Memour nan Keper
“Sohte mehkot me ke kak wia ni rahn de ni pwong sohte lipilipil—me pil iangahki meir—me sohte keper me e kakete wia kaimwiseklahn ahmw mour.”—Kohsang makisihn me oaralap koasoia: Discover.
MOUR kin rasehng alialu nan mwaht ehu me dirkihla pakudang, pwehki aramaso kak ohkihla de mehkihla ni ahnsou soh lipilipil, kalap ni soh pakairpe. Irair keper kan kin wekwekpeseng nan ehu ehu wehi. Keper pwukat kin iangahki aksident en sidohsa kan, mahwen nanpwungen aramas kan me kohsang wehi ehute, lehk, soumwahu en mohngiong, oh pil soahng tohto teikan. Karasepe ehu, nan wasa ehu nan Aperika me adaneki sub-Saharan Africa, soumwahu en AIDS kin keieu kemehla aramas tohto. Nan pahr keren kan, ni a “kemehla aramas rar pak 2.2 (met wehwehki pak 10 tohto sang kamakamalahn aramas kan nan mahwen kan koaros me kin wiawi nan Aperika),” koasoia U.S.News & World Report.
Ni ahnsowohte, sampah kin doadoahngkihla tala lik kei pwehn kareireila mour de katikitikihla keper kan en soumwahu oh ohlahn paliwar me kahrehda e solahr kak doadoahk. Madamadau kapw tohto kin wiawihda, duwehte kang mwenge kan oh mehn nimpil kan me mwahu ong paliwar, eh ekspiriens, kin kak wahdo imwila mwahu kan. Ahpw, mie utupen ire likilik kan ong irair kesempwal en mour koaros me kak sewese iuk en paiekihda mour ehu me pahn pere iuk sang keper, oh mour meleilei. Ire likilik pwukat kohsang nan Paipel. E kin audaudki kaweid kan me kin apwalihala soang soangen kapwunod kan me kin lelohng atail pali roson en war oh kamwahupatail. Ehi, ahpw Paipel sohte kin kihda kaweid oaritik koaros ong kahpwal koaros. Ahpw, e kin kihda mouren kosonned pwung kan pwehn kaweid kitail nan soangen ire kan me duwehte mwenge, kehl en paliwar, madamadau, wendipene, doadoahngki sakau, sika, oh wini ong mehn kamwadong kan, oh soahng tohto teikan.
Mouren me tohto kin pil dirkihla kahpwal akan ni pali en mwohni wasaht. Paipel pil kin sewese kitail. E sohte kin ihte kangoangehkin kitail en ahneki madamadau loalokong ong mwohni oh iaduwen kitail en apwalih neit mwohni, ahpw e pil kin kasalehda duwen iaduwen kitail en wia tohndoadoahk mwahu de kaun en doadoahk mwahu. Ni mengei, Paipel kin wia mehn kaweid mwahu, kaidehn ongete pelien mwohni oh kamwahupen pali roson en war, ahpw pil ong pein atail mour. Ke men kilang ia uwen Paipel ah katapan nan rahnpwukat? Eri, menlau pousehla wadewadekte.