Siohwa Iei Atail Wasahn Ruk

“Pwehki ke koasoia met: ‘Siohwa iei ai wasahn ruk,’ . . . kahrehda sohte me suwed kot pahn lelohng uhk.”​—MELKAHKA 91:9, 10, NW.

1. Dahme kahrehda kitail kak ndahki me Siohwa iei atail wasahn ruk?

SIOHWA iei wasahn ruk mehlel ong sapwellime aramas akan. Ma kitail kin mour unsekiong Koht, mehnda ma kitail pahn lelohng ‘soangen apwal koaros, ahpw [kitail] sohte pahn ohkihla; [kitail] kin mihla nan peikasal ekei ahnsou, ahpw e sohte kin kauwehla [atail] koapworopwor; mie [atail] imwintihti tohto, ahpw [kitail] sohte mwahn kin kelehpwla; oh ekei ahnsou paliwaratail lellel, ahpw [kitail] sohte ohla douluhl.’ Dahme kahrehda? Pwehki Siohwa kin ketikihong kitail “manaman lapalap.” (2 Korint 4:7-9) Ei, Samatail nanleng kin sewese kitail en momourki mour ehu me kitail pahn kak kapwaiada kupwuren Koht, oh kitail kak kamehlele mahsen kan en sounmelkakaho: “Pwehki ke koasoia met: ‘Siohwa iei ahi wasahn ruk,’ e sansal mwahu me ke wiahkihla Wasa Lapalahpie ahmw wasahn kousoan; kahrehda sohte me suwed kot pahn lelohng uhk.”​—Melkahka 91:9, 10, NW.

2. Dahme kitail pahn kak koasoia duwen Melkahka 91 oh dahme e inoukihdi?

² Mahsen pwukat en Melkahka 91 mwein ele Moses me ntingihdi. Kisin nting en kawehwe kan nan wasaht koasoia me ih me wiahda Melkahka 90, oh Melkahka 91 kin pousehlahte met oh sohte kasalehda me emen tohrohr me uhd ntingihda. Ele Melkahka 90 mwein aramas emen me kin koulki (91:1, 2), oh pwihn en koul ehu kin pwakih mwuri (91:3-8). Mwein mwuri, pil ngilen emen uhd pil pwakih (91:9a) oh pwihn ehu eri wia pasapeng mwuri (91:9b-13). Oh pil emen me uhd wia kaimwiseklahn lokaia ko wasaht (91:14-​16). E sohte lipilipil iaduwen met a wiawi, ahpw, dahme Melkahka 91 kin wia, e kin inoukihdi saledek en pali ngehn ong irail Kristian keidi kan ni arail wia pwihn ehu oh wasaht pil kin kihda soangen mahsen en kamweit tohto ong iengerail pwihn ehu me inoukidahr arail mour ong Koht.a Ni ahnsou wet, kitail en wiahki ehu oh koasoiapene audepen melkahka wet nin duwen sapwellimen Siohwa ladu kan.

Meleilei nan ‘Sapwellimen Koht Wasa Rir kan’

3. (a) “Wasa rir en Ih me Lapalahpie” kin karasaraski dah? (b) Dahme kitail kak ale ma kitail pahn mihmi “pahn mwete en Koht, Wasa Lapalahpie”?

³ Sounmelkahkao koulki met: “Mehmen me kin koukousoan nan wasa rir en Ih me Lapalahpie pahn wahdohng ih en kousoan pahn mwete en Koht, Wasa Lapalahpie. I pahn pahtohwanohng Siohwa: ‘Komwi me ahi wasahn ruk oh kehlepei, ahi Koht me I pahn likih.’ ” (Melkahka 91:1, 2, NW) “Wasa rir en Ih me Lapalahpie” kin karasaraski wasahn ruk ong kitail, oh keieu ong irail me keidi kan​—⁠me Tepil kin keieu men kauwehla arail pwoson. (Kaudiahl 12:15-​17) E men kemehla kitail koaros, ahpw pwehki kitail kin paiekihda mehn perepe ni atail kin mihmi pahn epwelpen Koht, e sohte kak wia met. Ni atail mihmi “pahn mwete en Koht, Wasa Lapalahpie,” kitail kin ale epwel mwahu sang Koht oh E pahn pere kitail. (Melkahka 15:1, 2; 121:5) Sohte wasahn ruk me mwahu de kehlail sang wasahn ruk me Siohwa Koht kin ketikihda, pwe Ih me kaunen lahng oh sampah.​—Lepin Padahk 18:10.

4. Soangen lidip dah kan “sounkoledi menpihr men” (Sehdan) kin doadoahngki, oh iaduwen kitail kak pitsang lidip pwukat?

⁴ Sounmelkahkao kapataiong met: “Pein [ Siohwa] pahn ketin kapitukasang nan lidip en sounkoledi menpihr kan, oh sang soumwahu lusulus ieu me kin kahrehong kahpwal laud kan ong aramas akan.” (Melkahka 91:3, NW) Irail sounkoledi menpihr kan me kin kousoan nan Israel kawao kin kalapw doadoahngki lidip kan pwehn koledi menpihr kan. Sehdan, kin rasehng “sounkoledi menpihr” men oh e kin doadoahngki lidip kan duwehte eh pwihn suwed oh pil “eh widing suwed kan.” (Episos 6:11, footnote) Lidip rir kan kin mih nan atail wasahn alu kan pwehn kahrehong kitail en pwupwudi nan dihp (wiewia suwed kan) oh kauwehla atail irair en pali ngehn. (Melkahka 142:3) Ahpw, pwehki kitail solahr kin wia dahme suwed, e duwehte ‘kitail pitlahr rasehng menpihr men me pitsang nan lidip en sounwia lidip kan.’ (Melkahka 124:7, 8) Kitail kak kalahngankihong Siohwa pwe E kin ketin doarekitailla sang Me Suwedo, “sounkoledi menpihr men”!​—Madiu 6:13.

5, 6. Dahkot “soumwahu lusulus” me kin kahrehda “kahpwal laud kan,” ahpw dahme kahrehda sapwellimen Siohwa aramas akan sohte kin lohdi pahn “soumwahu” wet?

⁵ Sounmelkahkao mahsanih duwen “soumwahu lusulus ieu me kin kahrehong kahpwal laud kan ong aramas akan.” Duwehte soumwahu lusulus ieu, mie mehkot me kin kahrehda “kahpwal laud kan” ong aramas akan oh ong irail akan me kin utungada sapwellimen Siohwa pwung en kaunda lahng oh sampah. Me pid duwen “soumwahu” wet, sounpoad Arnold Toynbee ntingihdi: “Sang ni imwin Mahwen Keriau en Sampah, wehi kan me kin uhda tohr tohtohla pak riau pwehki madamadau en uhki wehi kin wie lalaudla ahnsou koaros.”

⁶ Erein sounpar epwiki epwiki kei, ekei kaun en wehi kan kin kahrehong saminimin nanpwungen wehi kan en lalaudla. Re pil kin idingkihong aramas akan en wauneki irail de idingkihong aramas en kaudokiong dikedik kan, sansal kan de kilel kan me kin uhki arail wehi. Ahpw, Siohwa sohte kin mweidong sapwellime aramas lelepek kan en lohdi pahn “soumwahu lusulus” duwehte met. (Daniel 3:1, 2, 20-​27; 6:7-​10, 16-​22) Nin duwen pwihn en pirien limpoak ehu me mih wasa koaros nan sampah, kitail kin lelepek ongete Siohwa oh kaudokiong Ih kelepw, kapwaiada iren Paipel kan me kin pid soupoupalih, oh pil kin pwungki me “Koht kin ketin kupwurperenki mehmen me kin lemmwiki Ih, oh pil wiewia me pwung; sohte lipilipil ih soangen aramas dah.” (Wiewia 10:34, 35; Eksodus 20:4-6; Sohn 13:34, 35; 17:16; 1 Piter 5:8, 9) Edetehn kitail kin lokolongki “kahpwal laud kan” ni atail kin lelohng kalokolok de kahpwal pwehki kitail wie Kristian akan, kitail kak ahneki peren oh nsenamwahu ni pali ngehn pwe kitail mihmi nan “wasa rir en Ih me Lapalahpie.”

7. Iaduwen Siohwa kin pere kitail doadoahngki “lime kan”?

⁷ Pwehki Siohwa iei atail wasahn ruk, kitail kin ale kamweit sang mahsan pwukat: “E pahn ketin koaduhpwalkinuhkedi lime kan; ke sohte pahn perki mehkot pahn epwelpen nin lime; sapwellime irair en mehlel pahn sinsileiuk oh doareiukala duwehte mehn sansar laud ehu.” (Melkahka 91:4, NW) Koht kin ketin pere kitail, duwehte menpihr nohno men kin koaduhpwalkin nah kan. (Aiseia 31:5) ‘E pahn ketin koaduhpwalkinuhkedi lime kan.’ Menpihr nohno men kin doadoahngki pehnpihr kan en koaduhpwalkin nah kan, oh pere irail sang imwintihti kan. Kitail kin rasehng menpihr pwulopwul kan, oh kin nsenamwahu pahn epwelpen Siohwa pwehki kitail kin mihmi nan sapwellimen Siohwa pwihn en Kristian mehlel kan.​—Rud 2:12; Melkahka 5:1, 11.

8. Iaduwen sapwellimen Siohwa “irair en mehlel” duwehte mehn sansar laud ehu oh wasahn ruk ehu?

⁸ Kitail kak likih “sapwellimen [Koht] irair en mehlel” oh loalopwoat. Irair pwukat kin rasehng mehn sansar laud ehu me aramas en mahs kin doadoahngki, me kin uwe ieu me duwehte wenihmw ehu oh inenen laud pwehn kak pere paliwar pwon. (Melkahka 5:12) Likih soangen mehn perepe wet kin kihsang rehtail masak. (Senesis 15:1; Melkahka 84:11) Duwehte atail pwoson, sapwellimen Koht irair en mehlel de loalopwoat kin wia mehn sansar laud ehu me kin kakunkihla kesik ketieu kisiniei kan sang rehn Sehdan oh pere kitail sang imwintihti kan. (Episos 6:16) E kin pil rasehng wasahn ruk me kin sewese kitail en kesihnenda teng ni pali ngehn.

‘Se Sohte Pahn Masak’

9. Dahme kahrehda ni pwong kin wia ahnsou keper, ahpw dahme kahrehda kitail sohte kin masak?

⁹ Pwehki Koht kin ketin pere sapwellime kan, sounmelkahkao koasoia met: “Ke sohla pahn masak mehkot me keper nipwong, de kesik ketieu me kin pipihr ni rahn, de soumwahu lusulus kan me kin wawaiseli nan rotorot, de soangen suwed teikan me kin kemehla aramas nin rahn.” (Melkahka 91:5, 6, NW) Pwehki wiewia suwed tohto kin wiawi nan rotorot, ni pwong kin wia ahnsou keper. Pwehki rotorot en pali ngehn kin kipehdi sampah pwon, atail imwintihti kan kin kalap doadoahngki wiewia widing kan pwehn song en kauwehla atail pali ngehn oh kauhdi atail doadoahk en kalohk. Ahpw, kitail ‘sohla pahn masak mehkot me keper nipwong’ pwehki Siohwa kin ketin pere kitail.​—Melkahka 64:1, 2; 121:4; Aiseia 60:2.

10. (a) “Kesik ketieu me kin pipihr ni rahn” kin rasehng dah, oh dahme kitail pahn nantihong wia pwehn dehr lohdi pahn “kesik ketieu” wet? (b) Ia wehwehn “soumwahu lusulus kan me kin wawaiseli nan rotorot,” oh dahme kahrehda kitail sohte kin masak “soumwahu wet”?

¹⁰ “Kesik ketieu me kin pipihr ni rahn” kin rasehng lokaia likamw de uhwong kan. (Melkahka 64:3-5; 94:20) Ni atail kin nantihong kasalehong aramas akan duwen padahk mehlel, soangen uhwong pwukat sohte kin pweida ni atail kin wia doadoahk en papah Koht. Oh pil, kitail sohte kin masak “soumwahu lusulus kan me kin wawaiseli nan rotorot.” Soumwahu lusulus wet iei karasaras ehu duwen sampah wet me kin direkihla tiahk suwed oh pelian lamalam likamw kan me mih pahn manaman en Sehdan. (1 Sohn 5:19) “Soumwahu” wet kin kahrehda madamadau oh mohngiong en aramas akan en mehla ni pali ngehn, oh aramas akan sohte kin wehwehki duwen Siohwa, sapwellime kupwur kan, oh sapwellime koasoandi limpoak kan. (1 Timoty 6:4) Ahpw, mendahki rotorot wet, kitail sohte pahn masak, pwe kitail kin paiekihda marain en pali ngehn ni mwuledek.​—Melkahka 43:3.

11. Dahme pahn wiawiong irail me kin kamehlele ‘soangen suwed kan . . . nin rahn’?

¹¹ “Soangen suwed teikan me kin kemehla aramas nin rahn” sohte kin kamasapwehki kitail. “Nin rahn” mwein kin wehwehki “marain” de loalokong en sampah wet me aramas akan kin kamehlele. Ahpw, aramas akan me kin lohdi pahn madamadau en noahrok pahn mehla ni pali ngehn. (1 Timoty 6:20, 21) Ni atail pahn kin ni eimah kalohki Rongamwahu en Wehin Koht, kitail sohte pahn masak atail imwintihti kan, pwe Siohwa iei Soundoarpatail.​—⁠Melkahka 64:1; Lepin Padahk 3:25, 26.

12. Limwahn ihs me aramas kid kei kin “pwupwudi,” oh ni ahl dahieu irail kin pwupwudi?

¹² Sounmelkahkao pousehla: “Aramas kid kak pwupwudi mehla limwahmw, de aramas nen pil pahn kak kapiluhkpene, ahpw sohte me pahn kauweiukala. Ke pahn pein kilangki mesomwen, oh kadehde duwen me suwed akan ar pahn ale kalokolok.” (Melkahka 91:7, 8) Pwehki irail sohte kin mweidong Siohwa en wiahla arail wasahn ruk, me tohto pahn “pwupwudi” oh mehla ni pali ngehn “limwahn” kitail. “Aramas nen” kin pwupwudi ni “pali maun” en mehn Israel en pali ngehn rahnwet. (Kalesia 6:16) Ahpw, sohte lipilipil ma kitail wia emen Kristian me keidi de emen iengarail me inoudahr kan (kisehn “sihpw teikan”), kitail koaros kin nsenamwahukihla mih nan sapwellimen Koht “wasa riro.” Kitail kin ihte ‘kadehde duwen me suwed akan ar pahn ale kalokolok,’ pwe irail me suwed akan pahn lelohng kahpwal akan ni palien pisnes, ni pelien lamalam oh ni ahl teikan.​—Kalesia 6:7.

‘Sohte me Suwed Kot Pahn Lelohng Kitail’

13. Soangen kahpwal dah kan sohte pahn lelong kitail, oh dahme kahrehda?

¹³ Edetehn meleilei en sampah wet kin sosohrala, kitail kin mwohneki Koht nan atail mour oh pil kin ale kangoang sang dahme sounmelkahkao mahsanih wasaht: “Pwehki ke koasoia met: ‘Siohwa iei ahi wasahn ruk,’ e sansal mwahu me ke wiahkihla Wasa Lapalahpie ahmw wasahn kousoan, kahrehda sohte me suwed kot pahn lelohng uhk, sohte kalokolok ehu pahn kerendohng imwomw.” (Melkahka 91:9, 10, NW) Ei, Siohwa iei atail wasahn ruk. Ahpw, kitail pil kin wiahkihla Koht Wasa Lapalahpie ‘atail wasahn kousoan’ me wehwehki me kitail kin diar meleilei rehn Siohwa. Kitail men kapinga Siohwa nin duwen Kaunepen Lahng oh Sampah, oh pil wiahkihla Ih ‘atail wasahn kousoan’ nin duwen Utupen meleilei, oh kalohkiseli Rongamwahu en sapwellime Wehio. (Madiu 24:14) Kahrehda ‘sohte me suwed kot pahn lelohng kitail’​—kitail sohte pahn pil lelohng kahpwal akan me ntingihdi nan iretikitik kan en mwowe. Ni ahnsou me kitail pil kin lelong kahpwal akan duwehte rerrer en sahpw, melimel, lapake, duhpek, mahwen, de kahpwal teikan​—⁠soahng pwukat sohte kin kauwehla atail pwoson oh meleilei en pali ngehn.

14. Nin duwen sapwellimen Siohwa ladu kan, dahme kahrehda kitail sohte kin soumwahukihda soumwahu kehlail kan en pali ngehn?

¹⁴ Kristian me keidi kan kin rasehng mehn keiru kan me kin kousoanla nan ihmw likou kan oh tohrohr sang koasoandi suwed en sampah wet. (1 Piter 2:11) ‘Sohte kalokolok ehu pahn kerendohng imwarail kan.’ Sohte lipilipil ma kitail koapworopworki nanleng de sampah, kitail koaros sohte kin kisehn sampah, oh kitail koaros sohte kin mweidong soumwahu keper kan en pali ngehn en kaluwetala kitail duwehte dipen nenek, noahrok kepwe kan, kaudok likamw, oh kaudok ong “mahn lawalo” oh “dikedik en mahn lawalo,” me iei pwihn en United Nations.​—Kaudiahl 9:20, 21; 13:1-​18; Sohn 17:16.

15. Ni ahl dahieu kitail kin paiekihda sawas kan me kin kohsang rehn tohnleng kan?

¹⁵ Sounmelkakaho kawehwehda duwen mehn perepe me kitail kin paiekihda: “Koht pahn ketin kesilehkinuhk sapwellime tohnleng kan, pwe re en apwahpwalihiuk wasa koaros me ke pahn kohla ie. Re pahn kolkinuhkada pehrail kan, pwe ke dehr dipekelekel nin takai kan.” (Melkahka 91:11, 12) Siohwa ketikihong tohnleng kan arail manaman pwehn pere kitail. (2 Nanmwarki 6:17; Melkahka 34:7-9; 104:4; Madiu 26:53; Luk 1:19) Irail kin pere kitail ‘wasa koaros me kitail pahn kohla ie.’ (Madiu 18:10) Kitail kin paiekihda sawas oh mehn perepe sang rehn irail tohnleng kan ni atail kin wia atail doadoahk en kalohki Wehio oh kitail sohte kin dipekelekelki mehkot ni pali ngehn. (Kaudiahl 14:6, 7) Pil ‘takai kan’ me kin wehwehki mehn kerempwa kan me aramas akan kin koasoanehdi pwehn kauwehla atail doadoahk en kalohk​—⁠soahng pwukat pil sohte pahn kahrehong kitail en dipekelekel oh pwupwudi oh solahr kenikenla rehn Koht.

16. Iaduwen “laion” men oh mahn “cobra” kin wekpeseng ni mwomwen ira kin song en kemehla mahn akan, oh dahme kitail kak wia pwehn dehr lohdi pahn uhwong riau pwukat?

¹⁶ Sounmelkakaho pousehla oh mahsanih: “Ke pahn sok pohn laion oh sineik kan, pohn laion kommwad oh lapalahn sineik.” (Melkahka 91:13) Duwehte laion pwulopwul men me kin ni kommwad pwakih mahn akan oh kemehla, ekei atail imwintihti kan kin kasalehda, ni sansal, me re uhwong kitail sang ni ahr kin wiahda kosonned akan pwehn song kauhdi atail doadoahk en kalohk. Ahpw, likin soangen uhwong pwukat me kin wiawi ni sansal, mie soangen uhwong me kin pil wiawiong kitail ni mwomw me duwehte mahn sineik me adaneki “cobra” kin wia me kin rukiehdi mahn akan oh ngalis irail ni arail kin pwuriamwei. Ekei ahnsou, kaun en pelien lamalam akan kin mwomwen “rukala” ni arail kin doadoahngki sounwiahda kosonned akan, sounkopwung kan, oh mehteikan pwehn uhwong kitail. Ahpw, ki sapwellimen Siohwa sawas, kitail kin ni popohl doadoahngki mwoalen kopwung kan en ‘peiki oh kamanala ni kosonned doadoahk en kalohki Rongamwahu.’​—Pilipai 1:7, NW; Melkahka 94:14, 20-​22.

17. Iaduwen kitail kak sok pohn “laion pwulopwul men”?

¹⁷ Sounmelkakaho kin koasoia duwen kemehla “laion kommwad oh lapalahn sineik.” Mahn laion pwulopwul men kak uhdahn lemei, oh lapalahn sineik pil kak wiahla mahn ehu me inenen laud. (Aiseia 31:4) Mendahki uwen kehlail oh lemei laion pwulopwulo ni ahnsou me e kin pwakih mahn teikan ni kommwad, kitail kin, ni karasaras, “sok pohn laion” sang ni atail kin peikiong Koht oh sohte lohdiong aramas akan oh pwihn en aramas akan me kin rasehng mahn laion. (Wiewia 5:29) Eri, “laion” keper menet sohte kin kak kaluwetala kitail ni pali ngehn.

18. “Lapalahn sineik” kin katamankin kitail duwen ihs, oh dahme kitail anahne wia ma e pahn song en kauwekitailla?

¹⁸ Nan Krihk Septuagint, “lapalahn sineik” kawehwehdiong “drakono.” Met kin katamankin kitail duwen “drakon kalaimwuno . . . , iei ih serpent en mahso, me adaneki Tepil de Sehdan.” (Kaudiahl 12:7-9; Senesis 3:15) E kin duwehte lapalahn sineik me kak kamwutepene oh kadallehla mahn teikan. (Seremaia 51:34) Ni ahnsou me Sehdan, ni karasaras, kin songosong en sikidkitailpene, kauwekinkitailla kahpwal akan me kin kohsang ni sampah, oh kadalekitailla, kitail en nantihong pwehn pitsang oh itikasang kitail “lapalahn sineik” menet. (1 Piter 5:8) Irail luwen me keidi kan anahne en wia met pwe kokohp en Rom 16:20 kin pweida rehrail.

Siohwa​—Atail Utupen Komour

19. Dahme kahrehda kitail anahne wiakihla Siohwa atail wasahn ruk?

¹⁹ Sounmelkakaho me wiliandi Koht koasoia duwen tohnkaudok mehlel men: “I pahn komourala irail kan me kin poakohng ie oh I pahn sinsile irail kan me ese me ngehi iei Kauno.” (Melkahka 91:14) Mahsen pwukat “I pahn sinsile irail” kin uhdahn wehwehki “I pahn kahre ih lahng nan wasa ileile,” pwe aramas teikan sohte kak lel ih. Kitail kin wiahkihla Siohwa atail wasahn ruk nin duwen sapwellime tohnkaudok akan, keieu, pwehki kitail kin ‘poakohng Ih.’ (Mark 12:29, 30; 1 Sohn 4:19) Eri, Koht kin ‘sinsile’ kitail sang atail imwintihti kan. Kitail sohte pahn kisehn irail me E pahn koakoahkasang sampah wet. Ahpw, kitail pahn ale komourpatail pwe kitail kin wehwehki mwaren Koht oh, ni pwoson, kin likweriong mware. (Rom 10:11-​13) Kitail kin pil nantiong ‘peikiong Kauno [“Siohwa,” NW] atail Koht, kohkohlahte.’​—Maika 4:5; Aiseia 43:10-​12.

20. Ni kaimwiseklahn pwuhken Melkahka 91, dahme Siohwa kin ketin kamehlelehong sapwellime ladu lelepek?

²⁰ Ni kaimwiseklahn Melkahka 91, Siohwa ketin mahsanih duwen sapwellime ladu lelepek menet: “Ni ar pahn likwerih ie, I pahn sapeng irail; ni ar pahn lelohng apwal, I pahn ieiang irail. I pahn kapitirailla oh kawauwihirailla. I pahn katingihkin irail mour werei; oh I pahn komourirailla.” (Melkahka 91:15, 16) Ni ahnsou me kitail kin likweriong Koht oh kapakapki mehkot nin duwen kupwure, e kin ketin karonge atail pekipek kan. (1 Sohn 5:13-​15) Kitail kin lelongehr kahpwal tohto me kin kohsang rehn Sehdan. Ahpw, mahsen pwukat: “Ni ar pahn lelohng apwal, I pahn ieiang irail” kin sewese kitail en kaunopada ong kasongosong kan me kitail pahn lelohng ni ahnsou kohkohdo oh met kin pil kamehlelehong kitail me Koht pahn sewese kitail ni ahnsou me koasoandi suwed wet pahn sohrala.

21. Iaduwen irail me keidi kan linganlahr?

²¹ Edetehn Sehdan kin lingeringerda kowahlap wia uhwong laud, pwihn en irail me keidi kan koaros me mih nanpwungatail, pahn linganla nanleng ni sapwellimen Siohwa ahnsou konehng​—mwurin irail pahn “mour werei” nin sampah. Ahpw, sapwellimen Koht komour kapwuriamwei kan me wahdongehr irail me keidi kan lingan ni pali ngehn. Oh irail luwen me keidi kan me mihmi sampah kin ale pwais kaselel oh wahu ni arail kin tiengala mwowe nin duwen Sounkadehdehn Siohwa kan nin sampah nan imwin rahn akan! (Aiseia 43:10-​12) Sapwellimen Siohwa komour me pahn keieu laud ong sapwellime aramas akan pahn wiawi ni ahnsou me mahwen laud en Armakedon oh ih ahnsou me E pahn kasalehda ni sansal me Ih me pwung en kaunda lahng oh sampah oh E pahn pil kawahwih mware me sarawi.​—Melkahka 83:18; Esekiel 38:23; Kaudiahl 16:14, 16.

22. Ihs me pahn ale ‘komourparail sang rehn Siohwa’?

²² Sohte lipilipil ma kitail wia kisehn Kristian me keidi kan de iengarail inoudahr kan (kisehn “sihpw teikan”), kitail koaros men sohpeiong Koht pwehn ale komourpatail. Ni erein “rahn lapalap oh kamasepwehk en Siohwa,” irail akan me kin, ni loalopwoat, papah Koht pahn komourala. (Soel 2:30-​32, NW) Irail aramas akan nanpwungatail me kin wia kisehn pwihn en “pokon kalaimwun” oh pahn pitsang Armakedon oh pahn pedolong nan sapwellimen Koht sampah kapw oh pil pahn kolokolte arail lelepek ni kaimwiseklahn kasongosongo, iei irail akan me pahn ‘nsenamwahukihla mour werei’​—mour me sohte imwi. E pahn pil ketin kaiasada aramas tohto. (Kaudiahl 7:9; 20:7-​15) Siohwa pahn perenki ‘komourkitailla’ ki Sises Krais. (Melkahka 3:8) Pwehki koapworopwor kaselel me mih mwohtail, kitail eri nantihong sohpeiong Koht pwehn sewese kitail en wadawadek rahn akan en atail mour pwehn kalinganahda Ih. Sang atail lokaia kan oh wiewia kan, kitail en nantihong kasalehda me Siohwa iei atail wasahn ruk.

[Nting tikitik me mi pahs]

Iaduwen Ke Pahn Sapeng?

• Ia wehwehn “wasa rir en Ih me Lapalahpie”?

• Dahme kahrehda kitail sohte pahn masak?

• Ni ahl dahieu ‘sohte me suwed kot pahn lelohng [kitail]’?

• Dahme kahrehda kitail kak ndahki me Siohwa iei utupen komourpatail kan?

[Kilel nan Pali 15]

Ke wehwehki iaduwen sapwellimen Siohwa irair en mehlel kin rasehng mehn sansar laud ehu ong kitail?

[Kilel nan Pali 16]

Siohwa kin ketin sewese sapwellime ladu kan en wia arail doadoahk en kalohk edetehn uhwong sansal kan me kin wiawi mwohn wehi pokon de uhwong me sohte sansal

[Credit Line]

Cobra: A. N. Jagannatha Rao, Trustee, Madras Snake Park Trust