Siohwa, Koht Emen “Diren Mahk Ong Kitail”

“Komwi [Siohwa], me kupwur mwahu oh diren mahk ong kitail.”​—MELKAHKA 86:5.

1. Katoutou dahieu me Nanmwarki Depit weuwa, oh iaduwen e diar kamweitpen ah irairen loal ohla?

NANMWARKI DEPIT en Israel en mahs ese ia uwen toutou ong emen ma ah nsenmwakelekel kin ohla. E ntinghdi: “I mwopwlahr nan ahd en dipei kan, dipei kan katoutouwihielahr, I solahr kak wahda. I weikeklahr oh mwoahtohtalahr; mohngiongiet miher nan apwal, oh I weiweirengki ei medek.” (Melkahka 38:​4, 8) Ahpw, Depit kin diar kamweitpen ah irair en loal ohla. E eseher me edetehn Siohwa kin kalahdeki dihp, Siohwa sohte kin kailongki aramas me wiahda dihp​—⁠ma aramas dipan pahn koluhla mehlel oh soikala dihp. (Melkahka 32:5; 103:3) Ki pwoson unsek sapwellimen Siohwa diren mahk ong aramas akan me kin koluhla, Depit mahsanih: “Komwi [Siohwa], me kupwur mwahu oh diren mahk ong kiht.”​—⁠Melkahka 86:5.

2, 3. (a) Ni ahnsou kitail kin wiahda dihp, katoutou dahieu kitail pahn weuwa oh dahme kahrehda met pahn kak sewese kitail? (b) Keper dahieu mie, ma emen pahn mweidong eh nsensuwed en powehdi ih? (c) Dahme Paipel mahsanih duwen me Siohwa pahn perenki mahkong kitail dihpatail kan?

² Ni ahnsou me kitail kin wiahda dihp, ele mwein kitail pil kin nsensuwed laudkihla. Pepehm en nsensuwed wet iei mehkot me kin wiawihong kitail koaros oh pil kak sewese kitail. E kak kamwekid kitail en kapwungala atail sapwung kan. Ahpw, ekei Kristian akan, kin mweidong ahr nsensuwed en powehdi irail. Pein kadeikpen loalarail kin kahreong ren pein lemeleme me Koht sohte kin ketin mahkong irail, sohte lipilipil ia uwen laud en arail koluhla. Emen sister medemedewe duwen sapwung me e wiahda, oh e koasoiada met: “Ke pahn inenen nsensuwed, ma ke ahneki madamadau me Siohwa sohlahr poakohng uhk.” Oh pil mwurin sister menet koluhla oh ale kaweid mwahu sang rehn elder kan en mwomwohdiso, e saikinte leme me e warohng sapwellimen Koht mahk. E kawehwehda: “Rahn koaros I kin peki rehn Siohwa en mahkongie.” Ma kitail mweidong “nsensuwed en wie lalaudla”, Sehdan kak song en kaluwetala kitail lao lel kitail uhdi, oh lemeleme me kitail sohte warong papah Siohwa.​—2 Korint 2:​5-7, 11.

³ Ahpw, Siohwa sohte kin kilangwong irair pwukat ni ahl wet! Sapwellime Mahsen padahkiong kitail, me ni ahnsou me kitail kin kasalehda koluhla mehlel, Siohwa kin perenki kasalehda mahk. (Lepin Padahk 28:13) Eri, ma kitail ahneki madamadau me Koht sohte kak mahkong kitail, ele mwein kitail anahne en wehwehki dahme kahrehda oh iaduwen e kin mahkong dihpatail kan.

Dahme Kahrehda Siohwa “Diren Mahkong Kitail”?

4. Dahme Siohwa kin tamanda duwen irairen aramas akan, oh iaduwen met kin doahke sapwellime wiewia kan ong kitail?

⁴ Kitail wadek: “Duwen mesenleng oh kepinleng ara dohpeseng, ih duwen eh kin ketin kadohwaneweisang kitail dipatail kan. Duwen sahm emen eh kin kadekohng nah seri kan, ih duwen Kauno [Siohwa] eh kin ketin kupwurkalahngan ong irail kan me kin wauneki.” Dahme kahrehda Siohwa kin kasalehda mahk kalahngan? Ire tikitik en mwuri sapengki met: “Pwe e mwahngih dahme kitail wiawihkihda; e pil ketin tamataman me kitail uhdahn pwehl.” (Melkahka 103:12-​14) Ei, Siohwa sohte manokehla me kitail wiawihkihda pwehl, pil mie atail luwet akan pwehki dihp. Lepin lokaia “mwahngih dahme kitail wiawihkihda” kin katamankin kitail me Paipel kin karasaiong Siohwa duwehte emen soun wiahda dahl akan oh kitail aramas duwehte dahl kan me Siohwa wiahda.a (Seremaia 18:​2-6) Sounwiadahl me kin doadoahngki pwehl pwehn wiahkihda dahl kin koledi teng dahl akan, ahpw ni keneinei, pwe e ese dahme dahl kan kin wiawikihda. Duwehte, Siohwa, Sounwiadahl Lapalap, kin kanahieng apwalih kitail, pwe e ese me kitail aramas soh-unsek kei.​—⁠Pil kilang 2 Korint 4:7.

5. Iaduwen pwuhken Rom kin kawehwehda duwen ia uwen kehlail dihp kin koledi paliwaratail kan?

⁵ Siohwa wehwehki ia uwen kehlail dihp. Iren Paipel kan kawehweh dihp nin duwen irair kehlail ehu me koledi aramas akan. Ia uwen kehlail dihp? Nan pwuhken Rom, Koht me kamwekid Pohl en kawehwehda met ni oaretik: Kitail mih “pahn manaman en dihp,” nin duwen sounpei kan pahn ahr kaun (Rom 3:9); e kin “kakaun” pohn aramas nin duwen nanmwarki men (Rom 5:​21); e kin “momour loalatail” (Rom 7:​17, 20); “koasoandi tohrohr wet” kin wia doadoahk ni paliwaratail kan. (Rom 7:​23, 25) Ia uwen apwal kitail en uhweng paliwaratail soh-unsek!​—Rom 7:​21, 24.

6. Iaduwen Siohwa kin kilangwong irail akan me koluhla mehlel oh kin rapahki sapwellimen Siohwa mahk kalahngan?

⁶ Ihme kahrehda, atail Koht ketin mwahngih me kitail sohte kak peikiong ih ni unsek, mehnda ma pein loalatail men peikiong ih. (1 Nanmwarki 8:​46) Ni limpoak e kin kaselehong kitail e pahn ketin mahkohng kitail, ni ahnsou kitail kin koluhla mehlel oh kin rapahki sapwellime mahk kalahngan. Sounmelkahka Depit mahsanih: “Ei meirong, Maing Koht, iei koluhla mehlel en nan kapehdi; pwe komw sohte pahn ketin soikala koluhla mehlel oh peik en nan kapehd.” (Melkahka 51:17) Siohwa sohte pahn soikala, de sohpeiweisang, emen me loal ohla de toutouki ohlahn nsenmwakelekel. Ia uwen kaselel met kin kawehwehong kitail duwen sapwellimen Siohwa irairen diren mahkong kitail!

7. Dahme kahrehda kitail sohte kak isaneki sapwellimen Koht irairen mahk?

⁷ Met kin wehwehki, me kitail kak isaneki sapwellimen Koht mahk kalahngan, ikidiki atail luwet kan pwehn wiahda dihp? Soh douluhl! Siohwa sohte kin mweidong sapwellime pepehm kante en wiahda eh pilipil kan. Mie irepen Sapwellime irairen mahk kalahngan. E sohte pahn kasalehda mahk ong irail akan me kin kalap wiahda dihp ahpw sohte koluhla. (Ipru 10:26-​31) Ni pali teieu, ni ahnsou me e kin kilang aramas men me “loal ohla”, e kin “diren mahk.” (Lepin Padahk 17:3) Kitail pahn sukuhliki ekei lepin lokaia kan me diarekda nan Paipel me kin kawehwehda duwen irairen mahk unsek me kohsang powe.

Ia Uwen Unsek Siohwa kin Kaselehda Mahk?

8. Dahme Siohwa kin wia, ni ahnsou me e mahkong dihpatail kan, oh ia lipwen met ong kitail?

⁸ Nanmwarki Depit me koluhla oh mahsanih: “I ahpw wehkadahng komwi dipei kan, oh sohte ekihla ei sapwung kan. I lemedahr I en wehkadahng komwi ei ketihwo kan, komwi ahpw ketin mahkikihong ie dipei kan koaros.” (Psalm 32:5) Lepin lokaia “mahkikiong” ni lokaiahn Ipru kin wehwehki “pwekada” de “weuwa.” Lepin lokaia me kin kadoadoahkong nan iren Paipel wet kin wehwehki ‘kihsang ohlahn nsenmwakelekel, dihp.’ Eri, Siohwa pwekada de kihsang dipen Depit. (Pil kilang Lipai 16:20-​22.) Met kin kansenamwahuiala ohlahn nsenmwakelekel en Depit me eh weuwaseli. (Pil kilang Melkahka 32:3.) Kitail pil kak ni unsek liki Koht me kin mahkong dihp en aramas akan me kin koluhla ni ahr pwoson tomw meirong en Sises Krais. (Madiu 20:28; pil kilang Aiseia 53:12.) Irail akan me Siohwa kin pwekada de wahlahsang dihparail kan sohlahr pahn ahneki ohlahn nsenmwakelekel.

9. Ia wehwehn mahsen en Sises: “Komw ketin mahkikihong kiht aht pweipwand akan”?

⁹ Sises doadoahngki karasaras en sounkihda pweipwand oh aramas en pweipwand pwen kasansalehda iaduwen Siohwa kin kasalehda mahk. Karasepe ieu, Sises kangoange kitail en kapakapki: “Komw ketin mahkikihong kiht [aht pweipwand] akan.” (Madiu 6:​12) Sises karasaiong “dihp” duwehte “pweipwand.” (Luk 11:4) Ni ahnsou kitail kin wiahda dihp, kitail kin “pweipwand” ong Siohwa. Lepin lokaia “mahkong” ni lokaiahn Krihk kak wehwehki “kadar, manokehla pweipwand, sohte iding emen en kapwungala eh pweipwand.” Ni ahnsou me Siohwa kin kasalehda mahk, e kin kihsang pweipwand me kitail pahn anahne kapwungala. Irail akan me kin koluhla mehlel pahn kak nsenamwahula. Siohwa sohte pahn kak iding emen en kapwungala eh pweipwand me e ketin kihsangehr!​—⁠Melkahka 32:​1, 2; pil kilang Madiu 18:23-​35.

10, 11. (a) Ia wehwehn lepin lokaia pwukat ‘kamwakeleweisang,’ me diarekda nan pwuhken Wiewia 3:​19? (b) Karasaras dahieu me kasalehda sapwellimen Siohwa mahk ni unsek?

¹⁰ Nan pwuhken Wiewia 3:​19, Paipel kin doadoahngki pil ehu lepin lokaia tohrohr me kin kasansalehda sapwellimen Koht mahk: “Eri, kumwail koluhla oh wiliakapwala oh wekiong Koht pwe en ketin kamwakeleweisang kumwail dipamwail kan.” Lepin lokaia pwukat ‘kamwakeleweisang’ ni lepin lokaia ehu ni lokaiahn Krihk ni karasaras kak wehwehki “kihsang, kasorehla.” Nin duwen ekei me loalokong (scholars), kawehwehda met duwehte irihsla nting kan. Iaduwen met kin wiawi? Ingk en mehn nting kan, me mehn mahs kan kin doadoahngki kin wiawikihda carbon, gum, oh pihl. Mwurinte emen pahn doadoahngki ingk met, emen kak doadoahngki lihmw wisikisik oh lihmwihsang nting kan.

¹¹ Met kin kawehwe ong kitail koaros ni kaselel duwen sapwellimen Siohwa mahk ni unsek. Ni ahnsou me e kin mahkong dihpatail kan, mwomwen e duwehte kin doadoahngki lihmw ehu oh lihmwiasang dihpatail kan. Kitail sohte anahne perki me e pahn kolokolte oh tamataman dihpatail kan oh doadoahngki met ong ni ahnsou kohkohdo, pwe Paipel kin kasansalehda mehkot duwen sapwellimen Siohwa mahk me inenen kaselel: Ni ahnsou me e kin mahkohng emen, e kin manokehla dipe kan!

“I Solahr Pahn Tamanda Arail Sapwung kan”

12. Ni ahnsou Paipel mahsanih me Siohwa kin manokehla dipatail kan, met kin wehwehki me e sohte kak tamanda dipatail kan, oh dahme kahrehda ke sapengki met?

¹² Ki soukohp Seremaia, Siohwa inoukihong irail kan me mih pahn kosonned kapwo: “I pahn mahkikihong diparail kan oh I solahr pahn tamanda arail sapwung kan.” (Seremaia 31:34) Ahpw, met kin wehwehki me Siohwa sohte kak tamanda dihp en aramas akan ni ahnsou me e pahn mahkong irail? Soh douluhl. Paipel mahsanihong kitail duwen aramas tohto me eh mahkong, Depit pil emen. (2 Samuel 11:​1-​17; 12:​1-​13) E sansal me Siohwa sohte manokehla dihp me aramas akan wiahda, oh kitail en pil duwehte. Rekohd en dihparail kan, iangahki ahr koluhla oh mahk me Koht kasalehda, ntingdier pwe en padahkih kitail. (Rom 15:4) Eri, ia wehwehn met, ni ahnsou Paipel mahsanih duwen Siohwa sohte pahn “tamanda” dihpen irail akan me e kin ketin mahkong?

13. (a) Ia wehwehn lepin lokaia pwukat ni lokaiahn Ipru “I pahn tamanda”? (b) Ni ahnsou Siohwa mahsanih, “I sohlahr pahn tamanda ahr sapwung kan,” dahme e kin padahkiong kitail?

¹³ Lepin lokaia ni lokaiahn Ipru “I pahn tamanda” kin wehwehki laudsang ihte tamatamanda dahme wiawi mahs. Nin duwen pwuhk wet me adaneki Theological Wordbook of the Old Testament, e kapationg “e kin wehwehki en tepida wia mehkot me konehng.” Ni ahl wet, en “tamanda” dihp, kin wehwehki tepida wia mehkot me konehng ong aramas dipan akan. Ni ahnsou soukohp Oseia koasoi duwen mehn Israel sapeik akan. “Koht [Siohwa] pahn ketin tamanda diparail,” soukohpo kin lemeleme me Siohwa pahn tepida wia mehkot ong irail pwehki ahr sohte kin koluhla. Ihme, iretikitik kan kapataiong: “e pahn kalokehkin irail.” (Oseia 9:9) Ni pali teieu, ni ahnsou me Siohwa mahsanih, “I solahr pahn tamanda arail sapwung kan,” e kamehleleiong kitail me ni ahnsou me e pahn mahkong aramas men me koluhla, e sohte pahn kaloke aramaso mwuhr ong dihp me e wiahdao. (Esekiel 18:21, 22) E kin manokehla ni ahl me e sohte pahn pwurpwurehng katamankin kitail duwen dihp me kitail wiahda mahs pwen kak kaloke kitail. Siohwa wia mehn kalehmeng mwahu ong kitail koaros. Ni ahnsou me sawehwe oh akamai kin wiawi nanpwungatail oh e pahn mwahu kitail en dehr kapwurehda sapwung en mehteikan me ke mahkikiongehr irail.

Iaduwen Lipwehn Dihpatail kan?

14. Dahme kahrehda mahk sohte kin wehwehki me aramas dipano me koluhla pahn pitsang lipwen eh wiewia sapwung kan?

¹⁴ Pwehki Siohwa kin perenki mahkong aramas men me koluhkihla dipe kan, met kin wehwehki kitail sohte pahn pwukoahki lipwehn dihpatail kan? Soh. Kitail sohte kak wia dihp oh sohte pahn ale kalokolok. Pohl ntingihdi: “Pwe mehkot me aramas pahn padokedi, ihme e pahn dolung.” (Kalesia 6:7) Ele kitail pahn lelong irair kan pwehki sang atail wiewia kan de kahpwal akan, ahpw mwurin Siohwa kin mahkong kitail, e sohte pahn kahrehong kitail en lelong kahpwal. Ni ahnsou me kahpwal akan pahn pwarada, Kristian men sohte anahne ahneki madamadau wet, ‘Ele mwein Siohwa kin kaloke ie pwehki dihp kan me I wiahda mahs.’ (Pil kilang Seims 1:​13.) Ni pali teieu, Siohwa sohte pahn pere kitail sang lipwen atail wiewia sapwung kan. Mweipeseng, liseian en kiripw, soumwahu sang wiewiahn nenek, sohla likilik de wahu​—⁠mehpwukat koaros kin wiawi pwehki dihp me emen wia, oh Siohwa sohte pahn pere kitail. Tamanda, edetehn Siohwa mahkong Depit pwehki dihp me e wiahda rehn Padsipa oh ong Uriah, Siohwa sohte pere Depit sang lipwen dihp me e wiahda.​—⁠2 Samuel 12:⁠9-​14.

15, 16. Iaduwen kosonnedo me ntingdier nan pwuhken Lipai 6:​1-7 kin wia kapai ehu ong aramaso me ah dipwisou kan pirapasang oh sounlipirapo?

¹⁵ Dihp akan me kitail wiahda pahn pil karehdo irair teikan. Tehk karaspen dahme wiawi nan pwuhken Lipai irelaud 6. Kosonned en Moses koasoi duwen ni ahnsou me aramas men pahn wiahda sapwung laud, ni ah pahn adiasang ahn ienge mehn Israel dipwisou kan ni ah pirapla, de doadoahngki manaman ni ahl sapwung, oh likamw. Aramas me wiahda dihpo ahpw kahmahmki me e pirap, oh pil likamwkihda eh kahula. Irair wet kin pid sohte mehn kadehde ong pali koaros. Ahpw, mwuhr, aramaso me wiahda dihp kin toutoukihla met oh wekada dipe. Mwohn Koht pahn mahkong ih, e anahne pil wiahda kahk siluh wet: kapwurehla dahme e pirapala, pwainla persent 20, oh meirongki sihpw wol nin duwen meirong en dipen aramaso. Kosonnedo mahsanih: “Samworo ahpw pahn meirongkihla pwehn wia meirong en dipen aramaso, dipeo ahpw pahn lapwada.”​—⁠Lipai 6:​1-7; pil kilang Madiu 5:​23, 24.

¹⁶ Kosonned wet iei ehu koasoandi kaselel me kohsang rehn Koht. Aramas me ah dipwsou pirapasang kin paiekihda, e pahn pwurehng ale eh dipwisou kan oh nsenamwahula ni ahnsou me aramaso me wiahda dihp koluhla. Ni ahnsowohte, meno me wiahda dihp pahn paiekihda kosonned wet, ni ahnsou me eh nsenmwakelekel ohla pahn kamwekid ih en wehkada dipe kan oh kapwungala eh sapwung. Ni mehlel, ma e kahng wehkada dipe kan, Koht sohte pahn mahkong ih.

17. Ni ahnsou mehteikan kin nsensuwedki dihp me kitail wiaiong irail, dahme Siohwa kupwureki kitail en wia?

¹⁷ Edetehn kitail sohte mih pahn Kosonned en Moses, e kin padahkiong kitail duwen sapwellimen Siohwa madamadau kan me kin pid sapwellime mahk. (Kolose 2:​13, 14) Ni ahnsou me aramas teikan kin lelong kahpwal pwehki dihp me kitail wiahda, Siohwa kin perenki kilang kitail wia dahme kitail kak wia pwehn ‘kapwungala sapwung.’ (2 Korint 7:​11) Met kin pidada atail pahn pohnese dipatail kan, wehkada, oh pekmahk rehn meno me kitail wia dihp ong. Kitail kak peki rehn Siohwa sang ni poahson en meirong en Sises oh ahneki nsenmwakelekel oh kak liki me Koht ketin mahkong kitail.​—⁠Ipru 10:21, 22.

18. Kaiahn dahkei pahn kak iang sapwellimen Siohwa mahk?

¹⁸ Duwehte pahpa oh nohno limpoak kan, Siohwa pahn kasalehda mahk iangahki kaiahn. (Lepin Padahk 3:​11, 12) Me kin pid duwen dihp laud, Kristian men me koluhkihla dipe, ele pahn anahne kommoalsang eh pwais nin duwen elder men de ministerial servant men, de pioneer men. Mwein pahn kamedek ong ih en sohla ahneki pwais pwukat me e kin kesempwalki ong ahnsou kis. Kaiahn wet, sohte kin wehwehki me e solahr kenikenla rehn Siohwa de Siohwa sohla kin mahkong ih. Patehng met, kitail anahne tamanda me kaiahn me kin kohsang rehn Siohwa, kin wia kadehdepen me e poakohng kitail. Ale kaweid oh kapwaiada kin kak sewese kitail laud oh kaluwalahng mour soutuk.​—⁠Ipru 12:​5-​11.

19, 20. (a) Ma ke wiahda sapwung kan, dahme kahrehda ken dehr lemeleme me Siohwa sohte pahn kasalehda mahk ong uhk? (b) Dahme kitail pahn onop nan artikel en mwuhr?

¹⁹ Ia uwen kainsenamwahu en ese me kitail kin papah Koht emen me “diren mahk ong kitail”! Siohwa kin kilang loalsang dipatail kan oh sapwung kan. (Melkahka 130:​3, 4) E ketin mwahngih dahme mih loalatail. Ma ke pehm me loalomw ohla pwehki sapwung kan me ke wiahda mahso, dehr mwadang lemeleme me ke sohte kak ale sapwellimen Siohwa mahk. Sohte lipilipil soahngen sapwung kan me ke wiahda mahso, ma ke koluhla mehlel, oh nantiong en kapwungala ahmw sapwung, oh kapakap ni ngidingid peki Siohwa en mahkong uhk me poasoanda pohn ntahn Sises, ke kak liki me mahsen en 1 Sohn 1:9 pahn pweida rehmw: “A ma kitail wehkadahng Koht dipatail kan, e pahn ketin kapwaiada sapwellime inou oh eh pahn ketin wiewia me pwung: eri, e pahn mahkikihong kitail atail sapwung kan koaros.”

²⁰ Paipel kin kangoangehkin kitail en alasang Sapwellimen Siohwa mahk rehn riatail kan. Eri, ia uwen laud atail en mahk oh pil manokehla dipen meteikan ni ahnsou me aramas teikan pahn wia dihp ong kitail? Kitail pahn koasoi met nan artikel en mwuhr.

[Nting tikitik me mi pah]

Ia duwen Ke Pahn Sapeng?

◻ Dahme kahrehda Siohwa “diren mahkong kitail”?

◻ Iaduwen Paipel kin kawehwehda duwen sapwellimen Siohwa mahk unsek?

◻ Ni ahnsou Siohwa kin kasalehda mahk, ni ahl dahieu e pahn manokehla?

◻ Dahme Siohwa kupwurki kitail en wia ni ahnsou mehteikan kin nsensuwedki dihp me kitail wiaiong irail?

[Kilel nan pali 24]

Ni ahnsou mehteikan kin nsensuwedki dihpatail kan, Siohwa kupwureki kitail en kapwungala