Iaduwen Popohl En Krais Kak Kakaun Nan Mohngiongatail Kan?

“Popohl en Krais en kin kakaun nan mohngiongimwail kan, pwe ong ni popohl wet me Koht ketin malipehkinkumwailpene pwe kumwail en wiahla warteieu.”​—KOLOSE 3:15.

1, 2. Ni ahl dahieu me “popohl en Krais” kak kakaun nan mohngiong en Kristian men?

KAKAUN kin wia lepin lokaia ehu me aramas tohto kin kailongki, pwe e kin katamankinkitailla duwen aramas akan me pahn idingkihong aramas teikan en wia mehkot. Pohl kangoange ienge Kristian akan nan Kolose, “popohl en Krais en kin kakaun nan mohngiongamwail kan,” ele mwein ekei aramas sohte kin pwungki kangoang wet. (Kolose 3:15) Kaidehn kitail aramas akan me kin ahneki saledek en wiahda pein atail pilipil kan? Eri, dahme kahrehda kitail en mweidong emen de mehkot en kakaun nan mohngiongatail?

² Pohl sohte kin padahkiong mehn Kolose kan en kesehla arail saledek en wiahda pein arail pilipil kan. Lepin lokaiahn Krihk “kakaun” nan Kolose 3:15 kin mie wehwe me duwehte lepin lokaia: “ampaia” me kin kihong kisakis ong irail sounmwadong kan en mahs. Mie kosonned akan en mwadongo, ahpw pil mie arail saledek kan en sounmwadong kan, ahpw ni imwio, ampaia pahn pilada ihs rehrail sounmwadong kan me kin kapwaiada koasoandi kan en mwadongo oh eri kana. Pil duwehte kitail, kitail pil kin ahneki saledek en wiahda pein atail pilipil kan nan atail mour, ahpw, ni ahnsowohte, popohl en Krais anahne ahnsou koaros en kin wia atail “ampaia”​—de, nin duwen sounkawehwe Edgar J. Goodspeed kawehwehda lepin lokaia wet, “mehkot me pahn kahre kitail” nan mohngiongatail kan.

3. Ia wehwehn “popohl en Krais”?

³ Ia wehwehn “popohl en Krais”? Popohl wet iei popohl oh meleilei loalatail kan me kitail kin alehda ni ahnsou me kitail kin wiahla sapwellimen Sises tohnpadahk kan oh sukuhliki me Siohwa Koht oh sapwellime Ohl kin poakohng kitail oh kitail kin kenikenla rehra. Ni ahnsou me Sises pahn mweselsang sapwellime tohnpadahk kan, e padahkiong irail: “I kihong kumwail popohl. . . . Kumwail dehr nsensuwed, oh pahtou, oh masak.” (Sohn 14:27) Erein sounpar 2,000 mwurin mwo, irail pwihn lelepek en me keidi kan en paliwar en Krais, oh rahnwet, iengarail kan: pwihn en “sihpw teikan,” kin ahneki popohl wet. (Sohn 10:16) Popohl wet nan mongiongatail kan pahn anahne kamwekidada kitail. Ni ahnsou me kitail kin lelohng kasongosong laud kan, popohl wet pahn kak sewese kitail en dehr masepwehkada de pwunodiki kasongosongo nohn daulihla. Kitail en kilang iaduwen met kak pweida ni ahnsou me kitail kin lelohng kopwung sapwung kan, pwunod laud, oh ahneki madamadau ehu me pein kitail sohte katepe.

Ni Ahnsou me Kitail kin Lelohng Kopwung Sapwung kan

4. (a) Iaduwen Sises esehla me kopwung sapwung kan kin wiawi? (b) Dahme Kristian akan kak wia ni ahnsou me re kin lelohng kopwung sapwung kan?

⁴ Nanmwarki Solomon kilangada met: “Ekei aramas ahneki manaman, a ekei kin wie lokolok pahn ar manaman.” (Eklesiasdes 8:9) Sises wehwehkiher mehlelpen mahsen pwukat. Pwe ni ahnsou me e kin ketiket nanleng, e kin kilang sapwung akan me aramas akan kin wiaiong aramas teikan. Oh ni ahnsou me e ketiket nin sampah, pein ih lelohng kopwung sapwung me keieu laud, pwe mendahki ih ohl unsek men, aramas akan lahlahwe oh pil kemehla ih nin duwen aramas suwed men. (Madiu 26:63-​66; Mark 15:⁠27) Rahnwet, kopwung sapwung kin wie tohtohla, oh irail Kristian mehlel akan kin lelohng kalokolok laud oh “tohn wehi koaros kin kailongkin irail.” (Madiu 24:9) Ahpw, mendahki irail kin lelohng kalokolok kamwasepwek kan nan wasa kan me mehn Nazi kan kin kaloke oh kemehla aramas akan oh pil nan Soviet Gulag, oh mendahki aramas suwed akan nin duwen pwihn ehu kin kaloke irail, oh aramas akan kin karaunlikamwe irail, popohl en Krais kin sewese irail en kolokolete arail pwoson. Re kin kahlemengih Sises: “Ni aramas akan ar lahlahwe, e soh mwahn dupukohng irail; nan sapwellime lokolok mwuledek, e sohte angiangihada sounkamakam ko, pwe e ketin mweidalahte sapwellime koapworopwor koaros rehn Koht, Sounkadeik Pwung.”​—1 Piter 2:23.

5. Ni ahnsou me kitail kin rong duwen kopwung sapwung me wiawi nan mwomwohdiso, dahme kitail en keieu medemedewe?

⁵ Ahpw, ekei pak, kitail pehm me kopwung sapwung wiawi ni ahnsou me kitail kin lemeleme me emen nan mwomwohdisohn Kristian me sohte ale kopwungpwung. Ni soangen ahnsou pwukat, ele mwein kitail kin ahneki pepehm en Pohl: “Ni emen eh kin dipwakelekelda, I pil kin nsensuwedkihla.” (2 Korint 11:⁠29) Dahme kitail kak wia? Kitail anahne idek pein kitail peidek wet, ‘Uhdahn kopwung sapwung met?’ Pali laud en ahnsou, kitail sehse ire mehlel koaros me pid kahpwalo. Mwein kitail kin nsensuwedki mehkot me kitail rong sang rehn aramas emen me dene e ese duwen kahpwalo. Ihme kahrehda, Paipel mahsanih: “Aramas pweipwei kin kamehlele mehkoaros.” (Lepin Padahk 14:15) Eri, kitail anahne kanahieng.

6. Dahme kitail kak wia ma kitail kin lemeleme me mie kopwung sapwung nan mwomwohdiso?

⁶ Ahpw, medemedewe duwen met: mwein ke pehm me aramas emen wia mehkot suwed ong uhk. Dahme aramas men me kin ahneki popohl en Krais nan eh mohngiong pahn wia? E kesempwal ken koasoi ong aramaso me ke lemeleme me wia sapwung ong uhk. Mwurin met, ken dehr koasoi ong aramas teikan duwen ireo, ahpw dahme ke soh kapakap ong Siohwa oh likih me E pahn kapwungala ireo? (Melkahka 9:10; Lepin Padahk 3:5) Ma ke pahn wiahier met, ke pahn nsenamwahu nan mohngiongomw pwe ke wia uwen me ke kak en kapwungala ireo ni ahl me pwung oh ke kakehr “nennenwei.” (Melkahka 4:4) Pali laud en ahnsou, kaweid en Pohl wasaht kin dokedoke soangen kahpwal pwukat: “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kauno eh ketin mahkohngkumwailehr.”​—Kolose 3:13.

7. Dahme kitail anahne ahnsou koaros tamanda ong ni atail wiewia kan rehn riatail brother kan?

⁷ Edetehn kitail sohte kak kawekihla dahme wiawiehr, ahpw kitail kak kaunda pein atail pepehm akan. Ma kitail pahn mwekidkihda kahpwalo ni ahl me sohte konehng, eri, met pahn kak wia mehkot keper ong atail popohl laudsang kopwung sapwung me emen wiaiong kitail. (Lepin Padahk 18:14) Mwein met pil kak kahrehong kitail en dipakelekelda oh uhdi sang atail kin werekiong tohnmwomwohdiso kan lao lel kitail lemeleme kopwung me pwung wiawi. Sounmelkahkao ntingihdiehr me aramas akan me kin poakohng sapwellimen Siohwa kosonned akan, “sohte mehkot me kak kahrehiong irail en pwupwudi.” (Melkahka 119:165) Ni mehlel, aramas koaros kin lelohng kopwung sapwung ekei ahnsou. Dehr mweidong wiewia paisuwed pwukat en kerempwa uhk sang ahmw kin papah Siohwa. Ahpw, mweidong popohl en Krais en kin kakaun nan mongiongomw.

Ni Ahnsou me Kitail kin Ahneki Pwunod

8. Ia ekei kahrepen pwunod akan, oh dahme pahn wiawi ma pwunod laud kin wiawi erein ahnsou reirei?

⁸ Aramas tohto kin ahneki pwunod tohto nan “imwin rahn akan.” (2 Timoty 3:1) Sises mahsanih: “Ihme I ndahkihong kumwail: kumwail dehr kin pwunodki mourimwail, dahme kumwail pahn tungoale, de paliwaramwail, dahme kumwail pahn likawih.” (Luk 12:22) Ahpw, kaidehn pwunod akan koaros kin tepisang medemedewe nohn daulihla duwen dipwisou kan. Lohd me “nsensuwedki laud” tiahk suwed kan en aramas nan Sodom. (2 Piter 2:7) Pohl kin “pwunod en apwalih mwomwohdiso kan koaros.” (2 Korint 11:28) Sises ni eh pwunodadahr kowahlap ni pwong mwohn e pahn matala, oh “pwudowe lao kerediong nanpwel likamwete dingding en ntahn aramas.” (Luk 22:44) Eri, e sansal me kaidehn pwunod koaros kin sang ni pwoson luwet. Ahpw, sohte lipilipil dahme kahrehda kitail kin pwunod, ma atail pwunod kin wia pwunod laud ehu oh pahn wiawi erein ahnsou reirei, met pahn kak kahrehong atail popohl en solahr. Pwunod kin powehdi ekei aramas akan, kahrehong irail en ahneki madamadau ehu me irail sohte kak pousehla kapwaiada arail pwukoa kan en papah Siohwa. Paipel mahsanih: “Pwunod pahn kak adihasang omw peren.” (Lepin Padahk 12:25) Dahme kitail kak wia ma kitail kin pwunodiki mehkot?

9. Dahme kitail kak wia pwehn kamwahuwihala kahpwal kan me kin kahrehda pwunod, ahpw kahrepen pwunod dah kei sohte pahn kak kohsang douluhl?

⁹ Ekei ahnsou, kitail mwein pahn kak wia mehkot pwehn kapwungala irairo. Ma kitail kin pwunod pwehki soumwahu, e pahn wia elen loalokong en kilang dahme kitail kak wia pwehn kamwahuwihala ahmw soumwahu, ahpw ire pwukat pein emenemen kitail anahne wiahda pein atail pilipil kan.a (Madiu 9:12) Ma kitail kin toutoukihla pwukoa tohto, mwein e pahn mwahu en kihong meteikan ekei atail pwukoa kan. (Eksodus 18:13-​23) Ahpw, iaduwen irail akan​—duwehte pahpa oh nohno kan​—me kin ahneki pwukoa toutou kan ahpw irail sohte kak kihong aramas teikan pein arail pwukoa kan. Iaduwen emen Kristian me kin kousoanla rehn eh pwoud me kin uhwong kaudok mehlel? Iaduwen peneinei ehu me apwal en mwohni de kousoanla nan wasahn mahwen? E sansal, kitail sohte kak kihsang kahrepen atail pwunod akan koaros nan koasondi suwed wet. Ahpw, kitail kak kolokolete popohl en Krais me mih nan mongiongatail kan. Iaduwen?

10. Ni ahl riau dah kan emen Kristian me kin pwunod pahn kak ale kamweit?

¹⁰ Ehu ahl en wia met iei en rapahki kamweit oh sawas sang Mahsen en Koht. Nanmwarki Depit ntingihdi: “Ni ahnsou me I kin pwunodada oh pahtoula, komw kin ketin kansenamwahuwihiehla oh kapereniehda.” (Melkahka 94:19) Sapwellimen Siohwa “mahsen en kamweit akan” kin dierekda nan Paipel. Kaukaule wadek pwuhk wet me kohsang rehn Koht pahn sewese kitail en kolokolete popohl en Krais me mih nan mohngiongatail kan. Paipel mahsanih: “Mweidohng Kauno omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” (Melkahka 55:22) Pohl ntingihdi: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pilipai 4:6, 7) Ahnsou koaros wia kapakap sang mohngiongatail pahn kak sewese kitail en kolokolete atail popohl.

11. (a) Iaduwen Sises wia mehn kahlemeng mwahu me pid kapakap? (b) Iaduwen kitail pahn kilangwong kapakap?

¹¹ Sises kin wia mehn kahlemeng mwahu en poadidiong kapakap. Mie ahnsou kan me e kin wie eh kapakap ong Seme nanleng erein awa kan. (Madiu 14:23; Luk 6:12) Kapakap kin sewese ih en dadaurete pahn kasongosong laud kan. Ni pwong mwohn e pahn matala, eh pwunodadahr kowahlap. Eri, dahme e wia? E ahpw ketin “ngiangihong sapwellime kasakas.” (Luk 22:44) Ei, sapwellimen Koht Ohl unsek menet kin wia ohl en kapakap emen. E sansal me sapwellime tohnpadahk soh-unsek kan pahn anahne kekeirada en ahnla kapakap laud sang ih! Sises padahkiong sapwellime tohnpadahk kan “en kin poaden kapakap oh dehr tokedihsang.” (Luk 18:1) Kapakap kin wia mehkot kesempwal pwe kitail kin koasoiong Ih me kin mwahngih kitail laudsang pein kitail. (Melkahka 103:14) Ma kitail kin men nekidahla loalatail kan popohl en Krais, kitail anahne en “poadidiong kapakap pil ahnsou koaros.”​—1 Deselonika 5:17.

Powehdi Atail Luwet akan

12. Ia ekei kahrepe kan ekei aramas kin lemeleme me arail doadoahk ong Koht sohte kesempwal ong Ih?

¹² Siohwa kin kilangwong sapwellime ladu kan koaros nin duwen dipwisou kesempwal kan. (Akkai 2:7, footnote) Ahpw, aramas tohto kin apwaliki en kamehlele met. Ekei kin nsensuwed pwehki re wie mamahlahr, de arail pwukoa en peneinei kin wia tohtohlahr, de arail roson en paliwar kin wia luluwetala. Ekei kin nsensuwed pwe re kin mihla pahn irair suwed akan ahnsou wet pwehki re tikida nan irair kan me suwed. Ekei kin pwunodiki duwen sapwung kan me re wia mahs, oh re sehse ma Siohwa mahkong irail de soh. (Melkahka 51:3) Dahme kak sewese aramas pwukat me kin ahneki soangen pepehm kansensuwed pwukat?

13. Mehnia iren Paipel kan me kin kak kamweitala irail akan me kin ahneki madamadau ehu me re sohte katepe?

¹³ Popohl en Krais pahn kamehlelehong kitail duwen sapwellimen Siohwa limpoak. Kitail kak kapwurehong popohl nan mohngiongatail kan sang ni atail pahn medemedewe kanahieng me Sises sohte mahsanih me kesempwalpatail kin kohsang ni atail kin karasapene dahme kitail wia ong dahme meteikan kin wia. (Madiu 25:14, 15; Mark 12:41-​44) Ahpw, e kasalehda me keieu kesempwal kitail en lelepek. E mahsanih ong sapwellime tohnpadahk kan: “Ahpw me pahn dadaurete lel ni imwi, ih me pahn mourla.” (Madiu 24:13) Edetehn aramas akan kin “mwamwahliki” Sises, e wehwehki me Seme kin ketin poakohng ih. (Aiseia 53:3; Sohn 10:17) E padahkiong sapwellime tohnpadahk kan me Seme pil kin loalloale irail. (Sohn 14:21) Sises kasansalehda ire mehlel wet ni e mahsanih: “Kumwail kak pwainkihda kisin menpihr riemen sens ehu; ahpw sohte emen ira pahn pwupwudiong nanpwel, ma Samamwail sohte ketin mweidohng. A ong kumwail, pil pitenmoangamwail koaros iangehr wadawadedi. Eri, kumwail dehr masak, pwe kumwail kesempwalsang mehlel menpihr tohto.” (Madiu 10:29-​31) Met kin kamehlelehong kitail me Siohwa kin uhdahn poakohng kitail!

14. Dahme kin sewese kitail en kamehlele me Siohwa kin kesempwaliki emen emen kitail koaros?

¹⁴ Sises mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi, oh I pahn komourada ni imwilahn rahn.” (Sohn 6:44) Pwehki Siohwa kin ketin kainangihedo en idawehnla Sises, e sansal me Siohwa kin kupwurki kitail en komourala. Sises padahkiong sapwellime tohnpadahk kan: “Ih pil duwen Samamwail me ketiket nanleng, e sohte kin ketin kupwurki emen me tikitik pwukat en kin salongala.” (Madiu 18:14) Kahrehda, ma ke kin papah Koht ni mohngiongomw unsek, ke kak perenkihda ahmw wiewia mwahu kan. (Kalesia 6:4) Ma ke kin nohn nsensuwedkihla sapwung kan me ke wiahda mahs, tamanda me Siohwa pahn ketin mahkong aramas akan me kin koluhla mehlel. (Aiseia 43:25; 55:7) Ma mie pil ehu kahrepe me ke kin nsensuwed, tamanda me “Kauno kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.”​—Melkahka 34:18.

15. (a)Iaduwen Sehdan kin song en kihsang rehtail atail nsenamwahu oh ahneki popohl? (b) Dahme kitail kak kamehlele duwen Siohwa?

¹⁵ Sehdan men kihsang rehtail atail nsenamwahu oh ahneki popohl. Sehdan kin kahrehda kitail koaros sohsohki dihp me kitail kin peipeiong ahnsou koaros. (Rom 7:21-​24) E kin mwahuki ken ahneki pepehm me ahmw soh-unsek kan pahn kahrehong Siohwa en sohla kupwurki ahmw doadoahk. Dehr mweidong Tepil en kamworuseiukala! En mwasamwasahn oh kanahieng eh widing kan, oh mweidong atail kin mwasamwasahn en kakehle kitail pwehn kak dadaurete. (2 Korint 2:11; Episos 6:11-​13) Tamataman met: “Pwe ma kadeikpen loalatail kadeingkitailda, kitail en ese me Koht lapalapasang kadeikpen loalatail, oh pein ih kin ketin mwahngih mehkoaros.” (1 Sohn 3:20) Siohwa sohte kin ihte kilang atail sapwung kan. E pil kin mahsanih atail pepehm akan. Ale kangoang sang mahsen kan en sounmelkahka menet: “Kauno sohte pahn ketin kesehla sapwellime kan; e sohte pahn ketin kesehla irail kan me kisehn sapwellime.”​—Melkahka 94:14.

Wiahla Ehu nan Popohl en Krais

16. Dahme kahrehda kitail kak kamehlele me kitail sohte kin kelepw ni atail kin nantihong en dadaurete?

¹⁶ Pohl ntingihdi me kitail anahne en mweidong popohl en Krais en kaunda nan mohngiongatail kan pwehki Koht ketin “malipehkinkitailpene pwe kitail en wiahla warteieu.” Irail Kristian me keidi kan me Pohl ntingihdi duwen me alehier luhk ehu en wiahla kisehn paliwar en Krais, oh met pil duwehte luwen me keidi kan nan rahnwet. Iengarail kan “sihpw teikan” kin ehupene rehrail nin duwen “pwihn ehu” pahnangin “silipen sihpw men,” Sises Krais. (Sohn 10:16) Irail meh aramas rar kei kin wiahla ehu nin duwen “pwihn ehu” nin sampah pwon oh irail kin mweidong popohl en Krais en kaunda nan mohngiongarail kan. En esehla me kitail sohte kin kelepwla, kin sewese kitail en dadaurete. Piter ntingihdi: “Eri, kumwail tengeteng ni amwail pwoson oh kehlail ong ih, pwe kumwail ese me riamwail kan wasa koaros nin sampah kin iang kumwail mihla nan soangen lokolok me kumwail kin mihla loale.”​—1 Piter 5:9.

17. Dahme kin kangoange kitail en mweidong popohl en Krais en kaunda nan mongiongitail kan?

¹⁷ Eri, kitail koaros nantihong en popohl, iei ehu wahn ngehn en Koht me kesempwal. (Kalesia 5:22, 23) Irail akan me kin mwakelekel, pwung, oh popohl mwohn silangin Siohwa pahn ale kapai en mour soutuk nan paradais nin sampah. (2 Piter 3:13, 14) Kitail kin ahneki kahrepe tohto en mweidong popohl en Krais en kaunda nan mohngiongitail kan.

[Nting tikitik me mi pahs]

Ke Tamanda?

• Ia wehwehn popohl en Krais?

• Iaduwen popohl en Krais pahn kak kaunda nan mohngiongitail kan ni ahnsou me kitail kin lelohng kopwung sapwung kan?

• Iaduwen popohl en Krais kin sewese kitail en powehdi atail pwunod akan?

• Iaduwen popohl en Krais kin kansenamwahuwiahla kitail ni ahnsou me kitail kin ahneki pepehm me kitail soh katepe?

[Kilel nan Pali 13]

Mwohn irail akan me kadipe ih, Sises koasoanehdi nan kapehde me e pahn papah Siohwa

[Kilel nan Pali 14]

Rasehng sahm limpoak men me kin poalehdi nah seri, mahsen en kamweit me kin kohsang rehn Siohwa pahn kak kamweitala atail pwunod akan