Kitail Anahne Sawas Pwehn Wehwehkihla Pwuhk Sarawi
PWUHK SARAWI, de Paipel, kin wia pwuhk tohrohr ieu. Irail akan me ntingihada mahsanih me irail mwekidki sapwellimen Koht ngehn sarawi, oh audepen pwuhk wet kasalehda me met me mehlel. (2 Timoty 3:16) Likin soahng teikan me mih nan Paipel, e kin kasalehda iawasa aramas tepsang ie, ia kahrepen atail memour, oh ia imwilahn aramas. Ei, mie katepe kitail en tehk kanahieng audepen pwuhk wet!
Ele mwein ke wadekehr Paipel, ahpw diarada me pwuhk wet apwal en wehwehki. Mwein ke sehse iawasa ke kak alehsang pasapengpen ahmw peidek kan. Ma iei, eri kaidehn kowe kelepw me wia met. Ahmw irair en duwehte ohl emen me mih nan ahnsoun tepin Kristian akan. E seiloak pohn kuruma kohkohlahng Serusalem kolahng sahpwe, Idiopia. Ohl lapalap en Idiopia menet wie wadewadek mahsen en kokohp en Paipel me kohsang nan pwuhken Aiseia, me ntingihdier sounpahr 700 mwohn met.
Mwadangete, ohl emen eri peianda kuruma oh rahnmwahu. Ohlo ede Pilip, ih emen sapwellimen Sises wahnpoaron, oh e idek rehn ohlen Idiopia: “Ia duwe, komw wehwehki dahme komw wadewadeken?” Ohlen Idiopia eri sapeng: “Iaduwen ei pahn kak wehwehki, ma sohte me pahn kawehwehiong ie?” Ih eri luhkedahng Pilip nan were kuruma. Pilip eri kawehwehiong ih iren pwuhko me ohlo wadewadeko oh ih doula oh kalohkihong duwen “Rongamwahu duwen Krais.”—Wiewia 8:30-35.
Nin duwen mwohmwohte me Pilip wia pwehn sewese ohlen Idiopia pwehn wehwehkihla Mahsen en Koht mahs mahsie, Sounkadehdehn Siohwa kan kin sewese aramas akan en wehwehkihla Paipel rahnwet. Irail pahn pil perenki sewese iuk. E kin mwahu en mie koasoandi mwahu ieu en wiawihiong onop Pwuhk Sarawi, tepikihda mahs padahk mengei kan. (Ipru 6:1) Ni ahmw pahn kekeirada, ke pahn kakehr alehda dahme wahnpoaron Pohl kadaneki “mwenge kekeluwak”—me wehwehki padahk loale kan. (Ipru 5:14) Edetehn Paipel me ka pahn sukuhliki, pwuhk teikan—sawaspen Paipel akan—kak sewese iuk diar oh wehwehkihla iren Paipel akan me pid soangsoangen oaralap kan.
Onop Paipel kak koasoandi pwehn mwahu ong uhk, me pid ahnsou dah oh iawasa e pahn wiawi. Ekei pil kin doadoahngki telephone oh onop Paipel. Onop pwukat sohte kin wiawi nan perehn sukuhl; e kin wiawi ni ahl me pahn mwahu ong ahmw irair akan, me pil iangahki ahnepemw oh uwen ahmw sukuhl. Ke sohte anahne pwain soangen sukuhl en Paipel wet. (Madiu 10:8) Sohte des de sikeng, oh e sohte pahn wiawi pwehn kahrehong uhk ken namenekla. Ahmw peidek kan pahn pasapengla, oh ke pahn sukuhliki iaduwen ken kak karanih Koht. Dahme ke soh alehier kasukuhl en Paipel? Met, ke kakehr wie medemedewe soangen ahl akan me onop Paipel kak wahdohng ahmw mour peren mehlel.