PALI PAHIEU
Nsensuwedkihla Omw Wiahda Sapwung—“Kamwakeleiehda Sang nan Dipei kan”
“Ei doadoahk kapwo kahrehda se ekis paiamwahula, ahpw e pil kahreielahng ni soangen mwekid kan me sohte pahrekiong Paipel. I tepida iang kasarawi rahn en kasarawi kan, iang pidada wiewiahn palien politik kan, oh pil iang towehda sarawi teikan. Ngehi emen Sounkadehdehn Siohwa ahpw I sohla kin patehng mwomwohdiso erein sounpar 40. Uwen wereilahn ei sohla patehng mwomwohdiso, ih uwen laud en ei kin lemeleme me I sohla warohng sapwellimen Siohwa mahk. I pehm me I sohte kak mahkohng pein ngehi. Pwehki I esehier padahk mehlel mwohn ei tepida wiahda sapwung pwukat.”—Martha.
EN NSENSUWEDKIHLA omw wiahda sapwung kak wia mehn katoutou ehu me kak kauweiukala. Nanmwarki Depit ntingihedi: “I mwopwlahr nan ahd en dipei kan, dipei kan katoutouwihielahr, I solahr kak wahda.” (Melkahka 38:4) Ekei Kristian kan kin mweidohng nsensuwed laud en poweiraildi, me kahrehiong ren medewe me Siohwa sohte pahn kak ketin mahkohng irail. (2 Korint 2:7) Ia duwe, madamadau wet pwung? Mendahte ma ke wiahda dihp laud kan, ia duwe, met wehwehki me ke dohsangehr Siohwa me kahrehda e sohte pahn ketin mahkohng uhk? Uhdahn soh!
“Kitail Kapwungala Mahs Ire Pwukat”
Siohwa sohte kin ketin meliehla irail akan me dipan oh koluhla. Ni mehlel, e kin ketin keiong mparail! Nan karasaras en pwutak me salongalao, Sises kin ketin karasahiong Siohwa nin duwen pahpa limpoak men me nah pwutako kesehla eh peneinei oh wiahda mour samin. Kedekedeo, pwutako pilada en pwurala ni imweo rehn eh peneinei. “E saikinte karanih ihmwo, a eh pahpao kilangada. Nan kapehde mwekidkihda kowahlap kompoakehn nah pwutako; ih eri tangalahte pwoalehdi oh metik.” (Luk 15:11-20) Ke sou kin men karanihala Siohwa ahpw ke pehm me ke dohsang ih? Duwehte pahpao nan karasaraso, Siohwa kin ketin kasalehda eh kin ketin poakeiukala. E kin ketin kasikasik en kasamwo iuk.
Ahpw ia duwen ma ke kamehlele me dipomw kan nohn laud de tohto kahrehda Siohwa sohte pahn kak ketin mahkohng uhk? Menlau tehk sapwellimen Siohwa luhk me kileldi nan Aiseia 1:18: “KAUN-O pil mahsanih, ‘Kumwail kohdo kitail kapwungala mahs ire pwukat. Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh.’” Ei, mendahki ma dipomw kan mwomwen rei ehu me tengala ni likou pwetepwet me sohte kak kohsang, met sohte wehwehki me ke sohte kak ale sapwellimen Siohwa mahk.
Siohwa sohte ketin kupwurki ken kin wie lokolongki omw sapwung kan nan kadeikpen loalomw. Eri, ia duwen omw kak ahneki nsenamwahu me kohsang sapwellimen Koht mahk oh nsenmwakelekel? Tehk kahk riau me Nanmwarki Depit wiahda. Keieu, e koasoia: “I lemedahr I en wehkadahng komwi ei ketihwo kan.” (Melkahka 32:5) Tamataman me Siohwa ketin lukeiiukehr en kin kapakapohng ih oh “kapwungala mahs” soahng kan reh. Menlau ale luhk wet. Wehkada dipomw kan ong Siohwa, oh ehukihong ih omw pepehm kan. Sang ni soahng kan me e pein lelohng, Depit kak ni koapworopwor kapakapki: “Kamwakeleiehda sang nan dipei kan! . . . Komw sohte pahn ketin soikala koluhla mehlel oh peik en nan kapehd.”—Melkahka 51:2, 17.
Keriau, Depit alehdi sawas sang soukohp Nadan, me pilipilda en wia wiliepen Koht. (2 Samuel 12:13) Rahnwet, Siohwa ketikihdahr elder kan nan mwomwohdiso me kaiahnda pwe ren sewese me dipadahr ahpw koluhla en pwurehng kamwahwihala arail nanpwungmwahu rehn Siohwa. Ni ahnsou me ke tuhwong elder kan, re pahn doadoahngki Paipel oh wia kapakap me pahn kak kansenamwahwihala loalomw de katikala de kihsang omw madamadau sapwung kan oh seweseiuk en kamwahwihala omw nanpwungmwahu rehn Siohwa.—Seims 5:14-16.
Siohwa ketin kupwurki ken nsenamwahuki omw nsenmwakelekel
“Meid Pai Aramas me Kin Ale Lapwepen Dipe kan”
Ni mehlel, ele ke pahn pehm me wehkohng dipomw kan ong Siohwa Koht oh tuhwong elder kan pahn wia soahng kan me keieu apwal me ke kak wia. E sansal me Depit pil ahneki soangen pepehmohte. E ‘sohte wehkada’ dipe kan mwurin ahnsou kei. (Melkahka 32:3) Ahpw mwuhr e wehwehkihda kamwahupen eh wehkada dipe kan oh kapwungala soahng sapwung kan me e wiahda.
Kamwahu me keieu laud iei Depit pwurehng alehdi eh peren. E ntingihedi: “Meid pai aramas me kin ale lapwepen dipe kan, me Koht kin ketin mahkikihong eh sapwung.” (Melkahka 32:1) E pil kapakapki: “Maing ei Kaun, komw ketin sewese ie pwe I en pato, oh I ahpw pahn kapinga komwi.” (Melkahka 51:15) Ni eh saledeksangehr eh nsensuwedkihla eh sapwung kan oh kalahnganki sapwellimen Koht mahk, met kamwakidada Depit en padahkihong meteikan duwen Siohwa.
Siohwa ketin kupwurki ken nsenamwahuki omw nsenmwakelekel. Oh e ketin kupwurki ken pil padahkihong meteikan duwen ih oh sapwellime koasoandi kan, ni omw sohte pahn ahneki pepehm en nsensuwedki omw sapwung kan, ahpw ni mehlel oh peren laud. (Melkahka 65:1-4) Tamataman sapwellime luhk wet “wekiong Koht pwe en ketin kamwakeleweisang kumwail dipamwail kan.”—Wiewia 3:19.
Ih met me wiawihong Martha. E koasoia: “Nei pwutako kin pwurepwurehng kadarodo nei makasihn Kahn Iroir oh Awake! kan. Ekisekis, I pwurehng pwurodo rehn Siohwa. Wasa me keieu apwal en pwurehng pwurodo iei en peki mahki dipei koaros me I wiahdahr. Ahpw mwuhr, I kapakap ong Koht oh peki en ketin mahkohng ie. I sohte kak kamehlele me sounpar 40 douwehr powe mwohn ei pwurodo rehn Siohwa. Dahme wiawihong ie kin kadehdehda me mehnda ma aramas emen sohla patehng mwomwohdiso erein sounpar tohto, e kak ahneki ahnsou mwahu en pwurehng papah Koht oh pwurehng mihmi nan sapwellime limpoak.”