Poudek Ki Koapworopwor, Mwekid Ki Limpoak

“Eri, soahng siluh pwukat: pwoson, koapworopwor, oh limpoak, ih me pahn mihmihte. Ahpw me keieu kesempwal rehrail, iei limpoak.”​—1 KORINT 13:13.

1. Kaweid dahieu me wahnpoaron Pohl kihong kitail?

WAHNPOARON Pohl kaweidkin kitail me atail pwoson kin duwehte sohp ehu, oh met wehwehki me atail pwoson kak ohla. E koasoia duwen “kolokol omw pwoson oh kadeikpen loalomw en mwakelekel. Pwe mie aramas ekei me sohte kin dukiong kadeikpen loalarail, ahpw keselahr arail pwoson (rasehng sohp me seradahng pohn takai kan oh pwoarpeseng).” (1 Timoty 1:19) Nan keieun senturi C.E., sohp kan kin wiawihkihda tuhke. Ahpw ia uwen kehlail en sohp pwukat kin poahsoanda pohn soahngen tuhke dah kei me sohp pwukat wiawihkihda oh ia uwen koahiek en sounkou sohp pwukat.

2. Dahme kahrehda, ni karasaras, “waratail sohp” en atail pwoson anahne en kokouda kehlail, oh dahme kitail anahne wia?

² Ni karasaras, “waratail sohp” en atail pwoson pahn anahne en peipei nan sehd en aramas pingada kan. (Aiseia 57:20; Kaudiahl 17:15) Ihme kahrehda “waratail sohp” en atail pwoson anahne en wiahda pwehn kehlail oh pein kitail anahne wia met. Ni ahnsou me “madau kan” en mehn Suhs kan oh mehn Rom kan kin tepida wia kahpwal ehu ong tepin Kristian kan, Suhd ntinghdi met: “Eri, kompoakepahi ko, kumwail wiewiahte uwen me kumwail kak pwe kumwail en kakehlahda amwail pwoson sarawi. Kumwail kapakap ni manaman en Ngehn Sarawi, oh dadaurete ni limpoak en Koht, ni amwail kasikasik kalahngan en atail Kaun Sises Krais me pahn ketikihong kumwail mour soutuk.” (Sud 20, 21) Pwehki Sud pil koasoia duwen peiki ‘pwoson me Koht ketikihong sapwellime kan,’ lepin lokaia pwukat “pwoson sarawi” kakete oarepene padahk en Kristian akan, iangahki rongamwahu en kamourala. (Sud 3) Krais iei poahsoan en pwosono. Pwoson kehlail me anahn ma kitail men tengedi nan pwoson en Kristian mehlel.

Powehdi Melimel en Karaun Likamw akan

3. Iaduwen ekei kin kamasapwehkih ki aramas duwen sarawi likamw akan?

³ Ni pahr kerendo kan, mie soangen wiewia kansensuwed kan me pid mwutumwut en aramas akan me pein kihsang arail mour, kamaramas, oh wiewiahn loallap akan me kin pidada kisin pwihn en sarawi likamw akan. Kahrehda e wehwe kahrepen aramas tohto iangahki kaun en politik kan kin songsongen pere mour en aramas akan, keieu irail me pwulopwul akan, ren dehr pidada soangen sarawi likamw pwukat. “Koht suwed en sampah wet” me kin utungada wiewia suwed pwukat iei ih me kin kamasapwehkihki aramas duwen sarawi likamw akan oh e kin doadoahngki ire wet pwehn pelianki sapwellimen Koht aramas akan. (2 Korint 4:4; Kaudiahl 12:12) Ekei aramas kin doadoahngki met pwehn kahrehong aramas akan en uhwong atail doadoahk. Nan ekei wehi kan, irail kin wiahda kampein ehu en perehla aramas akan sang “sarawi likamw akan,” ahpw re kin, ni sapwung, karaunehki Sounkadehdehn Siohwa kan nin duwen “sarawi likamw” pwukat. Met kin kahrehong doadoahk en kalohk ni ihmw lel ihmw en apwal nan ekei wehi kan nan Iurop, oh pil, ni ahnsou wet, ekei aramas me kin onop Paipel rehtail sohlahr men onop. Pwehki irair pwukat, ekei riatail brother oh sister kan luwetlahr ni pali ngehn.

4. Dahme kahrehda kitail en dehr mweidong kalokolok kan en kaluwetala kitail?

⁴ Ahpw, ni mehlel, kitail en dehr mweidong kalokolok kan en kaluwetala kitail, ahpw en kakehle atail pwoson me kitail kin iang Kristian mehlel akan. (Madiu 5:11, 12) Mahs, aramas akan kin karaun likamwih Kristian akan nin duwen pwihn ehu me kin uhwong koperment, oh wasa koaros aramas akan “kin sansarsuwediong” pwihn wet. (Wiewia 24:5; 28:22) Ahpw wahnpoaron Piter kamehlelehong ienge me pwoson akan, ni ah ntingwong irail: “Kompoakepahi ko, kumwail dehr kin pwuriamweiki songosong kalok kan me kin lelohng kumwail, duwehte ma soahng wet sohte pahn kin lelohng kumwail. Ahpw kumwail perenkihda amwail iang pwaisanki en Krais eh lokolok, pwe, ni sapwellime lingaling eh pahn sansalda, kumwail en pil iang perenda kowahlap.” (1 Piter 4:12, 13) Met pil duwehte dahme emen me iang pwihn en governing body nan keieun senturi ntingihdi: “Riei ko! Kumwail perenkihda ma soangen apwal koaros kin lelohng kumwail, pwe kumwail ese me ni amwail pwoson eh kin powehdi apwal pwukat, e kin kalaudehla amwail kanengamah ni ahnsou apwal. Kumwail eri kanahieng pwe amwail kanengamah ni ahnsou apwal en poatopoatete oh unsekla, pwe pein kumwail en unsengkihla mehlel oh sohte pahn anahne mehkot.” (Seims 1:2-4) Duwehte melimel kan me kin kak song kehlail en sohp ehu, e pil pahn duwehte kalokolok kan me kitail kin lelohng, me pahn kak kasansalehda luwet kan en “waratail sohp” en atail pwoson.

Kalokolok kan kin Kapwarehda Irairen Dadaur

5. Iaduwen kitail kak ese ma atail pwoson pahn kak kehlail pahn kalokolok kan?

⁵ Kristian akan kak tehk ma ahr pwoson kin kehlail oh ma re ahneki irairen dadaur ihte mwurin ahr kin powehdi melimel en kalokolok kan. Atail dadaur nan melimel en lokolok kan pahn “unsengkihla mehlel” ma kitail pahn unsek ni irair koaros oh “sohte anahne mehkot” oh met pil iangahki atail unsek ni pwoson kehlail. Pohl ntingihdi: “Eri, se kin kasalehda ni mehkoaros me se kin wia, me kiht ladun Koht kei, ni at kin kanengamah ni ahnsoun lokolok, ni at apwal akan, ni ahnsoun at pwunod akan.”​—2 Korint 6:4.

6. Dahme kahrehda kitail anahne “peren nan atail apwal akan,” oh iaduwen met kin kakehle atail koapworopwor?

⁶ Kitail anahne kilangwong melimel en kalokolok kan me kitail kin lelohng ekei ahnsou nin duwen ahnsou kan me kitail kak tehk ma “waratail sohp” en atail pwoson me kehlail oh teng. Ong Kristian akan me mihmi nan Rom, Pohl ntingihdi met: “Oh kitail pil peren nan atail apwal akan, pwe kitail ese me apwal kin kahrehiong kitail en nannanti ni kanengamah, oh nannanti ni kanengamah kin kahrehiong Koht eh kin ketin kupwuramwahwih kitail, oh sapwellime kupwuramwahu wet kin kahrehiong kitail koapworopwor. Eri, koapworopwor wet sohte kin pitihkitaildi, pwe Koht ketin kapwiledohngehr nan mohngiongatail sapwellime limpoak sang rehn Ngehn Sarawi, me iei sapwellimen Koht kisakis ong kitail.” (Rom 5:3-5, New World Translation) Tengeteng nan pwoson ni ahnsoun kalokolok pahn kahrehong kitail en kenikenla rehn Siohwa. Met pahn uhd kakehlailla atail koapworopwor.

Dahme Kahrehda Ekei kin, ni Karasaras, Seradahng Pohn Takai kan

7. (a) Nin duwen mahsen en Pohl kin kasansalehda, iaduwen ekei aramas, ni karasaras, seradahng pohn takai kan? (b) Iaduwen ekei aramas nan rahnpwukat sohpeisang padahk mehlel?

⁷ Ni ahnsou me Pohl kihda kaweid me pid duwen “sohp me seradahng pohn takai kan,” e kin medemedewe duwen irail akan me “kesehlahr” kadeikpen loalarail oh arail pwoson. (1 Timoty 1:19, NW) Ekei irail me lahlahwe pwoson mehlel iei Imenius oh Aleksander. (1 Timoty 1:20, footnote; 2 Timoty 2:17, 18) Nan rahnpwukat, irail akan me lahlahwe pwoson mehlel kin, sang ni arail lokaia kan, kaloke pwihn en “ladu lelepek oh loalokong,” rasehng emen me kin ngalisdi pehn aramaso me kin kamwenge irail ni pali ngehn. Ekei kin duwehte pwihn me kin wiahla “papah suwed kan,” oh kin mengimengloalki, “Ei kaun pahn pwand en pwurodo.” (Madiu 24:44-49; 2 Timoty 4:14, 15) Re kin kahmahmki me imwin koasoandi suwed wet kerendohr oh re pil kin kauwe irail pwihn en “ladu lelepek oh loalokong” me kin mwasamwasahn ni pali ngehn oh me kin kangoange sapwellimen Siohwa aramas akan en mwasamwasahn. (Aiseia 1:3) Aramas pwukat me kin lahlahwe pwosono kin pweida ni arail kin “kasapwungelahr pwoson en ekei,” imwikihla, ni karasaras, sohp me seradahng pohn takai kan.​—2 Timoty 2:18.

8. Dahme kahrehda ekei aramas kin kauwehla “wararail sohp” en arail pwoson?

⁸ Ekei Kristian me inoukiong Koht ahr mour kin kauwehla “wararail sohp” en arail pwoson sang ni ahr kin kesehla kadeikpen loalarail kan oh perenkihda peren en sampah kan oh dihpen nenek. (2 Piter 2:20-22) Ekei kin kauwehla “wararail sohp” en arail pwoson pwehki re sohte kin kamehlele me koasoandi kapw kerendohr. Pwehki re sohte kak ese iahd ekei kokohp kan pahn pweida, re uhd sohlahr kamehlele “Rahnen Siohwa,” oh re kesehla pwoson mehlel. (2 Piter 3:10-13; 1 Piter 1:9) Irail kin mwadang diarada me irail pwuralahngehr nan pihl kiried oh ahd suwed en pihl akan en koasoandi suwed wet. (Aiseia 17:12, 13; 57:20) Ahpw, ekei irail me sohlahr iang mwomwohdiso en Kristian mehlelo kin kamehlele me met iei kaudok mehlel. Ahpw, e sansal me irail sohlahr kak kanengamah, pwe kanengamah wie irair kesempwal ehu en awiawih sampah kapw me Siohwa Koht inoukihda. Mour nan Paradais sohte mwadangete leledo duwen arail kin kasikasik.

9. Dahme ekei Kristian akan me inoukihong Koht ahr mour kin wia ni ahnsouwet, oh ire mehlel pwukat pahn sewese kitail en medemedewe duwen dah?

⁹ Wasa kei nan sampah, ekei Kristian me inoukihdahr ahr mour, “wararail sohp serek” en arail pwoson kin lilidi. “Wararail sohp akan” sohte kihrla, ahpw irail sohte tangawei marahra nan pwoson, ahpw irail peipei kohwei. Pwehki irail kin koapworopworki “Paradais pahn kereniong leledohr,” ekei irail nantihong en wia uwen me irail kak en alehdihte kating wet​—re kin ngoangki iang doadoahk en kalohk oh kaukaule iang towehda mihding kan oh kapokon kan koaros. Ahpw, ni ahnsou wet, re lemeleme me ahr kopwoaropwor sohte pahn mwadang kohdo, eri, re sohlahr men wia uwen me re kak en papah Koht. Met kin sansalda sang ni ahr kin sohlahr iang doadoahk en kalohk ahnsou koaros duwehte mahs, oh re kin iang towehda mihding kan ekeite pak, oh re sohte kin nsenohki iang prokram pwon en kapokon kan. Ekei kin kihong arail ahnsou laud ong mwadong oh mehn kamweit kan oh ekei kin kihong arail ahnsou laud ong rapahki kepwehn sampah. Ire mehlel pwukat kin sewese kitail en medemedewe duwen dahme pahn kamwekid pein atail mour oh iaduwen kitail kak kolokolte atail inou ong Koht. Atail ngoangki iang doadoahk en kalohk pahn pidada atail koapworopworki me “Paradais pahn kereniong leledohr”?

Koapworopwor kin Rasehng Mehn Poudek Ehu

10, 11. Pohl kin karasaiong atail koapworopwor en duwehte dah, oh dahme kahrehda karasaras wet me konehng?

¹⁰ Pohl kawehwehda me Siohwa ketin wiahda inou ehu me kapai kan pahn kohdosang rehn Eipraam. Oh wahnpoaron uhd kawehwehda: “Koht . . . ketin kapatakihong inowo sapwellime kahula. Eri, soahng riau mie me sohte kak wekidekla, oh duwen Koht me sohte kak ketin wiahda likamw. Eri, kitail kan me kin diar poadoarpatail reh kin kehlailkihda, kahrehda kitail kak kasikasik kamwahu kan me Koht ketin inoukihong kitail. Koapworopwor wet me mihmi rehtail rasehng mehn poudek ehu nan kapehditail kan, me teng, kehlail.” (Ipru 6:17-19, NW; Senesis 22:16-18) Koapworopwor me mihmi rehn irail Kristian me keidi kan iei mour soutuk nanleng. Ahpw ni ahnsouwet, pali moron en sapwellimen Siohwa ladu kan kin koapworopworki mour soutuk nan paradais nin sampah. (Luk 23:43) Ma sohte koapworopwor, emen sohte kak pwoson.

¹¹ Mehn poudek iei dipwisou kesempwal ehu pwe e kin koledi teng sohp ehu pwehn dehr peila. Sohte sousehd men me pahn seiloak ahpw mehn poudek sohte iang. Pwe Pohl kin iang sohp me serada pak tohto, e wehwehkiher me mehn poudek en sohp kan kin kak doarehla mouren irail sousehd akan. (Wiewia 27:29, 39, 40; 2 Korint 11:25) Nan tepin senturi, sohp akan me wiawihda ni ahnsowo sohte misihn loale me pahn kak kihong kapten en sohp akan en kak ilihliong ware sohp lahng wasa me e men kainenelahng ie. Likin sohp en mahwen kan me aramas tohto kin seiki, sohp akan en ahnsowo kin doadoahngki kisinieng pwehn katanga. Ma sohp kin mih nan irair keper me e kak seradahng pohn takai kan, ihte me kapten kak wia iei en kesehla mehn poudek en sohpo oh pahpahsan melimelo en mweledi oh ah koapworopwor mihmi ni poudeko me pahn teng oh sohte pahn mweida. Pohl karasaiong koapworopwor en Kristian kan ong “mehn poudek ehu nan kapehditail kan, me teng, kehlail.” (Ipru 6:19) Ni ahnsou me kitail kin lelohng melimel kan en kalokolok de kasongosong teikan, atail koapworopwor kaselelo kin wia duwehte mehn poudek ehu me kin katengehdi kitail, pwe “waratail sohp” en atail pwoson sohte pahn peila de, ni karasaras, atail pwoson sohte pahn tengla nan wasa pedepehd kan en pihk en peikasal kan de seradahng pohn takai kan en lahlahwe pwoson mehlel.​—Ipru 2:1; Sud 8-13.

12. Dahme kitail pahn wia ma kitail sohte men sohpeisang Siohwa?

¹² Pohl kaweidih mehn Ipru Kristian akan: “Kumwail mwasahn pwe emen kumwail dehr nan kapehd suwedla oh seupwosonla, oh kahrehda eh pahn sohpeisang Koht ieias.” (Ipru 3:12) Ni lokaiahn Krihk, “sohpeisang” kin wehwehki en lahlahwe padahk mehlel. Ahpw kitail sohte men wie duwehte sohp en pwoson me seradahng pohn takai kan. Pwoson oh koapworopwor pahn kak sewese kitail en lelepek ong Siohwa edetehn kitail kin lelohng kasongosong laud kan. (Deuderonomi 4:4; 30:19, 20) Atail pwoson sohte pahn rasehng sohp ehu me kin wekiwekidengkiseli angin padahk en aramas akan me lahlahwe pwoson mehlel. (Episos 4:13, 14) Oh atail koapworopwor en wiahla mehn poudek ehu ong kitail pwe kitail pahn kak powehdi melimel kan en mour nin duwen sapwellimen Siohwa ladu kan.

Mwekidki Limpoak oh Ngehn Sarawi

13, 14. (a) Dahme kahrehda “mehn poudek” en atail koapworopwor sohte itar? (b) Dahme pahn anahne kamwekid kitail en wia papah sarawi ong Siohwa, oh pwekida?

¹³ Kristian men sohte pahn kak kekeirada oh lel nan koasoandi kapw ma ihte kahrepen e kin papah Siohwa pwehn ale mour soutuk nan paradais nin sampah. Eh koapworopwor nin duwen mehn poudek ehu pahn anahne tengeteng nan eh mour, ahpw e anahne en kalaudehla eh koapworopwor oh pwoson irairen limpoak. Pohl kasansalehda met ni ahnsou me e ntingihdi: “Eri, soahng siluh pwukat: pwoson, koapworopwor, oh limpoak, ih me pahn mihmihte. Ahpw me keieu kesempwal rehrail, iei limpoak.”​—1 Korint 13:13.

¹⁴ Dahme pahn kamwekid kitail en papah Siohwa iei atail limpoak ong Siohwa pwehki ih me kin tepin poakohng kitail. Wahnpoaron Sohn ntingihdi: “Ahpw mehmen me sohte ahneki limpoak kin sehse Koht, pwe Koht iei limpoak. Iet duwen en Koht eh ketin kasalehda sapwellime limpoak ong kitail: pein ih ketin poaronedohng sampah Sapwellime Iehros, pwe kitail en kak mourkihla. Iet duwen mwomwen limpoak: kaidehn kitail me tepin poakohng Koht, ahpw ih me tepin poakohng kitail, oh ketin poaronehdo Sapwellime Iehros pwe en wiahla tomwpen dipatail kan.” (1 Sohn 4:8, 9, 19) Pwehki atail kalahngan ong Siohwa, kitail anahne keieu nsenohki mware en kasarawihla oh sapwellime kaunda pwung en pweida, kaidehn en keieu kesempwaliki alehdi mour soutuk.

15. Iaduwen atail limpoak ong Siohwa kin pid duwen sapwellime kaunda?

¹⁵ Siohwa kupwurki kitail en papah ih pwehki kitail kin poakohng Ih, kaidehn pwe kitail inengieng en mihmi nan Paradais. Encyclopedia en Paipel, Insight on the Scripturesa koasoia: “Met kin kaperenda kupwuren Siohwa, ni ahnsou me sapwellime kapikada kan kin utungada sapwellime kaunda pwehki limpoak. E ketin kupwurki irail kante me kin poakohng sapwellime kaunda pwehki sapwellime irair kaselel kan, oh pwehki sapwellime pwung, re men pilada sapwellime kaunda sang kaunda teikan. (1 Korint 2:9) Re sohte men pein uhtohrada ahpw re kin pilada en papah ih pahn sapwellime kaunda​—irail kin wia met pwehki ahr kin esehla ih oh sapwellime limpoak, kopwungpwung, oh erpit, oh re kin pohnese me irair pwukat kin siksang pein arail irair akan. (Melkahka 84:10, 11)”​—Volume 2, pali 275.

16. Iaduwen limpoak ong Sises kin kamwekid atail mour?

¹⁶ Nin duwen Kristian akan, kitail pil men poahkong Sises pwehki e poakohng kitail mahs. Pohl mahsanih: “Pwe limpoak en Krais me kamwakamwakid kiht, pwehki at dehdehkier padahk wet: aramas tehmen pwoukihla aramas koaros; met wehwehki me aramas koaros pil iang mehla. E ketin pwoukihla aramas koaros, pwe irail kan me momour, re dehr kin mourki pein ihr, ahpw re en kin mourkihte ih me pwoukinirailla oh ketin iasada pwe en ketikihong irail mour.” (2 Korint 5:14, 15) Atail mour ni pali ngehn, atail pwoson, oh koapworopwor kin poahsoankihda pohn Krais. Atail limpoak ong Sises Krais kin kakehlailda atail koapworopwor oh pwoson ni ahnsou me kitail kin lelohng apwal akan.​—1 Korint 3:11; Kolose 1:23; 2:6, 7.

17. Manaman kehlail dahieu me Siohwa kin ketikihong kitail, oh iaduwen pwuhken Wiewia 1:8 oh Episos 3:16 kin kasansalehda ia uwen kesempwal manaman wet?

¹⁷ Nin duwen atail limpoak ong Koht oh sapwellime Ohl kin keieu kamwekid atail mour, Siohwa pil kin ketikihong kitail mehkot me kin kamwekid kitail oh kakehle kitail en pousehlahte wia sapwellime doadoahk. Met iei sapwellime manaman, de ngehn sarawi. Lepin lokaia wet ni lokaiahn Ipru oh Krihk “ngehn” kin wehwehki engimah, me duwehte ipidohn kisinieng. Sohp kan me Pohl kin iang kin doadoahngki kisinieng pwehn katanga. Ni ahlohte, kitail anahne limpoak oh sapwellimen Koht manaman soh sansal en kamwekid atail sohp en pwoson pwehn wonowei nan sapwellimen Siohwa doadoahk.​—Wiewia 1:8; Episos 3:16.

Wonowei Lao Lel Kitail Pahn Lel Atail Mehn Akadei kan!

18. Dahme pahn sewese kitail en dadaurete pahn kasongosong kan en atail pwoson ni ahnsou kohkohdo?

¹⁸ Atail pwoson oh limpoak pahn lelohng kasongosong laud kan mwohn kitail pahn pedolong nan koasoandi kapw. Ahpw Siohwa kin ketikihong kitail mehn poudek ehu me “teng oh kehlail”​—atail koapworopwor kaselelo. (Ipru 6:19; Rom 15:4, 13) Kitail kak dadaurete pahn uhwong kan de kasongosong teikan, ma kitail pahn poudek ki koapworopwor. Mwurin ehu melimel mweledi oh mwohn pil ehu melimel pahn tepida, kitail en nantihong song en kakehle atail koapworopwor oh pwoson.

19. Iaduwen kitail kak kolokol oh kakainene “waratail sohp” en atail pwoson lao kitail lelahng pahn mwetehn meleilei en sapwellimen Koht sampah kapw?

¹⁹ Mwohn Pohl koasoia duwen “poudek ong mour,” e koasoia duwen met: “Ih at ineng lauden: emenemen kumwail en kin nantihong eh ngoang lel ni imwi, pwe me kumwail kin koapworopworki en kak pweida. Kumwail dehr dangahngahla, ahpw kumwail alasang irail kan me kin pwoson oh kanengamah re lao lel dahme Koht ketin inoukihong irail.” (Ipru 6:11, 12) Sang ni poahsoan en limpoak ong Siohwa oh sapwellime Ohl iangahki manaman me kohsang ngehn sarawi, kitail en kolokol oh kakainene “waratail sohp” en pwoson lao kitail lelahng pahn mwetehn meleilei en sapwellimen Koht sampah kapw.

[Nting tikitik me mi pah]

Kousapahl

◻ Kaweid dahieu me Pohl kihda me pid duwen atail pwoson?

◻ Iaduwen ekei kin, ni karasaras, seradahng pohn takai kan, oh iaduwen ekei kin luwetala ni pali ngehn?

◻ Sapwellimen Koht irair dahieu pahn anahne iang atail pwoson?

◻ Dahme pahn sewese kitail en pedolong nan sapwellimen Koht sampah kapw?

[Kilel nan Pali 16]

“Waratail sohp” en atail pwoson anahne en wiawihda kehlail pwehn kak powehdi melimel akan en mour

[Kilel nan Pali 17]

Atail pwoson kak duwehte sohp me seradahng pohn takai kan

[Kilel nan Pali 18]

Koapworopwor kin duwehte mehn poudek ehu ong atail mour nin duwen Kristian akan