Ke Kak Kolokolte Ahmw Tiahk Mwakelekel

“Pwe iet duwen wehwehn poakohng Koht: kitail en peikiong sapwellime kosonned akan.”​—1 SOHN 5:3.

1. Ia wekpeseng en tiahk en aramas akan rahnwet?

MAHS mahsie, Koht padahkiong soukohp Malakai en kohpada duwen ehu ahnsou me tiahk kan en sapwellimen Koht aramas akan pahn weksang tiahk kan en irail aramas akan me sohte kin papah Koht. Soukohp menet ntingihdi: “Kumwail eri pahn pwurehng kilang wekpeseng en aramas pwung kan oh aramas suwed kan, me kin papah ie oh me sohte kin papah ie.” (Malakai 3:18) Rahnwet, kokohp wet pweida. Elen mour me loalokong oh pwung iei en kapwaiada sapwellimen Koht kosonned akan. Ahpw, met kaidehn elen mour me mengei en idawehn. Ihme kahrehda, Sises mahsanih me irail Kristian akan pahn anahne nantihong pwe ren kak ale mour soutuk.​—Luk 13:23, 24.

2. Kasongosong dah kei likin pein atail ineng kan me kin kihong kahpwal ong ekei aramas me men kolokolte arail tiahk mwakelekel?

² Dahme kahrehda e apwal en kolokolte atail tiahk mwakelekel? Ehu kahrepe: pwehki mie kasongosong kan me kin kohsang wasa kan likin pein atail ineng kan. Pisnis en mehn kamweit kin men kihong nan madamadau en aramas akan me dipen nenek oh kamwahl kin wia mehkot kaperen, oh mehkot me aramas laud kante me kin wia, oh re kin mwomwen pohnsehse me dipen nenek oh kamwahl kin imwila suwed. (Episos 4:17-19) Pali moron en nsenen pwopwoud kan me kin wiawi nan mehn kamweit kan: kaidehn pwopwoud kan me kin wiahda. Pali laud en ahnsou, nan kasdo kan oh TV, nsenen pwopwoud kin wiawi nanpwungen aramas akan me sohte pwopwoud oh re kin wia met likamwete e sohte sapwung. Sohte limpoak oh wahu nanpwungen aramas pwukat. Aramas tohto kin kilang soangen tiahk pwukat sang ni ahnsou me re tikitik kohda oh re lemeleme me e mwahu. Oh pil, iengarail kan kin kasonge irail en duwehla irail akan me kin mwamwahliki tiahk mwakelekel, oh ma re sohte kin iang wia tiahk samin pwukat, aramas pwukat me kin mwamwahliki tiahk mwakelekel pahn kapailoke de kauwe irail.​—1 Piter 4:4.

3. Ia ekei kahrepe kan aramas tohto nin sampah wet kin wia dipen nenek?

³ Kasongosong kan pil kin kohsang pein atail ineng suwed akan oh ineng suwed pwukat kin kahrehda e apwal en kolokolte atail tiahk mwakelekel. Siohwa kapikihda aramas akan ineng en wia nsenen pwopwoud, oh ineng wet kak uhdahn kehlail. Dahme kitail kin medemedewe kin kalapw kamwekid atail ineng kan, oh dipen nenek oh kamwahl kin pid madamadau kan me sohte kin pahrekiong sapwellimen Siohwa kupwur kan. (Seims 1:14, 15) Karasepe ieu, nin duwen roporop ehu me ahpwtehn wiawi oh ntingihdi nan pwuhk ehu me oaralap koasoia British Medical Journal, aramas tohto me tepin iang wia nsenen pwopwoud kin men wia met pwehki re men ese ia mwomwen wia nsenen pwopwoud. Ekei kin lemeleme me pali moron en iengarail kan me kin mahki sounpahr duwehte irail kin kalapw wia dipen nenek, eri re pil men song wia dipen nenek. Ahpw, pil ekei kin nda me re sohte kak kanengamah de re “ekis sakaula ni ahnsowo.” Ahpw, ma kitail men kaperenda Koht, kitail anahne ahneki madamadau me weksang madamadau pwukat. Eri, soangen madamadau dahieu pahn kak sewese kitail en kolokolte atail tiahk mwakelekel?

Kakehle Dahme Ke kin Kamehlele

4. Dahme kitail anahne wia ma kitail men kolokolte atail tiahk mwakelekel?

⁴ Pwehn kolokolte atail tiahk mwakelekel, kitail anahne kamehlele me mour mwakelekel kin katapan ong kitail. Met kin pahrekiong dahme wahnpoaron Pohl ntingwong irail Kristian akan nan Rom: “Eri, kumwail ahpw pahn esehda dahme kupwuren Koht​—dahme mwahu, oh dahme e kin ketin kupwurperenki, oh dahme unsek.” (Rom 12:2) Kitail ese me tiahk mwakelekel kin wia mehkot katapan mehlel ong kitail oh e kin pid laudsang ihte kitail en wehwehki me e wia mehkot me Mahsen en Koht sohte pwungki. E kin pidada emen en wehwehki kahrepe kan Koht kin kalahdeki dipen nenek oh kamwahl oh iaduwen kitail kak paiekihda atail liksang dipen nenek oh kamwahl. Ekei kahrepe pwukat se kasalehdahr nan artikel en mwowe.

5. Keieu, dahme kahrehda Kristian kan kin anahne kolokolte arail tiahk mwakelekel?

⁵ Ahpw, ni mehlel, kahrepe keieu kesempwal ong kitail Kristian akan en liksang dipen nenek oh kamwahl kin poahsoankihda atail nanpwungmwahu rehn Koht. Kitail kin sukuhliki me E ketin mwahngih dahme keieu mwahu ong kitail. Atail limpoak ong Ih pahn sewese kitail en tateki dahme suwed. (Melkahka 97:10) Koht iei Ih me kin ketikihda “soangen wiawi sapan koaros oh kisakis mwahu koaros.” (Seims 1:17) E kin ketin poakohng kitail. Kitail kak kasalehda me kitail kin poakohng Ih oh kalahnganki soahng koaros me E kin wia ong kitail ni atail pahn peikiong Ih. (1 Sohn 5:3) Kitail sohte men kansensuwedihala Siohwa sang ni atail pahn kauwehla sapwellime kosonned pwung kan. (Melkahka 78:41) Kitail sohte men wia tiahk kan me pahn kahrehong aramas akan en kauweki mwaren Siohwa oh kaudok me me kin kohwong Ih ni sarawi oh pwung. (Taitus 2:5; 2 Piter 2:2) Sang ni atail pahn kolokolte atail tiahk mwakelekel, kitail kin kaperenda Wasa Lapalapie.​—Lepin Padahk 27:11.

6. Iaduwen e pahn wia sawas laud ong kitail, ma kitail pahn kasalehong meteikan duwen atail pahn kolokolete atail tiahk mwakelekel kan?

⁶ Ni ahnsou me kitail koasoanehdier nan kapehdatail me kitail pahn kolokolete oh dadaur atail tiahk mwakelekel, e pahn kalaudehla perepatail ma kitail pahn wehk ong aramas teikan dahme kitail koasoanehdier dahme kitail inoukihda en wia. Padahkiong aramas akan me ke wia laduhn Siohwa Koht oh me ke nantihong en kolokolte sapwellime koasoandi ileile kan. Tamataman me ire wet kin pid ahmw mour, paliwaromw, oh ahmw pilipil kan. E kin pid pil dahieu? E pil kin pid ahmw nanpwung rehn Samatail nanleng. Eri, kasansalehong meteikan me ke pahn kolokolete oh dadaur tiahk mwakelekel oh ih ahmw pilipil me ke wiahdahr oh ke sohte pahn wekila. Kitail en perenki kasalehong aramas akan ni sansal me kitail kin uhpahiong Koht sang ni atail kin kapwaiada sapwellime koasoandi kan. (Melkahka 64:10) Ken dehr namenek ahnsou me ke kin koasoiong meteikan duwen dahme ke koasoanehdi nan kapehdomw duwen omw pahn kolokolte tiahk mwakelekel. Ni omw pahn koasoiong meteikan, e pahn kak kakehle iuk, perehla iuk, oh pil kangoange meteikan en idawehnla omw mehn kahlemeng mwahu.​—1 Timoty 4:12.

7. Dahme pahn kak sewese kitail en kolokolte atail pilipil en kolokolte atail tiahk mwakelekel?

⁷ Eri, ni ahnsou me kitail koasoanehdier nan kapehdomw en kolokolete oh dadaur tiahk mwakelekel oh ke pil kin padahkiong meteikan duwen ahmw pilipil, wia uwen me ke kak pwehn kolokolte atail pilipil. Ehu ahl me pahn kak sewese kitail iei en kanahieng ihs me kitail pahn pilada en wiahla kompoakpatail kan. Pwuhk Sarawi mahsanih, “Ma ke pahn padahngki mehkot sang rehn me loalokong kan, ke pahn pil loalokongla.” Werekiong aramas akan me kin iang pwungki omw pilipil kan duwen tiahk mwakelekel; re pahn kakehleiukada. Ahpw, tamataman pwe irehohte pil pousehla oh mahsanih: “A ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) Wia uwen me ke kak en liksang werekiong aramas akan me pahn kak kaluwetala ahmw pilipil en kolokolte tiahk mwakelekel.​—1 Korint 15:33.

8. (a) Dahme kahrehda kitail anahne audehkihda nan kapehdatail soahng mwahu kan? (b) Dahme kitail anahne en liksang?

⁸ Kitail pil anahne audehkihda nan kapehdatail kan soahng kan me mehlel, me kesempwal, me pwung, me mwakelekel, me kaselel oh waun. (Pilipai 4:8) Kitail kin kapwaiada kaweid wet sang ni atail kin pilada mwahu dahme kitail kin kilang oh wadek oh soangen koul me kitail kin rong. Ma emen pahn nda me pwuhk suwed sohte pahn kak kaluwetala emen eri e pahn duwehte emen me kin nda me pwuhk mwahu kan sohte pahn kak kakehle emen. Tamataman me aramas soh-unsek kan kin kak mengei pwupwudi nan dipen nenek oh kamwahl. Eri, pwuhk kan, makisihn kan, kasdo kan, oh koul kan me kin kainengihada aramas akan en ahneki ineng suwed kan, oh met pahn kak kahrehong emen en wiahda dihp. En kolokolte atail tiahk mwakelekel, kitail anahne audehkihda nan kapehdatail kan erpit en Koht.​—Seims 3:17.

Ewen Kahk kan me kin Kahluwa Emen en Wia Dipen Nenek de Kamwahl

9-11. Nin duwen me Solomon ni oaritik mahsanih duwen poadoapoad wet, kahk dah kei me kahluwa ohl pwulopwul men en lohdi pahn dipen nenek?

⁹ Pak tohto, kin mie ewen kahk sansal ekei me aramas kin wia mwohn arail lelohng irair en wia dipen nenek oh kamwahl. Ehu ehu kahk pwukat ni emen ah pahn kin wia, e pahn kin ekis ekis kahpwalala emen en pwurasang. Tehk dahme Lepin Padahk 7:6-23 mahsanih duwen met. Solomon tetehkehr duwen “emen pwutak pweipwei” oh met kin wehwehki me e kin ahneki madamadau suwed akan. Ohl pwulopwul menet “alialu kohkohla pohn ahlo, limwahn wasa me lih emen kin kousoan ie. E kohkohla karanih imwen liho nin soutik, mwurin wasa eh pwongier.” Met, keieun sapwung me e wiahda. Mwurin wasa pwongehr, eh “mohngiong” kin kahre ih kaidehn ong ahl sohte lipilipil, ahpw ahlo me e ese mie lih me kin netkihla paliwere.

¹⁰ Kitail pousehla oh wadek: “Eri, liho ahpw tuhwong pwutako. Liho mi nan likoun lihen netiki paliwere men, oh e wiewia eh koasoandi kan.” E ahpw kilangada liho! E kak pwurala ni imweo, ahpw inenen apwal en wia met pwe e luwetalahr. Liho eri koledi ih oh kiss ih. Mwurin e mweidong liho en kiss ih, e ahpw rongada ah koasoi kadek kan: Liho ndaiong ih: “I wiahier ei meirong ko rahnwet, oh aleier uduk sang ni meirong ko.” Meirong en kaminimin kan kin pid uduk, pilawa, leh, oh wain. (Lipai 19:5, 6; 22:21; Nempe 15:8-10) Mwein e koasoi duwen met pwe e men kasalehda me e sohte luwet ni pali ngehn, oh ni ahnsowohte e kin padahkiong pwutako me mie soahng mwahu tohto en kang oh nim nan imwe. E peki rehn pwutako: “Kohdo kita pahn wia tiahk en limpoak pwohnget pwon. Kita pahn pwoaloapwoal oh pereperen.”

¹¹ Sohte apwal en ese dahme pahn wiawi met. “Liho eri kasongosongehki pwutako eh mwomw kadek.” Pwutako eri mwadangete iang liho kohla ni imwen liho oh e kin “rasehng kou me kin kohwong kamakamala” oh pil “rasehng menpihr me pihrdohng nan uhk.” Solomon kaimwisekla eh koasoi oh mahsanih: “E sohte mwahn ese me eh mour kohkolahng apwal.” Eh pilipil kin pid eh mour pwehki “Koht pahn ketin kadeikada me kin mouren kamwahl oh me kin mouren nenek.” (Ipru 13:4) Met kin wia mehn kasukuhl sansal ong ohl oh lih akan koaros! Kitail anahne pere kitail sang tepin ewen kahk kan me kak kahluweikitaillahng keid nan ahl me pahn kansensuwedih Koht.

12. (a) Ia wehwehn lepin lokaia wet: “pweipwei”? (b) Iaduwen kitail kak kakehlailda atail ineng en kolokolete tiahk mwakelekel?

¹² Tehk duwen ohl pwulopwul menet nan poadopoad wet, ih me “pweipwei.” Lepin lokaia pwukat kin padahkiong kitail duwen ahn pwutako madamadau kan, ineng kan, irairen limpoak kan, pepehm akan, oh mehn akedei kan nan eh mour me sohte kin pahrekiong dahme Koht kin kupwurki. Pwehki e luwet, met kin kahrehong ih en lelohng kahpwal laud. Pil nan rahnpwukat, “imwin rahn akan,” kitail anahne nantihong en kakehlailda atail kin kolokol teng tiahk mwakelekel. (2 Timoty 3:1) Koht kin ketikihong kitail sawas kan. E ketikihong kitail mihding en mwomwohdisohn Kristian akan pwehn kangoange kitail en kekeid nan ahl me pwung oh pil kitail en kak miniminiong irail akan me kin ahneki mehn akadei kan duwehte kitail. (Ipru 10:24, 25) Mie elder kan nan mwomwohdiso me kin apwalih kitail oh padahkiong kitail duwen elen pwung. (Episos 4:11, 12) Kitail kin naineki Mahsen en Koht iei Pwuhk Sarawi me kin kaweidkin kitail oh kahre kitail. (2 Timoty 3:16) Oh ni ahnsou koaros, kitail kak kapakapki sapwellimen Koht ngehn sarawi pwehn sewese kitail.​—Madiu 26:41.

Sukuhlikihsang Dihp kan me Depit Wiahda

13, 14. Iaduwen Nanmwarki Depit lohdi pahn dihp toutou?

¹³ E inenen kansensuwed pwe pil sapwellimen Koht ladu kehlail kan kakete lohdi pahn dipen nenek oh kamwahl. Nanmwarki Depit kin wia emen me kin papah Siohwa ni lelepek erein sounpar tohto. E kin uhdahn poakohng Koht. Ahpw, e lohdi pahn dihp. Duwehte dahme wiawiong pwutako me Solomon kasalehda (Lepin Padahk 7:6-23), mie kahk kan me kahrehong Depit en wiahda dihp kan.

¹⁴ Ni ahnsou me Depit wiahda dihp, ele mwein e mahki sounpar limeisek ehu de riau. Sang wasahn iroir pohn Tehnpaso, e kilangada lih masamwahu men, Padsipa, wie duhdu. E kalelapak ihs liho oh e ahpw mwahngihada me liho en Uraia eh pwoud oh ni ahnsowo Uraia iang mahweniong Rappa, kahnimw en mehn Ammon kan. Depit uhd ketikidohng liho nan Tehnpaso, oh e ahpw wiahda nsenen pwopwoud reh. Ahpw mwuhr​—liho diarada me e liseiandahr pwehki Depit. Depit koapworopworki me Uraia pahn pwurodo oh wendi rehn eh pwoud, ih kahrepe e padahkiong Uraia en pwurodo sang mahweno. Ma Uraia pahn wia met, likamwete Uraia me kahrehda Padsipa en liseian. Ahpw Uraia sohte pwurodo wasao oh kohla ni imweo. Eri, Depit nantihong pwaindi dihp me e wiahdahr, eri e kadarala Uraia pwehn kohla Rappa oh kihong ih kisin likou ehu pwehn wahlahng kaun en sounpei oh audepen kisin likou wet kawehwe ong kaun en sounpei en kadarala Uraia wasa me mahweno inenen kehlail pwe Uraia en mwadang mehla. Uraia eri mehla, oh Depit uhd pwoudki liohdi menet mwohn e sansal ong wehi pokon me e liseian.​—2 Samuel 11:1-27.

15. (a) Iaduwen dipen Depit sansalda? (b) Iaduwen Depit mwekidki kaweid me Nadan kihong ih ni elen koahiek?

¹⁵ Nin tepio, ahn Depit pilahn en pwaindi dihp me e wiahdahr pweida. Sounpwong kei dower powe. Serio​—pwutak men—​ipwidi. Ma Depit medemedewe duwen met ni ahnsou e wiahda Melkahka 32, eri e sansal me kadeikpen loale kadeikada ih. (Melkahka 32:3-5) Ahpw, Depit sohte kak ekihla dihp kan me e wiahdahr sang Koht. Pwuhk Sarawi mahsanih: “Ahpw Kauno kupwursuwedkihla sapwung wet me Depit wiahda.” (2 Samuel 11:27) Siohwa kadarala soukohp Nadan rehn Depit, oh ni ahl koahiek e kasalehong Depit sapwung me e wiahdahr. Depit ni ahnsowohte wehkada oh pekmahk rehn Siohwa. Pwehki eh koluhla mehlel eh pwurehng ahneki nanpwungmwahu rehn Koht. (2 Samuel 12:1-13) Depit sohte sapwungki kaweid me kohwong ih. Ahpw, e kasalehda soangen lamalam me ntingihdi nan pwuhken Melkahka 141:5: “Aramas mwahu men kak kaloke oh lipwoare ie ni kadek, ahpw I sohte pahn perenki ale wahu sang rehn aramas suwed kan, pwe ei kapakap kan kin uhwong ar wiewia suwed kan ahnsou koaros.”

16. Soangen kaweid dahieu me kin pid duwen dihp me Solomon kihda?

¹⁶ Solomon, nein Depit oh Padsipa pwutak keriemeno, mwein kin medemedewe duwen tiahk sapwung wet me semeo wia nan eh mour. Mwuhr e ntingihdi: “Omw mour sohte pahn pweida ma ke song en ekihla dipomw kan. Sakarkihda oh wiliakapwala; eri, Koht ahpw pahn ketin mahkikihong uhk.” (Lepin Padahk 28:13) Ma kitail pahn pwupwudiong nan dihp laud, kitail anahne rong kaweid wet me kohsang rehn Koht. Kitail anahne wehk ong Siohwa dihp kan me kitail wiahda oh ale sawas sang rehn irail elder kan nan mwomwohdiso. Elder kan kin pwukoahki sewese oh kapwungala aramas akan me lohdi nan dihp.​—Seims 5:14, 15.

Kanengamah Mendahki Apwal akan me kin Kohsang Wiahda Dihp

17. Edetehn Siohwa kin kasalehda mahk, dahme e sohte pahn pere kitail sang?

¹⁷ Siohwa mahk ong Depit. Pwekihda? Pwehki Depit ohl lelepek men, oh e pil kin kasalehda mahk ong aramas teikan, oh pil: e koluhla mehlel. Ahpw, Depit sohte kak ruksang kahpwal akan me kohdohng ih pwehki eh wiahda dihp kan. (2 Samuel 12:9-​14) Duwehte nan atail ahnsou. Edetehn Siohwa sohte pahn kaloke aramas akan me kin wiahda dihp ahpw koluhla mehlel, e sohte pahn pere irail sang lipwen dihp kan me re wiahda. (Kalesia 6:7) Ekei lipwen dipen nenek oh kamwahl iei mweipeseng, liseian, soumwahu me kin kohsang dipen nenek oh kamwahl, oh aramas akan sohla kin likih oh wauneki aramaso me wiahdahr dipen nenek de kamwahl.

18. (a) Dahme Pohl padahkiong mwomwohdisohn Korint en wia ong emen me wia dipen nenek? (b) Iaduwen Siohwa kin kasalehda limpoak oh mahk ong aramas dipan akan?

¹⁸ Ma pein kitail wiahda dihp laud, e mengei en nsensuwedki laud ni atail kin lelohng kahpwal laud kan me kohsang dihp kan me kitail pein wiahda. Ahpw, kitail en dehr mweidong mehkot de emen en kerempwa kitail en koluhla oh pwurehng ahneki nanpwungmwahu rehn Koht. Nan keieun senturi, Pohl ntingwong mehn Korint kan me irail anahne kihsang ohl emen nan mwomwohdiso me kin wiahda dipen nenek. (1 Korint 5:1, 13) Mwurin ohlo koluhla mehlel, Pohl kaweidkin tohnmwomwohdiso kan: “Eri, kumwail pahn mahkohng [oh] kumwail en kasalehiong amwail limpoak mehlel.” (2 Korint 2:5-8, New World Translation) Sang kaweid wet me kohsang rehn Koht, kitail kin kilang sapwellimen Siohwa limpoak oh mahk ong irail aramas me kin koluhla mehlel. Tohnleng kan en nanleng kin perenkihda me dipan emen eh kin koluhla mehlel.​—Luk 15:10.

19. Kapai dah kan kitail kak paiekihda sang ni atail kin nsensuwedkihla sapwung me kitail wiahda?

¹⁹ Mendahki kitail kin nsensuwedkihla wiahda dihp ehu, atail nsensuwed oh koluhla pahn kak sewese kitail en ‘dehr sohpeiong me suwed.’ (Sohp 36:21) Ni mehlel, lipwen dihp pahn kak sewese kitail en dehr pwurehng wiahda dihpo. Oh pil, pwehki Depit kin nsensuwedki dihp me e wiahda, e kin doadoahngki met en kaweidih aramas teikan. E mahsanih: “I ahpw pahn padahkihong me dipan akan sapwellimomwi kosonned akan, re ahpw pahn sapahldohng rehmwi.”​—Melkahka 51:13.

Peren Mehlel kin Kohsan Atail Papah Siohwa

20. Kapai dah kan kin kohsang peikiong sapwellimen Koht kosonned pwung kan?

²⁰ Sises mahsanih, “Irail kan me kin rong mahsen en Koht oh kapwaiada, iei irail me paisang mehlel!” (Luk 11:28) Peikiong sapwellimen Koht kosonned pwung kan kin wahdohng kitail nsenamwahu ni ahnsouwet oh pil ni ahnsou kohkohlahte. Ma kitail kolokolte atail tiahk mwakelekel ahnsou wet, eri kitail en pousehla wia met oh ale sawas kan me Siohwa kin ketikihong kitail. Ma kitail wiahda dipen nenek de kamwahl, kitail kak kamehlele sang dahme kitail sukuhliki me Siohwa kin ketin mahk ohng irail akan me kin koluhla mehlel, oh kitail en koasoanehdi nan kapehdatail en dehr pwurehng wiahda dihp.​—Aiseia 55:7.

21. Mehnia kaweid me kohsang wahnpoaron Piter me pahn kak sewese kitail en kolokolte atail tiahk mwakelekel?

²¹ Ni ahnsou keren, sampah suwed wet pahn sohrala, iangahki wiewia oh lamalam suwed akan. Kitail pahn paiekihda ni ahnsouwet oh ni ahnsou kohkohlahte ma kitail pahn kolokolte atail tiahk mwakelekel. Wahnpoaron Piter ntinghidi: “Eri, kompoakepahi ko, nin dokon amwail kasikasik Rahno, kumwail wia uwen me kumwail kak pwe kumwail en kin mwakelekel oh pwung mwohn silangin Koht ni kapehd popohl. . . . Eri, kompoakepahi ko, ni amwail eseier mepwukat, kumwail kaleke pwe kumwail dehr iangala padahk likamw en aramas suwed pwukat oh pwupwuweisang nan mour teng en amwail pwoson.”​—2 Piter 3:14, 17.

Ke Kak Kawehwe?

• Dahme kahrehda e pahn kak wia mehkot apwal en kolokolte atail tiahk mwakelekel?

• Ia ekei ahl akan en utungada atail kin men idawehn koasoandi en tiahk mwakelekel kan?

• Mehn kasukuhl dah kei kitail kak sukuhliki sang dihp kan me ohl pwulopwul wiahda nin duwen me Solomon kawehwehda?

• Dahme mehn kahlemeng en Depit kin kasukuhlikikin kitail duwen koluhla mehlel?

[Kilel nan pali 13]

E kin kalaudehla perepe mwahu ong uhk ma ke pahn wehk ong aramas teikan dahme ke koasoanehdier nan kapehdomw me ke pahn kolokolete ahmw tiahk mwakelekel

[Kilel nan pali 17]

Pwehki Depit koluhla mehlel, Siohwa mahkong ih