Sukuhlkihsang Sapwung Kan En Mahs
EN ATAIL Sounkapikadao kosonned en tiahk mwakelekel kan me poatopoat oh soh wekiwek. Ihme kahrehda mouren kosonned me diarek nan Kalesia 6:7 kin kadoadoahk rahnwet: “Pwe mehkot me aramas pahn padokedi ihme e pahn dolung.” Mehlel, aramas emen ele pahn kahmahmki ah pwukoahki ah wiewia ong Koht, ahpw kosonned sarawi kan kin duduwehte. Ni mehlel, sohte aramas men me kak pitsang imwila suwed en ah wiewia.
Iaduwen aramas emen me kin mourki mour suwed ahpw mwuri wekidekla, oh wiahla emen ladu en Koht? E pahn lokolongkihte imwila suwed en ah mouren mahso. Ahpw, met sohte kin wehwehki me Koht sohte mahkohng ih. Kamwahl me Nanmwarki Depit wiahda rehn Padsihpa wahdo apwal laud nan ah mour. E sohte kak pitsang met. Ahpw e koluhla, oh Koht ketin mahkohng ih.—2 Samuel 12:13-19; 13:1-31.
Mie pak me ke nsensuwedla ni ahnsou me ke kin lokolongki imwila suwed en sapwung kan me ke wiahda? Ma kitail ahneki lamalam pwung ong met, atail pepehm en koluhla kak wia mehn kataman ehu ong kitail en ‘kanahieng dehr sohpeiong me suwed.’ (Sohp 36:21) Ehi, pepehm en koluhla kak sewese kitail en liksang wiahda soahngen sapwungohte. Depit doadoahngki dahme wiawihong ih pwehki dihpo me e wiahda pwehn kapaiakihda kaidehn pein ihte ahpw pil mehteikan. E mahsanih: “I ahpw pahn padahkihong me dipan akan sapwellimomwi kosonned akan, re ahpw pahn sapahldohng rehmwi.”—Melkahka 51:13.
[Kilel kan nan pali 31]
Depit sukuhlkihsang mehkot dihpo me e wiahda rehn Padsihpa