Ale Kamweitpen Atail Pwunod Akan—mehn Kamaiau Mwahu Ehu
“Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.”—MADIU 11:28.
1, 2. (a) Dahme mih nan Paipel me kin sewese oh katikala pwunod laud kan? (b) Ia uwen pweida mwahu en sapwellimen Sises padahk kan?
ELE ke pahn pwungki me pwunod laud kin wia mehkot me suwed oh kin imwikihla kahpwal. Paipel kin kadehdehda me aramas koaros ahneki mehn kapwunod tohto nan arail mour rahnwet oh re men maiaudasang mehn kapwunod pwukat. (Rom 8:20-22) Ahpw, Paipel pil kin kasalehda iaduwen kitail pahn kak ale kamaiaupatail sang katoutou kan nan ahnsou wet. Kamaiau wet kin kohsang idawehn kaweid en ohl men me mour sounpahr riekid samwalahro. Ih kahpente men, ahpw eh limpoak ong aramas me laud mehlel. Ahnsou me e kin koasoi, e kin lel mohngiong en aramas akan, e kin sewese arail anahn akan, e kin pil sewesehda me luwet akan oh irail me pahtou kan. Pil laudsang met, e kin sewese me tohto pwe irail en koahiekla ni pali ngehn. Irail ahpw kin diar kamweitpen kapehdarail sang pwunod akan, me pil duwehte kowe.—Luk 4:16-21; 19:47, 48; Sohn 7:46.
2 Ohl menet, Sises mehn Nasaret, sohte ale sukuhl laud me duwehte me tohto me kin repen sukuhl nan Rom, Adens oh Aleksandria. Ahpw, sapwellime padahk kan kin inenen kaselel. Oaralap en sapwellime padahk kan iei wehio (koperment) me Koht pahn ketin doadoahngki pwehn kaunda sampah. Sises pil kin kawehwehda padahk kesempwal akan ong kaweid mour—oh mehpwukat kin inenen konehng atail mour en rahnwet. Irail oko me kin sukuhliki oh eri kapwaiada audepen sapwellimen Sises padahk kan kin mwadangete ale kapai, met me iangahki saledek sang kapwunod akan. Met soh pahn kaperen ong uhk?
3. Luhk kaselel dahieu me Sises ketikihda?
3 Ele ke pahn kelikamwe met. ‘Aramas emen me mour mahso kak kaweid ahi mour ahnsou wet?’ Eri, rong mahs sapwellimen Sises mahsen en luhk pwukat: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla. Kumwail ale oh kapaikada ei mehn wisiket (iohk, New World Translation) oh kumwail padahngki sang ie, pwe I me opampap oh nan kapehd karakarahk, kumwail ahpw pahn diar kommoalpen ngehnomwail kan. Pwe mehn wisik (iohk, NW) me I pahn kihong kumwail me mengei, oh audepe kan me marahra.” (Madiu 11:28-30) Ia wehwehn mahsen en Sises pwukat? Kitail en kasawih mahsen pwukat ni oaritik oh kilang iaduwen mahsen pwukat kin ritingada ahl me pahn kihsang pwunod kan sang atail mour.
4. Ihs me Sises mahsen ong, oh dahme kahrehda ekei irail me rongorong Sises apwaliki kapwaiada sapwellime mahsen kan?
4 Sises kin mahsen ong aramas tohto me kin ngoangki nantihong wia dahme pwung nin duwen kosonned akan, a rahpw “toutoulahr” pwehki kaun en lamalam en Suhs akan ar kin wiahiong sarawi en wia mehkot katoutou ong irail. (Madiu 23:4) Kaun en lamalam en Suhs akan kin kihong aramas akan kosonned apwal akan en pid kereniong soangen irair en mour koaros. Ke soh pahn pwunodkihda rongorong ahnsou koaros: “kumwail dehr” wia met de mwo? Ahpw, weksang met, Sises luhke aramas ong padahk mehlel, ong wia dahme pwung, oh ong mour mwahu me irail pahn rong ih. Ei, elen esehla Koht mehlel kin pid karonge Sises Krais, pwe ih me kak kawehwehda soangen Koht dah Siohwa. Sises mahsanih: “Mehmen me kilangieier pil kilangehr Sahm.”—Sohn 14:9.
Ahmw Mour Kin Diren Kapwunod?
5, 6. Iaduwen irair en doadoahk oh pweinen aramas nan mwehin Sises kin weksang atail ahnsou?
5 Met kakete wia mehkot me konehng kowe pwe mwein ahmw doadoahk de irair en ahmw peneinei ahnsou wet kin kahrehong uhk pwunod laud. De pil ahmw pwukoa teikan me nohn katoutou ong uhk. Ma iei, eri, ke duwehte irail me nan kapehd mwahu ko me Sises tuhwong oh sewese. Karasepe, kitail tehk apwal en diar mwohni oh apwalih mour. Aramas tohto nan rahnwet apwaliki met, oh pil duwehte irail nan mwehin Sises.
6 Nan mwehin Sises, tohndoadoahk emen kin doadoahk awa 12 nan ehu rahn, erein rahn 6 nan ehu wihk, oh kalap pweipweiki denarius ehu nan rahn ehu. (Madiu 20:2-10) Iaduwen met kapahrekiong pweinomw oh pweinen kompoakepahmw akan? Mehlel, e pahn apwal en karasapene pweinen mehn kawa ko ong pweinen aramas nan ahnsou wet. Ehu elen karasapene iei en kilang dahme e kak pwainda. Emen ohl loalokong koasoia me: nan mwehin Sises, pilawa reirei pwoat me wiawihkihda kep en pilawa amas 4 kin pahrekiong pweinen aramas emen ong doadoahk en awa ehu. Pil emen ohl loalokong koasoia me pweinen kep en wain mwahu kin pahrekiong pweinen awa riau. Ke kak kilang sang oaritik pwukat me aramas nan mwehin Sises kin doadoahk laud ahnsou laud pwe irail en kak mour. Re anahne kommoal oh mehn kansenamwahuparail me duwehte pein kitail. Ma aramas kadoake iuk, mwein ke pahn pehm me aramas pwukat men ken wiahda doadoahk laud sang dahme ke wia met. E kin kalap sohte atail ahnsou en madamadau laud pwehn wiahda pilipil akan. Mwein ke pehm me ke anahne ekis kommoal.
7. Iaduwen aramas akan kin mwekidiki sapwellimen Sises padahk?
7 E sansal me sapwellimen Sises luhk ong koaros “me pwangadahr oh toutoukilahr arail mehn wisik kan” pahn wia mehkot kaperen ong me tohto me rongorong ih ahnsowo. (Madiu 4:25; Mark 3:7, 8) Oh pil tamanda me Sises pil kapataiong inowo: “I ahpw pahn kommoaleikumwailla.” Inowohte pil wiawihong kitail rahnwet. E kak doadoahk rehtail ma kitail kin “pwangadahr oh toutoukilahr mehn wisik kan.” Oh inou wet pil kak doadoahk rehn kompoakpahtail akan me pil mihlahr nan soangen irairohte.
8. Iaduwen apwalih seri oh irair en mahla ah kin wahdo pwunod?
8 Pil mie soahng teikan me pil kin wia mehn katoutou ong mour en aramas akan. Apwalihada seri kin wia mehkot apwal. Pil wia seri, mehkot apwal. Ahnsou wet, e kin lalaudla tohtohn irail akan, nan soangsoangen dihn aramas akan, me ahnekihla kahpwal en madamadau oh soumwahu en paliwar akan. Ahpw, mendahki palien wini ah mwahula oh mour en aramas pil kin reireila, aramas mah kan kin ahneki kahpwal tohrohr kan me irail anahne powehdi.—Eklesiasdes 12:1.
Weuwa Iohk
9, 10. Kawao, ia wehwehn iohk, oh dahme kahrehda Sises ketin luhke aramas akan en ale oh kapaikada ah iohk?
9 Ke tehk pwe nan mahsen akan me mih nan Madiu 11:28, 29, Sises mahsanih: “Kumwail ale oh kapaikada ei mehn wisiket (iohk, NW) oh kumwail padahngki sang ie.” Nan mwehin Sises, aramas tikitik kan kin ele pehm me likamwete irail weuwa iohk ehu ahnsou me re kin doadoahk. Kawao, iohk kin wia karasepen lidu de sounpapah. (Senesis 27:40; Lipai 26:13; Deuderonomi 28:48) Aramas en doadoahk tohto me Sises kin tuhwong kin doadoahngki iohk pohn pwopwerail akan pwehn wahki wisik toutou kan. Wiawihdahn iohk kan me wiewia ma e pahn soanamwahu oh kansenamwahu pohn tepinwere oh pwopwe kan de soh. Nin duwen Sises ah wia kahpente emen, e kin wiahda iohk, oh e ese wiahda mwohmw me pahn “kansenamwahu.” Mwein e kin kidimikihla wasa me pahn kohdiong pohn paliwar akan ki kilin kou de likou pwehn wiahiong iohko en kansenamwahu en wisik.
10 Ni en Sises mahsanih, “Kumwail ale oh kapaikada ei mehn wisiket (iohk),” e kin karasahiong pein ih emen me kin kihda iohk me wiawihda mwahu oh kin kansenamwahu ong wasa me kin pwilidiong pohn tepin were oh pwopwe kan. Kahrehda, Sises kapataiong: “Audepen [ei mehn wisik] me marahra.” Met kasalehda me iohko sohte soansuwed en doadoahngki, oh doadoahko pil sohte soansuwed. Mehlel, ni en Sises luhkehki aramas en alehda ah iohk, e sohte pahn ahnsouwohte kihsang soangen kahpwal koaros me mie ahnsowo. Ahpw, dahme e pahn ketikihda pahn wahdo kansenamwahu laud. Koasoan sapahl en elen mour oh elen wia soahng kan pahn pil kamaiauirailda. Ahpw, kesempwal sang met, arail ahneki koapworopwor me sansal oh kehlail pahn sewese irail en katikala kapwunod en mour wet.
Ke Kak Ahneki Peren Nan Ahmw Mour
11. Dahme kahrehda Sises sohte mahsanih me aramas akan pahn ale oh wilianda arail iohk rehn emen tohrohr?
11 Menlau tehk me Sises sohte mahsanih me aramas akan pahn ale oh wilianda arail iohk rehn emen tohrohr. Rom pahn wie kakaun irailte, duwehte wehi kan nan rahnwet pahn wie kakaunte nan wasa kan me Kristian kan kin kousoan ie. Daksis me aramas kin wie pwapwain nan wehin Rom sohte pahn uhdi. Kahpwal en soumwahu oh mwohni pahn mihmihte. Soh unsek oh dihp pahn mihmihte rehn aramas akan. Ahpw, peren pahn ieiang irail ni arail pahn alehda padahk en Sises akan, oh met pahn pil kak wiawi rehtail nan atail ahnsou.
12, 13. Dahme Sises kasalehda mwahu me pahn wahdo nsenamwahu, oh iaduwen ekei aramas a kin mwekidki met?
12 Wasa kesempwal nan sapwellimen Sises karasaras en iohk kin dehde me e pid doadoahk en tohnpadahk. E sansal me sapwellimen Sises doadoahk me keieu kesempwal iei en padahki mehteikan, oh keieu e pahn padahk duwen Wehin Koht. (Madiu 4:23) Kahrehda ni ah mahsanih, “Kumwail ale oh kapaikada ei mehn wisiket (iohk),” met uhdahn pahn pid kitail en alasang ih oh wia soangen doadoahkohte. Pwuhken Rongamwahu kan kin kasalehda me Sises kin kamwekid kapehden aramas mehlel akan en wekidala arail doadoahk, me kesempwal nan arail mour akan. Tamanda luhk me e wiahng Piter, Seims, Andru oh Sohn: “Kumwail kohdo iangiehla; I ahpw pahn padahkihong kumwail duwen laidih aramas akan.” (Mark 1:16-20) E kasalehong soused oko duwen kansenamwahu en ma irail pahn wia soangen doadoahk me pein ih kin mwohneki sang soahng koaros, oh ma irail pahn wia pahn sapwellime kaweid oh sawas.
13 Ekei mehn Suhs oko me rongorong wehwehkihda sapwellimen Sises padahko oh kapwaiada audepe kan. Kitail kak medewehla duwen dahme wiawi ni keilen sehdo duwen me kitail wadek nan Luk 5:1-11. Soused pahmen wie doadoahk laud ni pwong ahpw sohte seikerail. Ahpw, e wiahkinteieu dirala arail uhk kan! Met kaidehn e depweilahte miehla kanengen uhko; ahpw, Sises me wiahiong en mie mwahmw. Ni arail kilangolongala nan sahpwo, irail kilangada diren aramas inenen men rongorong sapwellimen Sises padahk kan. Met kak kawehwehda dahme Sises mahsanih ong irail meh pahmen ko: “Sang met kohla kumwail pahn laidih aramas.” Iaduwen arail mwekidiki met? “Re ahpw nihdadahng wararail pwoht ko nansapw, oh pwilikihdi arail dipwisou kan koaros oh iangala Sises.”
14. (a) Iaduwen atail kak diar nsenamwahu nan rahnwet? (b) Soangen rongamwahu kansenamwahu dah me Sises kin kalohkihseli?
14 Ni mehlel, ke kak wia duwehte. Doadoahk en padahkiong aramas akan Paipel wiewiahwihte nan ahnsou wet. Mpen aramas wenerar me wia Sounkadehdehn Siohwa kan nan sampah pwon alehda luhk me kohsang Sises ohng “ale oh kapaikada [ah] mehn wisik (iohk, NW)” oh “laidih aramas akan.” (Madiu 4:19) Ekei aramas akan wiahkihla arail doadoahk kaukaule; a ekei kin lepin ahnsou ahpw wia uwen me re kak. Ahpw, aramas pwukat koaros kin diar peren, oh arail mour kin marahrahda. Met kin pidada wiewia dahme re perenki wia: iei padahkiong meteikan duwen Rongamwahu—“Rongamwahu en Wehin Koht.” (Madiu 4:23) E kin wia mehkot kaperen en koasoia duwen rongamwahu kan, ahpw, mehlel rongamwahu wet. Paipel kin audaudki padahk kan me kitail kak doadoahngki oh kamehleleiong aramas tohto me re kak diar mour me sohte kapwunod.—2 Timoty 3:16, 17.
15. Soangen kapai dah me ke kak alehsang sapwellimen Sises padahk kan duwen mour?
15 Oh pil, aramas akan me ahpwtehn tepida sukuhliki duwen Wehin Koht kin kakehr ale ekei kamwahu kan sang sapwellimen Sises padahk kan duwen mour en aramas akan. Aramas tohto kak kadehdehda ni mehlel me sapwellimen Sises padahk kan kin kamaiauirailla oh sewese irail en wekisang arail mour en mahs. Ke kak kamehleleiong pein kowe sang ni omw pahn kasawih ekei padahk kan duwen kaweid me pid mour me Sises kasalehda me ntingdi nan pwuhken Madiu, Mark oh Luk.
Ahl Oapwoat en Nsenamwahu
16, 17. (a) Iawasa ke kak diar ekei sapwellimen Sises padahk kesempwal kan? (b) Dahme anahn pwe aramas en diarada nsenamwahu me pahn kohsang sapwellimen Sises padahk kan?
16 Ni ahnsoun pwuradahn tehntuhke nan pahr 31 C.E., Sises wia padahk pwoat me sampah kin tamataman lel rahnwet. Padahk wet kin adaneki Kapahrek en Pohn Dohl. E ntingihdi nan Madiu irelaud 5 lel 7 oh Luk irelaud 6, oh met kin oaralapihehda pali tohto en sapwellime padahk kan. Ei, ke kak diar padahk teikan en Sises nan Rongamwahu teikan. Pali laud en dahme e mahsanih kin mengei en wehwehki, edetehn kapwaiada audepen padahk pwukat wia mehkot apwal. Ke soh pein wadek irelaud oko kanahieng, oh medemedewe? Mweidohng kehl en sapwellime kupwur en kamwekid ahmw madamadau oh wiewia.
17 E sansal mwahu me sapwellimen Sises padahk kan koasoandi ni soangen ahl tohto. Kitail kihpene mour en padahk me duwehpenehte kan, pwe ehu mour en padahk ong ehuehu rahn en ehuehu sounpwong, oh song doadoahngkihong nan pein omw mour. Iaduwen? Eri, ke dehr karuwaru. Tamanda, kaun kepwehpwe me idek rehn Sises Krais: “Dahme I uhdahn pahn wia pwe I en kak alehki mour soutuk?” Ni en Sises kousapahliong ih ire kesempwal kan en sapwellimen Koht Kosonnedo, ohlo sapengki me e wiahdahr mepwukat koaros. Ahpw, e pepehmete me e anahne wia laudsang. Sises padahkiong ih en kalaudehla ah kin song en kapwaiada mour en sapwellimen Koht padahk kan sang ah pahn doadoahngki, pwehn wiahla tohnpadahk kehlail. E sansal me ohl menet saikinte kaunopada itar pwehn wia met. (Luk 18:18-23) Kahrehda, mehmen me men sukuhliki sapwellimen Sises padahk kan nan rahnwet anahne tamataman me mie wekpeseng en pwungki padahk pwukat, oh kesempwaliki padahk pwukat oh doadoahngki pwehn katikala pwunod en mour.
18. Kasalehda iaduwen ke kak doadoahngki koakon me mih ni pali 24 oh 25 pwehn ale kamwahu kan.
18 Pwe kitail en kak tepiada kasawih oh doadoahngki sapwellime Sises padahk kan, kitail en kilang ire nempe 1 nan koakon me mih ni pali 24 oh 25. E kin koasoia pwuhken Madiu 5:3-9. Ni mehlel, emen emen kitail kak doudouloale de medemedewe loale duwen mwahu en kaweid me pwarada nan iretikitik pwukat. Ni ahmw pahn kasawih unsek padahk pwukat, dahme ke pahn ndahki duwen wiewiahn aramas? Ma ke men powehdi pwunod nan ahmw mour, dahme kak sewese iuk? Ia pahn mwomwen mwahulahn ahmw mour ma ke kalaudehla ahmw nsenohki doadoahk en pali ngehn, oh kin mweidohng soahng pwukat en kadire ahmw madamadau? Mie mehkan nan ahmw mour me ke anahne katikala pwe ken kalaudehla ahmw wiewiahn pali ngehn? Ma ke pahn wia met, peren pahn laudla ong uhk ahnsou wet.
19. Dahme ke kak wia pwehn kalaudehla ahmw loalokong oh wehwehki soahng ngehnin kan?
19 Met pil mie mehkot me ke kak wia. Ke soh uhd koasoi ong sapwellimen Koht ladu teikan iretikitik pwukat, mwein ong ahmw pwoud, ahmw peneinei teikan, de kompoakepahmw? (Lepin Padahk 18:24; 20:5) Tamataman me ohl kepwehpwe idek rehn emen aramas tohrohr—Sises—duwen mehkot me pid met. Pasapengo kak wia mehn kalaudehla ah peren oh ale mour soutuk. Iengomw tohnkaudok me ke pahn koasoi ong iretikitik pwukat—irail sohte pahrekiong Sises—ahpw koasoakoasoipene me pid sapwellimen Sises padahk kan pahn wia mehkot me pahn mwahu ong kumwa koaros. Song mwadang en wia met.
20, 21. Soangen koasoandi dahieu me ke kak daur pwehn sukuhliki duwen sapwellimen Sises padahk kan, oh iaduwen ahmw kak ese me ke wie kekeirada?
20 Pil pwurehng kilang koakon me oaralap koasoia, “Padahk kan me Pahn Seweseiuk.” Padahk pwukat kin pwihnpeseng pwe ken kak onop oh tehk kanahieng ehu padahk nan ehuehu rahn. Keieu, ke kak wadek mahs dahme Sises padahki nan iretikitik pwukat. Mwuri, medemedewe sapwellime mahsen akan. Song kilang iaduwen ahmw kak doadoahngki mehpwukat nan ahmw mour. Ma ke pehm me ke kin kapwaiadahr ire pwukat, pil tehk oh kilang pil dah kan me ke kak wia pwe ken kak mourki padahk en Koht akan. Doadoahngki audepen padahk pwukat nan ahmw mour nan rahno. Ma met pahn apwal en wehwehki de apwal en kapwaiada audepe, eri, pil kareireila pil ehu rahn. Tamataman me ke sohte anahne samanihala douluhl ah ke uhd doulahng padahk teio. Eri, rahn en mwurio, ke kak uhd tehk ehu padahk tohrohr. Ni imwin ehuehu wihk, ke kak kousapahlih oh kilang ia uwen ahmw pweida ohng kapwaiada padahk en Sises pahieu de limau. Keriaun wihk, ken nantihong kapwaiada pil ekei padahk kan, ehuehu rahn ken kapataiong ekei padahk kan en kapwaiada. Ma ke diarada me ekei padahk kan ke solahr nohn kapwaiada, ke dehr nsensuwed. Kristian koaros pahn lelohng irair wet. (2 Kronikel 6:36; Melkahka 130:3; Eklesiasdes 7:20; Seims 3:8) Nantihong pil kadoahke kapwaiada padahk ko ni kesiluh oh kapahieu en wihk ko.
21 Mwurin sounpwong ehu samwa, ke sukuhlikier padahk 31 koaros. Eri, ia pahn ahmw pepehm mwurin mwo? Ahmw peren oh irair en nan kapehdomw soh pahn mwahu sang mahs? Edetehn ahmw kekeirada pahn tikitik, ke pahn mour nsenamwahula, de mwein ke pahn kakehr sohte nohn pwunodki kahpwal akan, oh ke pahn wehwehki dahme pahn sewese iuk. Ke dehr manokehla me pil mie sapwellimen Sises padahk mwahu teikan me sohte mih nan koakono. Ke soh pein onop ire pwukat oh song doadoahngkihong ahmw mour?—Pilipai 3:16.
22. Dahme kak pweida ma ke idawehn sapwellimen Sises padahk kan, oh ire dahieu kitail pil anahne tehk?
22 Ke kakehr kilang me sapwellimen Sises iohk sohte toutou, ahpw e marahra. Pwukoa en padahk oh katohnpadahk me marahra. Mwurin wahnpoaron Sohn (me wia kompoakepahn Sises) ieiang Sises sounpahr 60 samwa, e mahsanih: “Pwe iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.” (1 Sohn 5:3) Ke kak pil ahneki soangen koapworopworohte. Ma ke pahn wereila nan ahmw doadoahngki padahk en Sises kan nan ahmw mour, a e pahn lalaudla ahmw wehwehkihla me mour me nohn kapwunod ong aramas tohto nan rahnwet sohte pahn nohn kapwunod ong uhk. Ke pahn kilangada me ke diarehr kamaiaupen loalomw oh solahr pahn pwunod duwehte mahs. (Melkahka 34:8) Ahpw, pil mie ehu ire tohrohr me pid sapwellimen Sises iohk me ke pil anahne medemedewe duwe. Sises pil mahsanih me ih me “opampap oh nan kapehd karakarahk.” Iaduwen met kin pid atail sukuhl sang oh kahlemengih Sises? Nan artikel en mwurin met, kitail pahn uhd tehkpene.—Madiu 11:29.
Iaduwen Ke Pahn Sapeng?
• Dahme kahrehda kitail en ale sawas sang rehn Sises ma kitail men ale kamweitpen atail pwunod?
• Dahme iohk kin wehwehki, oh pwekihda?
• Dahme kahrehda Sises luhke aramas akan en ale oh kapaikada ah iohk?
• Iaduwen kitail kak ale kamweitpen kapehdatail ni pali ngehn?
[Blurb nan Pali 26]
Iren pahr ong Sounkadehdehn Siohwa kan erein 2002 iei: “Kumwail kohdo rehi, . . . I ahpw pahn kommoaleikumwailla.”—Madiu 11:28.
[Kilels nan Pali 22]
Doadoahk en sewese aramas en ale sapwellimen Sises iohk oh ale komourparail kin inenen kansenamwahu
[Box/Picture nan Pali 20,21]
Padahk kan me Pahn Sewese Iuk
Soahng mwahu dah kan ke kak sukuhliki sang Madiu irelaud 5 lel 7? Irelaud pwukat kin audaudki padahk kan me wiawi ni keilen dohl en Kalili sang rehn Sounpadahk Lapalap, Sises. Menlau wadek iretikitik kan me koasoipe mih pah oh pein doadoahngki noumw Pwuhk Sarawi, oh kowe idek pein rehmw peidek pwukat.
1. 5:3-9 Dahme met kin padahkiong ie duwen ahi elen madamadau? Iaduwen ahi pahn kak kadoahke ahi peren en laudla? Iaduwen ahi pahn kak kalaudehla ahi madamadau ong anahn akan en pali ngehn?
2. 5:25, 26 Dahme pahn mwahu sang ien alasang ngehnen akamai me aramas tohto kin ahneki rahnpwukat?—Luk 12:58, 59.
3. 5:27-30 Dahme sapwellimen Sises mahsen akan kin kasalehda mwahu me pid medemedewe laud ineng en uduk? Oh iaduwen soikala soangen madamadau pwukat kak wahdo peren oh meleilei ong ahi irair en madamadau?
4. 5:38-42 Dahme kahrehda ien nantihong soikala madamadau en ngoangki me suwed me sampah kin kangoange?
5. 5:43-48 Iaduwen ahi kak ale kamwahu sang ni ahi pahn esehla irail akan me I kin kalap tuhwong me I kakete wiahkin irail ahi imwintihti kan? Iaduwen met kakete wia mehn katikala de pil kak kihsang kailok?
6. 6:14, 15 Ma ekei pak I kin sohte men kasalehda mahk, e kakete peirin de kailok me kin poahsoanehda? Iaduwen ahi kak wekidala ire wet?
7. 6:16-18 I kin nsenohkihte ien mwomw mwahu sang dahme mihmi loalei? Dahme konehng en uhdahn nsenohki duwen pein ngehi?
8. 6:19-32 Dahme e pahn imwikihla ma I pahn nok ngoangkihla mwohni oh pai kan? Dahme I konehng en medemedewe pwehn kak kolokoliong ie madamadau toupahrek nan ire wet?
9. 7:1-5 Ia mwomwen ahi pepehm kan ahnsou me I kin mih rehn aramas akan me kin men kalap men kasawih meteikan, oh litikitik, oh ahnsou koaros raparapahki sapwung en meteikan? Dahme e kesempwaliki ong ie ien soikeweisang ie soangen wiewia kan duwehte mehpwukat?
10. 7:7-11 Ma ngidingid peki mehkot me mwahu ni ahi kin peki sawas sang rehn Koht sawas, a ia pahn mwomwen ngidingid ong irair teikan nan mour?—Luk 11:5-13.
11. 7:12 Edetehn I ese Kosonned Kesempwalo (Golden Rule), ia uwen dod en ahi doadoahngki kosonned wet ong meteikan?
12. 7:24-27 Pwehi ngehi me pein pwukoahki kaweid ahi mour, iaduwen ahi pahn kak kaunopada mwahu ong apwal laud akan? Oh dahme kahrehda I anahne medemedewe sangehr met?—Luk 6:46-49.
Pil ekei padahk kan me I kak medemedewe duwe:
13. 8:2, 3 Iaduwen ahi kak kasalehda poakehla irail me pai ohla kan duwehte me Sises kin kalap wia?
14. 9:9-38 Ia uwen ahi kin kasalehda mahk nan ahi mour, oh iaduwen ahi pahn kak kalaudehla met?
15. 12:19 Ni ahi kin sukuhliki kokohp me pid Sises, I kin nantihong en ireweisang ie akamai?
16. 12:20, 21 Soangen mwahu dah kan ahi kak wiahda sang ni ahi sohte pahn kauwe meteikan sang ni ahi lokaia de pil ahi wiewia kan?
17. 12:34-37 Dahme I kin kalap koasoia pali laud en ahnsou? I wehwehki me ahnsou me I pahn padik orens ehu, pilen orens me pahn kohda, eri, dahme kahrehda ien kin medemedewe laud dahme mih loalei, nan ahi mohngiong?—Mark 7:20-23.
18. 15:4-6 Sang dahme I kin sukuhliki sang sapwellimen Sises mahsen akan, dahme I kilang me pid duwen limpoak ong me mah kan?
19. 19:13-15 Dahme I pahn anahne wiahki ahi ahnsou?
20. 20:25-28 Dahme kahrehda e pahn suwed en wia kaun lemei? Iaduwen ahi pahn kak alasang Sises ni ahl wet?
Pil ekei padahk kan me Mark ntingihdi me I kak medemedewe duwe:
21. 4:24, 25 Dahme kesempwal nan ahi wiewia ong meteikan?
22. 9:50 Ma ahi lokaia oh wiewia me mwahu, soangen kamwahu dah kan me e pahn wah?
Ni kaimwisekla, pil ekei padahk kan me Luk ntingihdi me I kak medemedewe duwe:
23. 8:11, 14 Ma I pahn mweidohng pwunod, kepwehpwe oh peren kan en kaunda ahi mour, dahme met pahn imwikihla?
24. 9:1-6 Edetehn Sises kin sapwellimaniki kehl en kakehlada me soumwahu, dahme e kin keieu kesempwaliki nan eh mour?
25. 9:52-56 I kin kalap lingeringer? Iaduwen—I kin nantihong dehr ahneki pepehm me I men dupuk me suwed?
26. 9:62 Dahme konehng ien medemedewehki duwen ahi pwukoa en kalohk oh padahkiong meteikan duwen Wehin Koht?
27. 10:29-37 Iaduwen ahi kak kadehdehda me ngehi mehn mpe mwahu men, a kaidehnte aramas en kohdo men?
28. 11:33-36 Soangen wekidekla dah kan me I konehng wia pwe ahi mour en mengei sang ahnsou wet?
29. 12:15 Dahme dipwisou kan kin wiaiong mour?
30. 14:28-30 Ma e pahn mie ahi ahnsoun mwohndi oh teneki kanahieng ahi pilipil kan, dahme ien kanahieng, oh kamwahu dah me e pahn wah?
31. 16:10-12 Kamwahu dah kan me I kak kihsang ahi ahneki mour en lelepek?