Kamehlele Sapwellimen Siohwa Mahk

1-2. Dahme Siohwa kin ketin wia ni atail koluhkihla dipatail kan? (Pil kilang ni kilin Kahn Iroir wet.)

NANMWARKI Depit uhdahn nsensuwedkihla sapwung kan me e wiahda. (Mel. 40:12; 51:3; nting kan me mi pohn irelaudo) Ahpw, e uhdahn koluhla oh Siohwa ketin mahkohng. (2 Sam. 12:13) Imwilahn met, Depit nsenamwahula ni eh wehwehkihda me Siohwa ketin mahkohng.—Mel. 32:1.

² Kitail pil kak nsenamwahula ni atail ese me Siohwa kin ketin kasalehiong kitail kadek kalahngan oh mahkohng dipatail kan. Ia uwen eh kansenamwahu en ese me Siohwa kin ketin kupwurki mahkohng dipatail kan—pil dihp laud kan—ma kitail uhdahn koluhla, wehkada dipatail kan, oh wia uwen atail kak en dehr pwurehng wiahda soangen sapwungohte. (Lep. Pad. 28:13; Wiewia 26:20; 1 Sohn 1:9) Oh kitail uhdahn perenki me ni Siohwa eh kin ketin mahkohng dipatail kan, e sohte pahn ketin pwurehng kapwukoahki de kalokehkin kitail.—Esek. 33:16.

3-4. Ia ahn sister men eh pepehm mwurin eh papidaisla, oh dahme kitail pahn koasoiapene nan iren onop wet?

³ Ahpw ekei pak, ekei kin apwalki kamehlele sapwellimen Siohwa mahk. Ih met me wiawihong Jennifer. Eh pahpa nohno padahkihong ih duwen Siohwa. Ahpw ni ahnsou me e ekis laudla, e tepida wia soahng suwed kan oh ekihsang eh pahpa nohno. Ahpw mwurin sounpar kei, e wiahda wekidekla kan, inoukihong Siohwa eh mour oh papidaisla. E koasoia: “Mwoweo, I kin kalapw wia tiahk samin me pid wia nsenen pwopwoud, sakaula, lingeringer, oh wiahki mwohni me keieu kesempwal ong ie. I ese me Paipel mahsanih me pwehki meirong en Krais, Siohwa kak ketin mahkohng dipatail kan. Ahpw I sohte kak kamehlelehiong pein ngehi me Siohwa kak ketin mahkohng ie.”

⁴ Ke kin ekei pak apwalki kamehlelehiong uhk me Siohwa ketin mahkohngehr sapwung kan me ke wiahda mahso? Ahpw tamataman ia ahn Depit pepehm duwen sapwellimen Siohwa kadek kalahngan. E kamehlele me Siohwa ketin mahkohngehr pwehki Siohwa kin uhdahn ketin kadek kalahngan. Siohwa ketin kupwurki ken pil wia met. Nan iren onop wet, kitail pahn koasoiapene dahme kahrehda kitail anahne kamehlele sapwellimen Siohwa mahk oh dahme kak sewese kitail en wia met.

DAHME KAHREHDA KITAIL ANAHNE KAMEHLELE SAPWELLIMEN SIOHWA MAHK?

5. Dahme Sehdan men kitail en kamehlele? Menlau kihda ehu karasaras.

⁵ Ni atail uhdahn kamehlele sapwellimen Siohwa mahk, kitail sohte pahn lohdi nan ahn Sehdan lidip kan. Tamataman me Sehdan pahn wia uwen eh kak en kauhkitaildihsang papah Siohwa. Pwehn lel eh mehn akadei, Sehdan kakete song en kahrehiong kitail en kamehlele me Siohwa sohte pahn ketin mahkohng dipatail kan. Medewehla dahme wiawihong ohlo nan Korint me wiahda tiahk samin me pid wia nsenen pwopwoud oh mwomwohdiso kihsang nanpwungarail. (1 Kor. 5:​1, 5, 13) Mwuhr e koluhla. Ahpw Sehdan men irail kan nan mwomwohdiso en dehr mahkohng ohlo oh sohte pwurehng kasamwolong nan mwomwohdiso. Oh ma mwomwohdiso sohte mahkohng ohlo, e kakete medewe me Siohwa sohte pahn ketin mahkohng ih. E kakete uhdahn nsensuwedla oh uhdihsang papah Siohwa. Sehdan kin wiewiahte wiepe wet. Ahpw “kitail ese wiepe kan.”—2 Kor. 2:​5-11.

6. Ma kitail kin medemedewehte me Siohwa saikinte ketin mahkohng kitail, dahme kak sewese kitail?

⁶ Ni atail uhdahn kamehlele sapwellimen Siohwa mahk, kitail kak pwurehng ahneki peren. Ni atail kin wiahda dihp, kitail kin nsensuwedkihla dahme kitail wiahdao. (Mel. 51:17) Met mehkot mwahu ehu. Kadeikpen loalatail kak kamwakid kitail en wiahda wekidekla kan oh wia dahme pwung. (2 Kor. 7:​10, 11) Ahpw ma kitail medemedewehte me Siohwa saikinte ketin mahkohng kitail, kitail kakete uhdihsang papah ih. Ahpw ni atail kamehlele me Siohwa uhdahn ketin mahkohng kitail, kitail kak uhdihsang nsensuwedki atail sapwungo. Eri kitail kak papah Siohwa ni nsenmwakelekel oh ni peren, nin duwen me e ketin kupwurki. (Kol. 1:​10, 11; 2 Tim. 1:3) Ahpw ia duwen atail kak kamehlelehiong pein kitail me Siohwa ketin mahkohngkitailehr?

DAHME KAK SEWESE KITAIL EN KAMEHLELE SAPWELLIMEN SIOHWA MAHK?

7-8. Dahme Siohwa ketin padahkihong kitail duwen pein ih, oh dahme kitail kak kamehlele? (Eksodus 34:​6, 7)

⁷ Medewe dahme Siohwa ketin mahsanihki pein ih. Karasepe, medewehla dahme Siohwa ketin mahsanihong Moses ni Nahna Sainai.a (Wadek Eksodus 34:​6, 7.) Mendahki Siohwa ketin sapwellimanki irair kaselel tohto, e ketin pilada en padahkihong Moses me ih “Koht emen me diren kalahngan oh kadek.” Eri ke medewe me ni emen me poakohng Siohwa wiahda dihp oh koluhla, Siohwa sohte pahn ketin mahkohng? Siohwa sohte pahn ketin wia met!

⁸ Kitail kak kamehlele me Siohwa sohte kak ketin mahsanih mehkot likamw duwen pein ih, pwehki ih Koht mehlel men. (Mel. 31:5) Eri kitail kak kamehlele dahme e ketin mahsanih. Ma e apwal ong uhk en sohla nsensuwedki dihp kan me ke wiahda mahso, pein idek rehmw: ‘I kamehlele me Siohwa kin uhdahn ketin kadek kalahngan oh limpoak oh pahn ketin mahkohng mehmen me koluhkihla dipe kan?’ Ma ke kamehlele met, eri ke kak kamehlele me e pil ketin mahkohng uhk.

9. Ia wehwehn Siohwa eh kin ketin mahkohng kitail? (Melkahka 32:5)

⁹ Medewe dahme Siohwa ketin padahkihong kitail nan Paipel duwen eh kin ketin mahkohng kitail. Karasepe, medewehla ia duwen sounnting en Paipelo Depit eh kawehwehda sapwellimen Siohwa mahk. (Wadek Melkahka 32:5.) Depit koasoia: “Komwi ahpw ketin mahkikihong ie dipei kan koaros.” Lepin lokaiahn Ipru me kawehwehdiong “mahkikihong” kak wehwehki “pwekada” de “wahsang.” Ni Siohwa eh ketin mahkohng Depit, e mwomwen me e ketin pwekada dipe ko oh wahsang. Depit kak peren ni eh ese me Siohwa uhdahn ketin mahkohng ih. (Mel. 32:​2-4) Kitail kak ahneki soangen perenohte. Ni atail uhdahn koluhkihla dipatail kan, kitail sohte anahne toutoukihte soahng suwed kan me kitail wiahda. Ahpw kitail kak perenki me Siohwa ketikihsang kitail katoutou wet.

10-11. Dahme mahsen ko “diren mahk” de onopadahr en mahk padahkihong kitail duwen Siohwa? (Melkahka 86:5)

¹⁰ Wadek Melkahka 86:5. Wasaht Depit koasoia me Siohwa kin ketin “diren mahk” de onopadahr en mahk. Met wehwehki me Siohwa sohte kin ketin mwadang lingeringerda ni atail wiahda sapwung kan oh e kin ketin ahnsou koaros kupwurki mahkohng irail kan me koluhla. Dahme kahrehda e kin ketin wia met? Iretikitiko doula mahsanih me Siohwa kin ketin ‘diren limpoak poatopoat ong koaros me kin patohwan kapakapohng ih.’ Nan iren onop en mwoweo, kitail sukuhlki me Siohwa ketin inoukihda en kasalehiong irail kan me kin poakohng ih limpoak loalopwoat oh sohte pahn ketin keseirailla. Pwehki sapwellime limpoak loalopwoat, e pahn ketin “mwadang mahkikihong” dipen irail koaros me koluhla. (Ais. 55:7) Ma ke kin peikasalkihte ma Koht ketin mahkikihong uhk mehkot me ke wiahda mahso, medewehla met: Ma ke kamehlele me Siohwa kin ketin onopadahr en mahkohng koaros me koluhla, oh kapakapki sapwellime kalahngan, eri ke kak kamehlele me e pil ketin mahkohng uhk ni omw pekmahk reh.

¹¹ Paipel pil padahkihong kitail me Siohwa uhdahn ketin mwahngih ia duwen atail wiawihda oh me kitail sohte unsek. Met kak kansenamwahwih kitail. (Mel. 139:​1, 2) Kitail pahn kilang dahme Depit koasoia nan ehu Melkahka oh ia duwen met eh kak sewese kitail en pil kamehlele me Siohwa ketin kupwurki mahkohng kitail.

DAHME SIOHWA KIN KETIN TAMATAMAN DUWEN KITAIL

12-13. Nin duwen me Melkahka 103:14 mahsanih, dahme Siohwa kin ketin tamataman duwen kitail, oh dahme met kamwakid en ketin wia?

¹² Wadek Melkahka 103:14. Depit kihda ehu kahrepen Siohwa eh kin ketin onopadahr en mahkohng irail kan me koluhkihla diparail kan. E koasoia me Siohwa kin “ketin tamataman me kitail uhdahn pwehl,” me wehwehki, Siohwa kin ketin ahnsou koaros mwahngih me kitail kin wiahda sapwung kan. Kitail pahn kalaudehla atail wehwehki dahme Depit koasoia.

¹³ Depit koasoia me Siohwa ketin “mwahngih dahme kitail wiawihkihda.” Siohwa ketin wiahda Adam sang “nesen pwehl ehu sang nanpwel.” Eri e ketin mwahngih ia duwen aramas akan ar wiawihda oh dahme re anahne. Karasepe, irail anahne mwenge, meir, oh esingek. Aramas unsek kan pil anahne soahng pwukat. (Sen. 2:7) Ahpw pwehki Adam oh Ihp dipada, wehwehn atail wiawihdahsang pwehl pil wehwehki me kitail ahneki luwet kan pwehki atail sohsohki dihp. Kitail pwehl pwehki atail sohte unsek oh anahne pelipelian atail men wia sapwung kan. Siohwa ketin mwahngih me pwehki kitail sohsohki dihp, ekei pak kitail pahn wiahda sapwung kan. Oh ni atail kin wiahda sapwung kan oh koluhla, e kin ketin kasalehiong kitail kadek kalahngan oh mahkohng kitail.—Mel. 78:​38, 39.

14. (a) Dahme Depit pil koasoiahki duwen Siohwa eh kin ketin mahkohng kitail? (Melkahka 103:12) (b) Dahme kitail kak sukuhlkihsang mwomwen Siohwa eh ketin mahkohng Depit? (Menlau kilang kakono “Ia Duwen Siohwa Eh Kin Ketin Mahk oh Manokehla.”)

¹⁴ Dahme pil kak sewese kamehlelehiong kitail me Siohwa ketin mahkohngkitailehr? (Wadek Melkahka 103:12.) Depit koasoia me ni Siohwa eh kin ketin mahkohng kitail, e kin ketin “kadohwaneweisang kitail dipatail kan” duwehte “mesenleng oh kepinleng ara dohpeseng.” Wasa me ketipino kin dakada oh wasa me e kin kihrla uhdahn dohpeseng. Met wehwehki me ni Siohwa eh kin ketin mahkohng dipatail kan, e mwomwen me e kin ketin kadohwaneweisang kitail douluhl dipatail kan. E kin ketin kadohwaneweisang kitail dipatail kan me kahrehda sohte mehkot kak kahrehiong en ketin pwurehng medewe de kalokehkin kitail dipatail kan.—Esek. 18:​21, 22; Wiewia 3:19.

15. Dahme kitail kak wia ma kitail kin suwedkihte sapwung kan me kitail wiahda mahso?

¹⁵ Ia duwen dahme Depit koasoia nan Melkahka 103 eh kak sewese kitail en kamehlele sapwellimen Siohwa mahk? Medewehla duwen sapwellimen Siohwa pepehm. E kin ketin tamataman me kitail sohte unsek. Oh e kin ketin mahkohng koaros me koluhkihla diparail kan. Ih met me ke wia. Pil tamataman me Siohwa ketin pilada en dehr ketin pwurehng medewe de katamankihong uhk dipomw kan me e ketin mahkohngehr. Eri e sohte pahn ketin pwurehng kapwukoahki de kalokehkin uhk. Siohwa sohte kin ketin medemedewehte dihp kan me kitail wiahda mahso. Kitail en pil dehr wia met. (Mel. 130:3) Ni atail kamehlele me Siohwa uhdahn ketin mahkohng kitail, kitail kak uhdihsang suwedki sapwung kan me kitail wiahda mahso oh pousehlahte papah ih ni peren.

16. Kihda ehu karasepe me kasalehda me e keper en medemedewehte dihp kan me Siohwa ketin mahkohngehr. (Pil kilang kilel.)

¹⁶ Medewehla karasaras wet. Ni emen eh kin diraipih sidohsa ehu, ele e kin kilang nan kilahso pwehn kilang dahme kohkohdo mwuri. Ele e kin pwurupwurehng wia met, ahpw e pahn keper ma e kin ahnsou koaros kilang nan kilahso. Pwehn dehr lelohng nan keper, e anahne kilenglahngete nan ahlo. Duwehte met, e mwahu en ekei pak medewe sapwung kan me kitail wiahda. Met kak sewese kitail en dehr pwurehng wiahda sapwungohte. Ahpw ma kitail kin medewehte dihp ehu me Siohwa ketin mahkohngehr, kitail kak sohla ahneki peren oh uhdihsang papah Siohwa. Ahpw kitail en medemedewehte atail papah Siohwa oh duwen ahnsou kohkohdo me e ketin inoukihda ni soahng suwed kan me kitail kin medewe “pahn manokonokla douluhl.”—Ais. 65:17; Lep. Pad. 4:25.

POUSEHLAHTE KAMEHLELEHIONG UHK SAPWELLIMEN SIOHWA MAHK

17. Dahme kahrehda kitail anahne pousehlahte kamehlelehiong pein kitail sapwellimen Siohwa limpoak oh mahk?

¹⁷ Kitail anahne pousehlahte kamehlelehiong pein kitail sapwellimen Siohwa limpoak oh mahk. (1 Sohn 3:19) Dahme kahrehda? Pwehki Sehdan pahn pousehlahte song kamehlelehiong kitail me Siohwa sohte ketin poakohng kitail oh sohte pahn ketin mahkohng kitail. Sohte lipilipil dahme e pahn wia, eh mehn akadei duduwehte, me iei en kauhkitaildihsang papah Siohwa. Kitail kak kasik me Sehdan pahn kalaudehla eh nannanti pwehki e ese me eh ahnsou mwotomwotlahr. (Kaud. 12:12) Kitail en dehr mweidohng en kana!

18. Dahme ke kak wia pwehn kamehlelehiong uhk sapwellimen Siohwa limpoak oh mahk?

¹⁸ Pwe ken likih sapwellimen Siohwa limpoak, doadoahngki iren sawas kan me kitail koasoiapene nan iren onop en mwoweo. Pwehn kamehlelehiong uhk sapwellimen Siohwa mahk, medemedewe dahme e ketin mahsanihki pein ih. Doudouloale dahme Paipel mahsanihki duwen sapwellime mahk. Dehr manokehla me e kin ketin ahnsou koaros mwahngih me ke sohte unsek oh pahn ketin kasalehiong uhk kadek kalahngan. Oh tamataman me ni eh kin ketin mahkohng emen, e uhdahn kin ketin mahkohng douluhl. Eri ke kak peren pwehki ke kamehlele me Siohwa ketin kasalehiong uhk kadek kalahngan, oh duwehte Depit, ke kak nda, “Kalahngan Siohwa omw ‘mahkikihong ie dipei kan koaros’!”—Mel. 32:5.