Koapworopwor Awiawih!

“I pahn koapworopwor awiawih Koht, me pahn ketin komouriehla. Ei Koht pahn ketin karonge ie.”​—MAIKA 7:7.

1, 2. (a) Iaduwen lamalam sapwung kauwehla mehn Israel kan nan sapwtehn? (b) Dahme kak wiawihong Kristian men me sohte kin ahneki lamalam pwung?

SOAHNG tohto nan mour kak mwahu de suwed, oh met pahn poahsoankihda atail madamadau. Ni ahnsou me mehn Israel kan koukousoan nan sapwtehn, Koht ketikihong irail manna. Re anahne en kilangseli nan sapwtehno oh uhdahn kalahngankiong Siohwa ah ketikihong irail arail mehn ketihnain. Met pahn kasalehda arail lamalam pwung. Ahpw soh, pwe re uhd tamanda soangsoangen mwenge kan nan Isip oh kaulimki me manna namanam suwed. Ia uwen arail ahneki madamadau sapwung!​—Nempe 11:4-6.

² Ni ahlohte Kristian men nan rahnwet kak kilangwohng soahng kan me re mwahu de re suwed. Ma e sohte pahn ahneki lamalam pwung, emen Kristian kakete sohla ahneki peren, oh met me toutou, pwe nin duwen me Nehmaia mahsanih: “Peren me Kauno [“Siohwa,” New World Translation] pahn ketikihong kumwail pahn kakehlakeikumwailla.” (Nehmaia 8:10) Ahneki lamalam me soahng koaros pahn pweida mwahu oh pil ahneki peren pahn sewese kitail en kehlail oh kin kekeirada meleilei oh miniminpene nan mwomwohdiso.​—Rom 15:13; Pilipai 1:25.

3. Iaduwen lamalam pwung sewese Seremaia erein ahnsoun apwal?

³ Mendahki e momour nan ahnsou kan me apwal, Seremaia kin kasalehda lamalam me soahng koaros pahn pweida mwahu. Pil mendahki e kilang ohla kamasepwehk ahnsou me Serusalem pwupwudi nan pahr 607 B.C.E., e kilangete me mie mehkot mwahu me kohsang met. Siohwa sohte pahn ketin manokehla Israel, oh wehio pitla. Seremaia ntingihdi nan pwuhk en Koul Kedepwidepw Kan: “Sapwellimen Kauno limpoak poatopoat oh kupwur mahk sohte kin tokedi. E kin kansenamwahu duwehte kansenamwahu en nimenseng, oh poatopoat duwehte dakadahn ketipin.” (Koulen Kedepwidepw Kan 3:22, 23) Erein poadopoad, sapwellimen Koht ladu kan me kin mihla nan irair kan me keieu apwal kin kolokolete lamalam me soahng koaros pahn pweida mwahu oh re pil kin peren.​—2 Korint 7:4; 1 Deselonika 1:6; Seims 1:2.

4. Lamalam dahieu Sises kin kolokol, oh iaduwen met sewese ih?

⁴ Sounpar wenepwiki mwurin Seremaia, Sises kin ale sawas en dadaurete pwehki e kin sapwellimaniki lamalam en pweida mwahu. Kitail wadek: “Pwehki peren me e kasikasik, e sohte mwahn kupwurohkihla kanamenekpen eh pahn pwoula nin tuhkeo; eri, ahnsou wet e ketiketier ni palimaun en mwoalen Koht.” (Ipru 12:2) Mendahki soangen uhwong kan de kalokolok kan me Sises lelohng​—pil iangahki medek en tuhken kalokoloko—​e kin medemedewehte “peren me e kasikasik.” Peren wet iei kapai kaselel en kawauwihala kaunda unsek en Siohwa oh kasarawihla mwaren Siohwa iangahki koapworopwor en wahdo kapai laud ong tohnsampah peik kan nan ahnsou kohkohdo.

En Ahnekihla Lamalam en Koapworopwor Awiawih

5. Atail awiawih pahn sewese kitail en kolokol lamalam pwung ong soangen ire dahieu?

⁵ Ma kitail pahn kekeirada atail lamalam en duwehte lamalam en Sises, kitail pahn kakete ahneki peren me Siohwa kin ketikihong kitail mendahki ma soahng kan sohte kin ahnsou koaros wiawi ni ahl oh ni ahnsou me kitail kin lemelemeohng. Soukohp Maika mahsanih: “Ahpw I pahn sohpeiong Kauno; I pahn koapworopwor awiawih Koht, me pahn ketin komouriehla.” (Maika 7:7; Koulen Kedepwidepw Kan 3:21) Kitail pil kak kasalehda lamalam en awiawih. Iaduwen? Ni ahl tohto. Ehu, ele mwein kitail kin medemedewe me brother men me ahneki pwukoa nan mwomwohdiso wiahda sapwung ehu oh me e anahne mwadang kopwungpwungla. Ma kitail ahneki lamalam en awiawih, kitail kak medemedewe, ‘Brother menet uhdahn sapwung, de ngehi me sapwung? Ma ih me sapwung, Siohwa soh kin mweidohng met en wiawi pwehki e kupwurki me brothero pahn mwahula oh sohte anahnepen kopwung?’

6. Iaduwen lamalam en awiawih pahn sewese emen me kin peipeiohng pein ah kahpwal ehu me e men powehdi?

⁶ Lamalam en awiawih me anahn ma kitail nsensuwedkihla kahpwal ehu me pein kitail ahneki de kitail kin peipeiong luwet ehu. Iaduwen ma kitail kin peki sawas en Siohwa, ahpw kahpwalo kin mihmihte. Dahme kitail en wia? Kitail en wiewiahte soahng koaros me kitail kakohng pwehn kapwungala kahpwalo oh eri pwoson mahsan kan en Sises: “Kumwail peki, e ahpw pahn kohieng kumwail; kumwail rapahki, kumwail ahpw pahn diar; kumwail letelet, e ahpw pahn ritidahng kumwail.” (Luk 11:19) En kin kapakapte, oh awiawih Siohwa. Ni ahnsou ehu me konehng oh ni pein sapwellime ahl, Siohwa pahn sapengla ahmw kapakap.​—1 Deselonika 5:17.

7. Ni ahl dahieu atail kin awih pahn sewese atail madamadau ong kawehwehn Paipel ehu me kin ekisekis wiawihda?

⁷ Ni en kokohp kan en Paipel kin wie pweipweida, atail wehwehkihla Pwuhk Sarawi kin loalla. Ahpw, ekei ahnsou, ele kitail kin lemeleme me kawehwe ehu me pwand. Ma kawehwe wet kin pwandasang dahme kitail mwahuki, kitail kak awih? Tamataman me Siohwa kupwurki me e konehng kasansalehda “mehkan me sarawi oh rir duwen Krais” ni a kin ketin kasalehda ekis ekis ni erein pahr 4,000 samwa. (Episos 3:3-6, NW) Eri, mie kahrepe kitail en soh-kanengamah? Kitail kin peikasalki me mie pwihn en “ladu lelepek oh loalokoang” ehu me idihdda pwehn kihong sapwellimen Siohwa aramas kan “kenerail mwenge ni ahnsou me konehng”? (Madiu 24:45) Ia kahrepen kitail en soikala atail peren me Koht ketikihong kitail pwehki kitail sohte wehwehki kawehwe koaros? Tamataman, Siohwa me pahn ketin koasoanehdi iahd oh iaduwen e pahn ketin kasansalehda sapwellime ‘ire rir kan.’​—Eimwos 3:7.

8. Iaduwen sapwellimen Siohwa kanengamah kin wia kapai ehu ong aramas tohto?

⁸ Ekei kin nsensuwed pwehki re kin lemeleme me mwurin arail papah lelepek erein sounpar tohto, mwein ele re sohte pahn koanoahdi kilang “rahn lapalap oh kamasepwehk en Siohwa.” (Soel 2:30, 31) Ahpw mendahki met, re kak ale kangoang ni arail kilang wasa mwahu kan en ire wet. Piter kaweidki: “Kumwail tehk mwahu sapwellimen Kauno kanengamah ong kumwail ni eh ketikihong kumwail ahnsou mwahu en ale komour.” (2 Piter 3:15) Sapwellimen Siohwa kanengamah mweidohngehr aramas mohngiong mehlel rar kan en sukuhliki padahk mehlel. Met soh kaselel? Pil ehu, uwen werei en Siohwa kasalehda kanengamah, met pil kareireila atail ahnsou en “nantihong doadoahk ni lemmwin oh poadidi pwe kumwail en kaunsekala komourpamwail.”​—Pilipai 2:12; 2 Piter 3:11, 12.

9. Ma kitail kin mihla pahn irair kan me kin irehdi uwen me kitail kak wia nan atail papah Siohwa, iaduwen atail kin awih pahn sewese kitail en dadaurete pahn irairo?

⁹ Atail koapworopwor awiawih pahn sewese kitail en dehr nsensuwedla ni ahnsou me uhwong kan, soumwahu, mahla, de kahpwal teikan pahn kerempwekitailla nan doadoahk en Wehio. Siohwa kupwurki kitail en papah ih sang nan mohngiongatail unsek. (Rom 12:1) Ahpw, sapwellimen Koht Ohlo, me “kin ketin kupwurkalahngan ong me luwet oh semwehmwe kan,” sohte idingki kitail en wia laudsang uwen me kitail kakohng; met pil duwehte rehn Siohwa. (Melkahka 72:13) Ihme kahrehda, kitail kin ale mehn kangoang en wia uwen me kitail kakohng, ni kanengamah awiawih lao irair kan kin wekila​—ma kaidehn nan koasoandi suwed wet de koasoandi me pahn kohdo. Tamataman: “Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasalehdahr oh pil kin kasalehiong riamwail souleng kan.”​—Ipru 6:10.

10. Irair suwed dahieu emen kak liksang ma e kin awih? Kawehwehda.

¹⁰ Atail koapworopwor awiawih pil kin sewese kitail en liksang aklapalap. Ekei me lahlahwe padahk mehlel eri pwupwsang padahk mehlel sohte men awih. Ele re lemeleme me mie wekidekla kan me anahne en wiawihda, kawehwehn Paipel de ire kan me pid koasoandi en pwihn. Ahpw, re pohnsehsehla me sapwellimen Siohwa ngehn sarawi kin kamwekid pwihn en ladu lelepek oh loalokong en wiahda wekidekla kan ni sapwellime ahnsou me konehng, ah kaidehn ni ahnsou me kitail leme met anahn. Oh wekidekla kan me wiawihda anahne en pahrekiong kupwuren Siohwa, kaidehn pein atail lamalam. Irail kan me lahlahwe padahk mehlel oh eri pwupwsang padahk mehlel kin mweidohng lamalam en aklapalap en kauwehla arail madamadau oh kadipikelekel irail. Ahpw, ma re alehda lamalam en Krais, re pahn kolokolete arail peren oh mihmihte rehn sapwellimen Siohwa aramas akan.​—Pilipai 2:5-8.

11. Iaduwen kitail kak paiekihda doadoahngki ahnsoun awiho, ni atail idawehnla ahn ihs mehn kahlemeng kan?

¹¹ Ni mehlel, ahneki lamalam en awiawih sohte kin wehwehki me kitail pahn dangahnga de nennenwei sohte wia mehkot. Mie soahng kan me kitail anahne en wiahda. Karasepe ehu, kitail anahne en soupisengki pein onopki Paipel oh eri kasalehda atail nsenohki soahng ngehnin kan duwehte me soukohp lelepek kan oh pil tohnleng kan kasalehda. Ni ah kosoia duwen arail kin nsenohki soahng ngehnin kan, Piter mahsanih: “Ong nin duwen komour wet me soukohp ako wiahier rompe oh kalelapakpe, . . . Iei padahk mehlel me pil tohnleng kan kin men iang dehdehkihla.” (1 Piter 1:10-12) Kaidehn pein onopki Paipelte me anahn ahpw kitail pil anahne en ahnsou koaros iang mihding kan oh kapakap. (Seims 4:8) Irail ko me kin kasalehda arail pohnese arail anahn en pali ngehn ni arail kin kaukaule ale mwengehn ngehn oh werekiong iengerail Kristian kan kin kasansalehda me re ahnekilahr lamalam en Krais.​—Madiu 5:3.

En Kilangwohng Soahng Kan Nin Duwen Dahme Uhdahn Kin Wiawi

12. (a) Uhtohr dahieu Adam oh Ihp rapahki? (b) Ia imwilahn en tohnsampah idawenla Adam oh Ihp?

¹² Ni ahnsou me Koht kapikada tepin pwopwoudo, e kolokol ong pein ih pwung en koasoanehdi koasoandi en dahme pwung oh dahme sapwung. (Senesis 2:16, 17) Adam oh Ihp men uhtohr sang kaweid en Koht, oh met imwikihla soahng kan me kitail kilang kapilpene kitail nan sampah rahnwet. Wahnpoaron Pohl mahsanih: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Erein sounpar wenekid en poadoapoad en aramas sangete ni mwein Adam kin kasalehda mehlel en mahsan kan en Seremaia: “Maing Kaun, I ese me sohte mehmen me kaunda pein imwilahn eh mour; sohte aramas emen me kaunda pein eh mour.” (Seremaia 10:23) Pwehn kamehlele me mahsan kan en Seremaia me mehlel sohte kin wehwehki me kitail sohte pahn pweida nan mour. Ire pwukat uhdahn kin wiawi nan mour. E kawehwehda ia kahrepen erein sounpar epwiki kei “ekei aramas ahneki manaman, a ekei kin wie lokolok pahn ar manaman” pwehki aramas kin kaunda pein irail uhtohr sang Koht.​—Eklesiasdes 8:9.

13. Pwehki irair en tohnsampah, madamadau dahieu Sounkadehdehn Siohwa kan kin ahneki ong dahme aramas kak wiahda?

¹³ Pwehki irair en tohnsampah, Sounkadehdehn Siohwa kan kin pohnese me mie soahng kan me kin irehdi kamwahulahn mehkan nan koasoandi wet. Atail ahneki lamalam en pweida mwahu kak sewese kitail en kolokolete atail peren, ahpw met kaidehn ih soahngo me pahn kamwahuwihala mehkoaros. Nan tepin pahr kan en 1950 samwa, emen kaun en lamalam en mehn Amerika ntingihdi ehu pwuhk wadawad me adaneki The Power of Positive Thinking. Pwuhko koasoia me pali laud en mehn kerempwe kan kak kapwungpwungla ma aramas kin apwalihkihala lamalam en pweida mwahu. Lamalam en pweida mwahu iei mehkot me kaselel. Ahpw dahme kin uhdahn wiawi nan mour kasalehda me loalokong, koahiek, kepwe kan de mwohni, oh ire tohto teikan kin irehdi dahme emenemen kitail kak wiahda. Oh me pid sampah pwon, kahpwal kan me inenen laud ong aramas en pweida kapwungala​—mendahki ia uwen ar ahneki lamalam en pweida mwahu!

14. Sounkadehdehn Siohwa kan kin ahneki madamadau me soahng kan pahn suwedte kohkohla sohte mwahula? Kawehwehda.

¹⁴ Pwehki Sounkadehdehn Siohwa kan kin ese me soahng pwukat uhdahn kin wiawi nan mour, aramas kan kin ekei pak karaunehkin irail me dene re ahneki madamadau en ihte kilang soahng kan me suwed. Ahpw, ni mehlel, Sounkadehdehn Siohwa kan kin ngoangki padahkihong aramas akan duwen ihs kelehpw me kak kamwahuwihala kahpwal kan en aramas. Ni ahl wet re pil kahlemengih lamalam en Krais. (Rom 15:2) Oh re kin soupisengki sewese aramas kan en ahnekihla nanpwung mwahu rehn Koht. Re ese me met pahn wahdo dahme keieu mwahu ong aramas akan ni ahnsouwet oh ni ahnsou kohkohdo.​—Madiu 28:19, 20; 1 Timoty 4:16.

15. Iaduwen doadoahk en Sounkadehdehn Siohwa kan kamwahuwihala aramas akan?

¹⁵ Sounkadehdehn Siohwa kan sohte kin pohnsehse kahpwal akan me kohsang koasoandi suwed wet me kin kapilpene irail: keieu wiewia samin kan me kin uhwong Pwuhk Sarawi. Mwohn emen pahn wiahla Sounkadehdehn Siohwa men, e anahne wekidala eh mour, pak tohto e pil anahne powehdi tiahk samin kan me tengla reh me Koht kin ketin kupwursuwedki. (1 Korint 6:9-11) Ihme kahrehda, Sounkadehdehn Siohwa kan kin sewese irail aramas me kin perenki rong Mahsen en Koht en powehdi ahr tiahk suwed kan duwehte kamamsakau, doadoahngki wini suwed kan, nenek, oh pilein mwohni. Irail pwukat me kin wekila kin sukuhliki en apwalih arail peneinei ni elen wahu oh mehlel. (1 Timoty 5:8) Ma aramas kan oh peneinei kan kin ale sawas ni ahl wet, arail kahpwal akan pahn tikitikla​—irail me doadoahngki wini suwed pahn malaulaula, pepei nan peneinei pahn sohla wiawi, oh soahng suwed teikan pahn sohla wiawi. Arail kin wia tohnwehi me kin peikiong kosonned oh sang arail kin sewese meteikan en wekidala arail mour en mwahula, Sounkadehdehn Siohwa kan kin katikitikihla doadoahk en irail aramas akan me arail doadoahk iei en apwalihala soangen kahpwal kan me kin kohsang koasoandi en aramas.

16. Dahme kahrehda Sounkadehdehn Siohwa kan sohte kin iang pidada nan mwekid en wekidala koasoandi kan me sampah kin wia?

¹⁶ Eri, Sounkadehdehn Siohwa kan wekidalahr sampah en tiahk mwahu? Eri, erein sounpar eisek samwalahro, nempehn Sounkadehde me kin kalohk kin tohtohlahsang aramas ekis malaulau sang 3,800,000 lel aramas 6,000,000. Met kekeirkihda aramas 2,200,000, oh me tohto rehrail kin kesehla wiewia sapwung kan ni ahnsoun me re wiahla Kristian. Mour tohto mwahula! Mendahki met, nempe wet me inenen tikitik ni ah kin kapahrekiong tohtohlahn aramas nan sampah pwon erein sounparohte​—875,000,000! Sounkadehdehn Siohwa kan kin diarada me e kaperen en sewese aramas kan me perenki rong, mendahki re wehwehki me malaulaute sang nanpwungen tohnsampah me pahn keid nan ahl me kahluwalahng mour. (Madiu 7:13, 14) Nin doken Sounkadehde kan kin awiawih wekidekala mwahu me Koht kelehpw kak wiawihong sampah pwon, re sohte kin iang pidada mwekid en wekidala koasoandi kan me sampah kin wia ahnsou wet, me kin kalap tepikihda ineng mwahu ahpw imwikihla nsensuwed oh pil iangahki pepei.​—2 Piter 3:13.

17. Dahme Sises wia pwehn sewese irail ko reh, oh dahme e sohte wia?

¹⁷ Ni arail kin wia met, Sounkadehdehn Siohwa kan kin kasalehda arail likih Siohwa duwehte me Sises kasalehda ni ahnsou me e ketiket nin sampah. Nan tepin senturi, Sises kin wiahda manaman kapwuriamwei kan ni ah kin kamwahuwihala me soumwahu kan. (Luk 6:17-19) E pil kin kaiasada me melahr akan. (Luk 7:11-15; 8:49-56) Ahpw, e sohte kihsang kahpwal me kin kahrehda soumwahu de kihsang mehla. E mwahngih me saikinte sapwellimen Koht ahnsou en wia met. Pwehki e sapwellimaniki koahiek en aramas unsek men, Sises kakete kamwahuwihala kahpwal en pelien politik oh koasoandi en aramas. Mwomwen me ekei aramas kan nan ah ahnsouwo men en alehda manaman oh kaunda, ahpw Sises sohte men wia met. Kitail wadek: “Ni aramas ako me mi wasao ar kilangehr kilel wet me Sises ketin wiadahr, re ahpw nda, ‘Mehlel, ohl menet iei ih Soukohpo me pahn pwarodohng sampah!’ Ni Sises eh ketin mwahngihada me irail pahn kodohng ale, pwe re en kasapwiladahng nanmwarki, e ahpw kelehpw ketila sang rehrail oh ketidalahng pohn nahnao.”​—Sohn 6:14, 15.

18. (a) Iaduwen Sises kin ahnsou koaros kasalehda lamalam en awih? (b) Iaduwen sapwellimen Sises doadoahk wekila sangete nan 1914?

¹⁸ Sises sohte men iang pidada nan pelien politik de doadoahk en koasoandi en aramas pwehki e mwahngih me ahnsoun ah pahn alehda manaman en nanmwarki oh en wiahda manaman kapwuriamwei en kamwahuwihala aramas koaros wasa koaros saikinte leledo. Pil mwurin ah ketidahla nanleng nin duwen ngehn ehu me solahr kak mehla, Sises men awih sapwellimen Siohwa ahnsou me e ketin kilelehong mwohn eh pahn nanmwarkihla oh kapwaiada sapwellime pwukoa kan. (Melkahka 110:1; Wiewia 2:34, 35) Ahpw, sangete ahnsou me Sises ketier nan mwoale nanleng nin duwen Nanmwarki en Wehin Koht nan 1914, e “ahpw mwesel kohkohla, kolahng kalowehdi eh imwintihti kan.” (Kaudial 6:2; 12:10) Ia uwen atail kin kalahnganki en uhpahiong sapwellime kaunda, nindoken meteikan me dene irail Kristian kin pohnsowehla padahk kan en Paipel me pid Wehio!

Awiawih​—Mehkot me Kansensuwed de Kaperen?

19. Iahd me awih kin kahrehong ‘mohngiong en ohla,’ oh iahd e kin wia mehkot kaperen?

¹⁹ Solomon wehwehki me awiawih kin kapwunod. E ntingihdi: “Ni ahnsou me omw koapworopwor kin ohla, mohngiongomw pil ohla.” (Lepin Padahk 13:12) Mehlel, ma kitail kin koapworopworki mehkot me sohte pahn pweida, mohngiongatail kak soumwahukihda nsensuwed. Ahpw, awiawih mehkot me kaperen​—ele mwein kapwopwoud ehu, ipwidi en seri men, de omw pahn tuhwong aramas kan me ke poakohng—​kin kak kadirehkinkitailla peren mwohn rahno pahn leledo. Pereno kin laudla ma kitail kin doadoahngki ahnsoun awiho ni elen loalokong, kaukaunop ong wiewiao me kohkohdo.

20. (a) Wiewia kaselel dah kei kitail kin koapworopwor kasikasik en kilang? (b) Iaduwen kitail kak diar peren nin doken atail awiawih sapwellimen Siohwa kupwur kan en pweida?

²⁰ Ma kitail kin koapworopworki unsek me dahme kitail kasikasik pahn pweida​—mendahkihte ma kitail sehse iahd soahng pwukat e pahn pweida—​ahnsoun awiho sohte pahn ‘kasoumwahuwihada mohngiongatail.’ Sapwellimen Koht ladu lelepek kan ese me sapwellimen Krais Kaundahn Pahr Kid kerendohr. Re koapworopworki me re pahn kilang imwilahn mehla oh soumwahu. Ki ngoang kasikasik re kin perenki awiawih ahnsou me re pahn kasamwohdo aramas lik kan sang mehla, iangahki arail peneinei kan. (Kaudial 20:1-3, 6; 21:3, 4) Nan ahnsou pwukat me tuhke kan oh mahn akan mihlahr nan keper, ladu lelepek kan en Koht kin perenki ahneki koapworopwor en kilang Paradais wiawihda pohn sampah. (Aiseia 35:1, 2, 7) Eri, ia uwen loalokong, en doadoahngki ahnsoun awiho ni elen erpit, “kehlail oh dadaur oh loalenohng amwail doadoahk ong Kauno ahnsou koaros”! (1 Korint 15:58) En kaukaule alehda mwengehn ngehn. Wiahda ehu nanpwung keren rehn Siohwa. Rapahkihda meteikan me mohngiongarail kamwekid irail en papah Siohwa. Kangoange iengatail me pwoson kan. Isaneki ahnsou luhluhwe me Siohwa mweidohng. Eri, awiawih Siohwa sohte pahn kahrehda ‘mohngiongomw en soumwahuda.’ Ahpw, e pahn kadirehkinuhkala peren!

Ke Kak Kawehwehda?

• Iaduwen Sises kasalehda lamalam en awih?

• Nan irair dah kei Kristian kan anahne lamalam en awih?

• Dahme kahrehda Sounkadehdehn Siohwa kan kin nsenamwahuki en awih Siohwa?

• Iaduwen atail awih Siohwa kak wia mehkot kaperen?

[Kilel nan pali 22]

Sises ketin dadaurete pwehki peren e ketin kasikasik

[Kilel nan pali 23]

Pil mwurin sounpar tohto en atail papah Siohwa, kitail kak kolokolete atail peren

[Kilel nan pali 25]

Aramas rar kan kamwahuwihala arail mour ni arail wiahla Sounkadehdehn Siohwa kan