Sapwellimen Koht Madamadau Ong Tiahk Mwakelekel

“Ngehi me Siohwa omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.”​—AISEIA 48:17, New World Translation.

1, 2. (a) Iaduwen pali moron en aramas kin medemedewe duwen tiahk en nsenen pwopwoud? (b) Ahpw, iaduwen Kristian akan kin kilangwong tiahk en nsenen pwopwoud?

RAHNWET, nan wasa tohto nin sampah, aramas tohto kin ahneki madamadau me tiahk mwakelekel iei mehkot me pein emen emen pahn pilada ma e pahn wia de soh. Aramas akan kin lemeleme me wia nsenen pwopwoud kin wia kasalepen arail limpoak me re kak wia ahnsou koaros oh met kaidehn mehkot me pahn wiawi nanpwungen irail me pwopwoud kante. Ma sohte emen kin nsensuwedkihla dahme re wia, re kin lemeleme me re sohte sapwung en pilada dahme re men wia. Nan arail madamadau, e sohte konehng en kadeik aramas teikan duwen arail tiahk, keieu ma e pid duwen wia nsenen pwopwoud.

² Ahpw, irail akan me esehla Siohwa sohte kin ahneki madamadau pwukat. Re perenki idawehn kaweid kan en Pwuhk Sarawi pwehki re kin poakohng Siohwa oh men kaperenda Ih. Re ese me Siohwa kin poakohng irail oh E ketikihong irail kaweid pwehn wia kamwahu ehu ong irail, kaweid me pahn, ni mehlel, kapaiada oh kaperenda irail. (Aiseia 48:17) Pwehki Koht kin wia Utupen Mour, e konehng aramas en sohpeiong Ih pwehn kaweidih irail, iangahki kaweidih irail ong iaduwen re pahn doadoahngki paliwararail kan, keieu me pid duwen nsenen pwopwoud.

Kisakis me Kohsang Sounkapikada Limpoak Men

3. Dahme aramas tohto nan Kristendom kin sukuhliki duwen nsenen pwopwoud, oh iaduwen e weksang dahme Pwuhk Sarawi mahsanih?

³ Weksang tohnsampah kan en nan rahnpwukat, ekei nan Kristendom kin padahngki me nsenen pwopwoud kin wia tiahk kanamenek, dihp, oh “tepin dihp” me wiawihda nan mwetuwel en Ihden iei Ihp me kasonge Adam en wia nsenen pwopwoud reh. Madamadau wet kin uhwong padahk en Pwuhk Sarawi. Pwuhk Sarawi mahsanih duwen keieun pwopwoudo nin duwen “ohlo oh eh pwoud lih.” (Senesis 2:25) Koht mahsanihong ira en naineki seri kan: “Kumwa kaparaparala pwe kadaudokamwa kan pahn kousoanla wasa koaros nin sampah.” (Senesis 1:28) E sohte pahn pwung Koht en padahkiong Adam oh Ihp en naineki seri oh mwuhr kaloke ira pwehki ira kapwaiada sapwellime koasoandi.​—Melkahka 19:8.

4. Dahme kahrehda Koht ketikihong aramas akan ineng en wia nsenen pwopwoud?

⁴ Kosonnedo me kohwong tepin samatail oh inatail oh me pwurehng kohwong Noha oh nah pwutak kan kin padahkiong kitail duwen kahrepe kesempwal aramas en wia nsenen pwopwoud: iei en wiahda seri kan. (Senesis 9:1) Ahpw, sapwellimen Koht Mahsen kin kasalehong kitail me sapwellime aramas pwopwoud kan kak wia nsenen pwopwoud kaidehn ihte pwehn wiahda seri kan. Nsenen pwopwoud pahn kak, ma e wiawi ni ahl me konehng, kaitarala anahn akan en pwopwoud akan ni paliwar oh arail anahn en pepehm akan oh pil kak kansenamwahuwih pwopwoud akan. Met iei ehu ahl ira kak kasalehda ara limpoak ong emen emen ira.​—Senesis 26:8, 9; Lepin Padahk 5:18, 19; 1 Korint 7:3-5.

Irepe kan me Kohsang rehn Koht

5. Koasoandi dah kei me Koht ketin kihong aramas akan duwen nsenen pwopwoud?

⁵ Nin dokon nsenen pwopwoud kin wia kisakis me kohsang rehn Koht, e sohte konehng kitail en pohnsehsehla irepe kan me pid duwen wia nsenen pwopwoud. Koasoandi wet pahn pil pid irail me pwopwoud kan. (Episos 5:28-30; 1 Piter 3:1, 7) Likin koasoandi en pwopwoud, e sohte konehng en wia nsenen pwopwoud. Pwuhk Sarawi kin kawehwe ni sansal duwen met. Nan Kosonnedo me Koht ketikihong wehin Israel, e mahsanih: “Kumwail sohte pahn kamwahl.” (Eksodus 20:14) Mwuhr, Sises kapataiong “dipen nenek” oh “kamwahl” ong “lamalam suwed kan” me kin kohda sang loalen aramas oh me kin kasaminehla aramas. (Mark 7:21, 22) Wahnpoaron Pohl mwekidki ngehn sarawi en kihong irail Kristian kan nan Korint kaweid wet: “Kumwail kadohwaneweisang kumwail tiahk en nenek.” (1 Korint 6:18) Nan sapwellime kisin likou ong mehn Ipru kan, Pohl ntingihdi met: “Kumwail koaros uhdahn pahn wauneki kasarawien kapwopwoud, oh kumwail ohl pwopwoud oh lih pwopwoud kan, kumwail uhdahn pahn kin loalopwoatpene, Koht pahn ketin kadeikada me kin mouren kamwahl oh me kin mouren nenek.”​—Ipru 13:4.

6. Nan Pwuhk Sarawi, ia wehwehn lepin lokaia wet “nenek”?

⁶ Ia wehwehn lepin lokaia wet “nenek”? E kohsang lepin lokaiahn Krihk por·neiʹa, oh e kin ekei ahnsou wehwehki nsenen pwopwoud nanpwungen aramas akan me sohte pwopwoud. (1 Korint 6:9) Nan ekei iren Pwuhk Sarawi kan, duwehte nan pwuhken Madiu 5:32 oh Madiu 19:9, lepin lokaia wet kin wehwehkiong dipen kamwahl, nsenen pwopwoud ong emen me kisehn omw peneinei, oh nsenen pwopwoud rehn mahn emen. Wiewiahn nsenen pwopwoud teikan nanpwungen aramas akan me sohte pwopwoud, duwehte doadoahngki ewe de kauwe ong wia nsenen pwopwoud oh pil doakeseli nein emen dipwisoun kaparapar kan: soangen tiahk pwukat koaros kin wehwehki por·neiʹa. Mahsen en Koht kin kasalehda me wiewia pwukat koaros sapwung.​—Lipai 20:10, 13, 15, 16; Rom 1:24, 26, 27, 32.a

Paiekihda Sapwellimen Koht Kosonned Akan Me Kin Pid Tiahk Mwakelekel

7. Ia kapai kan me kitail kin paiekihda sang ni atail pahn mwakelekel ni atail tiahk kan?

⁷ Pwehn peikiong sapwellimen Siohwa kaweid duwen tiahk mwakelekel pahn kak wia kahpwal ong aramas soh unsek akan. Nan kaeisek riau en senturi, sounpadahk en mehn Suhs ndand men, Maimonides ntingihdi: “Kosonned akan me keieu apwal en kapwaiada me mih nan Torah [Kosonned en Moses] iei kosonned akan me kin pid dipen nenek kan.” Ahpw, ma kitail kin peikiong sapwellimen Koht kaweid kan, kitail pahn paiekihda. (Aiseia 48:18) Karasepe ieu, ma kitail pahn peikiong sapwellimen Koht kosonned akan, e pahn pere kitail sang soumwahu kan me kin kohsang dipen nenek de kamwahl, oh ekei soumwahu pwukat kak kemehla aramas oh sohte wini en kamwahuwihala.b Tiahk mwakelekel pil kak pere kitail sang liseian en kiripw. Kapwaiada koasoandi erpit kan me kin kohsang rehn Koht kin kihong kitail nsen mwakelekel. Ma kitail pahn wia met, kitail pahn waunla oh aramas teikan pahn wauneki kitail iangahki kisetail kan, atail pwoud kan, neitail seri kan, oh iengatail Kristian brother oh sister kan. Oh pil, e pahn kihong kitail madamadau pwung me pid duwen nsenen pwopwoud oh met pahn kahrehong kitail en ahneki peren nan atail pwopwoud. Kristian lih men ntingihdi: “Padahk mehlel en Mahsen en Koht kin wia mehn perepe me keieu mwahu. I kasikasik en pwopwoud, oh ni ahnsou me I pahn pwopwoud, I pahn perenki padahkiong Kristian ohl me I pahn pwoudki me I kolokolte ahi mwakelekel.”

8. Ni ahl dah kei atail tiahk mwakelekel kan kin utungada kaudok min?

⁸ Sang ni atail kin kolokolte tiahk mwakelekel, met pahn kak wia mehn kadehde duwen kaudok mehlel me pid madamadau pwung oh tiahk pwung oh met pahn kak sewese aramas en karanih Koht me kitail kin kaudokiong. Wahnpoaron Piter ntingihdi: “Amwail tiahk kan nanpwungen me rotorot akan en kin mwahu, pwe ni ar pahn kin kinehiong kumwail likamw, me dene aramas suwed kei kumwail, eri, ni ar pahn kin kilang amwail wiewia mwahu kan, re en kapingahki Koht ni Rahnen eh pahn ketido.” (1 Piter 2:12) Mendahki ma irail akan me sohte kin papah Siohwa sohte pahn kilang de pwungki atail tiahk mwakelekel kan, kitail kak kamehlele me Samatail nanleng kin mahsanih, kupwurki, oh perenki kilang atail kin nannanti kapwaiada sapwellime kaweid kan.​—Lepin Padahk 27:11; Ipru 4:13.

9. Dahme kahrehda kitail anahne likih sapwellimen Koht kaweid mendahki kitail mwein sohte uhdahn wehwehki kahrepen sapwellime kosonned akan? Kihda karasaras ehu.

⁹ Pwoson Koht kin pidada atail pahn likih me Koht kin mwahngih dahme keieu mwahu ong kitail, mendahki ma kitail sohte kin wehwehki sapwellime kaweid kan ni unsek. Tehk duwen karasepe ieu nan Kosonned en Moses. Ehu kosonned kin pid duwen koasoandi en mwakelekel nan kahnimpwal en sounpei kan me irail anahne sarepedi kainen mwenge likin kahnimwpwalo. (Deuderonomi 23:13, 14) Mwein mehn Israel akan kin pwonopwonki duwen kaweid wet; mwein ekei kin ahneki madamadau me kaweid wet sohte kesempwal. Ahpw, ni ahnsou wet, palien sains en wini pohnese me kosonned wet kin sewese wasahn pihl akan en mwakelekel oh wia mehn perepe ieu sang soumwahu tohto me kisin mahn akan kin weuwaseli. Pil duwehte, mie kahrepe kan ong ni pali ngehn, palien pepehm akan, paliwar, oh madamadau kan me Koht kihong kitail kosonned akan duwen nsenen pwopwoud en wiawihte nanpwungen ohl pwopwoud men oh ah pwoud. Kitail en tehk duwen ekei mehn kahlemeng kan nan Pwuhk Sarawi duwen irail akan me kin kolokolte arail tiahk mwakelekel.

Sosep​—Ale Kapai kan Pwehki Eh Tiahk Mwakelekel

10. Ihs me song en wendi rehn Sosep, oh iaduwen Sosep mwekidki met?

¹⁰ Mwein ke wehwehki duwen mehn kahlemeng en Sosep, nein Seikop, me ntingdi nan Pwuhk Sarawi. Ni ahnsou me e mahki sounpar 17, e wiahla lidu men en Podipar, kaunen silepen Tehnpas en Parao en Isip. Siohwa eri kin ketin kapaiada Sosep, oh e wiahla sounkohwahn imwen Parao. Ni ahnsou me e lel sounpar 20 samwa, Sosep wiahla pwutak “paliwaramwahu men oh pil masamwahu.” Ihme kahrehda, en Podipar eh pwoud ahpw inangihada Sosep oh peki en kohla mahs wendi reh. Sosep, ni sansal, kawehwehda me: ma e pahn dukiong, e pahn wiahda sapwung laud rehn eh soumwas, ahpw, keieu e pahn “dipikihda mwohn Koht.” Dahme kahrehda Sosep ahneki madamadau wet?​—Senesis 39:1-9.

11, 12. Edetehn sohte kosonned kan me kohsang Koht me ntingihdi nan pwuhk kan duwen liksang dipen nenek oh kamwahl, dahme kahrehda Sosep wiahda eh pilipil pwung duwen met?

¹¹ Ni sansal, pilipil me Sosep wiahda sohte poahsoankihda masak me aramas pahn rong ma e wiahda dihp wet. Peneinei en Sosep kin mihmi dohsang ih, oh pil semen Sosep lemeleme me e melahr. Ma Sosep wiahda dipen nenek, eh peneinei sohte pahn rong duwen met. Ira pahn kakete ekihla dihp wet sang Podipar oh sapwellime ladu ohl kan, pwe re kak wia dihp wet ahnsou kan me meteikan sohte mih nan ihmwo. (Senesis 39:11) Ahpw, Sosep ese me e sohte kak ekihla soangen tiahk suwed wet sang Koht.

¹² Ahn Sosep pilipil poahsoankihda dahme e kin ese duwen Siohwa. E wehwehkier dahme Siohwa mahsanih nan mwetuwel en Ihden: “Iei kahrepe wet me ohl emen pahn kin mweikihsang seme oh ine oh ehukihong eh pwoud, pwe ira en kin wiahla ehu.” (Senesis 2:24) Oh pil, Sosep pil ese duwen dahme Siohwa mahsanihong nanmwarki men en mehn Pilisdia me men song en wendi rehn Sera, nohno en nohno kalap en Sosep. Siohwa mahsanihong nanmwarkio: “Komw pahn mehla pwe lih me komw aledahr mie eh pwoud. . . . Pwe ngehi me kasilehsang uhk ke en dehr wiahda dihp oh sohte mweidohng ke en sair liho.” (Senesis 20:3, 6) Eri, mendahki Siohwa saikinte wiahda kosonned akan me ntingda nan pwuhk, kupwure me pid duwen pwopwoud me sansal. Ahn Sosep nsen mwakelekel duwen tiahk kan, iangahki eh ineng en men kaperenda Siohwa kin sewese ih en liksang dipen nenek.

13. Dahme kahrehda Sosep sohte kak keidki wasa tohrohr me e sohte pahn kin tuhwong en Podipar eh pwoud?

¹³ En Podipar eh pwoud kin pekipeki rehn Sosep en wendi reh “rahn koaros.” Dahme kahrehda Sosep soh kin keidki wasa tohrohr me e sohte pahn kin tuhwong en Podipar eh pwoud? Eri, nin duwen ladu men, mie eh pwukoa kan me e anahne kapwaiada oh e sohte kak pein kawikila eh koasoandi kan. Sang mehn kadehde kan en palien archaelogy (irail akan me kin sukuhliki duwen dipwisou en kawa kan me kin weweida sang nan pwehl), e kin kasalehda me ihmw akan en mehn Isip kan, ma emen men pedolong nan ahr wasahn nahk kan e anahne keid nan wasa me aramas kin kousoan ie. Ihme kahrehda, Sosep sohte kak keidki wasa tohrohr likin wasa kan me en Podipar eh pwoud kin mih ie.​—Senesis 39:10.

14. (a)Dahme wiaiong Sosep mwurin e tangasang en Podipar eh pwoud? (b) Iaduwen Siohwa kapaiada Sosep ni eh kin kasalehda lelepek?

¹⁴ Eri, ehu rahn, ira kelepwla nan ihmwo. En Podipar eh pwoud koledi Sosep oh ndahng, “Nna, wendi mahs rehi!” Sosep tangasang ih. Liho eri sarohkihdi oh uhd karaunihehki me dene Sosep song en angkehlailiong ih. Dahme wiawi mwuhr? Siohwa kin mwadangete ketikihong ih keting ehu pwehki e lelepek? Soh. Sosep me lekdekla nan imweteng oh selikihdi mete kan. (Senesis 39:12-20; Melkahka 105:18) Siohwa eri mwahngihada kopwung sapwung wet oh mwuhr e kahrehong Sosep en saledek sang imweteng oh e uhd kesepwilada ih en mihla nan Tehnpaso. E wiahla keriaun Kaun nan Isip, oh e paiekihda eh pwoud lih men oh ekei nah seri kan. (Senesis 41:14, 15, 39-45, 50-52) Kahrepen poadoapoad duwen en Sosep kolokol eh lelepek me ntingihdi sounpar 3,500 samwalahro iei pwe sapwellimen Koht ladu kan pahn kak wadek duwen poadoapoad wet oh sukuhliki sang. Ia uwen kaselel kapai pwukat me kohwong Sosep pwehki e kin lelepek ong sapwellimen Koht kosonned pwung kan! Duwehte me kin wiawi nan atail ahnsou, mwein kitail sohte kin mwadangete kilang kapai kan me kin kohsang atail kolokolte tiahk mwakelekel, ahpw kitail kak likih me Siohwa kin mahsanih met oh pahn kapaiada kitail ni ahnsou me konehng.​—2 Kronikel 16:9.

Sohp Wiahda ‘Inou ehu me Pid Pwoaren Mese kan’

15. Ia wehwehn Sohp e wiahda ‘inou ehu me pid pwoaren mese kan’?

¹⁵ Pil emen me kin kasalehda lelepek iei Sohp. Erein ahnsou me Tepil kasonge ih, Sohp kin medemedewe duwen pein eh mour oh nda me e pahn mweidong kadeik laud en kohwong ih ma e kauwehla sapwellimen Siohwa kosonned me pid nsenen pwopwoud. Sohp mahsanih: “I wiadahr inou lapalap ehu: I en dehr kin kangkakil serepein mweipwon men ki ineng suwed.” (Sohp 31:1, NW) Mahsen wet kin kasalehda me Sohp kin nantihong kolokolte eh lelepek ong Koht, oh e pein koasoanehdi nan kapehde me e pil pahn liksang kilang serepein men ki ineng suwed. Ahpw, ni mehlel, e kin kilang lih akan rahn koaros oh e kin sewese irail ma re anahne sawas. Ahpw, e sohte pahn mweidong pein ih en rapahkihda lih kan pwein wia dipen kamwahl rehrail. Mwohn kasongosong sang Sehdan tepida, Sohp kin wia emen me inenen kepwehpwe: “e kepwehpwehsang aramas koaros ni palimese.” (Sohp 1:3) Ahpw, e sohte kin doadoahngki nah mwohni kan en kolekihdi lih akan. Inenen sansal me e sohte kin mwadongki lih pwulopwul kan pwehn wia dipen kamwahl rehrail.

16. (a) Dahme kahrehda Sohp wia mehn kahlemeng mwahu ong irail Kristian pwopwoud kan? (b) Iaduwen wiewia kan en irail ohl akan ni mwehin Malakai kin weksang wiewiahn Sohp, oh iaduwen wiewiahn Sohp kin weksang wiewiahn aramas akan nan atail ahnsou?

¹⁶ Ihme kahrehda, e sansal me ni ahnsou mwahu kan oh ni ahnsou apwal akan, Sohp kin kasalehda lelepek. Siohwa kin kilang eh wiewia kan oh ketikihong ih kapai laud tohto. (Sohp 1:10; 42:12) Sohp kin wia mehn kahlemeng kaselel ong irail Kristian pwopwoud kan, ohl oh lih akan! Ihme kahrehda Siohwa kin poakohng ih! Aramas akan rahn pwukat kin weksang Sohp, oh ni mehlel, wiewia kan en aramas tohto nan rahn pwukat kin duwehte wiewiahn aramas akan ni mwehin Malakai. Soukohp Malakai kadeikada irail ohl pwopwoud kan me kin kesehla ahr pwoud kan pwehn pwoudki lih pwulopwul kan. Pilen mesen lih pwopwoud kan me ahr pwoud ohl kin kesehla irail kin pwaindi sapwellimen Siohwa pei sarawio, oh Koht kadeikada irail akan me kin “kauwelahr arail inou” ong ahr pwoud kan.​—Malakai 2:13-16.

Emen Lih Pwulupwul me kin Tiahk Mwakelekel

17. Iaduwen lihen Sulam kin rasehng “mwetuwel ehu me kelpene”?

¹⁷ Kasilimen en emen me kin kolokolte eh lelepek me se pahn koasoia iei lih meipwon en Sulam. Pwehki e pwulopwul oh masamwahu, kaidehn ihte pwutako me wia silepen sihpwo kin mwahukihda ih, ahpw pil Nanmwarki kepwehpweo en wehin Israel, Solomon. Nan poadoapoad kaselel pwon en pwuhken Melkahkahn Solomon (Melkahkahn Melkahka kan), lihen Sulam kin kolokolte eh tiahk mwakelekel, kahrehda aramas teikan kin wauneki ih. Mendahki liho sohte mwahuki Solomon, Koht kamwekidada Solomon en ntingihdi duwen poadoapoad en liho. Silepen sihpwo me e kin poakohng pil kin wauneki liho pwehki eh tiahk mwakelekel. Ehu ahnsou e koasoia me e kin lemeleme me lihen Shulem me kin rasehng “mwetuwel ehu me kelpene.” (Melkahkahn Solomon 4:12) Nan Israel en mahs, mie soangsoangen iasai tohto, wahn rohs pwohmwahu kan, oh tuhke lingan kan nan mwetuwel kaselel kan. Soangen mwetuwel pwukat kin kalap kehlkihpene kakine de, ekei pak, wiawihkihda kehl ile oh aramas akan pahn kak ihte pedolong nan wenihmw kan me kin kak loakdi. (Aiseia 5:5) Ong silepen sihpwo, tiahk mwakelekel en lihen Sulam kin rasehng mwetuwel lingan ehu. Liho kin tiahk mwakelekel ni unsek. Eh limpoak pahn ihte kohwong meno me e pahn pwoudki.

18. Dahme wiewia kan en Sosep, Sohp, oh lihen Sulam kin katamankin kitail?

¹⁸ Lihen Sulam kin wia mehn kahlemeng mwahu ong Kristian lih akan nan rahnpwukat me pid kolokolte tiahk mwakelekel. Siohwa mahsanih oh kalangahnki tiahk mwakelekel en serepein en Sulam oh E ketin kapaiada ih duwehte E pil kapaiada Sosep oh Sohp. Arail wiewiahn lelepek kan kin ntingihdi nan Mahsen en Koht pwehn kaweidkin kitail. Mendahki atail nannanti kan en kolokolte atail lelepek sohte kin ntingting nan Pwuhk Sarawi, Siohwa kin sapwellimaniki “pwuhk ehu” duwen irail akan me kin kapwaiada sapwellime kupwur kan. Kitail en dehr manokehla me Siohwa kin “nsenohki” oh perenki kilang kitail kolokolte atail tiahk mwakelekel ni lelepek.​—Malakai 3:16.

19. (a) Soangen madamadau dahieu kitail anahne ahneki ong tiahk mwakelekel? (b) Dahme kitail pahn koasoi nan artikel en mwuhr?

¹⁹ Mendahki irail aramas soh-pwoson akan kin koruhrkin kitail, kitail kak ahneki peren pwehki kitail peikiong Sounkapikpatail limpoak men. Kitail kin kolokolte tiahk mwakelekel, oh kaweid me kin pid duwen tiahk mwakelekel kin kohsang Koht. Met kin wia mehkot me kitail kak kesempwaliki. Sang ni atail kin kolokolte tiahk mwakelekel, kitail kak peren pwe Koht kin kapaiada kitail oh kitail kak kolokolte atail koapworopwor en alehdi kapai kan me sohte pahn nek ni ahnsou kohkohlahte. Ahpw, pwehn sewese kitail en kolokolte tiahk mwakelekel rahn koaros, dahme kitail kak wia? Artikel en mwuhr pahn koasoia duwen peidek kesempwal wet.

[Nting tikitik me mi pahs]

Ke Kak Kawehwe?

• Dahme Pwuhk Sarawi kin padahkiong kitail duwen nsenen pwopwoud?

• Nan Pwuhk Sarawi, ia wehwehn lepin lokaia wet “nenek”?

• Iaduwen kitail kin paiekihda sang ni atail kin kolokolte atail tiahk mwakelekel?

• Dahme kahrehda Sosep, Sohp, oh lih meipwon en Sulam kin wia mehn kahlemeng mwahu ong Kristian akan nan rahnpwukat?

[Kilel nan pali 9]

Sosep tangasang dipen nenek

[Kilel nan pali 10]

Serepein en Sulam kin rasehng “mwetuwel ehu me kelpene”

[Kilel nan pali 11]

Sohp wiahda ‘inou ehu me pid pwoaren mese kan’