Perenki Ahmw Loalokongkihla Siohwa
“Meid pai irail kan me kin rong Mahsen en Koht oh kapwaiada!”—LUK 11:28, New World Translation.
1. Iahd me Siohwa tepida mahsen ong aramas akan?
SIOHWA kin ketin poakohng aramas akan oh E kin nsenohki irail. Ihme kahrehda, e sohte kin wia mehkot kapwuriamwei me E kin mahsen ong irail. Siohwa tepida mahsen ong aramas nan mwetuwel en Ihden. Nin duwen pwuhken Senesis 3:8 mahsanih, ahnsou ehu “nin soutik en rahno,” Adam oh Ihp “rong kapitien Siohwa Koht.” Ekei aramas kin lemeleme me mahsen pwukat kin wehwehki me Siohwa kin kalapw mahsen ong Adam rahn koaros ni soutik. Kitail sehse ma met mehlel de soh, ahpw, Pwuhk Sarawi kin kasansalehda me Koht kin kaidehn ihte padahkiong keieun ohl kaweid kan ahpw pil kehsehkin ih duwen dahme e pahn wia pwehn kapwaiada eh pwukoa kan.—Senesis 1:28-30.
2. Iaduwen keieun pwopwoudo kasalehda me re sohte men mihmi pahn epwel mwahu en Siohwa, oh met imwikihla dah?
2 Siohwa ketikihong Adam oh Ihp mour, oh kihong ira pwukoa en apwalih mahn akan oh pil sampah. Ahpw, Koht keinapwih sang ira en dehr wia mehkot—ren dehr kang sang wahntuhkehn kehsehki aramas dahme mwahu oh dahme suwed. Sehdan kasonge ira, oh Adam oh Ihp eri sapeikiong sapwellimen Koht kosonnedo. (Senesis 2:16, 17; 3:1-6) Ira pein pilada en utohrda sang Koht, re men wia pein ara pilipil ong dahme pwung oh sapwung. Ni ahnsou ira wia met, ira kasalehda me ira utohrada sang epwelpen Sounkapikpara limpoak men. Ara pilipil kahrehong imwila suwed ong pein ira oh kadaudokara kan me saikinte ipwidi. Adam oh Ihp mahla oh mehla, oh sohte ara koapworopwor en iasada. Kadaudokara eri sohsohki dihp oh mehla.—Rom 5:12.
3. Dahme kahrehda Siohwa mahsen ong Kain, oh iaduwen Kain mwekidki met?
3 Ahpw, mendahki Adam oh Ihp pelianda Siohwa nan Ihden, Siohwa kin mahsen ong sapwellime kapikapikda kan. Nein Adam oh Ihp mesenih, Kain, mihlahr nan keper en pwupwudiong nan dihp. Ahpw, Siohwa padahkihong ih me e pahn lelong kahpwal eri Siohwa kaweidkin ih en “wia mehkot pwung.” Kain sohte kapwaiada kaweid limpoak wet oh e kemehla rie. (Senesis 4:3-8) Keieun aramas lel kasiluhn aramas soikala kaweid sansal me kohsang rehn Ih me ketikihong irail mour, oh Ih Koht ohte me kin ketikihong sapwellime aramas akan kaweid pwe ren kak paiekihda. (Aiseia 48:17) Met inenen kansensuwedih Siohwa!
Siohwa kin Kasalehda Pein Ih ong Ohl akan en Mahs
4. Dahme Siohwa kin likih me pid duwen kadaudok kan en Adam, oh rohng en koapworopwor dahieu me E ketikihong kadaudok kan en Adam?
4 Mendahki Siohwa sapwellimaniki pwung en sohlahr mahsen ong aramas akan, E sohte ketin wia met. E kin likih me ekei kadaudok kan en Adam pahn, ni loalokong, kapwaiada sapwellime kaweid kan. Karasepe ieu, ni ahnsou me Siohwa kadeikada Adam oh Ihp, E kohpada duwen “Kadaudok” me pahn soikala Serpento, Sehdan me Tepil. Oh, mwuhr, moangen Sehdan pahn ohla wehwehki me e pahn mehla. (Senesis 3:15) Kokohp wet kin wia rohng en koapworopwor kaperen ong “irail kan me kin rong mahsen en Koht oh kapwaiada.”—Luk 11:28.
5, 6. Ni ahl dah kan Siohwa kin mahsen ong sapwellime aramas akan mwohn keieun senturi C.E., oh iaduwen irail kin paiekihda met?
5 Siohwa kin padahkiong ohl lelepek kan en mahs duwehte Noha, Eipraam, Aisek, Seikop, oh Sohp duwen sapwellime kupwur kan. (Senesis 6:13; Eksodus 33:1; Sohp 38:1-3) Mwuhr, Koht doadoahngki Moses pwehn ntingihdi kosonned tohto ong wehin Israel. Irail paiekihda Kosonned en Moses ni ahl tohto. Pwehki re kin peikiong Kosonnedo, Wehin Israel kin tohrohr sang wehi teikan koaros pwe re kin wia sapwellimen Koht aramas tohrohr kan. Koht ketin kamehlelehong mehn Israel kan ma irail pahn peikiong Kosonnedo, Koht pahn kapaiada irail kaidehn ihte ni paliwar ahpw pil ni pali ngehn, wiakihla irail wehin samworo oh wehi sarawi ieu. Kosonnedo kin kihda kosonned akan me kin pid dahme re pahn kang oh koasoandi kan en mwakelekel ni paliwar oh met kin sewese irail en roson ni paliwar. Ahpw, Siohwa pil kin kasalehda duwen imwila suwed kan ma re pahn sapeik.—Eksodus 19:5, 6; Deuderonomi 28:1-68.
6 Mwuhr, pwuhk teikan me wiawihkihda manaman en ngehn sarawi eri kapatapat ong Paipel. Poadopoad kan kin koasoia duwen dahme Siohwa kin wia ong wehi kan oh aramas akan. Pwuhk kan me audaudki koasoi lingan akan kin kasalehda duwen sapwellimen Siohwa irair akan. Pwuhk en kokohp akan kin kohpadahr iaduwen sapwellimen Siohwa kupwur kan pahn pweida ni ahnsou kohkohdo. Ohl lelepek kan en mahs kin ni kanahieng wia arail onop oh re kin doadoahngki nan arail mour nting pwukat me kohsang rehn Koht. Emen irail ntingihdi met: “Sapwellimomwi mahsen, iei serepei, mehn kaweid ie, oh kamarainpen elei kan.” (Melkahka 119:105) Ong irail akan me men rong, Siohwa kin kasukuhlih oh kamarainih irail.
Marain eri Lingalingla
7. Edetehn Sises wiahda manaman akan, aramas akan kin esehla ih nin duwen emen me kin wia pwukoa dahieu, oh dahme kahrehda?
7 Nan keieun senturi, ekei pwihn en pelien lamalam en mehn Suhs kapataiong Kosonnedo tiahk en aramas akan. Irail sohte kin doadoahngki Kosonnedo ni ahl me pwung, oh Kosonnedo eri sohla wia mehkot me kin kangoange irail, ahpw e wiahla mehkot toutou ong irail pwehki tiahk en aramas pwukat. (Madiu 23:2-4) Ahpw, nan pahr 29 C.E., Sises pwarada oh wia Mesaia. Sapwellime pwukoa kaidehn ihte en toukihda moure ong aramas akan ahpw en pil “kadehde duwen mehlelo.” Edetehn e wiahda manaman akan, pali laud en aramas akan kin esehla ih nin duwen “Sounpadahko.” Sapwellime padahk kan kin rasehng marain ehu me kin kamarainih madamadau en aramas akan me mih nan rotorot. Pein Sises ni pwung mahsanih: “Ngehi me marain en sampah.”—Sohn 8:12; 11:28; 18:37.
8. Mehnia pwuhk kan me wiawihkihda manaman en ngehn sarawi me ntingdier nan keieun senturi C.E., oh iaduwen tepin Kristian akan paiekihda met?
8 Mwuhr, pwuhk kan duwehte pwuhken Rongamwahu kan, me wehwehki pwuhk pahieu me ntingdier duwen mouren Sises, oh pwuhken Wiewia kan, pwuhk pwukat iang kisehn Pwuhk Sarawi oh re kin wia poadoapoad ong iaduwen padahk kan en Kristian kalohkiseli wasa koaros mwurin Sises pwoula. Pil mie kisinlikou kan me wiawihkihda manaman en ngehn sarawi me sapwellimen Sises tohnpadahk kan ntingdier oh pil pwuhken en kokohp en Kaudiahl. Pwuhk tikitik oh pil patehng pwuhk kan en nting en Ipru iei me patpene oh kaunsekihla Paipel. Sang ni pwuhk tikitik pwukat me ntingkihda sang ni manaman en ngehn sarawi iei Pwuhk Sarawi de Paipel, Kristian akan kak iangehr duwehte irail me sarawi kan koaros “dehdehki ia uwen laud, oh duwen eh tehlap, eh reirei, eh ile oh loal” padahk mehlel. (Episos 3:14-18) Re kakehr ahneki “madamadau en Krais.” (1 Korint 2:16) Ahpw, irail tepin Kristian akan sohte kak wehwehki ni unsek kupwuren Siohwa. Wahnpoaron Pohl ntingwong ienge tohnpadahk kan: “Pwe me kitail kin kilikilang met, rasehng me kitail kin irongen nan kilahs edied ehu.” (1 Korint 13:12) Soangen kilahs wet kak kasalehdahte mwomwen aramas ahpw sohte sansal mwahu. Loalokong unsek duwen Mahsen en Koht pahn miehla ni ahnsou kohkohdo.
9. Kamarain dahieu me wiawi ni “imwin rahn akan”?
9 Rahnwet, kitail kin momour nan ahnsou ehu me adaneki “imwin rahn akan” oh “ahnsou apwal ekei” pahn wiawi nan “imwin rahn akan.” (2 Timothy 3:1) Soukohp Daniel kohpadahr me nan imwin rahn akan “loalokong pwung pahn kadirehla wasa.” (Daniel 12:4, NW) Ihme kahrehda, Siohwa, me keieu kadek mahmahsen, kin ketin sewesehier irail akan me mohngiong mehlel en kak wehwehkihla sapwellime Mahsen. Nan rahn pwukat, aramas tohto kin wehwehki me Krais Sises wiahla nanmwarki nanleng nan pahr 1914. Re pil kin ese me e pahn kereniong kihsang me suwed akan oh kawekila sampah pwehn wiahla paradais. Ni ahnsou wet, padahk kesempwal me kin pid Rongamwahu en Wehin Koht kin kalohkiseli wasa koaros nan sampah.—Madiu 24:14.
10. Nan erein senturi akan, iaduwen aramas akan kin mwekidki sapwellimen Siohwa kaweid?
10 Ei, ni erein poadoapoad en aramas akan, Siohwa kin padahkiong aramas akan nan sampah duwen sapwellime kupwur kan. Pwuhk Sarawi kin kasalehda duwen aramas tohto me rong oh doadoahngki erpit me kohsang rehn Koht nan arail mour kan, oh irail ahneki kapai tohto. Pwuhk Sarawi kin pil padahkiong kitail duwen ekei aramas me kin soikala sapwellimen Koht kaweid limpoak kan, irail kin alasang Adam oh Ihp oh lelong kahpwal akan. Sises karasaiong met ni ahnsou me e doadoahngki karasaras en ahl riau. Ehu ahl kin kahluwalahng mehla. Aramas akan me kin soikala Mahsen en Koht kin keid nan ahl me tehlap. Ahl teio kin kahluwalahng mour soutuk. Mendahki ahl wet me tehtik, iei ahl wet me aramas malaulau kin keid ie oh met kin sansal sang ni arail kin kamehlele Paipel, Mahsen en Koht, oh kapwaiada kaweid kan loale.—Madiu 7:13, 14.
Kalahnganki Dahme Kitail Ahneki
11. Atail kin esehla oh kamehlelehla Paipel kin kasalehda dah?
11 Ke kin wia kisehn aramas akan me wia arail pilipil en keid nan ahl me kin kahluwalahng mour? Ma iei, e sansal mwahu me ke pil men kekeidte nan ahlo. Iaduwen ke kak wia met? Ahnsou koaros ke anahne doudouloale oh kalahnganki kapai kan me ke aleier nan ahmw mour pwehki ahmw esehla padahk mehlel kan en Paipel. Pwehki ke mwekidki Rongamwahuo, met kin wia mehn kadehde ieu me Koht kupwurkin uhk. Sises kasalehda met ni ahnsou me e kapakap ong Seme oh mahsanih: “Semei, Kaunen nanleng oh sampah! I kapingahkin komwi omwi ketin kasalehiong me soaloalokong kan mehkan me komw ketin ekihsang me koahiek oh loalokong en sampah kan.” (Madiu 11:25) Sounlaid akan oh sounrik daksis kan kin wehwehki sapwellimen Sises padahk kan, ahpw kaun en pelien lamalam akan me kin sukuhl laud sohte kin wehwehki sapwellime padahk kan. Sises pil masanih met: “Sohte emen me pahn kak kohdo rehi, ma Semei me ketin kadariehdo sohte kainangihedo rehi.” (Sohn 6:44) Ma ke esehla Paipel oh kamehlelehla oh idawehn padahk kan me mih loale, met kin wia kasalepen me Siohwa kin ketin kakaranihiukadohng Ih. Met iei kahrepe mwahu ieu kitail en ahneki peren.
12. Ni ahl dah kan Paipel kin kamarainih aramas akan?
12 Mahsen en Koht kin audaudki padahk mehlel kan me kin kasaledekala oh kamarainih aramas akan. Irail akan me kin kapwaiada kaweid en Paipel kin saledeksang kilinwo, kaudok likamw akan, oh sawehwe me kin laud nan mour en aramas tohto. Karasepe ieu, ma emen pahn esehla padahk mehlel duwen irairen me mehlahr akan, padahk mehlel pahn kasaledek ih oh e solahr pahn masak aramas mehlahr akan pwe e pahn wehwehki me re sohte kak lidere ih oh pil e pahn wehwehki me irail me mehlahr akan sohte kak lelohng kalokolok kan. (Esekiel 18:4) Esehla padahk mehlel duwen ngehn saut akan kin sewese kitail en liksang wunahni. Padahk en koapworopwor en kaiasada kin kamweitihala aramas akan me arail peneinei de kompoakparail melahr. (Sohn 11:25) Kokohp kan en Paipel kin kasansalehda iawasa kitail kin mih nan poadopoad en aramas akan oh kin sewese kitail en likih sapwellimen Koht inou kan ong dahme pahn wiawi ni ahnsou kohkohdo. Re pil kin kakehlailih atail koapworopwor en mour kohkohlahte.
13. Iaduwen kitail pahn paiekihda ni roson en paliwar ma kitail pahn kapwaiada kosonned kan en Mahsen en Koht?
13 Kaweid kan me Paipel kin sewese kitail en momourki mour me kitail kin paiekihda roson en paliwaratail kan. Karasepe ieu, kitail sukuhliki en liksang wiewia kan me kin kasaminehla paliwaratail kan, duwehte doadoahngki tipaker oh wini teikan. Kitail pil kin liksang kamamsakau. (2 Korint 7:1) Kapwaiada sapwellimen Koht kosonned akan me kin pid tiahk mwahu kin kak pere kitail sang soumwahu kan me kohsang wia dipen nenek de kamwahl. (1 Korint 6:18) Kapwaiada sapwellimen Koht kaweid kan me kin pid duwen liksang limpoak ong mwohni—noahrok—pahn sewese kitail en dehr kauwehla atail popohl oh meleilei, duwehte aramas tohto kin wia ni ahr kin kasikasik en naineki mwohni tohto. (1 Timoty 6:10) Ni ahl dah kan ke kin paiekihda ni roson en paliwar pwehki ke kin kapwaiada Mahsen en Koht?
14. Iaduwen ngehn sarawi kin kamwekid atail mour?
14 Ma kitail kin mourki kaweid en Mahsen en Koht, sapwellimen Siohwa ngehn sarawi pahn sewese kitail. Kitail pil pahn kekeirada loalatail sapwellimen Krais irair akan, duwehte mahk kalahngan oh kadek. (Episos 4:24, 32) Sapwellimen Koht ngehn sarawi kak kekeirada loalatail sapwellime wahn ngehn akan—limpoak, peren, popohl, kanengamah, kadek, kamwahu, pwoson, opampap, oh liksang me suwed. (Kalesia 5:22, 23) Irair pwukat kin kahrehong aramas akan en ahneki nanpwungmwahu rehn aramas teikan iangahki tohnpeneinei kan. Loalatail kan kin kehlailda oh met kin sewese kitail en eimah lelohng kahpwal akan. Ke kin wehwehki iaduwen ngehn sarawi me kamwekid ahmw mour?
15. Ni ahnsou me kitail kin kapwaiada kupwuren Koht, iaduwen kitail kin ale kamwahupatail?
15 Ni ahnsou me kitail kin kapwaiada kupwuren Koht, kitail kin kakehlailih atail nanpwungmwahu rehn Siohwa. Atail pwoson kin laudla ni atail kin kilang me Siohwa kin wehwehki atail anahn akan oh poakohng kitail. Kitail kin sukuhliki sang dahme kitail kin lelohng nan atail mour me E kin ketin sewese kitail nan ahnsoun apwal akan. (Melkahka 18:18) Kitail kin wehwehki me E kin ketin karonge atail kapakap kan. (Melkahka 65:2) Kitail kin sukuhliki en likih me sapwellime kaweid kan pahn kak sewese kitail. Oh pil, kitail kin ahneki koapworopwor kaselel me, ni sapwellime ahnsou, Koht pahn sewese sapwellime aramas lelepek kan en unsekla oh ale sapwellime kisakis en mour soutuk. (Rom 6:23) Tohnpadahk Seims ntingihdi: “Kumwail keido mpen Koht, oh e pahn ketin keiong mpamwail.” (Seims 4:8) Ke soh pehm me ahmw nanpwungmwahu rehn Siohwa kin kehlailda ni ahnsou me ke kin karanih Ih?
Pai Kesempwal kan Me Siksang Mehkoaros
16. Dahme ekei Kristian akan nan keieun senturi wia pwehn kawekila arail mour?
16 Nan keieun senturi, Pohl kin katamankin irail Kristian me keidi kan me ekei irail mahs kin wia dipen nenek, kamwahl, dipen Sodom kan, lipirap akan, noahrok kepwe kan, kamamsakau kan, karaunlikamw akan, loallap suwed kan. (1 Korint 6:9-11) Padahk mehlel kan en Paipel kin sewese irail en kawekila ahr mour; re “mwakelekelsangehr dihp.” Song medewehla ia mwomwen ahmw mour ma ke sohte sukuhliki padahk mehlel kan sang Paipel. Ni mehlel, padahk mehlel kin wia pai kesempwal ieu me siksang mehkoaros. Ia uwen laud atail peren pwe Siohwa kin padahkiong kitail duwen pai kesempwal wet!
17. Iaduwen Sounkadehdehn Siohwa kan kin ale ketihnain en pali ngehn nan mihding en Kristian kan?
17 Oh pil, medemedewe duwen kapai kan me kitail kin ahneki pwehki miniminpenehn riatail kan me kohsang wehi teikan! Pwihn en “ladu lelepek oh loalokong” kin ketikihda mwengehn ngehn ni ahnsou me konehng, oh pil irail kin wiahda Paipel kan, makisihn kan, oh pwuhk kan ni lokaia tohto. (Madiu 24:45-47) Nan mihding en mwomwohdiso kan nan pahr 2000, Sounkadehdehn Siohwa kan nan sahpw tohto wia arail onop duwen pwuhk kesempwal waluh me kohsang palien Pwuhk Sarawi ni lokaiahn Ipru. Re kin doudouloale duwen mour en aramas 40 nan Paipel me koasoiparail mihmi nan pwuhken Insight on the Scriptures. Irail (me iang Pwuhk Study en lokaiahn wai) koasoiapene pahkis ehu en pwuhken The Greatest Man Who Ever Lived oh kereniong audepe koaros en pwuhken Pay Attention to Daniel’s Prophecy! Irail pil onopki artikel silihsek weneu sang makisihn en Watchtower iangahki artikel kan en onop ong mihding kan me 52. Oh pil, sapwellimen Siohwa aramas akan ale ketihnain en pali ngehn sang Atail Doadoahk Ong Wehio me 12 oh ehu ehu wihk Kapahrek ong wehi pokon kin wiawi me kin pid soangsoangen oaralap tohto en Paipel. Ia uwen laud loalokong en pali ngehn!
18. Ni ahl dah kan kitail kin ale sawas sang mwomwohdisohn Kristian?
18 Wasa koaros nan sampah, tohto sang mwomwohdiso 91,000 me kin kihda sawas oh kangoang sang mihding kan oh miniminpene nanpwungarail. Kitail pil kin paiekihda sawas sang rehn iengatail Kristian mah kan me kin perenki sewese kitail en kehlailda ni pali ngehn. (Episos 4:11-13) Ei, pwehki kitail sukuhliki padahk mehlel, kitail kin alehdi kapai tohto. E inenen kaperen en esehla oh papah Siohwa. Ia uwen mehlel mahsen kan en sounmelkahkao: “Meid pai aramas akan me arail Koht iei Siohwa!”—Melkahka 144:15, NW.
Ke Tamataman?
• Mwohn ahnsoun Kristian akan, Siohwa kin mahsen ong ihs?
• Iaduwen marain ni pali ngehn kin wia kehlailda nan keieun senturi? oh nan atail ahnsou?
• Kapai dah kan kin kohsang momourki mour nin duwen loalokong me kohsang rehn Siohwa?
• Dahme kahrehda kitail kin perenki atail loalokong duwen Koht?
[Kilel nan pali 8]
Siohwa ketin padahkiong Moses, Noha, oh Eipraam duwen sapwellime kupwur kan
[Kilel nan pali 9]
Nan atail ahnsou, Siohwa ketin kamarainih aramas akan duwen sapwellime Mahsen
[Kilel nan pali 10]
Medemedewe duwen kapai kan me kitail kin kilang nanpwungatail riatail kan me kohsang wehi tohto!