Mour Mwurin Mehla—Dahme Aramas Kin Kamehlele?
“Ma aramas emen pahn mehla, e kak pwurehng mourda?”—SOHP 14:14.
1, 2. Iaduwen me tohto kin rapahki kamweit ni ahnsou me emen me re poakohng kin mehla?
NAN ihmw ehu nan New York City, wasa me aramas mehla men mie, kompoakepahn emen pwutak me mahki sounpar 17 oh ah peneinei kan kin irekla limwahn ahn pwutako kopwahn mehla. Pwutako mehkihla kanser. Ki mohngiong ohla, nohno kin sengiseng oh kapwukapwurehng ndinda: “Tommy perenehr met. Koht kupwurki Tommy en kohla reh nanleng.” Ih padahk wet me lih menet sukuhlki en kamehlele.
2 Mpen mwail 7,000 samwa me dohkisang wasao, nan Jamnagar, India, pwutak me keieu laud nanpwungen pwutak silimen isikada tuwi kan me pahn isikala arail pahpa me mehlahr. Ni ahnsou me kisiniei wie posopos, emen arail ohl sarawi me kisehn pwihn en Brahman kin koukoulki ngihs me pid arail nting sarawi kan me re kin kahdaneki Sanskrit mantras: “Soul me sohte kin mehla en kaukaule nannanti pwehn patehng dahme keieu mehlel.”
3. Peidek dah kei me aramas kin medemedewe sangete mahs kohkohdo?
3 Mehla kin kapilpene kitail. (Rom 5:12) Ihme e konehng kitail en medemedewe ma mehla kin kaimwisekihla soahng koaros. Ni ah kin medemedewe duwen mouren tuhke kan, Sohp, emen sapwellimen Siohwa Koht ladu lelepek me memour mahso, koasoia: “Mie koapworopwor nin tuhke pwoat me paldier, e kak pwurehng mourda oh wosada.” Iaduwen aramas? “Ma aramas emen pahn mehla, e kak pwurehng mourda?” Sohp kalelepek. (Sohp 14:7, 14) Sang mahs kohkohdo, aramas en wehi koaros nan sampah kin medemedewe peidek pwukat: Mie mour mwurin mehla? Ma ehi, soahngen mour dah? Dahme aramas kan kin kamehlele? Oh pwekihda?
Pasapeng Tohto, Oaralap Tehieu
4. Dahme aramas kan sang soangsoangen pelien lamalam kan kin kamehlele duwen mour mwurin mehla?
4 Me tohto me dene re Kristian kin kamehlele me mwurin mehla, aramas pahn kohla ma kaidehn nanleng ah nan ehl. Ni pali teio, pelien lamalam en Hindu, kin kamehlele padahk me dene ni mehla, soul en aramaso kin wekidekiong ni ehu mwomwen mour tohrohr. Nin duwen me mehn Islam kan kin kamehlele, dene pahn mie rahn en kadeik ehu mwurin mehla, ni ahnsou me Allah pahn kasawihada en emenemen mour oh koasoanehiong emenemen irail nan paradais de nan kisiniei en ehl. Nan ekei sahpw akan, padahk kan me pid me melahr akan kin kohsang doalpenehn tiahk en sahpw oh padahk en irail kan me dene re Kristian. Karasepe ehu, nan Sri Lanka, pelien Buddhist oh Kadolik kin mweidohng wenihmw kan oh wenihmwtok kan en wie langalangte ni ahnsou me emen mehla nan imwarail, oh re pahn pwilikihdi kopwahn mehlao ni ahl ehu me paten nehn me mehlao loale pahn inenlahng wenihmw en pedolong nan ihmwo. Re kamehlele me arail wia met pahn sewese ngehn, de soul, en me mehlao en pedoi. Rehn mehn Kadolik oh Prohs tohto nan West Aperika, arail tiahk iei en pwaindi kilahs en irongin kan ni ahnsou me emen mehla pwe aramas en dehr kilangala oh kilangada ngehnin me melahro. Eri, rahn 40 mwuri, peneinei oh kompoakepahn me mehlao kin kasarawihala en soulo kohdahla nanleng.
5. Ia poahsoan en padahk me pali moron en pelien lamalam kan kin pwungki?
5 Mendahki wekpeseng pwukat, pelien kaudok tohto kin pwungkihpene ire ehu. Re kamehlele me mie mehkot nan loalen aramas—me re kahdaneki soul, ngehn, de eni—me sohte kak mehla oh kin kaukaule momourte mwurin mehlahn paliwaro. Kereniong pelien lamalam epwiki kan en Kristendom kin utungada arail kamehlele me soul sohte kak mehla. Met pil wia padahk manaman ehu nan pelien lamalam en Suhs. E wia poahsoan en padahk me dene soul kin wekidekiong ni ehu mwomwen mour tohrohr me mehn Hindu kan kin kamehlele. Pelien Muslim kan kin kamehlele me soul kin momourte mwurin paliwaro mehla. Pwilidak en mehn Australia kan me adaneki Australian Aborigine, oh mehn Aperika kan me kin kamehlele me mie soul en soahng koaros duwehte tuhke, takai, pwehl, kisiniei, oh soahng me duwehte met, oh pelien Shinto, oh pil pelien Buddhist, koaros kin padahngki oaralap tehieu.
6. Iaduwen ekei me loalokong kan kin kilangwohng padahk me dene soul sohte kak mehla?
6 Ni pali teio, mie irail kan me kin kamehlele me mour imwisekla ni ahnsoun mehla. Ong irail, lamalam me dene pepehm oh loalokong kin kaukaulehte nan soul ehu me sohte moure, me tohrohr sang paliwar, sohte kak wiawi. Me loalokong en Spain en senturi 20 Migue de Unamuno ntingihdi: “Pwehn kamehlele me soul sohte kak mehla iei en pwungki me soul ele sohte kak mehla, ahpw en pwungki met ki soangen lamalam kehlail me ineng wet pahn kahrehong aramas en pohnsowehla lamalam konehng oh uhd wiahda mehkan me sapwung.” Meteikan me ahneki soangen kamehlelohte kin pil iangahki soangen aramas wekpeseng duwehte me ndand en mahsie kan, sounpadahk en lamalam en aramas Aristotle oh Epicurus, toahkte Hippocrates, oh sounpadahk en lamalam en aramas en Scotland David Hume, oh me loalokong en Arab Averroës, oh tepin prime minister en India mwurin arail uhtohr, Jawaharlal Nehru.
7. Peidek kesempwal dah kei duwen padahk me dene soul sohte kak mehla me kitail en ahnsouwet tehkpene?
7 Pwehki soangen lamalam oh padahk pwukat arail wekpeseng, kitail kak kalelepek: Kitail uhdahn ahneki soul ehu me sohte kak mehla? Ma soulo uhdahn kak mehla, eri iaduwen soangen padahk likamw wet wiahla kisehn padahk kan en pelien lamalam kan en rahnwet? Iawasa lamalam wet kohsang ie? E kesempwal kitail en rapahkihda pasepeng kan me mehlel oh pahn kaitarala peidek pwukat pwehki atail mouren ahnsou kohkohdo kin poahsoanda pohn met. (1 Korint 15:19) Ahpw, keieu, kitail en kasawihada iaduwen padahk me dene soul sohte kak mehla tepda.
Tepdahn Padahko
8. Iaduwen Socrates oh Plato kin kekeirada padahk me dene soul sohte kak mehla?
8 Sounpadahk kan en lamalam en aramas Socrates oh Plato en senturi kalimau B.C.E. me kakeirada padahk me dene soul sohte kin mehla. Ahpw, kaidehn ira me tepin wiahda padahk wet. Re wiahda padahko pwe aramas kepwehwe kan en ara mwehi oh dih kan en mwuhr en perenki padahk wet. Ahpw, ni mehlel, irail me adaneki Zoroastrians en Persia en mahsie oh mehn Isip kan mwohn irail kin pil kamehlele me soul sohte kak mehla. Eri, peideko mihmihte: Ia utupen padahk wet?
9. Manaman dahieu me tiahk kan koaros en Isip, Persia, oh Krihs mihla pahn?
9 Pwuhko me oaralap koasoia The Religion of Babylonia and Assyria koasoia: “Mahso, Isip, Persia, oh Krihs kin mihla pahn manaman en pelien kaudok en Papilon.” Me pid padahk kan en pelien kaudok en Isip, pwuhko pousehla koasoia: “Pwehki mahs mahsie Isip oh Papilon kin kerenpene, nin duwen me nting kan pohn lepin takai en El-Amarna kasalehda, ni mehlel mie ahnsou mwahu tohto pwe lamalam oh tiahk en Papilon en doalohng nan tiahk en Isip.”a Met pil duwehte tiahk en Persia oh Krihk.
10. Ia lamalam en mehn Papilon kan ong mour mwurin mehla?
10 Ahpw mehn Papilon kan en mahs kin kamehlele me soul sohte kak mehla? Nin duwen ire wet, Professor Morris Jastrow, Jr., en University en Pennsylvania, U.S.A., ntingihdi: “Mehn Papilon kan sohte kin lemeleme me mour kak kasohrala douluhl. Re kin medemedewe me mehla kin wia ahl ehu ong ehu mour tohrohr, oh kahmahmkihla me soul sohte kak mehla nan mour wet kin ihte kasalehda ni mehlel me mehla pahn kahluwalahng ehu mwomwen mour tohrohr.” Ehi, mehn Papilon kan kamehlele me soul kin momourte nan ehu mwomw tohrohr, mwurin mehla. Re kin kasalehda met ni arail kin sarepedi dipwisou kan rehn me melahr kan pwe me melahr kan en doadoahngki mwurin mehla.
11, 12. Mwurin Nohliko, ia wasa padahk me dene soul sohte kak mehla tepisang ie?
11 E sansal me, padahk me dene soul sohte kak mehla kin kohsang Papilon en mahsie. Met me kesempwal? Ehi, pwe nin duwen me Paipel kasalehda, Nimrod, nein nein Noha pwutak, me kauwada kahnimw en Papel, de Papilon. Mwurin Nohliko ni mwein Noha, tohnsampah pwon kin lokaiahki lokaia ehute oh ahneki kaudok ehute. Nimrod sohte kin ihte “uhwong Siohwa” ahpw ih oh irail kan me kin idawehnla ih men “ndandla.” Ihme ni ah tepiada kahnimwo oh kauwada imwen doulik ehu wasao, Nimrod tepiada kaudok tohrohr ehu.—Senesis 10:1, 6, 8-10; 11:1-4.
12 Nin duwen me poadoapoad kasalehda me Nimrod mehla suwed. Mwurin ah mehla, mehn Papilon kan kakete kin waunekihla ih ni arail wiahkihla ih sountepiada, oh sounkauwada, oh tepin nanmwarki en arail kahnimw. Pwehki koht Marduk (Merodach) kin wia meno me tepiada Papilon oh nanmwarki en Papilon tohto kin ahdeki edeo, ekei me loalokong kan kin kose me Marduk iei arail koht Nimrod. (2 Nanmwarki 25:27; Aiseia 39:1; Seremaia 50:2) Ma ih duwen met, eri padahko, me dene mie soul en aramas me kin momourte mwurin mehla, miehier ni ahnsou me Nimrod mehla. Poadoapoad kasalehda me mwurin Nohliko, wasa me padahk me dene soul sohte kin mehla kin tepida sang iei Papel, de Papilon.
13. Iaduwen padahk me dene soul sohte kak mehla kohpeseng nan sampah, oh ia imwilahn met?
13 Paipel kin pil kasalehda me Koht katokehdi nannanti en sounkoukou kan en imwen douliko nan Papel ni ah ketin kapingada arail lokaia. Pwehki arail solahr kak wehwehpene, re kesehla arail doadoahk oh mwarekpeseng “ong wasa koaros nin sampah.” (Senesis 11:5-9) Kitail anahne en tamataman me mendahki en sounkou imwen douliko arail lokaia wekila, arail madamadau oh padahk kan sohte wekila. Kedekedeo, wasa koaros me re kohla ie, re wahla arail padahk kan. Ni ahl wet padahk kan en pelien lamalam en Papilon—iangahki padahk me dene soul sohte kak mehla—eri wisikpeseng wasa koaros nin sampah oh wiahla utupen padahk en pelien kaudok laud kan en sampah. Ihme, minimin en kaudok likamw en sampah ehu eri wiawihda, me Paipel ni pwung kin kahdaneki “Papilon Lapalap, inen lihen netiki paliwere koaros oh wiewia samin suwed koaros en sampah.”—Kaudiahl 17:5.
Minimin en Kaudok likamw en Sampah Lellahng ni Palimese
14. Iaduwen padahk kan en pelien lamalam en Papilon kohla nan ekei sahpw kan en India?
14 Ekei sounpoadoapoad kan koasoia me mpen sounpar 3,500 samwalahro, mie pokon en mehn Aryan kan, me pohn kil pwetepwet, me kosousang nan sapwarail sang ni paliepeng en palikapi oh kohdo nan wasa me adaneki Indus Valley, rahnwet iei Pakistan oh India. Sang wasao re kohla nan mohs kan limwahn Pillap Ganges oh kotehla India. Ekei me loalokong kan koasoia me padahk kan en aramas pwukat me kosoudo kin poahsoanda pohn padahk en mehn Iran kan oh padahk en Papilon en mahsie. Eri, padahk en kaudok pwukat wiahla utupen padahk en lamalam en Hindu.
15. Iaduwen pelien lamalam en Hindu en rahnwet mihla pahn manaman en padahk me dene soul sohte kak mehla?
15 Nan India padahk me dene soul sohte kak mehla kin uhd mihla ni mwomwen padahk me dene soul kin momourte mwurin mehla ni ah kin wekidekiong ni ehu mwohmw tohrohr. Koasoi en Hindu, pwehn kawehwe duwen kahpwal suwed kan oh kalokolok me mih rehn tohnsampah, wiahda kosonned me adaneki Karma, kosonned duwen mehkot me kin kahrehda mehkot en wiawi oh imwilahn met. Kapatahiong kosonned wet padahk me dene soul sohte kak mehla, re wiahda padahk en me dene soul kin momourte mwurin mehla ni ah kin wekidekiong ni ehu mwomwen mour tohrohr, me dene emen pahn ale katingpen ah wiewia mwahu nan ah mour de kalokepen ah wiewia suwed mwurin ah mehla. Mehn akadei en irail kan me kin lelepek ong met iei moksha, de saledek sang pwupwurehng ipwidi nan ehu mwomwen mour tohrohr oh patohng dahme uhdahn momour, de Nirvana. Pohnangin sounpar epwiki kei, ni ahnsou me pelien lamalam en Hindu kohpeseng, padahk me dene soul kin momourte mwurin mehla ni ah kin wekidekiong ni ehu mwomwen mour tohrohr pil kohpeseng. Oh padahk wet wialahr utupen padahk en pelien lamalam en Hindu nan rahnwet.
16. Padahk dahieu duwen mour mwurin mehla me uhd kaunda madamadau en pelien lamalam oh tiahk kan en tohnwehi laud en Palimese en Eisia?
16 Sang pelien Hindu ekei pelien lamalam me duwehte Buddhist, Jainism, oh Sikhism wiawihda. Pelien lamalam pwukat kin kamehlele padahk me dene soul kin wekidekiohng ni ehu mwomwen mour tohrohr ni mwurin mehla. Me laud sang met, ni ahnsou me pelien lamalam en Buddhism lellahng ni pali laud en Palimese en Eisia—Saina, Korea, Sapahn, oh wasa teikan—e wekidala laud tiahk oh pelien lamalam en wasao pwon. Met kin kapwarehda pelien lamalam kan me kin kasalehda arail doaloahpene padahk kan, ni ahr kin alehda padahk en Buddhist, wunahni, oh kaudok ong ahr pahpa/nohno en mahs akan me melahr. Me keieu kehlail nanpwungen pelien lamalam pwukat iei pelien lamalam en Taoism, Confucianism, oh Shinto. Ni ahl wet kamehlelo me mour kin wiawihte mwurin paliwaro mehla kin kaundaiehr madamadau en pelien lamalam oh tiahk kan en pali moron en sahpw ko.
Iaduwen Pelien Lamalam en Mehn Suhs, Kristendom, oh Islam?
17. Dahme mehn Suhs kan en mahs kin kamehlele me pid duwen mour mwurin mehla?
17 Dahme aramas kan me kin idawehnla pelien lamalam en mehn Suhs akan, Kristendom, oh pelien Islam kin kamehlele duwen mour mwurin mehla? Sang nanpwungen kaudok pwukat, pelien lamalam en mehn Suhs me keieu mering. E tepida sounpar 4,000 samwalahro ni mwein Eipraam—mwohn Socrates oh Plato alehda padahk me dene soul sohte kak mehla. Mehn Suhs kan en mahs kin kamehlele kaiasadahn me melahr akan oh re sohte kin kamehlele me dene aramas sohte kak mehla. (Madiu 22:31, 32; Ipru 11:19) Eri, iaduwen padahk me dene soul sohte kak mehla pedolong nan padahk en mehn Suhs akan? Poadoapoad pahn sapengala met.
18, 19. Iaduwen padahk me dene soul sohte kak mehla pedolong nan pelien lamalam en mehn Suhs?
18 Nan pahr 332 B.C.E., Alexander Lapalap kalowehdi Middle East, iangahki Serusalem. Nindoken irail kan me wiliandi Alexander pousehlate ah prokram me adaneki Hellenization, doalpenen tiahk riau—Krihk oh Suhs—tepida wiawi. Kedekedeo, mehn Suhs kan esehla lamalam en mehn Krihk, ekei wiahla sounpadahk en lamalam en mehn Krihk.
19 Philo en Alexandria, en senturi keieu C.E., iei emen soahngen sounpadahk en mehn Suhs akan. E kin wauneki Plato oh kin nantiong en kawehwe pelien lamalam en Suhs ong ni padahk en lamalam en Krihk, oh met kin wiahda ahl ong sounpadahk en mehn Suhs en mwuri. Talmud—padok kan me rabbi (sounpadahk en mehn Suhs) kan ntingihdi—kin pil mihla pahn manaman en padahk en Krihk. “Rabbi kan en Talmud,” koasoia Encyclopaedia Judaica, “kin kamehlele me soul kin momourte mwurin mehla.” Mwuri nein mehn Suhs pwuhk kan, duwehte Cabala, kin pil padahngki padahk me dene soul kin wekidekiohng ni ehu mwomwen mour ni mehla. Ni ahl ehu me mwomwen e sohte inensang padahk en Krihk, padahk me dene soul sohte kak mehla eri kin pedolong nan pelien lamalam en mehn Suhs kan. Dahme kitail kak ndahki duwen padahk wet ah pedolong nan Kristendom?
20, 21. (a) Ia lamalam en Kristian kan en mahs me pid padahk en Plato, de Krihk? (b) Dahme kahluwalahng doalpenen padahk kan en Plato oh padahk kan en Kristian?
20 Pelien lamalam en Kristian me uhdahn mehlel tepisang rehn Sises Krais. Me pid duwen Sises, Miguel de Unamuno, me pwarada nan parakrap kan en mwowe, ntingihdi: “E kamehlele kaiasadahn uduk, nin duwen me mehn Suhs kan kin kamehlele, kaidehn soul sohte kak mehla, me padahk en [Krihk] Plato kin kamehlele.” E kaimwisekihla: “Soul sohte kak mehla . . . iei padahk en aramas kan me sehse Koht.” Pwehki met, kitail kak kilang ia kahrepe wahnpoaron Pohl ni kehlail kaweidki Kristian kan en tepin senturi en liksang “loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah , a kaidehn sang rehn Krais.”—Kolose 2:8.
21 Eri, iahd oh iaduwen “padahk en aramas me sehse Koht” wet pedolong nan pelien Kristendom? Pwuhken The New Encyclopædia Britannica kawehwehda: “Sang nan werengen senturi keriau AD Kristian kan me kin kaiahnda nan padahk en mehn Krihk kan kin tepida lemeleme me re anahne kasalehda arail pwoson padahk en mehn Krihk, pwehn kaitarala pein arail loalokong oh pwehn wekidohng irail me sukuhl kan me sehse Koht ong padahk en Krihk. Padahk en aramas me keieu pwungong irail iei padahk en Plato.” Mie sounpadahk riemen en mahs me wia soahngen sounpadahk en padahk en aramas me ahneki manaman laud pohn padahk en Kristendom, oh ira iei Origen en Alexandria oh Augustine en Hippo. Ira koaros kin mihla pahn manaman en padahk kan en Plato oh kin sewese doaloahong padahk pwukat nan padahk kan en Kristian.
22. Iaduwen padahk me dene soul sohte kak mehla wiahte padahk ndand ehu nan pelien lamalam en Islam?
22 Nindoken padahk me dene soul sohte kak mehla nan pelien lamalam en mehn Suhs oh Kristendom kin kohsang padahk en Plato, padahko kin wiawihda nan pelien lamalam en Islam sang ni tepidahn pelien lamalamo. Koran, pwuhk sarawi en lamalam en Islam, kin padahngki me aramas ahneki soul ehu me kin pouselahte momour mwurin mehla. E kin koasoia duwen dahme koasoansoandiehr ong soul ma e pahn mour nan mwetuwel en paradais nanleng de kolokolok nan kisiniei en ehl. Met kaidehn pwehki me loalokong kan en Arab sohte song en kapatahpene padahk kan en Islam oh padahk kan en Krihk. Ni mehlel, mehn Arab kan kin mihla pahn manaman en padahk kan en Aristotle. Ahpw, padahk me dene soul sohte kak mehla kin wiahte padahk en mehn Muslim kan.
23. Peidek dahkei me pid mour mwurin mehla me kitail pahn tehkpene nan artikel en mwuri?
23 E sansal me, pelien lamalam kan nan sampah wiahdahr soangsoangen padahk kapwonopwon kan me pid mour mwurin mehla, me poahsoanda pohn padahko me soul sohte kak mehla. Oh soahngen padahk wet kin kamwekidada, ehi, kin pil kaunda oh kaliduhla aramas lik kei. Pwehki mepwukat koaros, kitail men wehwehki duwen peidek pwukat: Kitail kak esehla padahk mehlel me pid dahme kin wiawi ni ahnsou me kitail mehla? Mie mour mwurin mehla? Dahme Paipel kin koasoiahki duwen met? Kitail pahn tehkpene ire pwukat nan artikel en mwuri.
[Nting tikitik me mi pah]
a El-Amarna iei wasa me lipwen ohlahn kahnimw en Isip Akhetaton kin mie, me dene kakauda nan senturi kaiesek pahieu B.C.E.
Komw Kak Kawehwe?
◻ Ia oarelap tehieu me pali moron en pelien lamalam kan kin kamehlele me pid duwen mour mwurin mehla?
◻ Iaduwen poadoapoad oh Paipel kin idialahng Papilon en mahsie me iei wasa me padahk me dene soul sohte kak mehla kohsang ie?
◻ Ni ahl dahieu pelien lamalam kan ni Palimese mihla pahn manaman en padahk en Papilon me dene soul sohte kak mehla?
◻ Iaduwen padahk me dene soul sohte kak mehla ah pedolong nan pelien lamalam en mehn Suhs, Kristendom, oh Islam?
[Kilel kan nan pali 24, 25]
En Alexander Lapalap kana kahluwalahng doalpenen tiahk kan en Krihk oh mehn Suhs kan
Augustine song en kapatapene padahk en Plato oh padahk en pelien Kristian
[Credit Line]
Alexander: Musei Capitolini, Roma; Augustine: Sang pwuhko Great Men and Famous Women