin paliwar ehu me kisehn pwehl, a ni eh kin iasada, e pahn wiahla paliwar ehu me kisehn ngehn.” (1 Korint 15:​43, 44) Pohl pousehla mahsanih: “Me pahn mehla uhdahn pahn kieweklahng ni soahng me solahr kak mehla.” Solahr kak mehla kin wehwehki mour soh imwi me sohte kak ohla. (1 Korint 15:53; Ipru 7:16) Ni ahl wet, irail me iasada kan kin weuwa “mwomwen Aramas en nanlengo,” Sises, me karehong arail iasada en kak wiawi.​—⁠1 Korint 15:​45-49.

8. (a) Iaduwen atail ese me irail kan me iasada iei aramas kohte me re wia ahnsou me re momour pohn sampah? (b) Kokohp dah kei pweida ni ahnsou me kaiasada wiawi?

⁸ Mendahki wekidekla wet, irail kan me kaiasada kin wia aramas kohte mwohn re mehla. Re pahn iaskihda mehn kataman kohte oh irair en Kristian kohte. (Malakai 3:3; Kaudiahl 21:​10, 18) Ni ahl wet, re rasehng Sises Krais. E wekisang ni pali ngehn ong ni mwomwen aramas. Eri e mehla oh iasada nin duwen ngehn ehu. Mendahki met, “Sises Krais ketin duweduwehte, ahio, rahnwet, oh pil kohkohlahte.” (Ipru 13:⁠8) Ia uwen kapai kaselel ehu me keidi kan ahneki! Pohl mahsanih: “Eri, mepwukat lao pahn pweida, oh me pahn mwerpeseng pahn kieweklahng ni me sohte pahn mwerpeseng, mahsen en Pwuhk Sarawi ahpw pahn pil pweida: ‘Mehla kamwomwmwomwlahr, oh mour powehdier unsek!’ ‘Kowe, Mehla, a ia omw manaman en powehdi? Ia omw tehtehn meninkau?’”​—⁠1 Korint 15:​54, 55; Aiseia 25:8; Oseia 13:14.

Kaiasada Nan Sampah?

9, 10. (a) Nan 1 Korint 15:​24, dahkot “imwio,” oh wiewia dah kei pweida me pid met? (b) Dahme anahne wiawi pwe mehla en sohla pwurehng wiawi?

⁹ Mie koapworopwor en irail me rar kan me sohte ahneki koapworopwor en mour nanleng nin duwen ngehn kei me solahr kak mehla? Ehi, uhdahn mie! Mwurin ah kawehwehda me kaiasadahng nanleng pahn wiawi erein ketier en Krais, Pohl kasalehda dahme pahn wiawi kaikairekdo oh mahsanih: “Mwurin met, imwin sampah ahpw pahn wiawi; Krais pahn ketin powehdi kaun akan koaros, me lapalap oh manaman akan, oh ketikihong Koht Sahm sapwellime Wehi.”​—⁠1 Korint 15:​23, 24.

¹⁰ “Imwio” iei imwin Kaundahn Krais Erein Pahr Kid, ni ahnsou me Sises pahn ni karakarahk oh loaloapwoat kapwurelahng ah Koht oh Seme Wehio. (Kaudiahl 20:⁠4) Kupwuren Koht en “ketikipene soahng koaruhsie nanleng oh sampah pahn tahpwteieu, iei pahn Krais” pahn pweida. (Episos 1:​9, 10) Ahpw, keieu, Krais pahn kauwehla “kaun akan koaros, me lapalap oh manaman akan” me kin uhwong kupwuren Koht Lapalahpie. Met kin pidada laud sang ohla me pahn wiawi ni Armakedon. (Kaudiahl 16:16; 19:​11-21) Pohl mahsanih: “Pwe Krais pahn ketin kakaun, Koht lao pahn ketin kalowehdi sapwellime imwintihti kan oh ketikihdiong pahn aluweluwe kan. Oh imwintihti me pahn lohdi keieu mwuhr, iei mehla.” (1 Korint 15:​25, 26) Ehi, lipwen dipen Adam koaros oh mehla pahn kohsang. Eri, ihme konehng Koht pahn kihsang audepen “sousou kan” ni ah pahn kapwurehdohng mour irail me melahr kan.​—⁠Sohn 5:28.

11. (a) Iaduwen atail ese me Koht kak pwurehng kapikada soul akan me mehla? (b) Ki soahngen paliwar dah kei me irail ko me iasada pohn sampah pahn ahneki?

¹¹ Met kin wehwehki me soul kan pahn pwurehng kapikipikda. Met sohte kak wiawi? E kak wiawi, pwe Melkahka 104:​29, 30 kihong kitail koapworopwor me Koht kak ketin wia met: “Ni omwi kin ketin katokehdi angin silangomwi rehrail, re kin mehla, oh pwurehng wiepwella. A ni omwi kin ketikihong irail angin silangomwi, re kin mourda.” Nin doken irail kan me kaiasada pahn wiahte aramas ko me re wia mwohn re mehla, re sohte anahne paliwar kohte. Ong irail ko me pahn iasadahng nanleng, Koht pahn ketikihong irail paliwar ehu me e kupwurki. Ni mehlel paliwararail kapw kan sohte pahn soumwahu oh pahn duwehte tepin paliwaro me re ahneki mwohn ahr mehla pwe kompoakepahrail kan en kak kasawihada irail.

12. Iahd me kaiasadahn irail ko nan sampah pahn wiawi?

¹² Iahd me kaiasada nan sampah pahn wiawi? Marda koasoiahki rie ohl mehlao Lasarus: “I patohwan ese me e pahn pwurehng mourda ni rahnen neko.” (Sohn 11:24) Iaduwen e esehki duwen met? Kaiasadao kin wia oarelap ehu me kin karehda uhpene nan ah mweio, pwehki mehn Parisi kan kin kamehlele kaiasada ahpw mehn Sadusi kan sohte kin kamehlele. (Wiewia 23:⁠8) Mendahki met, Marda ele kin ese sounkadehdehn mahs akan mwohn Kristian akan me kin koapworopworki kaiasada. (Ipru 11:35) Oh pil ehu, e pil kak sukuhlkihsang nan Daniel 12:13 me kaiasada pahn wiawi ni imwin rahn. E kakete sukuhlkihsang rehn pein Sises duwen met. (Sohn 6:39) “Imwin rahn” pahn wiawi ahnsouwohte me Kaundahn Krais erein Pahr Kid pahn wiawi. (Kaudiahl 20:⁠6) Medewehla peren me pahn wiawi erein “rahno” ni ahnsou me wiewia kaselel wet pahn tepida!​—⁠Pil tehk Luk 24:41.

Ihs Me Pahn Iasada?

13. Kasansal dahieu en kaiasada kin kileledi nan Kaudial 20:​12-14?

¹³ Kaudiahl 20:​12-14 kin kileledi en Sohn kilangada irail kan me pahn iasadahng nan sampah: “I ahpw kilangada me melahr akan, me lapalap oh me tikitik kan, duwen ar uh mwohn mwoahlo. Pwuhk kan eri papahkpeseng, oh pil ehu pwuhk papahkpeseng, iei pwuhken me momour kan. Me melahr akan eri pakadeingkihda mehkan me ntinting nan pwuhk ko duwen ar wiewia kan. Madau eri kapehda me melahr akan. Mehla oh wasahn me melahr akan pil kapehda me melahr akan me ira kolokol. Irail koaros eri pakadeida duwen ar wiewia kan. Mwuri, mehla oh wasahn me melahr akan ahpw pisikendilahng nan lehn kisinieio. Eri lehn kisiniei wet, iei keriaun mehla.”

14. Ihs me pahn iang kaiasada?

¹⁴ Kaiasada wet pahn oarepene “me lapalap oh me tikitik kan,” aramas ileile kan oh irail kan me sohte ahneki pwais laud kan me mour mahso oh mehla. Seri pwelel kan pil pahn iasada! (Seremaia 31:​15, 16) Ehu ire kesempwal pil sansalda nan Wiewia 24:15: “Me mwahu oh me suwed, pahn iasada sang mehla.” Aramas lapalap kan nanpwungen “me pwung kan” iei ohl oh lih lelepek kan en mahso, me duwehte Eipel, Inok, Noha, Eipraam, Sera, oh Reahp. (Ipru 11:​1-40) Medewehla omw pahn kak koasoiong soahngen aramas pwukat oh alehsang rehrail oaritik kan en dahme wiawi mahso ni mwein Paipel me re pein kadehdehki masarail! “Me pwung kan” pil pahn oarepene irail me kid kan me kin lahn Koht me ahpwtehn mehla oh sohte ahneki koapworopwor en mour nanleng. Mie emen nan ahmw peneinei de emen kompoakepahmw me ele iang pwihn wet? Ia uwen e wia kamweit ehu en ese me ke kak pwurehng kilang irail! Ahpw, ihs irail “me sapwung kan” me pahn kapwurpwurdohng mour? Re kin oarepene aramas rar kan, ele lik kan, me mehla mwohn re kak ahneki ahnsou mwahu en sukuhlki oh kapwaiada padahk mehlel en Paipel.

15. Ia wehwehn me iasada kan pahn “pakadeing kihda mehkan me ntinting nan pwuhk ko duwen ar wiewia kan”?

¹⁵ Iaduwen irail pwukat me kaiasada pahn “pakadeingkihda mehkan me ntinting nan pwuhk ko duwen ar wiewia kan”? Doaropwe limilim pwukat kaidehn rekord en arail wiewia kan en mahs; ni ahnsou me re mehla, re saledeksangehr dihp kan me re wiahda erein ahnsou me re momour. (Rom 6:​7, 23) Ahpw, aramas kan me iasada pahn mihmihte pahn dipen Adam. Eri, doaropwe limilim pwukat kin audaudki kaweid sarawi kan me koaros anahne idawehn pwehn kak paiekihda douluhl meirong en Sises Krais. Nin doken lipwen dipen Adam koaros pahn koakoahksang, ‘mehla pahn lohdi’ ni unsek. Lau lel ni imwin pahr kido, Koht pahn “ketin kakaun mehkoaruhsie.” (1 Korint 15:28) Aramas sohla pahn anahne emen Samworo Lapalap de emen Sountomw. Tohnsampah koaros pahn kapwurpwurlahng irair unseko me Adam paiekihda nin tepio.

Ehu Kaiasada Me Soandi Mwahu

16. (a) Dahme karehda e pwung en kamehlele me kaiasada pahn wiawi ni ahl ehu me soandi mwahu? (b) Ihs me pahn iang irail kan me pahn tepin iasada sang mehla?

¹⁶ Pwehki kaiasadahng nanleng pahn wiawi ni ahl ehu me soandi mwahu, “emenemen ni kaikairekdo wet,” e sansal me iasadahn irail kan pohn sampah sohte pahn karehda sampah en pingkihda nohn tohtohlahn aramas powe. (1 Korint 15:23) E wehwe mwahu me, epwel pahn kohwong irail kan me ahpwtehn iasada. (Pil tehk Luk 8:55.) Re pahn anahne mwenge oh​—⁠me keieu kesempwal​—⁠sawas ni pali ngehn pwehn loalokongkihla Siohwa Koht oh Sises Krais pwe ren kak ale mour. (Sohn 17:⁠3) Ma koaros pahn wiahkinteieu kapwupwurdohng mour, e pahn apwal en kihong irail koaros epwel me itar. E pwung en medemedewe me ekei pahn iasada mwohn ekei. Kristian lelepek kan me mehla mwohnte imwin koasoandi en Sehdan ele pahn iang tepin irail kan me pahn iasada. Kitail pil kak kasik me ohl lelepek kan en mahs me pahn papah nin duwen “soupeidi kan” pahn iasada mwadang sang mehteikan.​—⁠Melkahka 45:16.

17. Ia ekei ire kan me pid kaiasada me Paipel sohte kin koasoia, oh dahme karehda Kristian kan endehr nohn kin kedirepwki soahngen ire pwukat?

¹⁷ Ahpw, kitail endehr wiahda atail lamalam me ih met me pahn wiawi. Paipel sohte kin kihda pasapeng ong ire tohto. E sohte kin oaritikihada iaduwen, iahd, de iawasa me aramas kan pahn kaiasada ie. E sohte padahkihong kitail iaduwen irail ko me pahn iasada pahn ale sawas en ihmw, mwenge, oh likou. Oh kitail pil sohte kak uhdahn nda iaduwen Siohwa pahn ketin apwaliala soahngen ire kan me duwehte kekeirada oh apwaliada seri kan me iasada oh iaduwen e pahn apwaliala soahngen irair kan me ele kin pidada kompoakepatail kan de atail peneinei. Mehlel, ih ahnepen aramas iei en medemedewe duwen soahng pwukat; ahpw e pahn wia elen saloalokong en doadoahngkihla ahnsou laud songosong en sapengla peidek kan me ahnsouwet sohte pasapengpe. Dahme kitail pahn akadeiong iei en papah Siohwa ni lelepek oh alehda mour soutuk. Kristian keidi kan kin koapworopworki kaiasada nanleng. (2 Piter 1:​10, 11) “Sihpw teikan” kin koapworopworki ehu sohso soutuk nan sampah pahngangin Wehin Koht. (Sohn 10:16; Madiu 25:​33, 34) Ong duwen oaritik tohto kan me saikinte dehde me pid kaiasadao, kitail en likihkiong Siohwa duwen met. Atail peren en ahnsou kohkohdo kin nekinekla mwahu nan limen Meno me kak ‘kaitarala ineng en me momour koaros.’​—⁠Melkahka 145:16; Seremaia 17:⁠7.

18. (a) Kana dahieu Pohl kasalehda? (b) Dahme karehda kitail kin likih koapworopwor en kaiasada?

¹⁸ Pohl kaimwsekla ah padahk ni ah koasoia: “Eri, kitail kapingkalahngankihong Koht, me kin ketikihong atail roson en powehdi ni mwaren atail Kaun Sises Krais.” (1 Korint 15:57) Ehi, meirong tomw en Sises Krais kin kana powehdi mehla me kohsang rehn Adam, oh me keidi kan oh “sihpw teikan” kin iang kana wet. Ni mehlel, “sihpw teikan” me momour rahnwet kin ahneki koapworopwor ehu me tohrohr ong dih wet. Nin duwen kisehn “pokon kalaimwun” ehu me wie tohtohla, re kakete pitsang “kahn kamakam kowahlap” me kohkohdo oh sohte pahn lelohng mehla! (Kaudiahl 7:​9, 14) Ahpw, pil irail kan me mehla pwehki “paisuwed kin lelohng aramas koaruhsie” de pwehki wiliepen Sehdan kan kemehla irail, re kak koapworopworki kaiasadao.​—⁠Eklesiasdes 9:11.

19. Peneu dahieu me Kristian koaros rahnwet en kapwaiada?

¹⁹ Ihme karehda, kitail kin kasikasik rahn lingano ni ahnsou me mehla pahn sohla wiawi. Atail likih ni tengeteng sapwellimen Siohwa inou en kaiasada kin kihong kitail lamalam pwung en dahme uhdahn pahn wiawi. Mendahki dahme pahn wiawihong kitail nan mour wet​—⁠ma kitail pil mehla​—⁠sohte mehkot me kak kihsang rehtail kating me Siohwa inoukihda. Ihme karehda, en Pohl kaimwseklahn peneu ong mehn Korint kan me konehng rahnwet duwehte sounpar riekid samwalahro: “Eri, riei kompoakepahi ko, kumwail kehlail oh dadaur oh loalenohng amwail doadoahk ong Kauno ahnsou koaros, pwe kumwail ese me papah Kauno kaidehk doadoahk mwahl ehu.”​—⁠1 Korint 15:58.

Komw Kak Kawehwe?

◻ Iaduwen Pohl sapengala peideko duwen soahngen mwomwen paliwar dah kei me keidi kan me iasada pahn ahneki?

◻ Iaduwen oh iahd mehla sohlahr pahn wiawi?

◻ Ihs me pahn iang kaiasada nan sampah?

◻ Ia pahn atail lamalam me pid ire kan me Paipel sohte kin koasoia?

[Kilel nan pali 26]

Weren tuhke ehu kin “mehla” ni ah kin wekidekla

[Kilel kan nan pali 29]

Ohl oh lih lelepek kan en mahs, duwehte Noha, Eipraam, Sera, oh Reahp, pahn iang irail kan me pahn iasada

[Kilel nan pali 30]

Kaiasada pahn wia ahnsoun peren laud!