Irehdi Kahpwal en Sapahrekpeseng Ong Lapalap En Aramas

Sounkapikadao pahn ahnsou keren wahdo irair en pahrekpene me aramas kin inengieng. Lao ahnsouwo pahn kohdo, kitail kak wiahda ewen kahk kan en irehdi kahpwal en sapahrekpeseng ong lapalap en aramas me kin lelohng kitail oh atail peneinei. Nin duwen me Nelson Mandela me mahso wia president en South Aperika koasoia, “dahme kitail kin wiahkihda dahme kitail ahneki, ahpw kaidehn dahme kohieng kitail, me kin katohrepeseng aramas akan.”

POADOAPOAD kasalehda mehlel en dahme e koasoia. Mie ohl oh lih tohto me sohte arail mehkot ni ahnsou me re ipwidi ahpw, pwehki re koadoahkehda dahme re ahnekiehr, kin pweida mwahu oh tohrohrsang iengerail kan me paiamwahu sang irail. Irail kan me kin paiamwahu sangete ahnsou me re ipwidi kin kalusala dahme re ahneki oh sohte kak pweida mwahu.

Doadoahngki Mwahu Dahme Ke Ahneki!

Sounkadehdehn Siohwa kan kin nsenohki sewese aramas akan en loalokongkihla kupwuren Koht ni en aramas pwukat pahn onopki Paipel. Ahpw, re wehwehki me pwe aramas akan en paiekihda laud iren Paipel kan, re anahne ese wadawad oh nting. Ki kahrepe wet, Sounkadehdehn Siohwa kan kasukuhlkihongehr aramas kid kid kei wadawad oh nting, iangahki aramas 23,000 (nan werengen 1990 samwa) nan ehu sapwen West Aperika kelehpw. Ni ah koasoia duwen doadoahk mwahu me Sounkadehdehn Siohwa kan kin wiahda ni arail kin pwarek aramas teikan, San Francisco Examiner koasoia: “Kumwail en kilangwohng irail nin duwen tohnwehi kan me wia mehn kahlemeng mwahu. Re kin pwerisekiohng pwain arail taks kan, apwalih me soumwahu kan, oh kasukuhlih me sehse wadawad oh nting kan.”

Patohngete met, sang ni kaiahn en padahk mwohn wehipokon, Sounkadehdehn Siohwa kan kaianehdahr aramas kid kid kei pwe ren koahiekala wia kapahrek, oh ren kak samanihla padahk mwohn wehi pokon. Nanpwungen irail meh kid pwukat iei ekei me mahso kin apwalki lokaia. Karaspe ehu, tehk duwen emen ohl sang South Aperika me ntingihdi: “Ahi lohteng me inenen suwed me karehong ie en sohte kak koasoiong meteikan, oh kin ahnsou koaros kasik me meteikan en lokaiahkin ie. . . . Ni ahnsou me I iangala sukuhl en Theocratic Ministry oh wia wadawad en Paipel mwohn kisin pokon ehu  . . . , ahi lohteng inenen suwedla kahrehda I sohte kak kanekehla wadawad wet nan ahnsou me kilelediohng. Mwurin mihdingo [brother me apwali sukuhlo] ni kadek kihong ie kaweid kan me katepe. E kaweidikin ie me I en praktis wadawad ong pein ngehi mie ngile. I wia met, rahn koaros, wadawad mie ngile sang nan nei Paipel oh makasihn en Watchtower.” Ohl menet kekeirada inenen mwahu me ahnsouwet e kin wia padahk mwohn pokon en aramas me kin tohtohki aramas epwiki, pil iangahki kid.

Paiekihda Pahrekpene Nanpwungen Pirien en Kristian kan

Me pid kasukuhl, pelien roson mwahu, oh pelien paien wehi oh pwihn en aramas, irair kan nanpwungen Sounkadehdehn Siohwa kan kin wekpeseng. Wekpeseng pwukat kin kasalehda duwen irair en sohunsek en sampah me re kin kousoan loale. Ahpw weksang pwihn en kaudok teikan, rehn Sounkadehde kan re sohte kin lipilipilki keinek, pwihn en aramas, oh pelien paien wehi kan.

Re wiadahr met ni arail kin wia uwen me re kak en kapwaiada dahme re sukuhlkisang nan Paipel. Ni mohngiong unsek re kin peikiong soahngen mouren kosonned pwukat: “Pwehki I sohte kin kasawih aramas nin duwen me aramas akan kin wia. Aramas kin kasawih mwomwen aramas, ahpw ngehi, I kin kasawih nan mohngiong e aramas akan.” (1 Samuel 16:7) “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.” (Wiewia 10:34, 35) “Ma emen pahn wiahiong kumwail me suwed, kumwail dehr dupungkihong me suwed. Kumwail nantihong kapwaiada soahng mwahu kan me aramas koaros kin pwungki. Kumwail wia uwen amwail kak pwe kumwail en ahneki popohl rehn aramas koaros.”​—Rom 12:17, 18; pil kilang 1 Timoty 6:17-19; Seims 2:5, 9.

Ni arail kin kapwaiada mouren kosonned pwukat en Paipel me kin kahrehda miniminpene, Sounkadehdehn Siohwa kan sohte kin men mweidohng sapahrek kan me pid keinek, pwihn en aramas, de pelien paien wehi en pwarada nanpwungarail. Karaspe ehu, irair pwukat sohte kin koasoanehdi ihs me pahn ale pwais laud kan nan mwomwohdisohn Kristian. Pwukoah kan me duwehte padahk oh epwel, kin kohieng irail kan me koahiek ni pali ngehn.​—1 Timoty 3:1-13; Taitus 1:5-9.

Ong irail kan me lokolok pahn sapahrek kan en sampah ehu me liaktohrohr, ia uwen kansenamwahu ni en meteikan kin wiahkin irail duwehte riarail brother kan oh sister kan me irail koaros pahrekpene mwohn Sounkapikparail! Martina kak kasalehda mehlel en met. Mwurin ah pahpa kesehla arail peneinei, ah nohno kelehpw apwalihada ih ni semwehwe. Aramas akan kin kalapw mwamwahleki Martina, oh e sohla kin likih pein ih, oh e sohte kak ehuong meteikan. E ahnekihla madamadau en sohla kin nsenohki mehkot. Ahpw, soahng kan wekila, mwurin e tepiada onopki Paipel oh wiahla emen Sounkadehdehn Siohwa. E koasoia: “I anahnehte en peiong ahi madamadau sapwung kan, ahpw ahnsouwet I kakehr powehdi kahpwalo. Ahi wahu pil miehlahr, oh I kin koasoi ni likilik. Padahk mehlel kihongiehr irair en pwukoahki mehkan. Ahnsouwet I wehwehkidahr me Siohwa poakohng ie oh me mour mie katepe.”

Nin duwen pwihn en Kristian ehu nan sampah pwon, Sounkadehdehn Siohwa kan nan sahpw daulih 230 kin paiekihda irair en ahneki soangen lapalap tehieu nanpwungarail nan sampah ahnsouwet. Mie pwihn en lamalam ehu me kak nda me re kin pil ahneki soangen lapalap tehieu nanpwungarail oh kasalehda met sang arail wiewia?

Ni mehlel, Sounkadehdehn Siohwa kan kin mehlel nan ire wet. Re kak wehkada me pwehki re kohsang nan wasa kan me soh unsek, irail sohte kak kihsang sapahrek en nanpwungen aramas duwehte meteikan me erein sounpar epwiki kei kin songosong en wia met​—oh sohte kak pweida. Mendahki met, re wiadahr soahng tohto pwehn irehdi kahpwal suwed wet. Oh pwehki re pwoson kehlail inou en Koht, re kin kasikasik sampah pwung kapw ehu wasa me sapahrekpeseng ong lapalap en aramas pahn wiahla mehn mahs ehu.

Ehi, aramas peik kan koaros pahn ahnsou keren pwurehng pahrekpene “ni wahu oh pwung” me Sounkapikparail kupwurki ong irail en paiekihda nin tepio. Met wia madamadau kaselel ehu! Oh ahnsouwet e uhdahn pahn wiawi!

[Kilel nan Pali 7]

Sounkadehdehn Siohwa kan kin powehdi irair en sehse wadawad oh nting ni arail kin kasukuhlkihong aramas kid kid kei wadawad oh nting

[Kilel nan Pali 8]

Padahk mehlel en Paipel kin sewese kihsang lipilipilki keinek, pwihn en aramas, oh pelien paien wehi