Momourki Pwoson Sapwellimen Koht Inou Kan

“Kumwail kadehdehda me ngehite me Koht, oh sohte pil emen me duwehte ngehi. Sangete nin tepio I kasalehda dahme pahn wiawi mwuhr, I kohpada mahsie dahme pahn wiawi.”​—AISEIA 46:9, 10.

1, 2. Ia ekei pasapeng wekpeseng kan duwen en Koht kin ketin pidada nan wiewia kan en aramas?

IA uwen laud en Koht kin pidada nan wiewia kan en sampah? Mie soangsoangen pasepeng kan. Ehu pasepeng iei me Koht sohte kin pidada nan wiewia kan en aramas. Nin duwen pasepeng wet, mwurin ah kapikada aramas, e sohte kupwurki de e sohte kak ketin sewese kitail. Oh pil nin duwen pasapeng wet, aramas akan kin karasaiong Koht duwehte sahm emen me kamwohdadahng nah pwutak pohn pwaisikel kapw ehu, kainenehda pwaisikelo, oh siken pwaisikelo pwe nah pwutako en kak tepida tangdihla pohn ahl. Mwurin met, pahpao aluhwei sang pwutako. Pwutako pahn pein wia ah; ele e pahn pwupwudi, de soh. Mendahki ma pwutako pahn pwupwudi de soh, solahr ahn pahpao ong met.

² Pil ehu pasapeng iei me Koht kin uhdahn kaweikaweidih irair koaros nan atail mour oh me e pidada wiewia kan koaros me e ketin kapikada. Ahpw, ma met mehlel, ekei pahn lemeleme me Koht sohte kin ihte kahrehda me mwahu kan en wiawi ahpw pil kin kahrehda mwersuwed kan oh kansensuwed kan me kin lelohng tohnsampah. Ma kitail esehla dahme mehlel me pid iaduwen Koht kin pidada nan wiewiahn aramas, e pahn sewese kitail en ese dahme kitail en kasik sang reh. E pahn kakehlailla atail pwoson mehlel pweidahn sapwellime inou kan.​—Ipru 11:1.

3. (a) Iaduwen kitail ese me me Siohwa iei Koht en kupwur kan? (b) Dahme kahrehda Paipel kin mahsanih me Siohwa kin ‘wiahda,’ de ‘koasoanehdi’ kupwure?

³ Me kesempwal ong wehwehki iaduwen Koht kin pidada nan wiewiahn aramas iei ire mehlelo me Siohwa iei Koht en kupwur men. Met kin sansal ni mwareo. “Siohwa” kin wehwehki “E Kahrehda en Wiahla.” Ki wiewia kan me kin ekis ekis pweipweida, Siohwa kin ketin kahrehong pein ih en wiahla Sounkapwaiada sapwellime inou kan koaros. Ihme kahrehda, Paipel kin mahsanih me Siohwa kin ketin ‘wiahda,’ de ‘koasoanehdi,’ kupwure me pid mehkan de wiewia kan nan ahnsou kohkohdo. (2 Nanmwarki 19:25; Aiseia 46:11) Lepin lokaia pwukat kohsang lokaiahn Ipru ya·tsarʹ, me pahrekiong lepin lokaia me wehwehki “sounwia dahl.” (Seremaia 18:4) Duwehte emen sounwia dahl semen me kak wiahkihda nesen pwehl ehu dahl kaselel, Siohwa kak wiahda, de kamwekid, mehkan pwehn kapwaiada kupwure.​—Episos 1:11.

4. Iaduwen Koht ketin kapikada sampah pwe aramas en kousoan ie?

⁴ Karasepe ehu, Koht kupwurki me sampah pahn wiahla wasa kaselel ehu me pahn audaudkihda aramas unsek oh peik kan. (Aiseia 45:18) Mwohn e kapikada tepin ohl oh lih, Siohwa ketin kaunopada ong ira. Tepin irelaud kan en pwuhk en Senesis kin kasalehda iaduwen Siohwa ketin koasoanehdi rahn oh pwohng, sahpw madekeng oh nansed. Mwuri, e kapikada tuhke kan oh mahn akan. Doadoahk me Siohwa wia pwehn kaunopada sampah ong aramas en kak kousoan powe reireiki sounpar kid kid kei. Doadoahk wet pweidahr oh kaneknekla. Tepin ohl oh lih tepiada ara mour nan Ihden, paradais kaselel ehu me soahng koaros mih loale pwe ren kak nsenamwahuki mour. (Senesis 1:31) Ihme kahrehda, e sansal me Siohwa uhdahn pidada nan wiewia kan en aramas, ni ah kin ekis ekis koasoakoasoanehiong sapwellime doadoahk sapwellime kupwur ileileo. Tohtohlahn peneinei en aramas kin kahrehong en sohla pidada nan arail mour?

Siohwa Kin Ketin Ite Sapwellime Wiewia Ong Aramas akan

5, 6. Dahme kahrehda Koht kin ketin ite sapwellime wiewia ong aramas kan?

⁵ Mendahki ma Siohwa kin sapwellimanki manaman en wia met, e sohte kin ketin kaweidih de kaunda wiewia koaros en aramas. Mie kahrepe kan. Ehu kahrepe iei me aramas akan kapikipikda ni mwomwen Koht, re ahneki nsen saledek, re saledek en wiahda pein arail pilipil kan. Siohwa sohte kin ketin idingkihong kitail en kapwaiada kupwure; kitail pil kaidehn toahl kei me Siohwa kin kamwekid en wia dahme e mwahuki. (Deuderonomi 30:19, 20; Sosua 24:15) Mendahki ma e ketin kapwukoahkin kitail atail wiewia kan, Koht ni limpoak kin mweidohng kitail ekis saledek en pilada iaduwen kitail pahn kaweidih pein atail mour kan.​—Rom 14:12; Ipru 4:13.

⁶ Pil ehu kahrepe me Koht sohte kin uhdahn kaweidih soahng koaros me wiawi kin pidada ireo me Sehdan kapwarehda nan Ihden. Sehdan uhwong sapwellimen Koht kaunda unsek en lahng oh sampah. E kaperenih ki Ihp mehkot me likamwete Ihp pahn kakehr ahnekihdi ahnsou mwahu en uhtohrda​—mehkot me Ihp oh pil mwuri ah pwoudo, Adam, pwungkihlahr. (Senesis 3:1-6) Pwehn sapengla ire wet, Koht ketin mweidohng aramas akan en kaunda pein irail ong ahnsou kis pwehn kadehdehda me en Sehdan uhwong kaundahn Koht me sapwung. Ihme kahrehda, kitail sohte kak ikidkihong Koht soahng sapwung kan me aramas kin wiahda nan rahnwet. Moses ntingihdi duwen aramas kan me kin uhwong: “Ahpw kumwail me soaloalopwoat, sohte warohng wia sapwellimen [Koht] aramas, wehi mwersuwed oh dipan ehu.”​—Deuderonomi 32:5.

7. Ia kupwuren Siohwa ong sampah oh tohnsampah?

⁷ Ahpw, nindoken e ketin mweidohng aramas arail pilipil saledek oh ren song soangsoangen kaunda uhtohr kan, Siohwa sohte uhdahn sohla kin pidada wiewia kan en aramas, pwe met pahn kahrehong kitail en sohla kak koapworopworki me e pahn ketin kapwaiada sapwellime inou kan. Mendahki Adam oh Ihp uhwongada sapwellimen Koht kaunda unsek en lahng oh sampah, Siohwa sohte wekidala kupwure limpoak ong sampah oh tohnsampah. E uhdahn pahn kawiliakapwala sampah pwehn wiahla paradais ehu me pahn audaudkihda aramas unsek, peik, oh paia-mwahu kan. (Luk 23:42, 43) Rekord en Paipel sang pwuhk en Senesis lel pwuhk en Kaudiahl kin kasalehda iaduwen Siohwa kin ketin ekis ekis kadoahke pwehn kapwaiada kupwur wet.

Koht Kin Ketin Mwekid Pwehn Kahrehong Kupwure en Pweida

8. Dahme pidada wahlahng mehn Israel kan nan Sapwen Inou?

⁸ Nan sapwellime wiewia ong wehin Israel, Koht ketin kasalehda me e pahn ketin kahrehong kupwure en pweida. Karasepe ehu, Siohwa ketin kamehleleiong Moses me e pahn kapitala mehn Israel kan sang Isip oh wahiraildo nan Sapwen Inou, sahpw ehu me dirki milik oh sukehn loangalap. (Eksodus 3:8) Pakair wet me kesempwal oh likilik. E kin pidada kasaledeklahn mehn Israel ko​—me kapataiong iengerail kan mihmi ni uwen aramas silirar—​sang wehi kehlail ehu me sohte men kadarirailla. (Eksdus 3:19) Re pahn wisikdohng nan sahpw ehu me audaudki wehi kehlail kan me pahn uhwong arail pedolong nan sahpwo. (Deuderonomi 7:1) Mwohn arail pedolong nan sahpwo, re pahn seiloak nan sapwtehn ehu me irail mehn Israel kan pahn anahne mwenge oh pihl. Met kin wia irair ehu me pahn mweidohng Siohwa en kasalehda sapwellime manaman kehlail oh pil kasalehda me ih me Koht mehlel.​—Lipai 25:38.

9, 10. (a) Dahme kahrehda Sosua kak kadehde me sapwellimen Koht inou kan me likilik? (b) Ia uwen kesempwal kitail en likih sapwellimen Koht erpit en katingih sapwellime me lelepek kan?

⁹ Koht ketin kahreiei sang nan Isip mehn Israel kan ni ah doadoahngki soangsoangen wiewia kapwuriamwei kan. Keieu, e wahdohng pohn wehin Isip kalokolok eisek. Mwuri, e pwalangpeseng Sehd Weitahta, kahrehiong mehn Israel kan en pitla nindoken karis en sounpei en Isip kan me pwakih irail kamwomwmwomwla. (Melkahka 78:12, 13 43-51) Mwurin met, e ketin apwalihala mehn Israel kan erein arail seiseiloaki sounpar 40 nan sapwtehn, ni ah ketin kamwengehkin irail manna, oh ketikihong irail pihl, oh pil ketin apwalih irail pwe arail likou kan en dehr meringla oh me nehrail kan en dehr mpwetada. (Deuderonomi 8:3, 4) Mwurin mehn Israel kan pedolong nan Sapwen Inou, Siohwa kahrehiong ren powehdi arail imwintihti kan oh kana nan mahwen kan. Sosua, me kin kasalehda pwoson kehlail sapwellimen Siohwa inou kan, kin kadehdehki mese soahng pwukat koaros. Ihme kahrehda, e kak ni likilik ndahong ohl mah kan en ah mwehi: “Emenemen kumwail patohwan ese nan mohngiongimwail oh ngenomwail me Kauno [“Siohwa,” New World Translation] amwail Koht ketikihong kumwail soahng mwahu koaros me e ketin inoukidahr.”​—Sosua 23:14.

¹⁰ Duwehte Sosua en mahso, Kristian kan nan rahnwet kin uhdahn likih me Koht pahn kupwurki oh kak sewese irail ko me kin papah ih. Kamehlel wet kin wia kisehn atail pwoson. Wahnpoaron Pohl ntingihdi: “Eri, sohte me kak kenikenla pahn kupwuren Koht ma sohte eh pwoson. Pwe mehmen me men kohwong rehn Koht uhdahn pahn kamehlele me Koht ketin mie, oh me Koht kin ketin katingih irail kan me kin raparapahki.”​—Ipru 11:6.

Koht Mwahngih Dahme Pahn Wiawi Nan Ahnsou Kohkohdo

11. Irair dah kei me kahrehong Koht en kak kapwaiada sapwellime inou kan?

¹¹ Lel met, kitail kilangehr me nin doken Koht ah kin ketin mweidohng aramas en ahneki saledek en pilipil oh uhda tohr en kaunda, pein ih kin sapwellimanki kehl oh kupwur en ketin kapwaiada sapwellime koasoandi kan. Ahpw, mie pil ehu irair me kin kahrehda sapwellimen Koht inou kan en pweida mehlel. Siohwa mwahngih dahme pahn wiawi nan ahnsou kohkohdo. (Aiseia 42:⁠9) Ki sapwellime soukohp, Koht mahsanih: “Kumwail tamanda dahme wiawiher mahso; kumwail kadehdehda me ngehite me Koht, oh sohte pil emen me duwehte ngehi. Sangete nin tepio I kasalehda dahme pahn wiawi mwuhr, I kohpada mahsie dahme pahn wiawi. I mahsanih me ei koasoandi kan uhdahn pahn pweida, pwe mehkoaros me I kupwurki uhdahn pahn pweida.” (Aiseia 46:9, 10) Sounmwetuwel semen men kin ese iahd oh iawasa me e pahn padokedi weren tuhke ieu, ahpw e kakete ahneki peikasal ma tuhkeo pahn keirada mwahu de soh. Ahpw, “Nanmwarki Soutuk” kin sapwellimanki loalokong pwung en mwahngih ni unsek iahd oh iawasa sapwellime kupwur kan pahn pweida.​—1 Timoty 1:17.

12. Ni ahl dahieu Siohwa kasalehda ah mwahngih dahme pahn wiawi ahnsou kohkohdo ni mwehin Noha?

¹² Tehk iaduwen Koht kasalehda me e mwahngih nan ahnsou kohkohdo ni mwehin Noha. Pwehki paraparalahn me suwed akan nan sampah, Koht ketin koasoanehdi en kasohrala tohnsampah sapeik kan. E koasoanehdi ahnsou ehu me e pahn ketin wia met, mwurin sounpar 120. (Senesis 6:3) Ni ah ketin koasoanehdi ahnsowo, Siohwa kin medemedewe laud sang ihte kasohralahn me suwed kan, mehkot me e kak wia ahnsou soh lipilipil. Sapwellimen Siohwa ahnsou me e koasoanehdi pil kahrehda komouralahn me pwung kan. (Pil tehk Senesis 5:29.) Pwehki Koht kin ketin sapwellimanki erpit, e mwahngih ahnsou mwahu en koasoanehdi doadoahko me pahn kasohrala me suwed kan oh komourala me pwung kan. E ketikihong Noha oaritik kan me pid met. Noha pahn kauwada warihmw ehu “pwehn doarehla tohnimwe,” oh me suwed kan pahn kamwomwkihla nohlik lapalap ehu.​—Ipru 11:7; Senesis 6:13, 14 18, 19.

Doadoahk En Kokou Lap Ehu

13, 14. Dahme kahrehda kokou en warihmwo kin wia pwais apwal ehu?

¹³ Tehk madamadau en Noha ong pwukoah wet. Pwehki Noha kin wia ohlen Koht emen, e ese me Siohwa pahn kasohrala me suwed kan. Ahpw, mwohn met pahn wiawi, mie doadoahk me pahn wiawihda​—doadoahk ehu me emen anahne en ahneki pwoson pwehn kak wiahda. Kokou en warihmwo pahn wia doadoahk lap ehu. Koht kasaledahr ia uwen laud en warihmwo. Warihmwo pahn reireisang ekei wasahn mwadong kan nan rahnwet oh ileile duwehte ihmw poasoke limau. (Senesis 6:15) Sounkou kan en warihmwo sohte samanih doadoahk wet oh re malaulau. Sohte neirail dipwisoun doadoahk wiepan kan me mie nan rahnwet. Pil ehu, pwehki Noha sohte ahneki sapwellimen Siohwa erpit en mwahngih dahme pahn wiawi nan ahnsou kohkohdo, Noha sohte pahn kak ese soangen irair dah kan me pahn pwarada erein sounpar kan, ma irair pwukat ele kak sewese de irehdi doadoahk en kokouwo. Ele Noha kin medemedewe peidek tohto. Iaduwen e pahn kihpene dipwisoun kokou kan? Iaduwen e pahn kihpene mahn akan? Soangen mwenge dah kan me anahn oh ia uwen laud? Iahd Nohlik Lapalapo pahn wiawi?

¹⁴ Oh pil, mie irair me pid wiewiahn aramas kan. Me suwed kadirehla wasa koaros. Nephilim kehlail kan​—wahnedin tohnleng suwed kan oh lih kan—​kadirehkihla sampah me suwed kan. (Senesis 6:1-4, 13) Pil ehu, kokoupen warihmwo sohte pahn wia doadoahk ehu me pahn wiawi ni rir. Aramas akan kin wahpwonki dahme Noha wiewia, oh e kin padahkihong irail dahme e wiewia oh ia kahrepe. (2 Piter 2:5) E pahn kasik me re pahn pwungki met? Soh! Sounpahr kei mwowe, ohl lelepek Enok pakairki kasohralahn me suwed kan. Pwehki aramas akan sohte pwungki rong dahme e pakairki, Koht “ketikihsang,” de kamwotala ah mour, pwe ah imwintihti kan en dehr kemehla ih. (Senesis 5:24; Ipru 11:5; Sud 14, 15) Noha sohte pahn ihte pakairki rohng ehu me duwehte Enok me aramas kan pahn sapwungki ahpw e pahn pil kauwada warihmw ehu. Nindoken warihmwo wie kokouda, e pahn wia mehn kataman kehlail ehu ong duwen lelepek en Noha mwohn mesen dih suwedo!

15. Dahme kahrehda Noha kin likih me e pahn kak kapwaiada ah pwais?

¹⁵ Noha ese me Koht Lapalahpie kin utungada oh kapaiada ah doadoahko. Kaidehn pein Siohwa me ketikihda doadoahko? Siohwa ketin kamehleleiong Noha me ih oh ah peneinei pahn pedolong nan warihmwo ni ahnsou me e pahn nek oh komourala ih oh ah peneinei sang Nohlik Lapalapo. Koht pil ketikihda mehn kamehlelpen ki inou ehu. (Senesis 6:18, 19) Ni mehlel, Noha pohnese me Siohwa wehwehkiehr oh tenekiehr soahng koaros me pidada met mwohn e ketikihda pwukoah. Laud sang met, Noha ese me Siohwa sapwellimanki manaman en sewese ih ma anahn. Ihme en Noha pwoson kamwekid ih en kapwaiada. Duwehte ah pahpa kahlap Eipraam, Noha “uhdahn ese me Koht pahn uhdahn ketin kapwaiada audepen sapwellime inou.”​—Rom 4:21.

16. Nindoken kokou en warihmwo kin wie kekeirada, iaduwen en Noha pwosono kin kehlailla?

¹⁶ Ni en sounpar kan doudoulahte mwowe oh warihmwo miehlahr mwomwe, en Noha pwoson kin kehlailla. Kahpwal kan me pid kokou oh katangepen doadoahk en warihmwo kamwahula. Re powehdiehr kasongosong kan oh kahpwal kan koaros. Sohte soangen uhwong ehu me kak kauhdi doadoahko. Noha oh eh peneinei kin pehm en Siohwa kin utung irail oh pere irail. Nindoken en Noha kin nantihwei mwowe, ‘eh pwoson eh kin powehdi apwal pwukat, e kin kalaudehla ah kanengamah ni ahnsou apwal.’ (Seims 1:2-4) Kedekedeo, doadoahk en kauwada warihmwo kaneknekla, oh Nohliko kohdo, oh Noha oh ah peneinei komourala. Noha kin kilang pweidahn sapwellimen Koht inou kan, duwehte me Sosua wia mwuri. Noha ale katingpen ah pwoson.

Siohwa Utungada Doadoahko

17. Ni ahl dah kei atail ahnsou kin pahrekiong ni mwehin Noha?

¹⁷ Sises kohpada me atail ahnsou pahn pahrekiong ni mwehin Noha. Koht pil pwurehng koasoanehdi kasohrala me suwed kan oh kilelehdi ahnsou ehu pwe met en wiawi. (Madiu 24:36-39) E pil ketin kaunopada soahng kan en wiawi pwehn doarehla me pwung kan. Nindoken Noha kauwada warihmwo, sapwellimen Koht ladu kan nan rahnwet kin kalohkiseli sapwellimen Siohwa kupwur kan, padahki sapwellime Mahsen, oh katohnpadahk.​—Madiu 28:19.

18, 19. Iaduwen kitail ese me Siohwa kin utungada kalohkpen rongamwahuwo?

¹⁸ Ma Siohwa sohte ieiang Noha pwehn utung oh komourih, warihmwo sohte pahn kak kokouda. (Pil kilang Melkahka 127:1) Ni ahlohte, ma sohte sawas en Siohwa, Kristian mehlel kan sohte kak pitla, oh sohte kak pweida. Kameliel, emen Parisi ndand oh sounpadahk en Kosonnedo, nan keieun senturi kin pohnese duwen met. Ni ahnsou me mehn Suhs Sanedrin kan men kasorehla wahnpoaron kan, e kaweidki tohn mwoalen kopwungo: “Kumwail piseksang irail, pwe ma arail koasoandi oh doadoahk tepisang aramas, e uhdahn pahn sohrala; ahpw ma e kohdo sang rehn Koht, kumwail sohte kak poweiraildi.”​—Wiewia 5:38, 39.

¹⁹ Pweida mwahu en doadoahk en kalohk, nan keieun senturi oh nan rahnwet, kin kadehde me doadoahk wet sohte kohsang rehn aramas, ahpw e kohsang rehn Koht. Artikel en mwuri pahn koasoia ekei irair kaperen kan oh wiewia kan me sewese doadoahk en kalohk en pweida mwahu ni ahl ehu me inenen laud.

Dehr Uhdi!

20. Ihs me kin utung kitail ni atail kin kalohkiseli rongamwahuwo?

²⁰ Mendahki kitail momour nan “ahnsou apwal,” kitail kak kamehlele me Siohwa sapwellimanki manaman pohn mehkoaros. E kin ketin utung oh sewese sapwellime aramas akan nindoken irail kin doadoahk pwehn kanekehla doadoahk en kalohkiseli rongamwahu mwohn rahno me Koht ketin kilelehdi pwehn kasohrala koasoandi suwed wet pahn kohdo. (2 Timoty 3:1; Madiu 24:14) Siohwa kin ketin luhke kitail en iang wia “ienge tohndoadoahk.” (1 Korint 3:9) Kitail pil kamehlele me Krais Sises kin ieiang kitail nan doadoahk wet oh kitail kak pil likih utuht en tohnleng kan oh arail kaweid.​—Madiu 28:20; Kaudiahl 14:6.

21. Dahme kitail en dehr uhdisang kamehlele?

²¹ Pwehki Noha oh ah peneinei kin kasalehda arail pwoson sapwellimen Siohwa inou kan, re pitsang nohliko. Irail ko me kasalehda soangen pwosonohte nan rahnwet pahn pil pitsang “kahn kamakam kowahlap” me kohkohdo. (Kaudiahl 7:14) Kitail momour nan ahnsou kan me inenen kaperen. Wiewia kesempwal kan mihmihte mwowe! Ni ahnsou keren, Koht pahn ketin wahdo lahng kapw oh sampah kapw kaselel wasa me me pwung kan pahn kousoan ie. (2 Piter 3:13) Kitail en dehr uhdisang kamehlele me Koht pahn ketin kahrehong sapwellime inou kan koaros en pweida.​—Rom 4:21.

Ire Kesempwal kan en Tamanda

◻ Dahme kahrehda Siohwa sohte kin kakaun oaritik kan koaros nan wiewia kan en aramas?

◻ Iaduwen sapwellimen Siohwa erpit en kapwaiada kupwure kin sansalda nan sapwellime wiewia rehn Israel?

◻ Iaduwen sapwellimen Siohwa erpit en mwahngih nan ahnsou kohkohdo kin sansalda ni mwehin Noha?

◻ Likilik dahieu kitail en ahneki nan sapwellimen Koht inou kan?