Ke Men Kalaudehla Ahmw Wehwehki Paipel?

Dahme Kahrehda Ke Anahne Wadek Paipel?

PAIPEL weksang pwuhk teikan—e audaudki kaweid limpoak sang rehn Koht. (1 Deselonika 2:13) Ma ke pahn doadoahngki dahme Paipel kin padahki, ke pahn ale kamwahu laud. Ke pahn kalaudehla ahmw limpoak ong Koht oh ke pahn karanihla Ih, pwe Ih me kin wia sounketikihda “soangen wiawi sapan koaros oh kisakis mwahu koaros.” (Seims 1:17) Ke pahn sukuhliki iaduwen ke kak kapakap ong Ih. Ni ahnsoun apwal akan, ke pahn kak kehn sapwellimen Koht sawas. Ma ke pahn wiaiong ahmw mour en pahrekiong sapwellimen Koht kaweid akan me mih nan Paipel, Koht pahn ketikihong uhk mour soutuk.—Rom 6:23.

Paipel audaudki padahk mehlel kan me kin ketikihda mehn kamarain. Irail akan me kin alehda loalokong sang Paipel kin saledek sang sawehwe tohto kan me kadirehla mour en aramas rar kei. Karasepe, wehwehkihla padahk mehlel me pid dahme kin wiawiong aramas mwurin mehla kin kamaiau kitail sang perki me dene aramas melahr akan kin lidere kitail de me dene atail peneinei de kompoakpahtail me melahr akan wie kalokolok wasakis. (Esekiel 18:4) Padahk en Paipel me pid kaiasada en me melahr akan kin ketikihda kamweit ohng irail oko me arail peneinei oh kompoakpahrail akan melahr. (Sohn 11:25) Ni atail kin wehwehkihla padahk meh lel duwen tohnleng suwed oko kin sewese kitail en wehwehkihla duwen keper kan en wunahni oh pil sewese kitail en wehwehkihla dahme kahrehda suwed ah nohn tohto nan sampah.

Kaweid en Koht nan Paipel mahsanih ong kitail duwen atail pahn momour ni ahl ehu me pahn wahdohng kitail kapai kan en war. Karasepe ieu, “dehr wia mehkan daulihla” kin kahrehda roson en war. (1 Timoty 3:2, New World Translation) Ni atail kin ‘kamwakelekitailsang mehkoaros me kin kasaminehla paliwar oh pali ngehn,’ kitail kak pere kitail sang kaupe kan me kin kauwehla atail roson en war. (2 Korint 7:1) Atail kapwaiada kaweid en Koht nan Paipel pil kin wahdo peren nan pwopwoud oh ong wahupen pein emen emen aramas.—1 Korint 6:18.

Ma ke pahn kapwaiada Mahsen en Koht, ke pahn wiahla aramas peren. Loalokong en Paipel kin sewese kitail en diarada nan loalatail meleilei, nsenamwahu oh koapworopwor. E kin sewese kitail en kekeirada pepehm en poakpoake, limpoak, peren, meleilei, kadek oh pwoson. (Kalesia 5:22, 23; Episos 4:24, 32) Soangen irair en nan kapehd pwukat kin kak sewese kitail en wiahla ohl oh lih pwopwoud mwahu, pahpa oh nohno mwahu oh seri mwahu.

Mie pak ke kin medemedewe dahme pahn wiawi ni ahnsou kohkohdo? Kokohp en Paipel kin kasalehong kitail me kitail mihmi nan ahnsou kesempwal ehu. Kokohp pwukat sohte ihte kin kasalehda duwen irair en sampah nan ahnsou wet, ahpw re pil kin kasalehda me Koht pahn ketin wekidala sampah en wiahla paradais ni ahnsou keren.—Kaudiahl 21:3, 4.

Sawas ong Wehwehkihla Paipel

Mwein ele ke kin song en wadek Paipel, ahpw ke kin diar me e kin apwal en wehwehki audepe kan. Mwein ke sohte wehwehki iawasa me ke pahn kak diar nan Paipel pasapeng kan ong ahmw peidek kan. Ma iei, eri ke sohte kin kelepw nan irair wet, ni ahmw kin apwaliki diar pasapeng kan sang nan Paipel. Kitail koaros anahne sawas pwe kitail en wehwehki Mahsen en Koht. Sounkadehdehn Siohwa kan, nan sahpw mpen 235, kin kihda kasukuhl en Paipel ni sohte pweipwei ong aramas rar rar kei. Re pahn perenki sewese iuk.

E kin kalap mwahu ma onop en Paipel kin tepikihda sukuhliki padahk kesempwal kan oh ahpw doudoulahsang. (Ipru 6:1) Ni ahmw pahn doudoula, a pahn mengei ong uhk en wehwehkihla “mwenge kekeluwak”—me wehwehki padahk loal akan. (Ipru 5:14) Paipel iei pwuhk en kaweid mehlel. Ahpw, kisin pwuhk kan me audepe poahsoankihda padahk en Paipel me duwehte brochure (kisin pwuhk) me oaralap koasoia Dahme Koht Kupwurki Kitail en Wia? pahn kak sewese iuk en wehwehkihla mehkan me pid pali ngehn, me pid soangsoangen oaralap tohto.

Ke Men Koasoanehdi Ahmw Ahnsou Nan Ehu Ehu Wihk Pwehn Sukuhliki oh Wehwehkihla Paipel?

Sukuhliki Paipel kin kalap koasoandi ong ahnsou ehu oh ong wasakis me pahn soanamwahu ong uhk. Aramas tohto kin onop nan pein imwarail kan. Ekei kin onop ki telephone. Koasoandi en onop wet kaidehn mehkot me pahn wiawi nan imwen sukuhl me aramas tohto pahn iang towehda, ahpw e wia koasoandi ieu nanpwungen kowe oh emen aramas pwehn kak pahrekiong ahmw koasoandi oh uwen me ke kak wehwehki. Sohte test de sikeng pahn wiawi, oh sohte mehkot me pahn wiawi me pahn kahrehda ken namenekihla. Ahmw peidek kan me pid Paipel pahn pasapengla, oh ke pahn sukuhliki iaduwen ke kak karanih Koht.

Ke sohte anahne pwain kasukuhl en Paipel wet. (Madiu 10:8) E kin ritida ong pelien sarawi koaros oh pil irail akan me sohte arail pelien lamalam ahpw kin raparapahki en kalaudehla arail loalokongkihla Mahsen en Koht.

Ihs irail akan me kak iang mwohd ong kasukuhl en Paipel wet? Ahmw peneinei pwon. Sohte lipilipil kompoakepahmw kan me ke men luhkehdo kak pil iang. De ma ke men kelepw ah e pil pahn mwahu.

Me tohto kin koasoanehdi awa ehu nan ehu ehu wihk pwehn onop Paipel. Ma ke men koasoanehdi ahmw ahnsou laud sang met de pil mwotomwot sang met nan ehu ehu wihk, Sounkadehde kan pahn kak koasoanehdi arail ahnsou pwehn sewese iuk.

Luhk Ehu Kohwong Uhk en Iang Kasukuhl

Se men luhke iuk en tuhwong Sounkadehdehn Siohwa kan. Ehu ahl me ke kak wia met iei en ntingwong adres me mih pah. Koasoandi pahn wiawihda pwe emen en kak wia onop en Paipel rehmw.

□ Menlau kadarodohng ie ehu brochure (kisin pwuhk) me oaralap koasoia Dahme Koht Kupwurki Kitail en Wia? Kadehdehda ni mehnia lokaia.

□ Menlau kehsehkin ie duwen onop en Paipel ni sohte pweipwei.