“Kumwail Ale oh Kapaikada Ei Mehn Wisiket”
1 Nan sampah ehu me direki kapwunod oh kahpwal kan, kitail wehwehkier mehn kamweit sang atail mwekidki sapwellimen Sises luhk ong diarada kamweit me mi pahn sapwellime mehn wisik. (Mad. 11:29, 30) Alehda mehn wisik wet en iang doadoahk en katohnpadahk kin pidada en iang doadoahk ehu me kaidehn ihte apwal ahpw pil kaperen. Met kin pid kalohki rongamwahu en wehio oh sewese meteikan en iang kitail diarada kamweit pahn sapwellimen Sises mehn wisik.—Mad. 24:14; 28:19, 20.
2 Kamweit Sang Doadoahk en Kalohk: Sises sohte mahsanihong sapwellime werek kan en kapatahiong sapwellime mehn wisik ong dahme irail kin weuwa. E luke irail en wilianda arail wisik toutou kan ong sapwellime wisik marahra. Kitail solahr pahn katoutouwihkin kitail kahpwal kan oh pil duwen solahr koapworopworki en koasoandi wet soahng kan me sohte tengeteng; de kitail solahr pahn kedirepwki kepwehpwehn sampah kan. (Luk 21:34; 1 Tim. 6:17) Mendahki kitail kedirepw oh anahne doadoahk pwehn diarada atail anahn en ehuehu rahn, atail kaudok ong Koht en keieu kesempwal nan atail mour. (Mad. 6:33) Kitail pahn ahnsou koaros diarada me doadoahk en kalohk kin kaperen, sohte kapwang, ma kitail ahneki madamadau pwung ong dahme keieu kesempwal.—Pil. 1:10.
3 Ni mehlel, kitail perenki koasoakoasoia dahme kitail kesempwaliki nan audepen atail mohngiong. (Luk 6:45) Kristian kan koaros kin nsenohki mehlel duwen Siohwa oh kapai kan en Wehio me e ketin inoukidahr. Eri, ia uwen kaperen en koasoia duwen rongamwahu oh pwilikihdi atail kapwunod en rahn koaros ni atail iang doadoahk en kalohk. (Rom 10:15) Ni mehlel, ni atail kin kalaudehla atail doadoahk, atail koahiek pil kin laudla oh atail peren kin laudla. Ihme kahrehda, kihong ahnsou laud ong doadoahk en kalohk, uwen me kitail kak, pahn wahdo peren me laudsang met. Oh ia uwen kansenamwahu ni ahnsou me aramas akan kin mwekidki atail padahk. (Wiewia 15:3) Mehnda ma kitail lelohng saroh de uhwong, doadoahk en kalohk pahn wahdo peren ong atail nanpwungmwahu rehn Koht ma kitail kin tamataman me atail koahiek kin kaperenda Siohwa oh me soangen imwila mwahu kan pahn kihong ih kaping.—Wiewia 5:41; 1 Kor. 3:9.
4 Ni atail alehda sapwellimen Sises luhk, kitail kin perenki kapai en iang ih papah nin duwen Sounkadehdehn Siohwa kan. (Ais. 43:10; Kaud. 1:5) Sohte mehkot me kansenamwahu sang met!