Mahlen Sarawi Kan Tepisang Mahs Mahsie

“Mahlen sarawi kan me mih nin dinapw kin wia ahl ehu en kadokeikitail lahng ong sapwellimen Koht irair en mwakelekel oh sarawi oh pil ong sapwellime aramas sarawi kan.”-GREEK ORTHODOX ARCHDIOCESE OF AUSTRALIA

RAHN KARAKAR WET nan August, lingan ketipin dakedaker pohn kendake siment me doudoudahla ihmw sarawi en “Lih Keieu Sarawi Inen Koht,” pohn dekehn Tínos, nan Sehd en Aegean Sea. Kamwasik en karakar en ketipin sohte kak kapweiekihdi nannantiwei en aramas pohnangin 25,000 aramas pwoson en pelien lamalam en Greek Orthodox me doudoudahwei ni alu wawai pwe irail en leladahwohng sansal en inen Sises me re kapwatahda oh lingan.

Serepein pwulopwul men me mwoator, e sansal me nan paliwere inenen medek oh pwunod laud sansal pohn mese, oh e wie limwilimwahdekki pwukie kan me nta wie kereker. Ekiste keilahsang ih, lialaud emen mih mwo me pwangadahr pwe e seiloakdohsang elep wehio oh e nannanti pwekepwek neh kan me pwangadahr. Mwahnakapw pwulopwul men mwekimwekid nan ah ngoangala oh pwudewe wie kereker oh e nannantihong dindilseli nanpwungen pokon en aramas akan. Irail koaros​—⁠arail mehn akadei iei en metikedi mahlen sarawi en Mery oh poaredi mwohn mahleno.

E sansal me irail aramas poadidi pwukat uhdahn mehmehlel nan arail men kaudokiong Koht. Ahpw, meh depe irail ese me pwongih mahlen sarawi kan tepida wiawi sounpahr epwiki kei mwohn Krais ketiket sampah?

Reklahn Mahlen Sarawi kan

Nan pelien sarawi en Orthodox, mahlen sarawi kan kin mih wasa koaros. Nan ihmw sarawi kan, mahlen sarawi en Sises, Mery, oh pil “aramas sarawi kan” mih nan werengen ihmw pwukat. Tohn sarawi pwukat kin kasalehda me re wauneki mahlen sarawi pwukat ni arail kin metik, isik mehn kapwohmwahu kan, oh pil isikada kandehla kan. Pil nan imwarail akan, pali laud en irail mie pein neirail mahlen sarawi kan me mih pohn pelien dinapw nan keimw en imwarail akan, wasa re kin kapakap ie. Orthodox Kristian kan kin kalap nda me ni arail kin kaudokiong mahlen sarawi kan, irail kin kehn me re kin karanih Koht. Me tohto kin kamehlele me mahlen sarawi pwukat audaudki manaman sang Koht kahrehda re kin kak wiahda manaman akan.

Tohn sarawi pwukat pahn ele pwuriamweiki en diarada me tepin Kristian akan sohte kin pwungki doadoahngki mahlen sarawi kan nan arail kaudok. Pwuhk me ede Byzantium koasoia: “Tepin Kristian akan alehda madamadau en suwediki sansal takai sang rehn mehn Suhs oh sohte pwungki doadoahngki kilel en aramas sarawi kan.” Pwuhkohte pil koasoia: “Sang ni kelimau en senturi kohdo, sansal takai oh mahlen sarawi kan . . . kin tepida rekla nan ihmw sarawi kan oh pil nan imwen aramas akan.” Eri, ma songen wiepen kaudok wet sohte kohsang rehn tepin Kristian akan, eri iawasa e tepidohsang ie?

Rapahkihda Ia Tapirail

Sounroporop Vitalij Ivanovich Petrenko ntingihdi: “Doadoahngki dikedik en eni oh sansal takai kan nan kaudok tepidohsang mwohn Krais ketiket sampah oh wia ‘tiahk en pagan.’ ” Sounpoadoapoad tohto pwungki oh koasoia me doadoahngki mahlen sarawi kan nan kaudok kan tepidohsang nan Wehin Papilon, Isip, oh Krihs. Karasepe, nan Krihs mahso, dikedik en eni kan me kin doadoahk nan sarawi kan kin wia sansal takai. Irail kamehlele me dikedik pwukat ahneki manaman. Aramas kin kamehlele me sansal pwukat kaidehn aramas me wiairailada ahpw re kin kohsang nanleng. Ni rahn en kasarawi tohrohr kan, soangen sansal sarawi kan aramas kin wa pidakiheki kahnimwo, oh meirong kin kohwong irail. “Sansal ko kin wia koht ekei, edetehn aramas kin songosong en kasalehda . . . wekpeseng en koht oh sansal,” iei me Petrenko koasoia.

Eri, iaduwen soangen madamadau oh wiepen kaudok pwukat arail pedolong nan sarawi en Kristian kan? Soun roporop menet diarada me, pahr epwiki kei mwurin mehlahn wahnpoaron akan, ahpw mehlel nan Isip, “padahk en Kristian tepida doaloahla padahk en kaudok en pagan me kohsang rehn mehn Isip, Krihs, Suhs, Oriental oh Rom.” Imwilahn met: “Kristian akan doaloapene arail sarawi ohng wiepe oh doadoahkpen dikedik me pagan kan ahneki, oh wiahkihla wiepe kapw en kaudok, edetehn irail sohte wekidala sang wiepe me pagan kan kin wia.”

Mwadangete, kaudokpen mahlen sarawi kan wiahla mehkot kesempwal nan ihmw sarawi oh nan ihmw akan. Nan pwuhk me adaneki The Age of Faith, soupoad Will Durant kawehwehda iaduwen wiewia wet ah tepida oh e koasoia: “Ni ahnsou me aramas sarawi kan me aramas kin kaudokiong ahr wie tohtohla, anahnepen tamataman oh kadehdehda ihs emen emen irail eri pwarada; eri, kilel en irail oko oh pil Mery eri wiawihda ni wehieu me inenen tohto; oh me pid Krais​—⁠kaidehnte mwomwen paliwerehte me wiawihda ahpw pil sapwellime lohpwu wia mehkot sarawi oh mepwukat koasoiepen manaman akan me sansal wiahda pil miehla. Pwehki mepwukat wia mehkot me kin kamwekid ahn aramas kehl en madamadau, eri aramas pwukat wiahkihla kilel sarawi kei; oh mehkan me irail kin kapinga uwen linganperail, oh aramas kin poaridihsang, metik, isikada kandehla oh isik mehn kapwohtik mwohrail, oh kapwatahkihda wahn rohs akan, oh kin song en alehsang irail en wiahiong irail manaman akan oh pil pwongih. . . . Padre kan oh irail me iang Council en Church kan kin pwurepwurehng kawehwe me sansal takai pwukat kaidehn koht ekei, oh re kin wia mehn sawas en katamando duwen koht akan, ahpw aramas akan sohte men alehda kawehwe pwukat.”

Rahnwet, aramas tohto me kin doadoahngki mahlen sarawi kan nan kaudok pil kin kawehwe me re wiahte mehkan me irail kin wauneki​—⁠kaidehn mehn kaudok. Irail kak pil nda me mahlen sarawi kan sohte uhdahn kesempwal ahpw e wiahte mehn sawasepen madamadau ni ahnsou me emen wie kaudok ong Koht. Mwein iei pil duwen ahmw madamadau met. Ahpw, peidek kesempwal kin pwarada wasaht: Ia kupwuren Koht ong met? E kak wehwehki me mahlen sarawi kan wie mehkan me aramas kin kaudokiong? E kakete me soangen wiepe wet pahn keper ahpw aramas sohte wehwehki?

[Box/Picture nan Pali 4]

Dahkot Mahlen Sarawi?

Met weksang sansal takai kan me aramas tohto nan pelien lamalam en Roman Catholic kin kaudokiong. Mahlen sarawi kin wia mehkot me ke kak kilang reirei ih oh tehlap pe en Krais, Mery, “aramas sarawi kan,” tohnleng kan, oh aramas en Paipel teikan, de pil mahlen en wiewia kan en poadoapoad en sarawi en Orthodox. Mehpwukat kin kalap mahlendiong pohn pelien dinapw.

Nin duwen pelien sarawi en Orthodox, “ong Kilel en Aramas Sarawi kan, kilel pwukat sohte kin duwehte kilel en aramas me wiawihkihda uduk oh nta.” Oh pil, mahlen sarawi “mwowe kin tehtikitik ahpw tetehlapala kohlahng nin tihnsewehu.” E kin kalap “sohte mwete me pahn kasalehda ahnsou dah me nin rahn de nih pwong.” Aramas kin kamehlele me tuhke de litepw me wiahda mahlen sarawi kin “direki manaman en Koht.”

[Kilel nan Pali 4]

Doadoahngki dikedik en eni oh sansal takai kan nan kaudok kin kohsang kaudok likamw

[Kilel Credit Line nan Pali 3]

© AFP/CORBIS