Siohwa Kin Ketin Kupwurokin Uhk

“Kumwail mweidohng Ih [Koht], amwail pwunod koaros, pwehki eh kin ketin kupwurokin uhk.”​—1 PITER 5:7, New World Translation.

1. Ni ahl kesempwal dahieu me Siohwa oh Sehdan kin wekpeseng?

SIOHWA oh Sehdan undahn wekpeseng. Mehmen me kin karanih Siohwa kin soikala Tepil. Koasoipen wekpeseng nanpwungara pwarada nan ehu pwuhk. Encyclopædia Britannica (1970) kin koasoia duwen wiewia kan en Sehdan nin duwen me kileledi nan pwuhken Sohp: ‘Doadoahk en Sehdan iei en kohkohseli nin sampah pwon raparapahki wiewia kan de aramas akan me e pahn kak kauwe; e wiewia kan kin weksang dahme “silengin Kauno” kin mahsanih, me kin ketin lel wasa koaros nin sampah pwen ketin kakehlahda soahng koaros me mwahu. (II Kronikel xvi, 9). Sehdan kin rapahki sapwung kan oh sohte likih aramas mwahu kan oh soh-roporop akan oh e kin ale mweimwei en kasonge irail, ahpw e sohte kak kasonge irail daulihala dahme Koht ketin mweidong.’ Ia uwen wekpeseng en ira!​—Sohp 1:6-​12; 2:1-7.

2, 3. (a) Iaduwen wehwehn lepin lokaia “Tepil” kin kasalehda dahme wiaiong Sohp? (b) Iaduwen Pwuhk Sarawi kasalehda me Sehdan kin kaukaule karaun likamwe sapwellimen Siohwa ladu kan nin sampah?

² Lepin lokaia wet “Tepil” kin kohsang lepin lokaiahn Krihk me wehwehki “soun karaun mwahl,” “soun likamw.” Pwuhken Sohp kin kasalehda me Sehdan kin karaune sapwellimen Siohwa ladu lelepek, Sohp kin papah Koht pwehki roporop, ndinda met: “Ia duwe, Sohp pahn kak pwongih komwi, ma komw sohte ketin kapaiahda?” (Sohp 1:⁠9) Pwuhken Sohp kin kasalehda me edetehn Sohp kin lelohng kasongosong kan oh kalokolok kan, e kin karanih Siohwa. (Sohp 10:9, 12; 12:9, 10; 19:25; 27:5; 28:28) Mwurin e lelohng kahpwal akan, e koasoia ong Koht met: “Eri, mahso I patohwan esehte dahme aramas teikan patohwanohng ie, a met I pein patohwan kilangkinkomwiher mesei kat.”​—Sohp 42:⁠5.

³ Sehdan sohlahr kin karaun mwahlih sapwellimen Koht ladu lelepek kan sangehr mwurin Sohp kohdo? Soh. Pwuhken Kaudiahl kin kasalehda me nan imwin ahnsou, Sehdan kin kaukaule karaun likamwe rien Krais me keidi kan iangahki iangerail lelepek kan. (2 Timoty 3:12; Kaudiahl 12:10, 17) Ihme kahrehda, kesempwal kitail Kristian mehlel akan koaros en uhpaiong atail Koht, Siohwa limpoak, oh papah Ih pwehki atail limpoak loal oh met pahn kasalehda me ahn Sehdan karaun akan me uhdahn likamw. Ni ahnsou me kitail pahn wia met, kitail pahn kaperenda sapwellimen Siohwa mongiong.​—Lepin Padahk 27:11.

Siohwa kin Rapahki Ahl akan en Sewese Kitail

4, 5. (a) Weksang Sehdan, dahme Siohwa kin rapahki nin sampah? (b) Ma kitail men Siohwa en kupwurkin kitail, dahme kitail anahne en wia?

⁴ Tepil kin kohkohseli nin sampah pwen raparapahki ihs me e kak karaun likamwe oh mehmen me e kak kadallehla. (Sohp 1:7, 9; 1 Piter 5:⁠8) Weksang met, Siohwa kin raparapahki oh sewese aramas akan me anahne sapwellime sawas. Soukohp Ananai padahkiong Nanmwarki Asa: “Kauno [“Siohwa,” NW] kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.” (2 Kronikel 16:⁠9) Ia uwen wekpeseng ahn Sehdan kin tetehk aramas akan ni kailok oh Siohwa me kin apwalih aramas mwahu ni elen limpoak!

⁵ Siohwa sohte kin mahmahsanih kitail pwehn tehk atail sapwung kan. Sounmelkakao ntingihdi: “Ma komw pahn ketin kilelehdi dipat akan, ihs me kak pitsang sapwellimomwi kadeik?” (Melkahka 130:⁠3) Pasepeng ong peidek wet: sohte me pahn kak pitsang. (Eklesiasdes 7:20) Ma kitail pahn karanih Siohwa ki mongiongitail kan unsek, silangih pahn mahmahsanih kitail, kaidehn pwen kadeik, ahpw en mahsanih atail kin nantiong en wia me mwahu oh karonge atail pekipek kan oh pek mahk kan. Wahnpoaron Piter ntingihdi: “Pwe silangin Kauno kin mahmahsanih me pwung kan, oh e kin karonge ar pekipek kan ahnsou koaros; a e kin sohpeisang me kin wia me suwed.”​—1 Piter 3:⁠12.

6. Iaduwen dahme wiaiong Depit kin kak kihong kitail kamweit oh kaweid?

⁶ Depit soh unsek oh e wiahda dihp laud. (2 Samuel 12:7-9) Ahpw, e kasalehong Siohwa eh pepehm loal kan oh karanih Ih ni eh poadidiong kapakap. (Melkahka 51:1-​12, superscription) Siohwa ketin karonge ah kapakap oh kasalehda mahk, edetehn Depit lelohng kahpwal akan pwehki dihp me e wiahda. (2 Samuel 12:10-​14) Met kin kihong kitail kamweit oh pil kaweid. E kansenamwahu en ese me Siohwa kin kupwurki en mahkong kitail dipatail kan ma kitail kin kohluhla mehlel, ahpw e kesempwal kitail en pohnese me pali laud en ahnsou, dihp kin imwikihla kahpwal akan. (Kalesia 6:7-9) Ma kitail men karanih Siohwa, kitail anahne en tateki soahng koaros me kin kansensuwedih Ih.​—Melkahka 97:⁠10.

Siohwa kin Kakaranihodohng Mpe Sapwellime Aramas akan

7. Soahngen aramas dah kei me Siohwa ketin mahsanihada, oh iaduwen e kin kahrehdo aramas pwukat reh?

⁷ Depit ntingihdi met nan sapwellime melkahka kan: “Mehnda ma komw kin ketiket wasa ileilehie, ahpw komw kin ketin kupwure me tikitik kan, oh me aklapalap akan sohte kak ruksang komwi.” (Melkahka 138:⁠6) Duwehte melkahka wet, nan pil ehu melkahka e mahsanih: “Sohte emen duwehte Kauno, atail Koht. E kin ketiket powe wasa ileilehie, ahpw kin ketin mahsendihdo oh ireirong nanleng oh sampah. E kin ketin pwekada me semwehmwe kan sang nanpwel; e kin ketin kasapwilada me paisuwedlahr akan sang ar apwal.” (Melkahka 113:5-7) Ei, Sounkapikada Lapalapie en audepen lahng oh sampah kin mahsendihdo oh ireirong sampah, oh silangi kin mahsanih irail aramas “aktikitik kan” me kin “pahtoulahr oh milahr nan apwal pwehki soahng saut akan me wiewiawi.” (Esekiel 9:⁠4) E kin ketikihdohng mpe soangen aramas pwukat ki sapwellime Ohl. Ni ahnsou me e ketiket nin sampah, Sises mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi. . . Sohte emen kak kohdo rehi, ma Sahmo sohte ketin mweidohng.”​—Sohn 6:44, 65.

8, 9. (a) Dahme kahrehda kitail koaros anahne en kohla rehn Sises? (b) Dahme kahrehda koasoandi en tomw iei koasoandi kaselel ieu?

⁸ Aramas koaros anahne patohdohng rehn Sises oh pwoson meirong en tomw pwehki irail koaros ipwikihdi wia aramas dipan akan, oh kin dohweisang Koht. (Sohn 3:36) Irail anahne kapwungala oh wekidala arail mour ong Koht. (2 Korint 5:20) Koht sohte kin awih aramas dipan akan en peki reh en wiahda koasoandi ehu pwehn sewese aramas akan en diarada popohl reh. Wahnpoaron Pohl ntingihdi: “Ahpw Koht ketin kasalehiong kitail ia uwen laud en sapwellime limpoak ong kitail, pwe ni ahnsou me kitail mihmi nan dihp, Krais ketin pwoukinkitailla. . . . Kitail wiahier imwintihti en Koht mahs, a met e ketin wiahkinkitaillahr kompoakepah pwehki pwoulahn Sapwellime Iehros. Ahnsou wet kitail wialahr kompoakepahn Koht, eri, kitail uhdahn pahn pil mourkihla ieias en Krais.”​—Rom 5:8, 10.

⁹ Wahnpoaron Sohn kamehlelehong kitail duwen ire mehlel ieu me Koht kin ketin kapwurehdohng Ih aramas akan: “Iet duwen en Koht eh ketin kasalehda sapwellime limpoak ong kitail: pein ih ketin poaronedohng sampah Sapwellime Iehros, pwe kitail en kak mourkihla. Iet duwen mwomwen limpoak kaidehn kitail me tepin poakohng Koht, ahpw ih me tepin poakohng kitail, oh ketin poaronehdo, Sapwellime Iehros pwe en wiahla tomwpen dipatail kan.” (1 Sohn 4:9, 10) Koht kin tepida kasalehda limpoak, kaidehn aramas. Ke soh kin ahneki pepehm en men kerendohng Koht menet me kin kasalehda limpoak laud ong “aramas dipan akan,” oh pil “imwintihti kan?”​—Sohn 3:16.

Kitail Anahne Raparapahki Siohwa

10, 11. (a) Dahme kitail anahne wia pwen rapahki Siohwa? (b) Iaduwen kitail pahn kilangwong koasoandi wet en Sehdan?

¹⁰ Kitail wehwehki me Siohwa sohte kin idingki kitail en keila mpe. Kitail anahne rapahki Ih, “oh diarada Ih, mendahki e sohte dohsang emenemen kitail.” (Wiewia 17:27) Kitail anahne en wehwehki sapwellimen Siohwa pwung, kitail en uhpaiong ih. Tohnpadahk Seims ntingihdi: “Eri, kumwail peikiong Koht, oh pelianda Tepil, e ahpw pahn tangasang kumwail. Kumwail keido mpen Koht, oh e pahn ketin keiong mpamwail. Kumwail me dipan akan, kumwail kamwakelehda pehmwail kan. Kumwail me mwalaun kan, kumwail kaminehla loalamwail kan.” (Seims 4:7, 8) Kitail en dehr masak pelianda Tepil oh uhpaiong Siohwa.

¹¹ Met kin wehwehki me kitail pahn mih dohsang koasondi suwed wet en Sehdan. Seims pil ntingihdi: “Soaloalopwoat amwailen! Kumwail sehse me amwail limpoakohng sampah wet wehwehki imwintihti ong Koht? Mehmen me kin inengieng kompoakepahnki sampah wet, iei ih imwintihtien Koht.” (Seims 4:⁠4) Eri, ma kitail men wiahla sapwellimen Siohwa kompoakepah kan, kitail anahne kasik me sampah en Sehdan wet pahn kailongkinkitailla.​—Sohn 15:19; 1 Sohn 3:⁠13.

12. (a) Mehnia mahsen en kamweit kei me Depit ntingihdi? (b) Mehnia kaweid me Siohwa ketikihda ki soukohp Asaraia?

¹² Ni ahnsou me sampah en Sehdan wet kin uhwong kitail, kitail anahne en kapakap ong Siohwa, peki sapwellime sawas. Depit, kin pein ekspiriens Siohwa ketin doarehla ih pak tohto, oh e ntingihdi met pwen kamweitiala kitail: “E kin ketiket limwahn irail kan me kin likweriong, irail akan me kin likweriong ni mehlel. E kin ketikihong anahn en irail me kin wauneki; e kin ketin karonge ar likwer, oh kin ketin komourirailla. E kin ketin sinsile irail kan me kin poakohng, a e pahn ketin kamwomwala aramas suwed akan.” (Melkahka 145:18-​20) Melkahka wet kin kasalehda me Siohwa kak doarehla kitail ni ahnsou pein emenemen kitail kin ale kasongosong oh me e pahn ketin doarehla sapwellime aramas akan nin duwen pwihn ehu nan “kahn kamakam kowahlap.” (Kaudiahl 7:14) Siohwa pahn ketin karanih kitail ma kitail pahn karanih Ih. “Ngenen Koht” kamwekid soukohp Asaraia en mahsanih ire mehlel wet: “Kauno [“Siohwa,” NW] kin ketin ieiang kumwail erein amwail pahn ieiang Ih. Ma kumwail pahn rapahki, E pahn ketin mweidohng kumwail en diar, ahpw ma kumwail pahn sohpeisang, E pahn ketin keseikumwailla.”​—2 Kronikel 15:1, 2.

Kitail Anahne en Uhdahn Kamehlele Siohwa

13. Iaduwen kitail kak kasalehda me kitail kin uhdahn kamehlele Siohwa?

¹³ Wahnpoaron Pohl ntingihdi duwen Moses me “wonlahte mwowe nan eh seiloak, likamwete e kilang Koht me soh sansal.” (Ipru 11:27) Ni mehlel, Moses sohte uhdahn kilang Siohwa. (Eksodus 33:20) Ahpw, pwehki e kin uhdahn kamehlele Siohwa, likamwete e kilang Ih. Duwehte Sohp, mwurin e lelohng eh kasongosong kan, ni karasaras, mesen Sohp en pwoson likamwete e kilangada Siohwa nin duwen emen Koht me kin mweidong sapwellime ladu lelepek kan en lelong kasongosong kan ahpw e sohte kin kesehla irail. (Sohp 42:5) Paipel mahsanih me Enok oh Noah kin ‘iang Koht kekeid.’ Ira kin wia met ki ara kin nantihong en kaperenda oh peikiong Koht. (Senesis 5:22-​24; 6:⁠9, 22; Ipru 11:5, 7) Ma kitail kin uhdahn kamehlele Siohwa duwehte Enok, Noah, Sohp, oh Moses, eri kitail pahn “tamanda Kauno,” ni atail wiewia kan koaros, oh E pahn “kasalehiong [kitail] ahl me pwung.”​—Lepin Padahk 3:5, 6.

14. Ia wehwehn lepin lokaia wet “tengeteng” rehn Siohwa?

¹⁴ Mwohnte mehn Israel akan pahn pedolong nan Sapwen Inou, Moses kihong irail kaweid wet: “Kumwail idawehn Kauno oh lemmwiki Ih. Kumwail peikiong oh kapwaiada sapwellime mahsen kan. Kumwail pwongih oh loalopwoatohng, [oh tengehdihong reh].” (Deuderonomi 13:⁠4) Irail anahne en idawehn Siohwa, lemmwiki oh peikiong Ih, oh pil tengeteng reh. Emen me samanih Paipel nda me lepin lokaia wet me kawehwehdi “tengeteng” oh kin wehwehki “en uhdahn karanih emen.” Sounmelkahkao mahsanih met: “Siohwa kin uhdahn karanih aramas akan me kin lemmwiki Ih.” (Melkahka 25:14) Nanpwungmwahu kesempwal keren wet rehn Siohwa kak en mehlel ong kitail oh ma atail limpoak ong Ih me inenen kehlail, kitail pahn masak en kansensuwedihala Ih.​—⁠Melkahka 19:9-​14.

Ke Kin Wehwehki Duwen Sapwellimen Siohwa Epwel Mwahu?

15, 16. (a) Iaduwen Melkahka 34 kin kasalehda me Siohwa kin ketin apwaliahda kitail? (b) Dahme kitail anahne wia ma kitail kin apwaliki tamataman sapwellimen Siohwa wiewia mwahu kan me e ketin kasalehong kitail?

¹⁵ Ehu widing suwed en Sehdan iei en kahrehong kitail en manokehla me atail Koht, Siohwa, kin ahnsou koaros apwalih mwahu sapwellime ladu lelepek kan. Nanmwarki Depit en wehin Israel kin pohnese duwen sapwellimen Siohwa perepe edetehn e lelong kahpwal laud ieu. Ni ahnsou ieu me e anahne en mwomwehda me e aramas pweipwei men mwohn Nanmwarki Akis en Kad, e ketin wiahda koul ehu, ehu melkahka me inenen kaselel oh iet ekei audepe kan me kin kasalehda eh pwoson: “Kumwail iang ie lohkiseli roson lapalap en Kauno; kitail wiakihteieu kapinga mware! I kapakap ohng Kauno, e ahpw ketin sapeng ie; e ketin kasaledekihiehla sang nan ei masak koaros. Me toutoulahr akan kin sohpeiong oh kin nsensenamwahu; re sohte pahn nsensuwedla. Sapwellime tohnleng kin sinsile irail kan me kin wauneki Kauno, oh kin kapitirailsang soahng keper kan. Kumwail pein rapahki ia uwen kalahngan en Kauno. Meid pai irail kan me kin diar sileparail pahn kupwure. Kauno kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor. Apwal tohto kin lelohng aramas mwahu men, ahpw Kauno kin ketin doarehsang nan eh apwal akan koaros.”​—Melkahka 34:3, 4, 7, 8, 18, 19; 1 Samuel 21:10-​15.

¹⁶ Ke kin kamehlele sapwellimen Siohwa manaman en doarehla aramas akan? Ke kin wehwehki duwen sapwellime tohnleng kan me kin kak perehla kitail? Ke pein rapahki ia uwen kalahngan en Siohwa? Iahd kaimwiseklahn ahmw ahneki pepehm en me Siohwa kin ketin wiewia mwahu ong uhk? Song en tamanda. Mie ahnsou me ke kalohk ni kaimwiseklahn ihmw en rahno, oh ke lemeleme me ke sohlahr kak pousehla? Ahpw mwein ke tuhwong tohnihmw emen me kin perenki rong. Eri, ke tamanda en kasalehda omw kalahngan ong Siohwa pwehki E kihong uhk kehl me anahn oh pil kapaiada uhk? (2 Korint 4:7) Ahpw mwein, ke kin apwaliki en tamanda wiewia mwahu kan me Siohwa wiaiong uhk. Mwein ke anahne en medemedewe dahme e wiaiong uhk wihk ehu samwalahro, de sounpwong ehu samwalahro, de sounpar ehu samwalahro, de daulihlahr sounpar kei samwalahro. Ma ih duwen, dahme ke soh pahn nantihong karanih Siohwa oh song en kilang iaduwen e kin kahre oh kaweidkin uhk? Wahnpoaron Piter kaweidih Kristian akan: “Eri, kumwail pein karakarahkala pahn nin limen Koht manaman . . . Kumwail mweidohng ih amwail pwunod koaros, pwehki eh kin ketin apwahpwalih kumwail.” (1 Piter 5:6, 7) Ni mehlel, ke pahn pwuriamweiki ni ahmw pahn diarada me pak tohto e kin ketin sewese oh kupwurokin iuk!​—Melkahka 73:28.

Kaukaule Raparapahki Siohwa

17. Dahme kesempwal ma kitail men raparapahki Siohwa?

¹⁷ Kitail anahne en kaukaule kolokol atail nanpwung mwahu rehn Siohwa. Sises kapakap ong Semeo oh mahsanih: “Oh iet mour soutuk, aramas akan en eseikomwihla,me komwihte Koht mehlel, oh pil esehla Sises Krais me komw ketin poaronedohr.” (Sohn 17:⁠3) Kitail anahne en ni ahnsou koaros loalokongkihla loalokong me pid Siohwa oh sapwellime Ohl. Kitail pil anahne sawas sang kapakap oh ngehn sarawi pwen sewese kitail en wehwehki duwen “sapwellimen Koht kupwur rir kan.” (1 Korint 2:10; Luk 11:13) Kitail pil anahne kaweid me kin kohsang rehn “ladu lelepek oh loalokong” pwen kak audaudkihda atail madamadau kan ki ketinain en pali ngehn “ni ahnsou me konehng.” (Madiu 24:45) Ki sawas wet, Siohwa kin kaweidih kitail en wadek sapwellime Mahsen ni ehu ehu rahn, en kaukaule iang towehda mihding en Kristian akan, oh ni mongiongitail unsek en iang doadoahk en kalohki “Rongamwahu en Wehio.” (Madiu 24:14) Ni atail kin wia met, kitail kin kaukaule raparapahki atail Koht, Siohwa me kin nsenohki kitail.

18, 19. (a) Dahme kitail anahne nantihong en wia? (b) Ma kitail kin ni kehlail uhwong Tepil oh kaukaule raparapahki Siohwa, kapai dah kei kitail pahn alehda?

¹⁸ Sehdan kin wia uwen me e kak en kaloke, uhwong oh wiahda kahpwal akan ong sapwellimen Siohwa aramas akan. E kin song en kauwehla atail popohl oh atail nanpwungmwahu rehn Koht. E sohte men kilang kitail en kaukaule wia atail doadoahk en rapahki aramas mehlel akan oh sewese irail en iang utungada sapwellimen Siohwa pwung en kaunda audepen lahng oh sampah pwon. Ahpw, kitail anahne en nantihong lelepek ong Siohwa, likih me E pahn ketin doarehla kitail sang Me Suwedo. Ma kitail pahn mweidong sapwellimen Koht Mahsen en kaweidih kitail oh utungada sapwellime pwihn sansal, kitail kak likih me E pahn sewese kitail ahnsou koaros.​—Aiseia 41:8-​13.

¹⁹ Eri, kitail koaros anahne en uhwong kehlail Tepil oh ah widing suwed kan, oh ahnsou koaros raparapahki atail Koht, Siohwa, me pahn uhdahn ‘kakehlailkitailla, oh poahsoaneikitailda.’ (1 Piter 5:8-​11) Eri, kitail pahn ‘dadaurete ni limpoak en Koht, ni [atail] kasikasik kalahngan en atail Kaun Sises Krais me pahn ketikihong kumwail mour soutuk.’​—Sud 21.

Iaduwen Ke Pahn Sapeng?

• Ia wehwehn lepin lokaia wet: “Tepil” oh ia uwen Tepil ah kin tengehdi ong kolokol wehwehpen ede?

• Iaduwen Siohwa kin weksang douluhl Tepil nin duwen e kin mahsanih aramas akan nin sampah wet?

• Dahme kahrehda aramas akan anahne pwoson tomwo ma irail men karanih Siohwa?

• Ia wehwehn “tengeteng” rehn Siohwa, oh iaduwen kitail kak raparapahki Ih ahnsou koaros?

[Kilel nan Pali 15]

Mendahki kasongosong kan, Sohp tepida wehwehki me Siohwa kin ketin kupwurohkin ih

[Kilels nan Pali 16, 17]

Wadek Paipel rahn koaros, kaukaule iang towehda mihding en Kristian akan, oh ngoangki iang doadoahk en kalohk kin katamankin kitail me Siohwa kin ketin kupwurokin kitail