Ia Uwen Kehlail En Ahmw Pwoson?

“Pwehki ahmw pwoson me kahrehong iuk en kesihnen.”​—2 KORINT 1:24, NW.

1, 2. Dahme kahrehda kitail anahne ahneki pwoson, oh iaduwen kitail kak kakehlahda atail pwoson?

SAPWELLIMEN Siohwa ladu kan kin ese me irail anahne pwoson Koht. Ni mehlel, ‘sohte me kak kenikenla pahn kupwur en Koht ma sohte eh pwoson.’ (Ipru 11:6) Ihme kahrehda, e pahn wia elen loalokong ma kitail pahn kapakapki ngehn sarawi oh pwoson, me iei kisehn wah kaselel kan. (Luk 11:13; Kalesia 5:22, 23) Kahlemengih pwoson me iengatail kan kin kasalehda pil kak kakehlahda pein atail pwoson.​—2 Timoty 1:5; Ipru 13:7.

² Atail pwoson pahn kehlailda ma kitail kin ngidingidki kapwaiada dahme Mahsen en Koht kin koasonehdi ong Kristian akan koaros en wia. Atail pwoson pahn kak kehlailda ma kitail pahn wadek neitail Paipel ni rahn koaros oh ngoangki onop Pwuhk Sarawi ki sawas sang pwuhk kan me pwihn en “ladu lelepeko” kin wiahda ong kitail. (Luk 12:42-​44; Sosua 1:7, 8) Kitail kin ale kangoang sang pwoson en emenemen kitail ni atail kin kaukaule iang towehda mihding en Kristian akan oh kapokon kan. (Rom 1:11, 12; Ipru 10:24, 25) Oh atail pwoson kin kehlailda ni ahnsou me kitail kin iang doadoahk en kalohk oh koasoiong aramas teikan.​—Melkahka 145:10-13; Rom 10:11-​15.

3. Me pid pwoson, sawas dah kitail kin ale sang rehn Kristian elder limpoak kan?

³ Irail Kristian elder limpoak kan kin sewese kitail en kakehlahda atail pwoson ni ahnsou me irail kin kihong kitail kaweid oh kangoang kan me kin kohsang Pwuhk Sarawi. Irail kin ahneki madamadau ieu duwehte wahnpoaron Pohl, me padahkiong mehn Korint kan: “Kiht iengomwail tohndoadoahk kei ong kaperenpamwail, pwehki sang ni amwail pwoson me kahrehda kumwail kin keskesinenki.” (2 Korint 1:23, 24, NW) Pil ehu kawehwe mahsanih: “Se kin iang kumwail doadoahk pwen wiaiong kumwail en peren, pwe amwail pwoson me kehlail.” (Contemporary English Version) Aramas pwung kan kin momourki pwoson. Ahpw, ni mehlel, sohte emen tohrohr kak kolohng kitail atail pwoson, de wiaiong kitail en kolokol atail lelepek. Ihme kahrehda, ‘emenemen kitail koaros uhdahn pahn pein wa eh wisik.’​—⁠Kalesia 3:11; 6:5.

4. Iaduwen poadopoad akan en sapwellimen Koht ladu lelepek kan me mih nan Nting Sarawi kan, pahn kak kakehlahda atail pwoson?

⁴ Pwuhk Sarawi kin audaudkihda poadopoad en aramas pwoson akan. Ele mwein kitail wehwehki duwen arail wiewia kaselel kan, ahpw kitail kin pil wehwehki duwen arail pwoson me re kin kasalehda ni ehu ehu rahn, ni erein arail mour werei? Medemedewe ong iaduwen irail kin kasalehda pwoson ong ni irair akan me kitail kin lelong nan rahnpwukat pahn kak sewese kitail en kakehlada atail pwoson.

Pwoson kin Kahrehong Kitail en Eimah

5. Mehnia iren Paipel kin kadehde me pwoson kin kakehlada kitail en ni eimah kalohkiseli sapwellimen Koht mahsen?

⁵ Pwoson kin kakehlahda kitail en kalohkiseli sapwellimen Koht mahsen ni eimah. Enok kin ni eimah kohpada duwen sapwellimen Koht kadeik. E mahsanih: “Iet, Kauno pahn ketido oh sapwellime tohnleng sarawi ngedehrie pahn iang, pwe en ketin kadeikada aramas koaros, pwe en ketin kalokehki me dipan akan wiewia suwed koaros me re wiadahr, oh lokaia suwed koaros me aramas seupwoson pwuko wiahiong Koht.” (Sud 14, 15) Ni ahnsou me imwintihti seupwoson akan en Inok rong mahsen pwukat, irail uhdahn men kemehla ih. Ahpw, ni eimah oh pwoson e wia ah padahk, oh Koht “ketikihsang ih” ni ah ketin kameirala ih ong ni irairen mehla oh e sansal me eh sohte ketin mweidong ih en lelohng lokolok. (Senesis 5:24; Ipru 11:5) Kitail sohte kin kilang soangen manaman duwehte met, ahpw Siohwa kin ketin karonge atail kapakap kan oh sewese kitail en kalohkiseli sapwellime Mahsen ki pwoson oh eimah.​—Wiewia 4:24-​31.

6. Iaduwen pwoson oh eimah me Koht ketikihong Noha sewese ih?

⁶ Pwoson me kahrehong Noha en peikiong Koht oh “wiahda warihmw ehu me kapitala ih oh eh peneinei.” (Ipru 11:7; Senesis 6:13-​22) Noha pil kin “lohkiseli duwen mour pwung” oh ni eimah lohkiseli sapwellimen Koht kadeik kan ong aramas akan. (2 Piter 2:5) Irail mwein kin kapailoke oh mwamwahliki ih pwehki e kin kalohkiseli Nohliko, duwehte aramas akan nan rahnwet kin kapailoke oh mwamwahliki kitail ni ahnsou me kitail kin kasalehong irail iren Paipel kan me kin kadehde me koasoandi suwed wet pahn kereniong sohrala. (2 Piter 3:3-​12) Duwehte Inok oh Noha, kitail kak kalohkiseli soangen rohng wet pwehki atail pwoson oh eimah me kin kohsang rehn Koht.

Pwoson Kin Sewese Kitail en Kanengamah

7. Iaduwen Eipraam oh aramas teikan kasalehda arail pwoson oh kanengamah?

⁷ Kitail anahne pwoson, oh kanengamah, keieu ni atail kin awiawih kaimwiseklahn koasoandi suwed wet. Eipraam kin lemmwiki Koht, oh ih emen me kin ‘pwoson oh kanengamah me pahn lel dahme Koht ketin inoukihong irail.’ (Ipru 6:11, 12) Ki pwoson, e mweselsang kahnimw en Ur, me kin dirkihla pai kan en sampah, ahpw e wiahla mehn keiru men nan sahpw ehu dohsang eh sahpw me Koht ketin inoukihong ih. Aisek oh Seikop kin sohsohki inou wet. Ahpw, “aramas pwukat koaruhsie pwoson, ahpw re melahr. Re sohte ale mehkan me Koht ketin inoukidahr.” Ki pwoson re kin ‘raparapahki sahpw ehu me kaselel sang wasao, iei nanleng.’ Ihme, Koht ketin “kaunopohngirailehr kahnimw ehu.” (Ipru 11:8-​16) Ei, Eipraam, Aisek, oh Seikop​—oh arail pwoud pwoson akan​—kin ni kanengamah awiawih sapwellimen Koht Wehin nanleng, oh pahnangin wehi wet, irail koaros pahn iasadahng mour nin sampah wet.

8. Eipraam, Aiseia, oh Seikop kin kasalehda kanengamah oh pwoson edetehn irail sohte kilang dah kan en pweida?

⁸ Eipraam, Aisek, oh Seikop sohte kesehla arail pwoson. Irail sohte kaunda Sapwen Inou, oh irail sohte kilang wehi koaros en ale kapai kan pwehki kadaudok en Eipraam. (Senesis 15:5-7; 22:15-​18) Edetehn ‘kahnimw me Koht ketin kauwada’ sohte pahn pweida lao lel sounpar epwuki kei dower powe, ohl pwukat pousehla kasalehda pwoson oh kanengamah erein arail mour. Kitail pil anahne kahlemengih irail, keieu pwehki ni ahnsouwet Wehin Mesaia kaundahr nanleng.​—Melkahka 42:5, 11; 43:5.

Pwoson kin Sewese Kitail en Akadeiong Dahme Keieu Mwahu

9. Ni ahl dahieu pwoson kak sewese kitail en pweida nan atail mehn akadei kan?

⁹ Sahm lelepek ako sohte alehdi tiahk en mehn Kenan me sakanakan, pwe irail kin ahneki mehn akadei ile kan. Pwoson kin sewese kitail en ahneki mehn akadei ngehnin kan me pahn sewese kitail en soikala sampah wet me kin mih pahn manaman en me suwedo, iei Sehdan me Tepil.​—1 Sohn 2:15-​17; 5:19.

10. Iaduwen kitail ese me Sosep nantiong akadeiong mehn akadei ieu me kin mwahusang wia aramas ndand nin sampah wet?

¹⁰ Pwehki Koht kin ketin kahre Sosep, iei nein Seikop, e uhd ahneki pwukoa en wiahla emen kaun en Isip, soun nek mwenge, ahpw kaidehn ah mehn akadei en wiahla emen ohl ndand nin sampah wet. Pwehki e kin pwoson pweidahn sapwellimen Siohwa inou kan, Sosep sounpar 110 padahkiong rie ko: “I nektehn mehla, ahpw Koht pahn ketin apwalih kumwail oh pahn ketin kahluweikumwaillahng nan sahpw me e ketin inoukihong Eipraam, Aisek oh Seikop.” Sosep pekihda rehrail en wahda paliwere oh seridi nan Sapwen Inou. Ni ahnsou me e mehla, irail kihong wini ni kahlepeo oh kihdiong nan kohpwa nan sapwen Isip. Ahpw, ni ahnsou mehn Israel akan pitsangehr selidi nan sapwen Isip, soukohp Moses koasoanehdi me irail pahn wahda tihn Sosep ko pwehn seridi nan Sapwen Inou. (Senesis 50:22-​26; Eksodus 13:19) Soangen pwoson me Sosep kin kasalehda anahne kamwekid kitail en nantiong en akadeiong mehn akadei kan me kin mwahu sang wia aramas ndand nin sampah wet.​—1 Korint 7:29-​31.

11. Ni ahl dahieu Moses kin kasalehda me e kin ahneki mehn akadei ngehnen kan?

¹¹ Moses ‘pilada en iang sapwellimen Koht aramas akan lokolok sang ah kaidehn en ahneki peren en lepin ahnsou nan dihp’ oh pil iang wia aramas sukuhl laud oh kisehn peneinei lapalap nan Isip. (Ipru 11:23-​26; Wiewia 7:20-​22) Met kahrehong en mendahkihla lapalap nin sampah oh mwein kak iang seridi nan kohpwahn lingan nan wasahn seridi en aramas lapalap akan en Isip. Ia pahn katepen met ni atail pahn karasalahng kapai en wia “sapwellimen Koht mehlelo ohl,” sounkadokehdo sapwellimen Koht kosonnedo, oh wia sapwellimen Koht soukohp, oh soun nting en Pwuhk Sarawi men? (Esra 3:2) Ke kin inengieng en kekeirada nan ahmw wasahn doadoahk, de omw pwoson kin sewese iuk en akadeiong mehn akadei ngehnen kan?

Pwoson kin Imwikihla Mour Kansenamwahu oh Katapan

12. Imwikihla mwahu dahieu wiaiong mour en Reap pwehki eh kin pwoson?

¹² Pwoson kin sewese aramas akan en kaidehn ihte en akadeiong mehn akadei mwahu kan, ahpw e pil kin sewese kitail en ahneki mour kansenamwahu oh katapan. Reap en Seriko nin duwen emen lih me kin netikihla paliware, kin ahneki madamadau ieu me eh mour sohte katepe. Ahpw, met kin wekila, ni ahnsou e pwosonlahr! E “pil pwungla rehn Koht pwehki eh wiewia kan [pwoson], ni eh kasamwo lipoahrok en mehn Suhs akan oh kadarirailla ni apwoat ahl tohrohr,” ira eri pitsang ara imwintihti en mehn Kenan kan. (Seims 2:24-​26) Reap kin pohnese Siohwa nin duwen Koht mehlel, oh e pil kasalehda pwoson ni ahnsou e kesehla eh mour en lih me kin netikihla paliwere. (Sosua 2:9-​11; Ipru 11:30, 31) E sohte pwoudkihda mehn Kenan soh pwoson, ahpw e pwoudkihda emen ladun Siohwa. (Deuderonomi 7:3, 4; 1 Korint 7:39) Reap alehdi pwais kaselel ieu en wiahla nohno kalap en Mesaia. (1 Kronikel 2:3-​15; Rud 4:20-​22; Madiu 1:5, 6) Duwehte aramas teikan me kin kesehla ar mour en nenek, e pahn pil ale kating ieu​—kaiasada oh mour nan paradais nin sampah.

13. Soahngen dihp dah kei me Depit wia rehn Padsipa, ahpw soangen madamadau dahieu me e kasalehda?

¹³ Mwurin Reap kesehla eh mour suwed, e kin kolokolete mour pwung. Ahpw, ekei irail inoukihong Koht arail mour ni erein ahnsou werei, ahpw mwuhr irail pwupwudiong nan dihp laud. Nanmwarki Depit wia dipen kamwahl rehn Padsipa, oh koasonehdi ahn Padsipa pwoud en kamakamala nan mahweno, oh mwuhr e pwoudikihda ih. (2 Samuel 11:1-​27) Depit ni eh koluhla mehlel oh peki rehn Siohwa: “Komw dehr ketikihsang ie ngenomwi sarawi.” Sapwellimen Koht ngehn sarawi sohte kin ketin uhdisang ieiang Depit. E kin pwoson me Siohwa, me kasalehda mahk, sohte pahn ketin kaririala silangih sang irail akan me kin “loal ohla” pwehki diparail. (Melkahka 51:11, 17; 103:10-​14) Pwehki ara pwoson, Depit oh Padsipa ale kapai en wia pahpa oh nohno kahlap en irail ako me imwikihla Mesaia.​—1 Kronikel 3:5; Madiu 1:6, 16; Luk 3:23, 31.

Pwoson kin Kehlailkihda Mehn Kadehde kan

14. Mehn kamehlele dah kei me Kideon alehdi, oh iaduwen poadopoad wet pahn kak kamwekid atail pwoson?

¹⁴ Edetehn kitail kin weweidki pwoson, ekei ahnsou kitail anahne mehn kadehde kan pwe en kasalehda me Koht kin ketin sewese kitail. Sounkopwung Kideon pil anahne soahngen sawas wet ni e kin “mahweniong wehi kan oh kalowehkinraildi pwoson.” (Ipru 11:32, 33) Ni ahnsou mehn Midian kan oh iengarail wehi kan kin mahweniong Israel, sapwellimen Koht ngehn kin sewese Kideon. E men kilang mehn kamehlele kan pwe en kadehde me Siohwa kin ketin sewese ih, ih eri peki ma ekei mehn kadehde kan pahn kak wiawi ni ahnsowo, me kin pid kisin kilin sihpw me mih wasa aramas kin koakoa pilawa. Nan keieun mehn kadehde, pwoaik mih pohn kisin kilin sihpw kisette, a nanpwel madekeng. Nan kariau en mehn kadehde, kisin kilin sihpw kiset inenen madekeng, a nanpwelohte me pwoaik mih ie. Kehlailkihda mehn kamehlele pwukat, Kideon ni pwoson kalowehdi imwintihti kan en mehn Israel akan. (Sounkopwung kan 6:33-​40; 7:19-​25) Ma kitail kin rapahki mehn kamehlele kan ni ahnsou kitail kin wiahda pilipil ieu, met sohte kin wehwehki me kitail sohte kin ahneki pwoson. Ni ahnsou me kitail kin wiahda atail pilipil kan, kitail kin kaselehda pwoson ni atail kin ale sawas sang ni atail kin wadek Paipel oh pwuhken Kristian akan oh kapakap ong Koht, ale sapwellime ngehn sarawi.​—Rom 8:26, 27.

15. Iaduwen kitail kak ale sawas sang ni atail kin medemedewe duwen pwoson me Parak kasalehda?

¹⁵ Pwoson en sounkopwung Parak kin kehlailkihda mehn kamehlele kan me wiawihda ni elen kangoang. Lih soukohp Depora kin kangoange ih en kapitala mehn Israel akan sang kanaudok en Nanmwarki en mehn Kenan kan, Sapin. Pwoson oh mehn kamehlele me Koht pahn ketin sewese ih, Parak kahre ohl 10,000 me sohte doadoangki dipwisoun mahwen mwahu kan en mahweniong oh kalowehdi sounpei kehlail kan en Sapin me Sisera kin wiahla kaun. Ni ahnsou me irail kana, Depora oh Parak koulki koulen kaping ieu. (Sounkopwung 4:1–​5:31) Depora kangoange Parak en wiahla kaun en mehn Israel me Koht ketin idiahda, oh e wiahla emen sapwellimen Siohwa ladu kan pwehki pwoson kin “kamwomwala karis en sounpei kan en mehn liki kan.” (Ipru 11:34) Pwehki Parak kin pwoson, medemedewe iaduwen Koht ketin kapaiada Parak, eri met pahn kak sewese kitail en powehdi atail kin masak kapwaiada ehu pwukoa apwal nan atail doadoahk en papah Siohwa.

Pwoson kin Kahrehong Popohl en Mie

16. Mehn kahlemeng dahieu me Eipraam wia ni ahnsou e nantiong en kasalehda popohl rehn Lohd?

¹⁶ Pwoson kin sewese kitail en kapwaiada atail pwukoa apwal kan nan atail doadoahk en papah Koht, e pil kin kahrehong popohl oh meleilei en mie. Eipraam mahlahr kin mweidong Lohd, nein rie ohl me pwulopwul sang ih en pilada sahpw me keieu mwahu, oh met wiawi ni ahnsou neira silepen mahn akan kin akamaipene oh iei ahnsou me irail anahne en tohrohrpeseng. (Senesis 13:7-​12) Eipraam kin ni pwoson kapakapki sapwellimen Koht sawas en kapwungala kahpwal wet. Ahpw e sohte kin medemedewe duwen pein ah anahn akan mahs, e kapwungala kahpwal wet ni elen popohl. Ma kitail kin akamaipene rehn emen riatail Kristian, kitail en pwoson oh kapakap oh “rapahki popohl,” oh medemedewe duwen mehn kahlemeng mwahu en Eipraam me kin kasalehda limpoak.​—1 Piter 3:10-​12.

17. Dahme kahrehda kitail kak nda me kapwungalahn nanpwungsuwed me wiawi nanpwungen Pohl, Parnapas, oh Mark wiawihda ni elen popohl?

¹⁷ Medemedewe iaduwen atail kin kapwaiada koasoandi kan en Kristian ni pwoson pahn kak sewese kitail en kasalehda popohl. Ni ahnsou Pohl tepida kariau en eh seiloak en misineri, Parnapas pwungki en pwurala rehn mwomwohdiso kan nan Saiprus oh Asia Minor. Ahpw, Parnapas mwahuki eh cousin Mark en iangirahda. Pohl sohte pwungki pwehki Mark pwurasang ira oh keseirahla Pampilia. “Akamai laud” wiawi, oh akamai wet kahrehong ira en tohrohrpeseng. Parnapas ahpw kahrehda Mark oh mwesellahng Saiprus, ahpw Pohl pilada Sailas oh “kotehla Siria oh Silisia, kangkakehlaka tohnmwomwohdiso kan.” (Wiewia 15:36-​41) Kedekedeo, e sansal me ira kapwungala nanpwungsuwed nanpwungara pwe Mark mih rehn Pohl nan Rom, oh wahnpoarono kin koasoi mwahu duwen ih. (Kolose 4:10; Pailimwon 23, 24) Ni ahnsou me Pohl selidi nan Rom mpen pahr 65 C.E., e padahkiong Timoty: “Mark en iang uhk kohdo, pwe e kak sewese ie nan ei doadoahket.” (2 Timoty 4:11) Pohl ni pwoson kin kapakapki irairen nanpwungen ih oh Parnapas oh Mark, oh met imwikihla popohl me kin pid “popohl en Koht.”​—Pilipai 4:6, 7.

18. Dahme imwikihla Iuodia oh Sindiki ara nanpwungsuwed?

¹⁸ Pwehki soh-unsek, “kitail koaros kin kalap sapwungala.” (Seims 3:2) Nanpwungsuwed pwarada nanpwungen Kristian lih riemen, me Pohl ntingwong: “Iuodia oh Sindiki, kumwa en miniminpene nanpwungamwa duwehte pirien ehu rehn Kauno. . . . I anahne komwi en sewese lih riemenet; pwehki ara iang ie doadoahk laudki ara lohkiseli rongamwahu.” (Pilipai 4:1-3) Kitail kak kamehlele me lih riemenet en Koht kin kapwungala arail kahpwal ni elen popohl ni ara kin kapwaiada kaweid me ntingihdi nan pwuhken Madiu 5:23, 24. Ma kitail pahn kapwaiada mouren kaweid en Pwuhk Sarawi, met pahn kak kahrehong popohl en mie.

Pwoson kin Sewese Kitail en Dadaur

19. Kahpwal dahieu sohte kawehla pwoson en Aisek oh Repeka?

¹⁹ Ma kitail ahneki pwoson, kitail kak dadaurete mendahki kahpwal. Ele mwein kitail kin pwunodki emen nan atail peneinei me papidaisla ahpw e sapeikiong Koht ni eh pwoudki emen aramas seupwoson. (1 Korint 7:39) Aisek oh Repeka inenen nsensuwedki neira pwutak Esau me pwoudikihda lih akan me sohte kin pwoson Koht. Ah pwoud mehn Hittite kan kahrehong en Aisek oh Repeka “ara nsensuwed mehlel”​—uwen laud en Repeka eh nsensuwed, e kamwekid ih en nda met: “I inenen tihwohkilahr en Esau eh pwoud kan, lihen liki kan. Ma Seikop pahn pwoudikihda emen soangen lih pwukat, me pwilidak en Id, eri a, ihte me mwahu, I en mehla.” (Senesis 26:34, 35; 27:46) Ahpw, kahpwal wet sohte kauwehla pwoson en Aisek oh Repeka. Eri, kitail en kolokolte pwoson kehlail ma kahpwal akan kin mwomwen apwal ong kitail en powehdi.

20. Ni ahl dahieu me Naomi oh Rud kasalehda pwoson?

²⁰ Naomi, emen liohdi en Sudia mahlahr men, me kin wehwehki me pahn mie lih en Suda me pahn kaipwiehdi seri ohl me pahn wia papah kalap en Mesaia. Ahpw, pwehki nah pwutak kan mehlahr oh sohte neira seri oh pein ih sohlahr kak neitik, e pahn apwal ah peneinei en iang wia pahpa kalap en Mesaia. Ahpw, Rud, serepein me pwoudiki nah pwutak ahpw wiahla liohdi men, ahpw uhd pwoudikihda ohl mah, Pohas, oh e neitikiedier pwutak emen, me wia pahpa kahlap en Sises, Mesaia! (Senesis 49:10, 33; Rud 1:3-5; 4:13-​22; Madiu 1:1, 5) Pwoson me Naomi oh Rud kasalehda kin kahrehong ira en dadaurete mendahki kahpwal akan oh met kin kahrehdong ira peren laud. Kitail pil pahn kak ahneki peren laud ma kitail pahn kolokolete atail pwoson mendahki kahpwal akan.

21. Dahme pwoson kin wiaiong kitail, oh dahme kitail anahne nantiong en wia?

²¹ Edetehn kitail sehse dahme pahn wiawihong pein emen emen kitail ni rahn kohkohdo kan, ki pwoson kitail kak powehdi kahpwal akan koaros. Pwoson kin kahrehong kitail en eimah oh kanengamah. E kin kihong kitail mehn akadei me keieu mwahu oh mour katepe ieu. Pwoson kin kahrehong kitail en ahneki nanpwungmwahu rehn aramas teikan oh dadaur mehndahki kahpwal akan. Kitail en wiahla soangen aramas akan me kin “pwoson oh aleier komourpatail.” (Ipru 10:39) Kitail en pousehla kakehlahda atail pwoson ki manaman me kin kohsang rehn atail Koht limpoak, Siohwa oh kitail en kapinga ih.

Iaduwen Ke Pahn Sapeng?

• Mehnia iren Paipel kan kin kadehde me pwoson kak sewese kitail en eimah?

• Dahme kahrehda kitail kak nda me pwoson pahn kak kahrehong kitail en ahneki mour katepe ieu?

• Iaduwen pwoson kin kahrehong popohl en mie?

• Mehn kadehde dah kei mie me pwoson kin sewese kitail en dadaur mehndahki kahpwal akan?

[Kilels nan Pali 14]

Pwoson kin kahrehong Noha oh Enok en eimah kalohkiseli sapwellimen Siohwa mahsen akan

[Kilels nan Pali 15]

Pwoson me Moses kin kasalehda kin kamwekid kitail en akadeiong mehn akadei ngehnin kan

[Kilels nan Pali 16]

Mehn kamehlele kan me kin kohsang rehn Koht kin kakehlahda pwoson en Parak, Depora, oh Kideon