Ia Duwen Omw Kak Paiekihda Siohwa Eh Kupwurki Mahkohng Uhk?

“Ngehi, KAUN-O, Koht emen me diren kalahngan oh kadek, me sohte kin mwadang lingeringerda, . . . kin mahkohng me suwed kan oh me dipan akan.”​—EKS. 34:6, 7.

RAPAHKI PASAPENGPEN PEIDEK PWUKAT

Dahme Siohwa ketin wia ni ahnsou me Depit oh Manase wiahda dihp? Dahme kahrehda?

Dahme kahrehda Siohwa sohte ketin mahkohng wehin Israel?

Dahme kitail anahne wia ma kitail men Siohwa en ketin mahkohng kitail?

1, 2. (a) Soangen Koht dah men Siohwa ong wehin Israel? (b) Dahme kitail pahn sukuhlki nan iren onop wet?

NI MWEHIN Nehmaia, pwihnen Lipai kei kasalehda ni ahnsou me irail kapakap mwohn aramas ko me wehin Israel kin pwurepwurehng “kahngala peikiong” sapwellimen Siohwa kosonned kan. Ahpw Siohwa kin ketin pwurepwurehng mahkohng irail. Ih iei ‘Koht emen me kin kupwur mahk; me kin kupwurkalahngan oh limpoak, me sohte kin mwadang engiengda. Sapwellime kalahngan me lapalahpie.’ Siohwa ketin pousehlahte kasalehiong irail kadek kalahngan.​—Neh. 9:16, 17.

² Emenemen kitail kak idek rehtail, ‘Ia duwen ei kak paiekihda Siohwa eh kupwurki mahkohng ie?’ Pwehn sewese kitail en diarada pasapengo, kitail pahn sukuhlki ia duwen Koht eh ketin mahkohng nanmwarki riemeno Depit oh Manase oh ia duwen ara paiekihda sapwellime mahk.

AHN DEPIT DIHP LAUD KAN

3-5. Dihp laud dah kan me Depit wiahda?

³ Mendahki Depit ohl emen me kin men peikiong Koht, e wiahda dihp laud kei. Nanpwungen dihp pwukat, meh riau pidada pwopwoud ehu, Uraia oh Padsipa. Dihp pwuko kahrehda imwila suwed ong irail. Ahpw sapwellimen Koht ahl en kapwungala Depit padahkihong kitail duwen sapwellimen Siohwa mahk. Kitail kilang dahme wiawi.

⁴ Depit kadarala sounpei en Israel ko ren kalowehdi poasen kaunen mehn Amon kan, Rappa. Rappa mi mpen mwail 50 palimese en Serusalem palio Pillap Sordan. Nin doken sounpei ko ar mihmi wasahn mahweno, Depit mihmi pohn imweo nan Serusalem oh kilangada Padsipa eh wie duhdu. Ah pwoudo iang sounpei ko kohla mahwen. Depit uhdahn mwahukihda Padsipa kahrehda e kadarala meninkeder kei ren wahdo ni imweo, ih eri wiahda dipen kamwahl reh.​—2 Sam. 11:1-4.

⁵ Ni Depit eh diarada me Padsipa liseian, e ndaiong kaunen sounpeio en kapwurehla Uraia Serusalem. Eri, e kin pwurepwurehng ndaiong Uraia en kohkohla ni imweo. Depit men Uraia en wia nsenen pwopwoud rehn Padsipa pwe Uraia en medewe me ih me pahpa en serio. Ahpw Uraia sohte kohla ni imweo. Eri nanmwarkio ntinglahng nah kaunen sounpeio ni rir en kihdi Uraia mwohn karis en sounpei ko oh ndaiong sounpei teiko ren tangasang. Imwintihti ko mwadang kemehla Uraia nin duwen me Depit koasoanehdi. (2 Sam. 11:12-17) Eri nanmwarkio sohte wiahdahte dipen kamwahl ahpw e pil kemehla aramas emen me sohte eh sapwung.

DEPIT WEKIDALA EH MADAMADAU

6. Dahme Koht ketin wia mwurin Depit eh wiahda dihp? Dahme met padahkihong kitail duwen Siohwa?

⁶ Siohwa kin uhdahn ketin mwahngih soahng koaros, kahrehda e ketin mwahngih dahme Depit wiahda. (Lep. Pad. 15:3) Mendahki Depit pwoudkihla Padsipa mwurin Uraia eh mehlao, Siohwa “kupwursuwedkihla sapwung wet me Depit wiahda.” (2 Sam. 11:27) Eri, dahme Koht ketin wia? E ketin poaronehla sapwellime soukohp Nadan rehn Depit. Pwehki Siohwa iei Koht en mahk, e ketin kupwurki kasalehiong Depit mahk. Ahpw e anahne ketin diarada ma Depit uhdahn koluhla mehlel. E uhdahn wia mehn kangoang ehu me Siohwa ketin kupwurki wia met. E sohte ketin idingkihong Depit en wehkada dipe ko, ahpw e ketin mahsanihong Nadan en ndaiong nanmwarkio soai pwoat me kasalehda uwen suwed en dipen Depit ko. (Wadek 2 Samuel 12:1-4.) Met wia ahl mwahu ehu ong Siohwa en ketin diarada uhdahn ahn Depit pepehm.

7. Ia ahn Depit pepehm ni eh rong ahn Nadan soaio?

⁷ Nanmwarkio medewe me dahme wiawi nan soai me Nadan koasoiahda wia mwekid sapahrek ehu. Depit lingeringerda pahn ohl kepwehpweho nan soaio oh ndaiong Nadan: “I kahukihla KAUN-O me ketin ieias, me soangen aramas me wiahda soangen tiahk wet, uhdahn konehng en kamakamala!” Depit pil nda me mie mehkot anahne kowohng ohl me nah sihpw ko pirapala. Ahpw Nadan ndaiong Depit: “Iei komwi me aramaso.” Met uhdahn kapwuriamwei ong Depit. Nadan nda me pwehki dahme Depit wiadahro, e pahn lelohng nan apwal oh tohn eh peneinei pahn mehla suwed. E pahn pil namenekla mwohn aramas pwehki dipe kan. Pwehki dahme Nadan nda, Depit esehda uwen suwed en dipe ko. E inenen nsensuwedla oh nda: “Iet ngehi aramas dipan emen me dipadahr ong KAUN-O.”​—2 Sam. 12:5-14.

DEPIT KAPAKAP OH KOHT KETIN MAHKOHNG

8, 9. Ia duwen Depit eh kasalehda eh pepehm duwen dipe kan nan Melkahka 51? Dahme kitail kak sukuhlki sang Melkahka 51 duwen Siohwa?

⁸ Mwuhr, Nanmwarki Depit ntingihada Melkahka 51. Melkahka wet kasalehda uwen Depit eh nsensuwedla. Depit peki sawas rehn Siohwa. Depit wia laudsang ihte wehkada dahme e wia sapwung. E pil koluhkihla dipe ko. Ahn Depit nanpwungmwahu rehn Koht me keieu kesempwal ong ih. E wehkada: “I dipadahr mwohmwihte—mwohmwihte kelehpw.” E peki rehn Siohwa: “Maing Koht, komw ketin wiahiong ie ehu mohngiong mwakelekel, oh ketikihong nan kapehdiet ehu [“elen madamadau,” NW] kapw oh loalopwoat.” E pil peki: “Komw ketin kasapahldohng ie nan peren me kin kohsang ni sapwellimomwi komour, oh ketin kupwurehkin ineng en peikiong komwi.” (Mel. 51:1-4, 7-12) Ni omw kin patohwanohng Siohwa duwen sapwung kan me ke wiahda, ke kin uhdahn mehlel ong ih duwehte Depit?

⁹ Siohwa sohte ketin perehsang Depit imwila suwed kan en dipe ko. Dihp ko pahn pousehlahte kahrehda kahpwal kan erein ahn Depit mour. Ahpw pwehki Depit ahneki mohngiong me “koluhla mehlel,” Siohwa ketin mahkohng ih. (Wadek Melkahka 32:5; Mel. 51:17) Koht Wasa Lapalahpie ketin mwahngih ia uhdahn pepehm oh kahrepe kan me kahrehda emen kin wiahkihda dihp. Eri Koht sohte ketin mahsanih me sounkopwung kan anahne kemehla Depit oh Padsipa nin duwen me Kosonned en Moseso kaweidki. (Lip. 20:10) Ahpw pein ih ketin kapwungala Depit oh Padsipa oh ketin mahkohng ira. Koht pil ketin kahrehiong neira pwutak Solomon en wiahla nanmwarkien Israel mwurin Depit.​—1 Kron. 22:9, 10.

10. (a) Ia ehu kahrepe me Siohwa sapwellimanki pwehn mahkohng Depit? (b) Dahme emen anahne wia pwehn ale mahk sang Siohwa?

¹⁰ Mwein pil ehu kahrepe me Siohwa ketin mahkikihong Depit iei pwehki Depit eh mahkohng Sohl. (1 Sam. 24:4-7) Sises ketin kasalehda me Siohwa kin ketin wiahiong kitail dahme kitail kin wiahiong meteikan. “Kumwail dehr kadeik aramas teikan, pwe Koht en dehr ketin kadeingkumwailda. Pwe Koht pahn ketin kadeik kumwail nin duwen amwail kin kadeik meteikan, oh e pahn ketin sohngkin kumwail mehn sohngohte me kumwail kin sohngki meteikan.” (Mad. 7:1, 2) E kansenamwahu en ese me Siohwa pahn ketin mahkohng dipatail kan mehnda ma dihp laud kan duwehte kamwahl oh kamaramas. Ahpw e pahn ketin mahkohng kitail ihte ma kitail pahn mahkohng meteikan, wehkadahng ih dipatail kan oh ma kitail wekidala atail madamadau sang ni atail kilangwohng dipatail kan duwehte Siohwa kin ketin wia. Ni me dipan akan ar kin koluhkihla mehlel diparail kan, Siohwa pahn ketikihong irail ahnsoun kakehlepen arail elen madamadau de sewese irail ren ahneki nsenmwakelekel.​—Wadek Wiewia 3:19, 20.

MANASE WIAHDA DIHP LAUD AHPW MWUHR KOLUHLA

11. Soahng suwed dah kan me Manase wiahda?

¹¹ Paipel kihda pil ehu karasaras me kasalehda me Siohwa ketin kupwurki mahkohng dihp inenen laud kan. Mpen sounpar 360 mwurin Depit eh tepida kaunda, Manase wiahla nanmwarki en Suda oh e kakaunki erein sounpar 55. Siohwa ketin padahkihong ih me e ketin kupwursuwedki duwen dihp kasaut kan me e wiahda ni ahnsowo. Karasepe, Manase wiahda pei sarawi kan ong Paal, kaudokiong ketipin, maram oh usu kan oh meirongkihla nah pwutak kan nan kisiniei ong koht likamw kan oh kangoange aramas ko ren wia tiahk en wunahni. “E wiahda dihp lapalap ong KAUN-O.”​—2 Kron. 33:1-6.

12. Ia duwen Manase eh sohpeiong Siohwa?

¹² Mwuri, Manase kolokoldi oh wisiklahng nan imweteng en Papilon. Nan Papilon, e ele tamanda dahme Moses padahkihong mehn Israel ko: “Ni amwail pahn miher nan apwal pwehki soahng pwukat lelohngkumwailehr, eri, kumwail pahn sohpeiong KAUN-O oh kapwaiada sapwellime kosonned akan.” (Deud. 4:30) Manase sohpeiong Siohwa. Ia duwen? E “aktikitikla” oh kin wie “kasakas” ong Koht (me kileldi nan pali 23). (2 Kron. 33:12, 13) Paipel sohte padahkihong kitail uhdahn lepin lokaia kan me Manase doadoahngki nan eh kapakap ko, ahpw e kakete duwehte ahn Nanmwarki Depit nan Melkahka 51. Sohte lipilipil ma e duwehte de soh, kitail ese me Manase wekidala douluhl eh madamadau.

13. Dahme kahrehda Siohwa ketin mahkohng Manase?

¹³ Dahme Siohwa ketin wia ni ahnsou me Manase kapakap ong ih? Siohwa “ketin karonge.” Duwehte Depit, Manase wehwehki uwen laud en dipe ko oh koluhla mehlel. Ihme kahrehda Koht ketin mahkohng Manase oh ketin mweidohng en pwurala Serusalem nin duwen nanmwarki men. Imwilahn met, Manase marainkihla me Siohwa iei Koht mehlelo. (2 Kron. 33:13) E kansenamwahu en sukuhlki sang karasaras wet me Siohwa kin ketin mahkohng irail kan me kin koluhla mehlel.

IA DUWE, SIOHWA KIN KETIN MAHK AHNSOU KOAROS?

14. Ia duwen Siohwa eh kin ketin pilada ma e pahn ketin mahkohng aramas emen me wiahda dihp?

¹⁴ Pali laud en sapwellimen Koht aramas akan sohte pahn anahne peki reh en ketin mahkohng dihp kan me laud duwehte ahn Depit oh Manase. Ahpw kitail kak sukuhlki sang ara mehn kahlemeng me atail Koht ketin kupwurki mahkohng dihp laud kan ma me dipano koluhla mehlel.

15. Ia duwen atail ese me Siohwa sohte kin ketin ahnsou koaros mahkohng dihp koaros?

¹⁵ Mehlel, kitail sohte kak nda ni pwung me Siohwa kin ketin ahnsou koaros mahkohng dipen aramas koaros? Me pid met, ahn Depit oh Manase madamadau uhdahn weksang madamadau en aramas sapeik kan nan Israel oh Suda. Ni ahnsou me Depit wiahda dihp, Koht ketin poaronehla Nadan en kihong Depit ahnsou mwahu en koluhla. Depit kalahnganki ahnsou mwahu wet oh koluhla. Manase pil mihla nan irair uhdahn apwal oh pohnese me e anahne koluhkihla dipe kan. Ahpw mehn Israel oh Suda ko sohte kin kalapw koluhkihla diparail kan, mendahki Koht ketin pwurepwurehng poaronehla soukohp kan pwehn ndaiong irail sapwellime madamadau ong arail wiewia suwed kan. Eri, Siohwa sohte ketin mahkohng irail. (Wadek Nehmaia 9:30.) Pil mwurin mehn Israel kan arail pwurasang Papilon pwurala Suda, Siohwa ketin pousehlahte poaronehla meninkeder lelepek kan duwehte samworo Esra oh soukohp Malakai. Ni aramas ko ar kapwaiada kupwuren Siohwa, re uhdahn peren.​—Neh. 12:43-47.

16. (a) Dahme wiawihong wehin Israel pwehki re sohte men koluhkihla diparail kan? (b) Ahnsou mwahu dah me Siohwa ketikihong kadaudok en wehin Israel?

¹⁶ Mwurin Siohwa eh ketin poaronehdo Sises nin sampah pwehn wia meirong unsek ong aramas koaros, e solahr ketin kupwurki meirong en mahn kan me wehin Israel kin anahne wiahda. (1 Sohn 4:9, 10) Ni Sises eh ketiket nin sampah, e mahsanih duwen Serusalem ni ahl ehu me kasalehda duwen sapwellimen Siohwa pepehm. E mahsanih: “Serusalem, Serusalem! Kowe me kemelahr soukohp ako oh kin koasungki takai sapwellimen Koht meninkeder kan me pekederdohng uhk! Pak depe me I kin men pwoalepene noumw aramas akan koaros, rasehng litok emen me kin kompwoalepene nah kisin pwurok kan pahn peh, ke ahpw sohte kin mweidohng ie!” Sises eri mahsanih: “Eri, ke en ese pwe Tehnpas Sarawio pahn tehnla douluhl.” (Mad. 23:37, 38) Wehin Israel, me dipan oh sohte men koluhla, uhd welialikihda “Israel en Koht.” (Kal. 6:16, NW; Mad. 21:43) Ia duwe, emenemen kadaudok en Israel kak ale mahkpen dipe kan? Ei, Siohwa ketin kupwurki mahkohng irail ma re pwoson Koht oh meirong en Sises Krais. Ni ahnsou me irail kan me mehla ahpw sohte koluhkihla diparail iasada nan Paradais, irail pahn paiekihda sapwellimen Siohwa mahk oh kalahngan.​—Sohn 5:28, 29; Wiewia 24:15.

IA DUWEN ATAIL PAIEKIHDA SAPWELLIMEN KOHT MAHK?

17, 18. Ia duwen Siohwa eh kak ketin mahkohng kitail?

¹⁷ Pwehki Siohwa ketin kupwurki mahkohng kitail, dahme kitail anahne wia? Kitail anahne koluhkihla dipatail kan duwehte Depit oh Manase. Kitail en wehkada me kitail dipan, koluhkihla dipatail kan, peki Siohwa en ketin mahkohng kitail oh peki reh en ketin sewese kitail en kesehla atail ineng suwed kan. (Mel. 51:10) Ma kitail wiahda dihp laud ehu, kitail pil anahne koasoiaiong elder kan duwen dahme kitail wiahda pwe ren kak sewese kitail. (Seims 5:14, 15) Sohte lipilipil ia uwen laud en dipatail kan, e kansenamwahu en tamataman me Siohwa iei ‘Koht emen me diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel. E kin kapwaiada eh inou ong me ngeder, oh kin mahkohng me suwed kan oh me dipan akan.’ Siohwa sohte ketin wekila.​—Eks. 34:6, 7.

¹⁸ Siohwa ketin inoukihong mehn Israel koluhla kan me e uhdahn pahn ketin mahkohng diparail kan. E ketin mahsanih me irail weitahtahkilahr diparail kan, ahpw e pahn ketin kamwakeleirailda duwehte “sinoh.” (Wadek Aiseia 1:18.) Eri ia duwen atail kak paiekihda Siohwa eh kupwurki mahkohng kitail? Kitail kak ale mahkpen dipatail kan ma kitail pahn kalahnganki sapwellimen Siohwa mahk oh koluhkihla dipatail kan.

19. Dahme kitail pahn sukuhlki nan iren onop en mwuhr?

¹⁹ Ia duwen atail kak men mahkohng meteikan duwehte Siohwa kin ketin kupwurki mahkohng aramas? Ia duwen atail kak kasalehda mahk ni en meteikan wiahda dihp laud oh koluhkihla? Iren onop en mwuhr pahn sewese kitail en medemedewe duwen atail pepehm pwe kitail en kak duwehte Samatail, Siohwa, me kin “kupwur mwahu oh diren mahk.”​—Mel. 86:5.

[Kilel nan pali 26]

Pwehki sapwellimen Siohwa mahk, Manase pwurala Serusalem oh pwurehng wiahla nanmwarki